<font color='#000000'>هاي القصة منقوله قريتها وعيبتني وقلت لازم احطا الكم عسى انها تعيبكم ...............
في جامعة الامارات بالتحيد في الكوفي هاوس.. البنات يالسات على الطاوله دخلت عليهم حصه ومعاها كيسه ....
حصه: مرحباا بنات ... ايييييه بنات بنات.....!!
لطيفه: هااااه شعندج ..
حصه: مالت عليكم انا يايبه لكم شي وايد حلو واااااااااااااااايد..!
فطوم : شوووه؟ قولي عااااد.
حصه: يايبه شريط عرس ولد يراااناااااااااااا وفيه كل المزاييين.
لطيفه: قولي والله .................. يالله نروح نشوفه.
فطوم: يا الله بسرعه قبل لا يخلص البريك.
حصه: أوكيه بس .. وين بنشوفه ؟؟
فطوم :في الااابات.!! لاب 25 فاضي دوم البنات يشوفون اشرطه هناك..!!
لطيفه : سلامي ع فطوم اللي عندها العلوم كلها .
قطوم: عيل شو تتحرييني خديه شرااتج.؟
حصه: أوكيه فكونا عاد ويله نشن .
وقاامن البنات بيروحن الااابات عدا ظبيه ربيعتهم اللي كانت ساكته طول الوقت ..!!
لطيقه: ظبيوه؟؟!! ليش يالسه مابتروحين ويانا .؟؟
ظبيه: سمحوا لي بنات تعبانه ومالي بارض.!!
حصه: شو تعبانه.. حرام عليج نشي شوفي الشريط معانا..
فطوم: يا الله عاد ظبيوه لا تخربين علينا نشي خلينا نستانس.
ظبيه: ادريبكن ما بترحمني .. بس عندي كلاس بعد نص ساعه يعني ما بطول ورايه درب المخج .
وراحت الشله(حصه,فطوم,لطيقه,شمه, حمده وظبيه)الابات وسحبن الكراسي وشغلن الشريط ويلسن البنات يشوفون الشريط وكان العرس واايد حلو واللي فيه احلى
فطوم: بنات بنات.. شفتن اللي لابس كندوره كركميه.. عنبو محلاته ..
لطيفه: هييييييييه ماشاء الله عليه غاوي.
فطوم: غاااوي إلا يهههههههههبل.حصوه منو هذا؟؟
حصه: واحد من رواعي المنطقه الغربيه.
فطوم : حصوه عيال بن صويلح ظاهرين في الشريط؟
حصه: لا مايو العرس كانوا رايحين عرس في الهير .. مع ان يايبين فرقة بوصلاح.
وكملن البنات تعليقاتهم ..على منو هذا وطاعوا هذا ..ومن وين فلان وكيف يرزف ومحلاته .....الخ
ظبيه ملانه ومالها خاطرلشي وفجأه شافت واحد إيبس عند الكميرا ويلست اتشوفه.. عيبها وايد وحركانه حلوه وهو يرزف ومر الوقت..
فطوم: ظبيوه ماعندج كلاس الحين؟؟
ظبيوه: هيه بس الظاهر اني بطنش المحاظره.
ويضحكون البنات ويكملون شوفة الشريط............ غنت الفرقة اغنية عيضه.(أهمه) نشو الشباب كلهم يرزفوون وظبيه بتمووووووت وتعرف منو هذا اللي يرزف.
ظبيه:حصوه منو هذا؟
حصه: أي واحد.؟
ظبيه: اللي لابس سفره حمرا هذا اللي يرزف مع اللي طاوي السفره..
حصوه: أوووه هذا سعيد.
ظبيه: شو جبيلته؟
حصه: رميثي.
ظبيه: ماشاء الله عليه واايد يرزف حلوووووووووو .
حصه: لا تتخبرين ما شالله عليه حتى هوه حلو
فطوم: لازم رميثي الحلاة إلا من عقبهم
ومر الوقت وخلص الفلم ونشن البنات وراحن البنات الكوفي وظبيه بعدها اتفكر في سعيد اللي سحرها برزفه وحركاته..كانت سرحانه ومب حاسه بعمرها.
لطيفه : ظبيوه..ظبيوه.. شوما بتروحين البوابه؟ وإلا بتيلسين مع البنات لين الساعه 8 شرات كل يوم ثلاثاء.. التيووس دي مال البنات؟
ظبيه: لا لا بروح البيت تعبانه ومالي خاطر بصراحه.
وقامت ظبيه ولمت كتبها وشلت شنطتها.....
ظبيه: بنات حد منكن عندها شريط عيضه اليديد؟
فطوم : لا ما عندا روحي عند هاذيج الشله يحطون عند طاولتهم فوق الست مسجلات وكل الاشرطه تقولين تسجيلات واكيد بتحصلينه عندهن .
وراحت ظبيه صوب الشله وحصلت الشريط عند روضه وظهرت من الكوفي رايحه صوب بوبة العين وهي تسمع اغنية عيضه اهمه وكل ما تخلص الاغنية تعيدها من اول لين ما وصلت البوابه وراحت البيت وهي بعدها تفر في سعيد الرميثي وهو يرزف ع الاغنيه.....
***
ــــــــــــــــــــــالب يت ـــــــــــــــــــــــــ ــــ***
سلامه:ظبيوه شبلاج من ييتي من الجامعه وانتي يالسه في الحجره وتسمعين عيضه.
ظبيه:مابلاني شي شفت اليوم شريط عرس يهبل .
سلامه:قولي والله شو حلو؟
ظبيه: لا تتخبريبن.ز إلا رهييييييب. فطوم ماتت ع واحد من المنطقه الغربيه.. بتموت وتعرف رقمه..!!
سلامه : فطوم امبونها رمسه لكن ادريبها مابتتصل به.
ظبيه: بس بصراحه العرس وايد حلو فيه واحد اسمه سعيد الرميثي من رواعي السمحه.. ماشاء الله عليه وايد حلو.. والله ايخليه لهله.
سلامه: وين مستوي العرس؟
ظبيه: ما اعرف والله صبري بتخبرفطوم.
وخذت ظبيه تيلفونها واتصلت حق فطوم ربيعتها الروح بالروح...
فطوم:ألوووووه مرحبا السااع ..هلا والله بهل الطويه ..............
ظبيه: هههههههههههههههههههههههه ........... هلا والله علومج..؟
فطوم: طيبه.. هاه شوه في خاطرج؟ توني امفارقتنج!
ظبيه: بسم الله منج ..أنا الغلطانه إني دقيت لج يله باي .
فطوم: حووووووه شعندج مره ماصدقتت البنت ...ظبيوه ليكون تيلفونج ما فيه رصيد ... الله ايعيني عليكم قوم البطاقه المدفوعه ..............
