صريخ على الموظفيين

[ايه احبك]

سلام عليكم

تعبت واالله تعبت
كنت وايد زينه وياهم وماحب احد ياخذ عني فكره مب زينه ولا يكرهني ابد ابد ابد
لا حب الصريخ ولا احب اهدد.... اعرف انه مب اسلوب الليدر شب لنه اسلوب مب مستخدم بين البشر يستخدم بين الحيوانات

من الأخير
اليوم صرخت على موظفيني غصبن عني والله والله اليوم اول مره اصرخ عليهم واحد ورا الثاني جنه يتريون الي بعده والي بعده يحصل رزقه مني وصيحت واحد من الموظفين بسبت الصريخ احس اني شريرة والله والله ما كنت ابا اتبع هالاسلوب بس شو اسوي اذا ما اتبعته ما بيبون لي الشغل الي اباه

وفعلا بعد هالصريخ يابلوي شغل مال اسبوع في يوم :S بالاصح في 3 ساعات :S

حد ينصحني خاصه اني اعتبر عمري قليلة خبره في التعامل مع الموظفين الي تحتي
PS:اتعلمت من هالدنيا انه شي اصلا مب حلو كثر اسمه وشكله ... وايد ظايجه

ولحد يقول الدراسه تساعد في الليدرشب لنه الدراسه غير عن الخبره بوايد

[المنصوري]

امممم وعليكم السلام ورحمة الله وبركاته

شو دارسة انتي قبل ؟

نوعية الدراسة اتوقع لها دور كبير في كيفية التأقلم على بيئة العمل ( تساعد على التأقلم ) مع انه النظــري جداً يختلف عن العملــــي ’’
من خلال تجربتي .. المنجر الناجح يباله خبـــرة ,, ومن الغلط انك ترى اتكون منجر من البداية بليااا خبــــرة ’’
فيه قرارات ممكن ترفعنا فوق واتخلينا مسؤولين عن دائرة\شركة\مؤسسة... إلخ بس لازم نعرف من البداية هل نحن ممكن ننجح في هذا المنصب .. أو هل نحن بالأصح نمتلك الصفات المثالية لهذا المنصــب ؟!
نصيحتي /// التدريخ في المناصب

موفقة خيـــر business woman

مــنــ9ــوري
كان هناااا

[ايه احبك]

امممم وعليكم السلام ورحمة الله وبركاته

شو دارسة انتي قبل ؟

نوعية الدراسة اتوقع لها دور كبير في كيفية التأقلم على بيئة العمل ( تساعد على التأقلم ) مع انه النظــري جداً يختلف عن العملــــي ’’
من خلال تجربتي .. المنجر الناجح يباله خبـــرة ,, ومن الغلط انك ترى اتكون منجر من البداية بليااا خبــــرة ’’
فيه قرارات ممكن ترفعنا فوق واتخلينا مسؤولين عن دائرة\شركة\مؤسسة... إلخ بس لازم نعرف من البداية هل نحن ممكن ننجح في هذا المنصب .. أو هل نحن بالأصح نمتلك الصفات المثالية لهذا المنصــب ؟!
نصيحتي /// التدريخ في المناصب

موفقة خيـــر business woman

مــنــ9ــوري
كان هناااا

صح الدراسه لها دور والحمدلله احس 85% من الي دارسته يتماشى في المكان الي انا فيه
الخبره في التعامل مع الموظفين هو الي نحتاج تدريب فيه او نكسب خبره فيه

انا الحمدلله احس عمري اقدر اوجهم اساعدهم احفزهم لكن اضغط عليهم بصريخ هذا ما حبه ولا احب اتخذه لكن اليوم انجبرت لنهم عاديييني زميلتهم اكثر من مديرتهم لني كنت سويت اند نايس الحين يه على راسي هالسويت اند نايس
وبعدين الي فوقي راعي الخبره بعد يتخذ نفس الاسلوب وياي وانا انتقد هالاسلوب عشان جي ما بي اعامل الي تحتي نفس شي ...