ظبيه: مالت عليج ..... يحيني أنا قوم بطاقتيه مدفوعه و مع هذا اتصلبج و انتي يا راعية الخط ما تتصلين ............ المهم وين مستوي العرس الي شفناه في الجامعه ؟
فطوم : ليش يعني .............. شي في خاطرج
ظبيه: لا ماشي بس سلامه تبا تشوف الشريط ..
فطوم: سلامه..ممممممم ما ادري والله بس اعتقد انه في سويحان.
ظبيه: اوكي خلاص يله باي جلبي بويهج.
فطوم: هههه باي
و قالت ظبيه لسلامه تيب تيلفون البيت وراحت سلامه ويابت التيلفون لين الحجره واتصلت ظبيه حق البداله وخذت رقم استيديو الوسام واتصلت به لكن ما حصلت الشريط العرس عندهم وعقب اتصلت حق مركز التسجيل وحصلت الشريط وطرشت الدريول وعطته فلوس عشان اييب لها الشريط.....
تمرر الايام والشهور وظبيه بعدها اتشوف الشريط وتتذكر سعيد الرميثي في كل لحظه.. ماكانت تقدر تنام لين ماتشوف الشريط وحفظت شكل سعيد.. ... ... وتمر الليالي ويهل عليهم العيد
سلامه: ظبيوه خلصي بسرعه.. ابويه وحميد وخليفه بيون الحين من الصلاة وانتي بعدج ..
ظبيه: صبري هاذوه خلصت شوه بلاج كنت اتعدل..
أم ظبيه: سلامه .. سلامه ..
سلامه : لبيه امايه ..
الام: ظبيه ليش فاجه شعرج الحرمات بياكلونج وبيضربون بعين..روحي لميه...
ظبيه: حرام عليج امايه .. امس بت عند الافراح اعدل شعريه واتكشخ والحين تقول لي لميه ..
الام: لا حوووووول.... بس لاتظهرين جدام الحرمات بشعرج ............
... يلست ظبيه اطرش مسجات حق ربيعاتها واتصلت بها فطوم وقالت لها انها بتيها البيت .. وراحت عند امها في الميالس ..و كانت امها ماسكه المدخن تتدخن .....و قالت حق امها ان فطوم بتيها
ظبيه: امايه عطيني المدخن بتدخن ريحة عودكم حلووووه .........
ام ظبيه: ظبيوه عقب ما تتدخنين وديه صوب الممر وخليه هناك ايفوح عالريايل اول حدرتهم..
ظبيه: ان شاء الله امايه ..
وراحت ظبيه و حطت المدخن عالطاوله في الممر .وفجأةسمعت صوت حد يقول ..هوود .... هووود.. ويوم لفت ويها وقف قلبها يوم شافت الي رمس ...... كان سعيد الرميثي و من الصدمه ما عرفت شوه اتسوي و نست انها بلا شيله و عباه ...... طاحت عينها في عينه.. وتصنم الريال من حلاتها .. ما كان ايريد ايشوفها بس ما قدر ينزل عينه من حلاتها.. فجاه ربعت ظبيه وسعيد ايطالعها و يشوف شعرها وراها كان فخاطره ان يمسك شعرها .... حس ان عيونها فيهن شي غريب ... بعدين دخلت عليه امها و رحبت به وقربتبه في الميلس
ظبيه :سلالالالالالالالامه .... سلالالالامه ..
سلامه : هاا بلاج ..
ظبيه: بلاني .. لحقيني .. سعيد الرميثي في بيتنا .
سلامه: منوه سعيد هذا بعد ..؟؟
ظبيه: اللي شفناه في الشريط مال عرس سويحاان..
سلامه:.. قولي و الله ... هذا كيف ياااااااا بيتنا .....
ظبيه: ما ادري والله اني ما اعرف ما ادري ..... بس و الله انصدمت يوم شفته
سلامه: ظبيوه .... بس لايكون شافج؟
ظبيه : لالا ما شافني ....... بروح اتصل بفطوم.
جذبت ظبيه ع اختها وماقالت لها ان شافها سعيد ما عرفت ليش بس حست انه احسن ان سلامه ما اتعرف ...... اتصلت بفطووم وخبرتها كل السااالفه
طلع سعيد من بيت ظبيه.. وهو يفكر بالغزال اللي شافه ..... مب امصدق انه في انسانه ممكن اتكون حلوه لهدرجه ... ما قدر سعيد ينام ذك اليوم ..... كل ما اتخر عينه يتذكر ظبيه و حلاتها لدرجة انه صار يتخيل انه يلمس ويها ..... يلمس شعرهاااااا .... حاول انه يتخيل غزالت احلامه و هي تظحك ..... و هي ترمس ...... و هي نايمه ......
في المركز الدولي في العين..الشباب متيمعين هناك...
علي : هلا بو عسكور وين محد يشوفك؟؟..
سعيد: والله الا في الدار ............. انته عولمك..؟؟
علي: تمام .. هاااه شبلاك ..؟ تعبان .. .؟
سعيد: آااااااااااااه.. يا علي لو تدري بحالي جان عذرتنيه ..
علي : رب ما شر بو عسكور..
سعيد:
بان الفجر واسفر علي ساهر الليل..
وأنا الذي من طل ليلي أعاني..
كله سبب سود العيون المظاليل..
ذاك الغزال إللي وداده شجاني..
فزيت له واقف على حسن تدليل..
وصغيت القوافي ثابته من زماني..
عيني يشوق لها حسين التعازيل..
اللي كساه الزين بين الغواني..
خده كما البراق لو جابع بشيل..
والعنق عنق اليافلي الدماني..
والعين تعشق فايج الزين وتميل ..
ع ما يحب القلب في كل شاني...
والشعر طايح على المتن ويميل..
يسعدك شوفه بالصدفه لو ثواني..
.... .. .. . آااااه ياعلي..
علي: أفاااااا و الله يا بوعسكور ........... من ورايه..؟
سعيد: والله ياعلي من يوم شفتها وانا ميت عليها ...
علي: انزين عااااد منووووووووه؟؟
سعيد : ما اعرف اسمها بس هي أخت خليفه الظاهري..
علي : أي خليفه..؟
سعيد : خليفه.... ربيعنا اللي في فلي هزااع..
علي : قول والله .. انزين ... انزين تعاااااال .. انته وين شفتها .. ؟
و قال سعيد حق علي كل شي استوى يوم العيد في ميلس قوم خليفه
علي : ما يهمك بوعسكور .... حلك عندي .... انته عطني بس يومين ...
سعيد : علي شوه بتسوي .... ايه لاتفظح البنت تراها خت ربيعي .....
علي :افاااااا عليك و الله ... بس كنت اريد اييب الك معلومات عنها ....
سعيد: كيف ..؟
علي : اعرف وحده من فلي هزاع بتخبرها عن هالبنت ...
سعيد :بس انا ما اعرف اسمها
علي : عادي .... و رفجت بوخليفه لاظويلك الاسم و الرقم ان بغي
علي يتصل حق ربيعته ........
علي : مرحبا بج الغاليه.. شحالج ..؟
روضه: هلا والله بهالصوت غريبه متصل ..؟؟
علي : والله كنت شوي مشغول..
روضه : يا الله الحمد الله سمعنا صوتك..
علي : أقول أأأأأ....
روضه : هاا شو أطلب ..
علي : أباج تسألين عن وحده من فلي هزاع ..
روضه : والله بنات فلي هزاع وايد وانا اشدراني منوه اللي تباني اسأل عنها ...؟؟
علي : بعطيج أسم أخوها ..
روضه : أوكيه شو اسمه؟؟
علي : اسمه خليفه بن فلان بن فلان الظاهري ..
روضه : شوه هاي وحده يديده تبا تتعرف عليها..؟
علي: ههههههههه.... .... أفااااا انا اتعرف ع بنات.. حبيبي حبي الاول نعم انته ولا غيرك.... مكانك داخل فوادي ولاحد حاز تقديرك .. أنا احبك أنا ودك ....
روضه : ههههههههههههه بسك ... ادريبك .. دهااان سير هااااه..؟
علي : شو الحين بتسألين وإلا لا ..؟
روضه : أوكيه الغالي بسأ ل تآمر بشي ..
علي : لا سلامة راسج .
روضه : بتصل لك أنا مع السلامه ..
علي : تسلمين .. مع السلامه
ظبيه: صباح الخير امي
الام: هلا بنتي ها متى بتردين اليوم من الجامعه
ظبيه:مادري يوم بخلص بتصلبكم مع السلامه
الام: الله وياج ويوفقج
في الطريق ظبيه وسلامه مع الخدامه والدريول رايحين الدوامات
سلامه: ظبيه بلاج ساكته
ظبيه: مادري خطر في بالي سعيد الرميثي
سلامه: الله الله عالصبح شو الظاهر قمنا نحب والله عجيبه
ظبيه: ههههههههههه سلامه نزلي يالله وصلنا مدرستج
سلامه وهيه تظحك: ..فكري فكري بسعيد مالج
ظبيه وسلامه : ههههههههههه
تنزل ظبيه وادش الجامعه وتمشي رايحه الكوفي هاوس وتشوف ربيعاتها كلهم على الطاوله
ظبيه: صباح الخير...شحالكن بنات ..عساكن بخير
حصه + لطيفه + فطوم + شمه + حمده: صبااح النور
فطوم :هاظبيه اخبارج؟؟؟
ظبيه: تمام
فطوم: هاعندج كلاس الحين
ظبيه:هيه عندي في مخج بس عقب نص ساعه
فطوم :انزين انا رايحه
ظبيه: لحظه لحظه بوصلج كلاسج
ظبيه وفطوم يتمشون رايحين مبنى 66
فطوم: بلاج احسبج تبين تقولين شي
ظبيه : ماادري احس اني احبه
فطوم: اهااااااااااا منوه
ظبيه: سعيد الرميثي
وتبى فطوم ترمس وتقاطعها ظبيه وتقولها اشوفج بعدين باااي.
سعيد في الدوام وتفكيره كله في الملاك اللي شافه
وتمر الثواني واللحظات والساعات
ويرن تلفون سعيد..وحاط نغمه (( وش الذي عيني تشوفه ..وجه القمر اومطلع الشمس))
ويرد سعيد: ألوووه....
علي : هلا مرحبا الشيخ ...
سعيد : عقب .. عقب سلم عليه الحين قول لي شو سويت...
علي : مب قلت لك قبل أعجبك أنا افا عليك ...
سعيد : قول لي يا الله عااااد ..
علي : أسمها ظبيه وتدرس في الجامعه كلية علوم أنسانيه و الاجتماعيه... و ... .,,, و ,,
هي اكبر وحده من البنات و عندها اخت بس صغيره .. يعني بنت مداارس .. الخ
وقال علي حق سعيد عن كل شي ..... ...
سعيد : فديت اسمها انا والله انها ظبيه ...ووالله اني احبها احبها ...
علي : يا الله عاد انته عليك الباقي .. انا اللي علي سويته ..
سعيد .. علي انته شو تقول ؟؟!!.. ... كيف تتوقع اني ممكن اغلط مع اخت ربيعي خليفه ..
علي : انا ما قلت لك أغلط معاها والحب مب عييييب ..
سعيد : عيب والله و اكبر عيييييب ........... ما ربينااا ع هالسوالف .
علي : عيل عن الحشره من شهر و انته حاشرنا واحبها ,...انزين ربك البنت تحب حد غيرك .. بعد انته غير شكل ...
سعيد : لا لاتقول جيه ان شاء الله لا .. بموت ... هي ذبحتني .. ونظرتها فيها شوق واشياء وايد والله يا علي .. احبها ..
علي : حوووووووووه .. يا ريااال شو انته صدق الظاهر تحب ..
سعيد : ما بيدي حيله يا علووه .
علي : لا انته قمت تخورها انا علوووه .. اصغر عيالك انا ..؟؟ يا الله اجلب بويهك انا بروح المقهى عند الشباب ,, ..
سعيد : اوكيه القاك هناك باي .
***ـــــــــــــــــالبنت ـــــــــــــــــــــــــ ــــــــ***
ظبيه يالسه في حجرتها وتسمع المسجل ..(لي صاحب خذني بزينه .. عن كل مزيون ورعبوب ..)..... .... وفجأة تيلفونها يرن ..
ظبيه : الوووه .
فطوم : الوه هلا ظبيوه شحالج ..؟؟
ظبيه : بصراااااحه تعبااانه .. !!
فطوم : أأ,,,,أوووه يضرب الحب شو بيزل ..
ظبيه : افطوم عن الغلاسه عاااد .. حسي .
فطوم : والله ما حبيت علشان احس ..
ظبيه : فطوم ... ... أحبه .
فطوم : جدييييييييييييييييييييييم ه من شهور وانتي تقولين هالكلام ..
ظبيه : فطامي حرام عليج عااد حسي فيه ... والله احبه .. وما ادري شو اقول لج ..
فطوم : ظبيووووووي ....
ظبيه : فطام حرام عليج لا تكسرين مياديفي ..