شكرا لوجودك هني منصوريي وشفت التنقيعه االمتعمدة

[تحفه]

احيانا الصريخ مطلوب ... الناس مختلفه ويايين من بيئات متنوعه تحسين حد من نفسه يحشم نفسه وحد ما يمشي ويصطلب الابالعين الحمرا

الله يوفقققققج (k) وهالنصيحه الوحيده الي عندي

[تحفه]

صيييييحتي واااااااحد! o,0

[حبوبه دبي]

سـلاام !

احم أكيــد الدرااســه والخبره تلعب دوور كبيــر في التعــامل مع المـوظفيــن ،،

يمكــن انتــي غلطتي من البداايـه وعـاملتييهم معــامله المـوظف و المـوظف ،، هالشي الحلـو بس بعـد لازم اتسـوين حـد وقت الشــغل شغل !



بس نصيــحتي لــج عــاملي النــاس شــرات مـا تحبين النــاس يعــاملــونج

مـاتوقع انه فــي شخـص يحب اي شخــص يصــرخ فـ ويهه !

هممم

الحــلو الـواحد يعتذر ويصلــح غلطـتـه و في نفس الوقت فهميــهم بطريقــه حلـوه عشـان مـا تنعـاد السـالفه

كـوني جــاده و حبــوبه فـ نفس الوقــت



ولا اظــايجيــن بـ عمرج !

والسمــوحه



.

[مناير]

مرحبـــااا

فالبداية أحب أقول الله يعينج ويقويج على هالمسؤولية

في شي ثاني يمكن أنا ما يربته بحكم اني بعدني طالبة في Grade 10

بس من خلال اخواني وخاصة ختيه رئيسة قسم قالت المفروض الواحد يتعامل من البداية

مع اللي يشرف عليهم بالتعامل الراقي لكن وهاي أهم شي في حدود عشام كلحد يعرف التزاماته

وحدوده

لانه في النهاية انتي ينفرض عليج شغل معيّن لازم اتسويه وفي نفس الوقت تفرضين عليهم شغلهم

والمفروض هم ايقومون به وكلحد حد لازم يتحاسب على تقصيره لأنه في النهاية منو بيكون في الويه إذا هم قصّروا

فشغلهم انتي وبتتحاسبين على انج انتي المقصّرة

أنا أقول انتي ما غلطتي ابد ابد ابد ( إحذر الحليم إذا غضب ) كنت زينه وياهم بس هم صدّقوا ارواحهم

شوي وهذا يزاهم، يمكن العتب على الصريخ فقط لا غير، بس صدقيني ما بيعيدونها مرة ثانية وبيصطلبون بعد

وصدقيني بيحسبون لج ألف حساب

بس انتي بعد لازم اتحطي النقاط ع الحروف ( الشغل شغل ) وكلحد يلتزم به

سوري طولت في الرمسة بس صدقيني ها عن تجربه شايفتنه .....

ربي يوفقج

DONT WORRY

[الهيثــم]

في البدايـة إختي إيه أحبك الله يعيـنج على المسؤوليــة .. ويقـويج ..

أول انطباع ياخذه الشخص عنك جميل ، وهو الي بيحدد طريقة تعامله معك في المستقبل
على سبيل المثال في حالتج ، من البداية يمكن هم حسوا إنج من النوع المتساهل ، والمتسامح ، وللأسف كان المفروض ما يستغلون هالطيبة والتسامح بشكل خاطئ عشان ما ااتكون العاقبة عليهم ، وفي نفس الوقت ما يخترب عليهم جو العمل الرائع الي يسوده التعاون والمودة .. استغلوا طيبتج معاهم بالإهمال ..

حلـو إنهم حصلوا درس ع الخفيـف .. وحلاة الآدمي سهل وصعيب ..
مرة تشدين ومرات ترخيين .. وبهالطريقة الحياة تمشي ، في كل الامور مب بس العمل والقيادة . .