فطوم : لا فسفينه نحن .. عقلي .. شو بلاج الريال مب حاس فيج ولا يعرفج وانتي متعذبه ع الفاضي ليش ...؟ خلي عنج هالأفلام الهنديه وعيشي واقعج يا الهبله ...
وتدخل سلامه ع ظبيه وهي تكلم فاطمه ...
سلامه : ظبيه انا وامايه وحرمة خليفه وخالوه وبناتها بنروح نتمشى....... وعقب يمكن نظهر يا الله جان بتخاوييينا ..؟؟
ظبيه: لا مالي بارض .
فطوم : ظبيوه عيوني انا ببند عنج وانتي روحي خففي عن عمرج شوي روحي تمشي معاهن.. أحسن لج من الحكره في الحجره وسماع المسجل ..!!
\ظبيه : اوكيه فطامي برايج باي .
فطوم : يا الله بيباي.
.......
ــــــــــــــــــــفي العين مووووول ـــــــــــــــــــــــــ ـــــــ***
ظبيه:- سلامه مسكي عويش لا تخلينها تربع عنج..
عوشه:- عموه.. عموه... أنا اليد الوح الحمام..
ظبيه:- سلامه وديها الحمام..
سلامه:- شوه؟! بتبطي.. وديها انتي..
ظبيه:- يعنبلاء نفعج... عيل انتي ليش يايه ويانا؟
سلامه:- اريد اروح باريس غالري..
ظبيه:- مالت عليج.. اوكي انا بودي عويش الحمامات وانتي روحي باريش غالري وبلاقيج هناك..
سلامه:- اوكي..
مسكت ظبيه عوشه بنت خوها خليفه وراحت تدور عالحمامات وخطفت من جدام الكوفي وفيه شباب وايد.. استحت ظبيه من الموقف هذا على انها اتطوف من جدام الرياييل بس كانت مطره علشانها ما كانت تعرف مكان الحمامات.. وصدفه ان سعيد وعلي يالسين ويا ربعهم في الكوفي نفسه..
يوم خطفت ظبيه من جدام الكوفي علقوا عليها الشباب
قال واحد منهم:- يا ويل حالي انا.. فديت الي لابسه وردي والله..
في ذيج اللحظه التفت سعيد صوب ظبيه.. وحس بشي غريب صوب هالبنت المتغشيه.. هو نفسه ما عرف ليش بس حس انه ايعرفها.. يوم انتبه علي حق سعيد التفت هو بعد صوب البنيه المتغشيه وشاف عوشه في ايدينها وعرف انها بنت خليفه..
فقال حق سعيد بصوت واطي عشان ما يسمعونه باقي الشباب:- سعيد.. اتعرف هالبنت الصغيره؟؟؟
سعيد:- اي بنت؟!
علي:- الي تمشي مع هاي الطويله الي لابسه وردي..
سعيد:- لا ما اعرفها.. ليش تعرفها انته؟!
علي:- هيه هذي بنت خليفه الظاهري.. هل فلي هزاع..
سعيد:- قول والله؟! اوكيه يله نش..
علي:- حوووه وين بتروح؟!
سعيد:- يمكن ظبيه معاهم.. بصراحه انا فز فلبي يوم طافت هالبنت من عدالنا والله كنت حاس اني اعرفها..
علي:- سعيد عّين خير.. يمكن ما تكون ظبيه يمكن تكون حرمة خليفه..
سعيد:- ظنك؟؟! اوكي تعال ويايه انته بس.. شباب سمحولنا شوي وبنردلكم..
راح سعيد وعلي ورا ظبيه.. كانوا يلحقونها من مكان لمكان الين ما حست ظبيه انه حد يلحقها وما يتها الجراه انها تلف صوبهم علشان اتشوفهم.. بس حست فجاه ان قلبها انقبض وما تدري ليش.. واخيرا لقت ظبيه الحمامات.. ففتحت الباب حق عوشه علشان اتحدر.. وبصراحه كان ضاربنها فضول اتريد تشوف الي كانوا يلحقونها واستقلت فرصة انها كانت تفتح الباب ولفت بويها صوب سعيد وعلي.. وقف قلبها يوم شافت سعيد ومن الصدمه طاحت شنطتها .. فجاه وقف سعيد يطالع ظبيه فعرفها.. عرف انها الغزال الي طلع فجاه في حياته وسرق قلبه وكدر منامه.. وخت ظبيه صوب شنطتها وايديها ترتجف مب مصدقه.. معقوله؟؟! سعيد مستحيل.. ما اصدق .. يلست ظبيه تكلم نفسها وهي في الحمامات بعد ما دخلت عوشه الحمام..
علي:- سعيد.. حوه.. سعيد اشعندك؟!
سعيد:- هي والله والله العظيم انها ظبيه.. قلبي يقول انها ظبيه..
علي:- حوو عاد شعندك؟ بو عسكور جاد ما تكون ظبيه... لا تتهور.. حط الرحمن في صدرك وخلنا انرد عند الشباب..
سعيد:-الشباب؟؟! شو شبابه...انا من شهور وانا اريد اشوفها وانته تقولي شباب روح لااااااااااااا..
بعد ما خلصت عوشه من الحمام شلتها ظبيه وغسلت ايدها.. وعدلت ظبيه غشوتها واتعطرت وعطرت عوشه وياها وظهرن من الحمام وشافت سعيد وعلي وين ما كانت تحيدهم.. واتعمدت انها اطوف من جدامهم .. وطافت وشافت عيون سعيد كيف كانت بتاكلها .... في خاطرها فرحانه .. لأنها حست ان سعيد مهتم فيها وايد .. وراحت ظبيه صوب باريس غاليري ولقت أختها سلامه ..
ظبيه : شو سلامه مطوله ..؟؟
سلامه : هيه مسويه هديه حق ربيعتيه والظاهر أنهم بيبطون وهم يغلفونها ..
ظبيه : اوكي خلاص أنا بروح صوب الألعاب بلاعب عويش وانتي يوم بتخلصين تعالي هناك عشان عقب نروح البيت ..
وطلعت ظبيه من المحل وراحت صوب الألعاب وسعيد بعده ورااااهااا .. ويوم هيه ع السلم المتحرك ..كان واحد من الشباب ع اليمب الثاني من السلم كان يبا يرقمها وسعيد بغاااا يموت وكان خاطره يذبحه..لكن ظبيه كانت مطنشتنه وراحت صوب الألعاب وخذت كوره حق عويش ويلست تلاعبها من لعبة للعبه وسعيد بعده وراها تعبت ظبيه من الوقفه فيلست ع الكراسي المحطوطه وخلت عويش تحوط بين الألعاب واطالعها من بعيد وأستغل سعيد الفرصه وراح صوب عويش ومسكها وكلمها ......... ....
سعيد : أنتي شو أسمج ..؟
عوشه : ليث ..
سعيد : ههههههه.. شوفي إذا تبيني ألاعبج الألعاب كلهم قولي لي اسمج ..
عوشه : اذا قلت لك اثمي بتخليني العب وايد..؟
سعيد : هيه وايد .
عوشه : ثرات اسبوعي ...
سعيد : وهو يضحك .. هيه ..
عوشه : اسمي عوثه ..
سعيد : هاهاهاهااا .. يعني عوشه .... انزين منوه هاذيج اللي كانت تلاعبج ..
عوشه تأشر صوب ظبيه وتقول: ... هاي عمووه
سعيد : شو أسمها .؟
عوشه :ليش بتخليها تلعب وايد ثراااااات اسبوع ايدها بعد ..
سعيد : ههههههههههههههههههههه ...... هيه ...
عوشه : هاذي عموه ذبيه .. انا وايد احبها ما احب عموه سلامه.. ما تخليني العب في حجلتها ..
سعيد: هههههههههههههههههه .......... اوكي تعالي بوديج تلعبين ..
علي : وين بترووح ..؟؟
عوشه :سووه ؟ بنلوح نلعب.
ويضحك سعيد وعلي على رمسة عوشه ..
رن تيلفون ظبيه وكانت متصله لها فطوم....
فطوم: هلا ظبيوه شحالج ؟.. ..
ظبيه : أنا؟ ..أنا مالكة الدنيا كلها الحين كنت ابا اتصل لج بس تيلفوني مافيه رصيد..
فطوم: لازم قوم مدفوعه... قولي شو اللي مفرحنج ..؟؟
ظبيه : فطوم.. .... سعيد هنيه في المول والله يوم شفته يتبعني قلبي وقف ..
فطوم : ..أييييييييييييه ظبيووه شوي شوي عليه مب ملحقه افهم كلامج.
وقالت ظبيه حق فطوم كل السالفه ..... ... من اول ما شافته لين آخر لحظه.. وفجأة يتقرب سعيد وعلي وعوشه صوب ظبيه ..
ظبيه: فطوم بخليج .. الحين باي ..
وسكرتوما عطت فطوم فرصه انها ترمس او ترد عليها وهل عليها سعيد ..
سعيد : السلام عليكم ..
ظبيه : وعليكم السلام ... ... عوشه وين رحتي .. .. ؟
عوشه : لحنا نلعب ثوي .
سعيد : هاهااهاهاااااههاهاااااا
ظبيه : اسمحلنا الشيخ تعبناك ..
سعيد : لا أفا عليج... يله باي عوشه ..
عوشه : باي
بعد ما راح عنهم سعيد وقف صوب بوابة الخروج .. صوب الألعاب ..وأنتبهت له ظبيه وكان قلبها شوي وبيوقف .. خوف ع فرح ع ما تعرف شوووه ... ويتها اختها سلامه وماسكه الأكيااس...
سلامه : يا الله خلصت ..
ظبيه : يا الله بنرد البيت وايد تأخرنا ..
ويوم وصلوا صوب بوابة الخروج قالت ظبيه حق سلامه تروح هي وعوشه السياره وهي بتلحقهم بتروح التسجيلات تبا تاخذ شريط... ... ... سمعها سعيد ولحقها وهو يسحب علي وراااه ... .. دخلت ظبيه المحل ويلست تحوط مب عارفه شو تاخذ .. وسعيد وعلي وراها وهي مرتبكه .....
قال سعيد حق راعي التسجيلات يحط له اغنيه راشد الماجد ..( شيلي الطرحه عن الوجه السموح ... نوري كل الوجود بطلتك ....املكيني بالغالى عمر و رووووح زلزليني لا رميتي طرحتك )ارتبشت ظبيه و هيه تسمع الأغنيه ... وومب عارفه شو تسوي فطلعت من المحل ..وسعيد وراها من مكان لمكان لين ما وصل مواقف السيارات .... ...
سعيد : ظبيه بعطيج رقمي ارجوج تصلي .. ... ... ارجوج .. ابا اقول لج شي ..
في خاطري كلام وايد مب قادر اصبر ارجوج ..
وكرر سعيد رقمه فوق الخمس مراااات ..
وتمر الأيام وسعيد ع أنتظاره .. يتريا ظبيه تتصل وظبيه ماكلتنها الحيره مب عارفه شوتسوي.. تتصل وتسمعه .. تتصل وتقول له عن اللي في خاطرها .. والا تحبه بسكوت ..
***ــــــــــــــــــــــ اتصال ـــــــــــــــــــــــ***
سعيد : اتصدق أحس اني غلطت يوم ر قمت ظبيه .. يا ريال حاس عمري طحت من عينها والله بموت إذا هالشي استوى .
علي : أووووه .. يا أخي تراك لوعت بجبدي من اسبوع ونحن ع هالمواال انزين انا شوووه بيدي ..
سعيد: تعتقد اني غلطان ..؟؟
علي : يوم قلت لك و الباقي عليك ظهرتني مب ولد جبايل وما اعرف السنع واليوم أنت اترقمها عادي صح ؟ .....
سعيد : لم ثمك .. أنا ما كان ينقصني إلا رمستك المخبقه .. يا الله بخليك باي
يوم الثلاثاء الساعه 12 فليل
ظبيه يالسه في حجرتها اتريد تنام بس مب قادره مب عارفه شو اتسوي ..راحت صوب المسجل وشغلت
((( اسهر معي ليله ...حاول تحس بلوعتي ليله ..عد النجوم اشكثرها...يلي بقلبي كبرها))
ظبيه : ليتك تحس فيني والله
بعدها يت غنيه ((اهمه لوكذب اني مااهمه..غلاي يجول بقلبه ودمه))
ماتت ظبيه يوم سمعتها وحست الشوق يحرق فوادها
ويم سمعت هالمقطع(( يكابر وادري انه يكابر ...وانا ادري بس لكن دوم صابر..ابيه يبوح عن حبه وشوقه...وانا اللي بين خلق الله اهمه))
ماحست بنفسها الا وهيه ادق رقم سعيد..رن رنتين بعدين سكرت ..خافت من اللي سوته وخافت انه يكون راقد ..بس بعد ثواني اتصل بها سعيد ترددت اترد عليه والا لا وفي النهايه قرررت اترد عليه
ظبيه : الو ...مرحبا
سعيد : مرحبا الساع ..الشيخه حد اتصل على هالرقم
ظبيه: هيه اسمحلي كنت...كنت مغلطه في الرقم
حس سعيد انه يعرف هالصوت
سعيد: لا افااا عليج عادي الشيخه ...بس انتي متاكده انج مغلطه؟؟؟
ظبيه ساكته مب عارفه شو اترد عليه..حينها عرف سعيد ان السالفه فيها شيء...ماكان يعرف انها ظبيه ..بس حاس ان هالبنت عندها سالفه
سعيد: اوكي ..انتى منوه كنت اتريدين ؟؟يعني اذا ما فيها احراج
ظبيه :لا عادي بس خلاص انا غلطانه في الرقم سمحلي
سعيد: الشيخه .. لحظه..انا حاس انه في شي في خاطرج
ظبيه: لا ماشي في خاطريه.. اسمحلي ..مع السلاامه
سعيد: ورفجت بوخليفه اتقولين اللي في خاطرج ..والله احس انه شي في خاطرج..