انا تعلمت شي من الوالد ، ما شاء الله عليه من النوع إلي إذا قال شي ما يقوله بـ زعيج ولا صراخ ، وفـ نفس الوقت قراراته لها هيبة وكلمته لازم تتنفـذ ، بحكم إني شفــته في مجـال عملـه كيــف .. وهالشي ما حصله إلا بطيب تعامله مع النـاس وحب النـاس له ، وإنه يسمعهم إذا عندهم مشكلة ويساعدهم ، فـ النتيجة اتكون إنه إذا قال شي ، كل إلي تحته يسوونه من طيب خـاطر ..


عمـوما إختي القيادة مسؤولية ، ومب كل حد يقدر عليها ، ومب كل حد يحبها ، في ناس ما يحبون يتحملون المسؤولية ولا يصدعون راسهم ..

وربي يوفقج إن شاء الله ويعينج

~

خــّطاب

[طفلة من هذا الزمان]

ايـــه أحبك،، صيحتي وااااحد ؟!! مب غلطة مطبعيه يعني ؟!!
أفضل تفنشونـــه
المهم ،،
خبرتي كانت بسيطة و لمدة محدودة اكتسبت منها خبرة إدارية و خصوصا في إدارة فريق العمــل ،،
أعتقد - و correct me if I'm wrong - أسلوبج النايس و لسويت كان steady أقصد كنتي من البداية تعاملينهم بهالأسلوب و تميتي على وتيرة وحده ما اختلفت هالوتيرة ، وطبعا هي اللي حطتج في الموقف اللي انحطيتي فيه ،،
.
.
بس لا مــانع من بعض الشــدة أحيانــا .. مب غلط .. مب ضعف .. بس ممكن إشاره لهم .. احذر الحليم إذا غضب ..
لتصحيح الأوضــاع عندي نصايح بسيطه فــادتني جدا ..
1- كـوني واضحه في اللي تبينهم يسوونه و منو بالضبط اللي بيسويه .. يعني مافي مجـال ينقال لا ما قلتيلي و قلتي لـفلان ..
2- تــابعيهم during the process .. اطمني من وقت لوقت وين واصلين فهالشغله و شو اللي تاملهم يسوونه
3- Deadlines وااايد مهمه .. طبعا فترة انتي تشوفينها كافيه يخلصون الشغل و فترة تكفيج انتي تطلعين ع الشغل و فترة لين ما تقدمين الشغل
4- اذا تعدوا الديدلاين ممكن تفكرين بعقوبات بسيطه ..وبالمقــابل طبعا اذا خلصوا ع الوقت المحدد ، ممكن تفكرين بطرق مكافأة بسيطة .. كلمة شكرا أحيانا تكفي .. و ال recognition مهم جـــدا ،في اللقاءات الدورية ، في الاجتماعات ، أي فرصة ممكنه و جدام ناس لأن بني آدم يحب المديح ، بس طبعا بدون مبالغه ..
5- أهم شي على الاطـلاق .. الcommunication channels .. كوني متواصله وياهم أول بأول .. عن طريق الإيميلات ممكن أو بعض الدواير عندهم البوب أب مسج أعتقد ..
والألفـــــــــة اللي بينج و بينهم بترجع مع الوقت .. بابتسامه .. بترحيب .. بسلام حار .. بكلمة طيبة .. لا تضايجين يعني
أتمنى أكون فدتج بشي ،،
وموفقــة خير ياختي ،،
طفلـــة

[ايه احبك]