ظبيه: ااااااه...اول شي ممكن اعرف تيلفون منوه هذا؟؟؟
سعيد: امممممممم تيلفوني
ظبيه : ممكن اعرف اسمك لو سمحت
سعيد: وياج سعيد الرميثي
ويوم نطق باسمه فز قلب ظبيه وماعرفت شو اتقول وسكتت..ويوم ان ظبيه ماتكلمت حس سعيد انها غزالة حياته والملاك اللي شافه
سعيد : ظبيه؟؟ ارجوج قولي انج ظبيه
ظبيه وهيه مصدومه: كيف عرفتني ؟؟؟
سعيد: لا مب معقوله والله انتى ظبيه ... لا اكيد انا احلم ..قولي والله انج ظبيه ..قولي انج ظبيه وريحيني
ظبيه وهيه مستغربه من رده فعل سعيد هيه وياك ظبيه
سعيد: اااه..حرام عليج هذا اللي تسوينه فيني والله حرام ..!!
ظبيه: انته شوه تقول ,,؟
سعيد:-شوه سويتي؟! ما شي بس اخذتي قلبي وروحي وسرقتي النوم من عيوني خليتيني جسم بلا روح.. سرقت النوم من داخل عيوني.. وخليتي السهر فيها مؤبد..
ظبيه:- سعيد.. انته شوه تقول؟!
سعيد:- ارجوج قولي اسمي مره ثانيه ارجوج..
سعيد:- آآآآة فديت سعيد يوم تظهر من ثمج..
سكتت ظبيه من المستحى وما عرفت شو ترد على سعيد وعلى كلامه..
ظبيه:- انا اسفه اذا كنت اتصلت بك في وقت متاخر..
سعيد:- لا افا عليج لا متاخر ولا شي..
ظبيه:- يعني انته مب مشغول؟!
سعيد:- لا فاضي ما شي ماسك خط دبي السمحه.. وبعدين حتى لو كنت مشغول عشانج افضى وافضي كل حياتي.. ظبيه.. ليش ما اتصلتي بي؟! حرام عليج.. والله كنت بين علشان اكلمج..
ظبيه:- سعيد ما كانت عندي ذيج الجرأه اللي تخليني اتصل بواحد من الشباب.. سعيد.. انا ما كنت بتصل.. بس ما ادري يوم سمعت غنية عيضه ما قدرت امسك عمري.. ودقيت وانا مب حاسه بعمري...
سعيد:- غنية عيضه؟! وشو دخل غنية عيضه؟!
ظبيه:- سعيد.. انا اعرفك من زمان.. انا اعرفك من من اليوم او امس..
سعيد:- لحظه.. لحظه.. اريد اعرف شو السالفه.. ظبيه انا ادري انج عرفتي اني هو الشخص نفسه الي شافج عند ميالسكم ذاك اليوم( يوم العيد)..
ظبيه:- هيه عرفتك... بس على فكره انا كنت اعرفك قبل ذاك اليوم بشهور...
سعيد:- شوه؟! شهور؟! ليش انتي من وين عرفتيني؟!!
قالت ظبيه حق سعيد عن الشريط والعرس وكيف سالت عنه وكل شي.. وسعيد كان ساكت ويسمعها...
ظبيه:- وهذي كل السالفه... الحين عرفت شوه السالفه... وشوه سالفة غنية عيضه...
سعيد:- يالله يا القدر.. صدق والله ما في انسان يقدر يغير القدر...
ظبيه:- ليش سعيد انت تعتقد ان القدر يجمعنا..
سعيد:- اكيد والا ما استوى كل هذا... واكبر دليل انج يالسه تتكلمين ويايه الحين.. ظبيه.. ممكن اقولج شي؟!
ظبيه:- آمر..
سعيد:- كان خاطريه اني اسمع صوتج لكن الحين ليتني ما سمعته..
ظبيه:- ليش؟!
سعيد:- لاني قبل كنت ميت ومن سمعت صوتج زاد عذابي.. والطعن في الميت حرام يا بنت الناس..
ظبيه:- اذا انته كنت ميت فكيف تحس بالعذاب؟!
سعيد:- انا صدق ميت بس ميت بحبج..
زادت دقات قلب ظبيه مب امصدقه اذنيها مب مصدقه ان سعيد يحبها...
ظبيهك- سعيد ارجوك..
سعيد:- ظبيه انتي اللي ارجوج.. حرام عليج شهور وانا اتخيل هاللحظه... حرام عليج انج تحرميني منها.. ظبيه انا ما اطلب انج تحبيني.. بس ارجوج لا تحرميني من اني احبج..
كان في خاطر ظبيه انها اتقول انها تحبه بعد... بس كانت خايفه.. خايفه لا يكون سعيد يجذب عليها..
سعيد:- الغاليه سمعي هالاغنيه دوم اسمعها واتذكرج.. " من بين الناس حبيتك .. من بين الناس.. وبكل احساس اغليتك.. وبكل احساس.. حبك جرى بدمي.. نساني كل همي"..
ظبيه:- اوكي.. اوكي.. لحظه..
راحت ظبيه للمسجل وادور شريط راشد الماجد...
ظبيه:- اسمع هالاغنيه.. " انا احبك ولا فكرت اخونك.. وقلبي في الهوى عايش يصونك.. احلف ورب البيت غيرك ما حبيت"..
سعيد:- فديت روحج الغاليه ذوقج روووعه...
استحت ظبيه وضحكت...
سعيد:- بتخبرج الغاليه انتي وين ادرسين؟!
ظبيه:- انا في جامعه الامارات سنه ثانيه كلية العلوم الانسانيه وشو بعد تبي تعرف ؟!
سعيد:- والله زين وانا بعد بقولج عن نفسي انا اشتغل في جهاز بوظبي للاستثمار... امممممم...
ظبيه:- انزين كم عمرك؟!
سعيد:- انا شيبه عمري 24 سنه... ويضحك..
ظبيهك- العمر كله انشاء الله وانا عمري 12 سنه .. ههههههه..
سعيد:- فديتج والله 12 وفي الجامعه عليه عاد قولي كم؟!
ظبيه:- عمري 20 ىسنه..
سعيد:- العمر كله انشاء الله... وشو الجامعه حلوه والا ممله؟!
ظبيه:- حلوه بس امتحاناتها صعبه..
سعيد:- لا اكيد انتي شاطره مبين عليج..
ظبيه:- سعيد بخليك الحين ورايه امتحان بكره الصبح..
سعيد:- انزين متى بتكلميني؟!
ظبيه:- والله ما ادري؟!
سعيد:- لازم لازم لازم تكلميني... حرام عليج والا بموت.. بتخبرج هذا تلفونج؟!
ظبيه:- هيه تلفوني..
سعيد:- انزين انا بتصلج..
ظبيه:- لا لا لا دخيلك.. يمكن تتصل واكون عند اخواني.. اقولك.. خلاص انا بتصلك يوم بتفيق..
سعيد:- انزين الغاليه بس دخيلج اتصلي بي..
ظبيه:- انشاء الله من عيوني شي في خاطرك؟
لحظة سكوت..
سعيد:- سلامتج الغاليه..
ظبيه:- انزين تصبح على خير..
سعيد:- وانتي من اهله وربعه وجيرانه وطوايفه هههههههههه... مع السلامه..
***ــــــــــــــــــــــ البيت ـــــــــــــــــــــــــ ــــــــــــ***
مريم : عويش عن الحشره ... بتطيحين ... حسبي الله ع هالبنت ...
ظبيه : بلاج خليها تلعب ...
مريم : شو تلعب ..؟؟ ماتشوفينها اتنط من كرسي لكرسي والله لو استوابها شي بيذبحنا خليفه ..
خليفه : فديت اللي تقول خليفه ..
مريم : مرحبااا ملاااين وزود والله .
عوشه : باباتي ثوفني كيف العب ثوووف ...
مريم : عويش والله لضربج .. خليفه شوف بنتك ..؟؟
خليفه : خليها تلعب اشعندج عليها ..
مريم : انزين ... تلعب لكن يوم بتتكسر لا تهزبني ..
ظبيه : ههههههههههه هاي بنت وحده ومظهره عيونكم الله يعين يوم بتيبون درزن ..
عوشه : ماماه أليد ماي .
مريم : ان شاء الله عيوني.
خليفه : ظبوي شلي عويش ويااج ابا ايلس ويا حرمتيه .
ظبيه : لا .. أنا مول ما حسيت... يا اخي قول فارجيينا وبس . صح .. ..؟
ويضحكون ع رمسة ظبيه .. وتروح ظبيه حجرتها ومعاها عويش وتحصل 3 مسج كول و5 مسجات ع تيلفونها .. لقت فاطمه متصله مرتيين ورقم اخوها حميد مره.. ويوم شافت المسجات لقت اربع من سعيد ووحده من فطوم.. وهي مب مكلمه سعيد من يومين .. فمسكت التيلفون وحطته في الجرج وودت عوشه عند سلامه ورجعت حجرها قفلت الباب وشغلت المسجل ..
واتصلت حق سعيد ..
سعيد : مرحبااااا ملاين شو ملايين "إلا بلاااين ..وينج أنتي شو هالغيبه والله ما اصبر بدونج ..
ظبيه : هههههههه هلا مرحبا بو عسكور.. والله زحمت امتحانات عليه وبعدين من يوميين وبنات عمومي مسوين غزو علينا ..
سعيد : حرام عليج والله شتقت لج .. قسم با الله والله احس قلبي بيقف لو ما اتصلتي ...
ظبيه : فديت قلبك أنا ..
سعيد : آااااااااه .. كنت زعلان بس الحين لا..
ظبيه : هههههههههههه أوكي الغالي بخليك الحين .
سعيد : ششششششووووووووووه اتخليني ..!!! انا ما صدقت انج اتصلتي تبيني اسكر .. لالالالالالا ما بسكر ..
ظبيه : فديت سعيد انا ... والله ورااايه دوام ..
سعيد : ليش متى دوامج ..؟
ظبيه : بروح بس حق محاظرتين من 2 لين الساعه 5.
سعيد : اوكيه يعني بتتصلين فليل ..؟؟
ظبيه : ان شاء الله ..شي في خاطرك؟
سعيد : بعدني بترياااج آاااه والله وايد في خاطريه ..... بس ماادري متى بترحميني ..؟؟
ظبيه : أوكي ... بيباي ..
سعيد : وهو يتنهد باي .
سعيد : ظبيه ..!!
ظبيه : لبيه..
سعيد: أحبج ..أحبج ..أحبج مووووت ..
لحظة سكووت.
ظبيه : باي.
سعيد : باي ..
مب احلى قصة حب ...
ـــــــــــــــــــــــــ ـ في الكوفي هاوس ـــــــــــــــــــــــــ ***
ظبيه:- يالله بنات بنشوفكن بعدين...
فاطمه:- يالله باي بنات...
نوره:- ليش باي ما بترجعين مع ظبيوه...
فاطمه:- لا أنا من بعد الفكر ما عندي شي ومالي خاطر حق اليلسه...
وطلعت ظبيه وفاطمه من الكوفي رايحات صوب مبنى 66... وهن رايحات صوب الكلاس يلست ظبيه تقول حق فاطمه عن سعيد ألين ما وصلن القاعه ويلست ظبيه وفاطمه عدال بعض في السيد الثاني وشوي تيمعن البنات كلهن وبعدها بثواني دخل الدكتور وبدت المحاضره... كان الدكتور مندمج في الشرح والبنات مندمجات بعد وياه فجأه سمعن صوت تلفون واصلنه مسج والصدفه إن هالتلفون كان تلفون ظبيه احمر ويه ظبيه ومب عارفه شو تسوي وفاطمه أول ما سمعت التلفون لفت صوب ظبيه وخاطرها تذبح ظبيه لف الدكتور صوب البنات...
الدكتور:- بنات يا ريت لو يكون في شويت احترام للكلاس ولو سمحتي يا راعية التلفون أغلقي تلفونج أو حتى حطيه على السايلنت إذا إنتي ما تصبرين عنه... بنات هذي آخر مره بسمح بمثل هالحركات ...
تمنت ظبيه لو إن الأرض تنشق وتبتلعها وكانت تسمع البنات يهمسن عليها ويقولن والله إنها ما تستحي هذي مضيعه المذهب ووايد من هالرمسه لدرجة إنها كانت اتريد تطلع من الكلاس لولا فاطمه اللي مسكتها ... وبطلعت الروح خلص الكلاس طلعت فاطمه من الكلاس وتسحب ظبيه معاها ألين ما وصلن النافورة...