فعلا يا تحفه ما فاد فيهم الا الصريخ صاروا يشتغلون او يسون الي اباه بدون ما اذكرهم ... لوول اتصدقين هيه لوول لهدرجه هو حساس قصدج O-o
---
وعليكم السلام حبوبة دبي المشكلة اني امتلك الدراسة لكن الخبره افتقرها وايد وصدقيني بتطبيق الواحد يعرف يربط الدراسة بالتطبيق لنهم مختلفين .. انا صح ما حب اتعامل بهالاسلوب او حد يعاملني بهالاسلوب بس الي فوقي يعاملوني بهالاسلوب اذا احبه ولا ما احبه انا اليوم اعتذرت على انه سمعوا حسي في المكان بس ما اقتنعت المدير يعتذر عشان دسبلن ..... شكرا فديتج وايد استفد يا عمري من كلامج ^-^
---

منااااير دوووم اشوف نك نيمج ما توقعت انج كنز XD وايد استانست اني شفت ردج حتى لو كنت ما اختبرتي الشي بنفسج ^-^ كلامج صح لكن شي اذا حاولت اكون سيريس دوم ما افلح لنه بطبيعتي اضحك واسولف واعامل الكل مثل اخوان و خوات لكن هذول اتحروا اني ما حاطه اعتبار لأداءهم الحمدلله مريت في هالتجربة ..شكرا حبيبتي على نصيحيتج ودوم طولي XD
----
هلا خطاب فعلا اعجبت بشخصية ابوك الله يخليه لكم ويحفظه المشكله السن يلعب دور لنه مهما كان دوري ومكانتي في الدوام بعد ستل فيني بارت الفرفشه ابي اضحك وياهم واسولف عادي بدون حواجز نفس المدراء الي فوق راسي
الحمدلله انه النتايج اليوم بينت اني ما غلطت XD شكرا خطاب على النصيحة والله استفدت ^-^
-----
نور الموضوع بطفلة ^-^ لوول لا مب غلطه مطبعيه اتصدقين شكيت فيه لوول هذا 90% الشغل على راسه اذا فنشته افضل افنش عمري وياه لوول
اليوم سويت كل الي قلتيه بنسبه للوضوح كتبت لهم ايميل اوضح لهم ماي ريولز اند ريجليشن عشان ما يقولوم ما قلت ولا سويت و المتابعه كنت من زمان اسويها بس قبل كنت اسكت عن الأعذار الحين اقولهم ابا شغل مب مسموح لأي عذر وبعد عطيتهم ديدلين مثل قلت لي وشكرت هم على الي يابولي سو فار وباجر ناويه اعزمهم هلى ريوق عشان يخف جو التوتر الي خلقته هاليومين ..
وااااايد شاكره لج ماشالله كل الي قلتيه طبقته وحسيت اني مرتبه ^-^


الحمدلله على كل حال
اشكركم اخواني وخواتي

[مجموعة إنسان]

اناا معااااااااااااااج لازم بالقوة

اذكر واااحد اعرفه قبل فتره كانت عنده قهوة
كل شهر يطلع العمال برع القهوة ويقول للأول انت جي جي جي غلطت
يقوله العامل ايوة
ويعطييييه كفففففف
ويكمل عليهم كلهم جييي ,,,


ما ايون اللا بالعين الحمرااا ,,, لازم واحد يهزبهم
صح بدلعهم بس لازم الهزااب ويعرفون ان في حد فوقهم

خلييج قوية ولا تستوين بارده معاهم

[ايه احبك]

بلاا عليك كف مره وحده وين حقوق الانسان o.O
لووول عاد قالوا بالقوه مب بالكف لوول بعدين يتحول لشووت لووول ولا بعد يعزمه على الكوفي
صح الواحد لازم يشد ويرخي وان شالله ها بيكون اسلوبي وياهم من اليوم
مشكور مجاميع XD

[مجموعة إنسان]

عيل لاتشوفين ابوي يوم يتعامل مع المهنده اللي بكفالته !!! هههه

[ايه احبك]

وي اميييييي ليكون ابوك الي صفعهم في الكوفي O-o

[أنامل قلب]

ما شاء الله الجماعه كفو ووفو ، واظن انج ماشيه بشكل سليم + تراج قاعده تكتسبين الخبره =)



{ موفقه دائما ~ ..