فاطمه:- ظبيوه والله انج ما تستحين شو هذا هبلا إنتي وإلا تستهبلين...
ظبيه:- والله والله إني انصدمت شراتج يوم سمعت التلفون وما كنت أدريبه إنه مب محطوط سايلنت...
فاطمه:- شوه ما كنت أدري؟ والله لو واحد غير الدكتور أحمد كان والله طلعج من الكلاس ووداج حق المشرفات ... شو إنتي ما تدرين إن فيها فصل...
ظبيه:- حرام عليج عاد... شو أسوي... حرام عليج إيسد كلام الدكتور لي...
فاطمه:- كلام الدكتور؟! ما عليه... الغاليه تراج راسبه في الفكر خلاص... وأنا مالت عليه يالسه عدالج شوفي من عقب هاليوم في كلاس الفكر لا أعرفج ولا تعرفيني...
ظبيه:- حرام عليج فطوم...
فاطمه:- حرام عليج؟! انزين منوه مطرش لج مسج؟
ظبيه:- ما ادري لحظه بشوف...
المسج:-
"يعلم الله في خفوقي شايلك صوره وصوت مثل دم في عروقي لو يخف مني أموووت"
ظبيه:- من سعيد...
فاطمه:- من سعيد؟ قوي جيه... والله العظيم نهايتنا بفظيحه إنشاء الله...
ظبيه:- بسم الله من فالج...
وعدى هاليوم على خير
. أسمييييك يا المستحيل ماذااه! ما تخلي الواحد يرقد!
المهم....... خلنا نكمل ونشوف شو صار........!
0000000000
***ـــــــــــــــــــــــ اتصال ـــــــــــــــــــــــــ ـ***5
ظبيه:- سعيد باجر بنروح دبي...
سعيد:- دبي؟! ليش؟!
ظبيه:- ما شي بس نريد نفصل شيل وعبايا ونشتري قطع وهالسوالف ...
سعيد:- لا والله وماشي في العين؟!
ظبيه:- لا شي بس في دبي علشان بالمره نتكشت...
سعيد:- ومنوه بيروح وياج؟
ظبيه:- أنا ومريم حرمت خليفه وفطوم ربيعتي...
سعيد:- يا سلام شلة بنات يعني... لا تروحين...
ظبيه:- سعيد حرام عليك عاد... أريد أروح والله سعيد فديتك...
سعيد:- اتعرفين نقطة ضعفي... بس ما تروحين لا وافي ولا السيتي سنتر وتتغشين بشيله غليظه...
ظبيه:- إنشاء الله الغالي انته آمر بس...
وراحت ظبيه ومريم وفاطمه دبي وحاطن في المراكز ألين ما شبعن وفي درب الرده الساعه11 فالليل بنجر عليهن التاير عدرب دبي العين... ومن نحاسة الحظ كان التاير السبير امبنجر بعد... ما عرفوا شوه يسون... نزل الدريول من السياره...
فاطمة:- طاعوا النحاسه ... والله صدق المنحوس منحوس ولو علقوا على رأسه فانوس...
ظبيه:- لحظه... لحظه أشوف سياره واقفه ورانا...
كان في السياره اثنين من الشباب رادين من دبي رايحين صوب العين فنزلوا من السياره وراحوا صوب الدريول وكلموه... فتحت مريم دريشتها تسال الدريول...
مريم:- حمزه...
حمزه:- هاه ماماه...
شوه أسوي تلفون حق خليفه علشان يشوف السياره؟!
قال واحد من الشباب:- لا أفا عليج الشيخه... إنشاء الله بنعابل السياره وبنبدل تايرها لا تتصلين حق حد...
مريم ما تقصر يا الطيب...
رد عليها وقال:- أفا عليج... السالفه ما تحتاي...
سكرت مريم دريشتها وراح واحد من الشباب صوب سيارتهم ووقف اللي كلم مريم عند الدريول...
فاطمة:- يا حافظ عليه والله إنه شيخ هالريال...
ظبيه:- لا والله؟!
حمزه:- ماماه هذا نفرات يقول سوي نزل شويه...
قاللهم نفس الريال:- الشيخات لو تنزلن من السياره شوي ألين ما نعابل في السياره... وانتن ركبن سيارتيه ألين ما نخلص ... لأنه فظيحه يا خواتي اتمن واقفات في الشارع جدام اللي خاطف واللي ياي وبعدين الحين فالليل وأنا أخاف على سمعتكن تراكن مثل اخواتي...
مريم:- إنشاء الله بنات نزلن...
فاطمه:- والله انه مخاوي شما...
ظبيه:- فطوم... بيسمعج...
نزلن من السياره وراحن صوب سيارة الريال ... بس ظبيه ما طاعت تركب... وتمت واقفه عند الباب عدال فاطمه الي ركبت هيه ومريم...
فاطمه:-مريوم أتشوفين صورته... المكان ظلمى وأنا من الصبح أدور وما لقيت شي
ظبيه:- وإنتي شدراج أنه حاط صورته؟!
فاطمه:- الحين الشباب كلهم يحطون صورهم في السياره... وبعدين صورته حلوه غير رايكن اتحسبنه ...أكيد حلو مالت على حظنا يعني ما لقى التاير يبنجر الا فليل عشان ما نقدر نشوفه...
ظبيه:- مالت... سكتي تراه ياي صوبنا...
قاللهم:- أوكي الشيخات ...خلصنا من تايير السياره...
مريم:- مشكور يا الشيخ ما تقصر...
فرد عليها:- لا أفا عليج هذا واجب علينا...
نزلن من السياره الريال رايحات صوب سيارتهن
فاطمه:- بس اسمحلنا الشيخ انريد رقمك عشان اخوانا يتصلون بكعلشان يردولك التاير...
رد عليها الريال:- لا أفا عليج يا الشيخه هذي فضيحه في حقنا وتراه إلا تاير وفدوى عنكن مية تاير...
فاطمه:- هذا إلا من طيب اصلك... بس لازم ناخذ رقمك ولو حتى عشان يشكرونك...
قاللها:- اوكي رقميه (........)
فاطمه:- اسمحلي بس منوه الريال؟
قاللها:- عبدالله... عبدالله بهيان العامري...
فاطمه:- مرحبا الساع والله...
عبدالله:- مرحبا بج يا الشيخه...
وركبت فاطمه ويا مريم وظبيه السياره وراحن صوب العين...
_
والباقي ان شاء الله بحطا باجر..........
والسموحة..
<img src="http://oasis.bindubai.com/emoticons/biggrin.gif" border="0" valign="absmiddle" alt=':D'></font>
رد مع اقتباس
مواقع النشر (المفضلة)