<font color='#000000'>الباقي من القصة,,,,
ــــــــــــــــــــــــا تصال ـــــــــــــــــــ***6
فاطمه:- ظبيوه... إنتي لازم تكلمين سعيد...
ظبيه:- سعيد... فديت روحه والله... آآآه يا فاطمه والله ما أعرف شوه أسوي... أهليه محتشرين عليه وأولهم حميد... أوين والله بتخربين عليه...
فاطمه:- وحميد وين داخل بالعرض في السالفه بعد...
ظبيه:- داش عرض!!! أصلا حميد هو الي مكبر راس بويه أوين إذا احنا ما قربنا بحمد ولد عمي ما بيوزن حميد لميثه وهو يريد ميثه...
فاطمه:- ظبيوه... بنصحج نصيحه لويه الله ... خذي حمد...
ظبيه:- شوه خذي حمد؟؟! إنتي بذات المفروض ما تقولين هالكلام أنتي تعرفين إني أحب سعيد وبموت إذا كنت لحد غيره...
فاطمه:- ظبيه بس سعيد ما سوى شي علشان ياخذج...
ظبيه:- أصلا إحنا ما تكلمنا في هالسالفه... فاطمه أنا متاكده أن سعيد يحبني...
فاطمه:- ظبيوه إنتي لازم تقولين حق سعيد... وتشوفين ردة فعله إذا هو شارنج صدق وايريدج بيسوي المستحيل علشانج... وإذا هو لعاب بيتعلث بأي شي وبيقولج ما بيدي حيله...
يلست ظبيه تفكر برمست فاطمه... وقررت أنها تتصل بسعيد ...
سعيد:- مرحبا ملايين... حبيبتي حرام عليج هذا الي تسوينه فيني...
ظبيه:- هلا سعيد...
ظبيه:- هلا سعيد؟!! هذا إلي طلع منج بذمتج؟ اسبوع ما أكلمج وتقولين هلا سعيد... ما كنت أتوقع أن قلبج قاسي لهالدرجه...
ظبيه:- حرام عليك سعيد... بس إنته ما تعرف إلي استوالي وإلا جان عذرتني...
سعيد:- ليش إنتي عطيتيني فرصه عشان أعرف... ظبيه إنتي طنشتيني أسبوع كامل وأنا اتصل وأطرش لج مسجات وإنتي مب حاسه فيني... حتى هان عليج اتردين عليه أو حتى اطرشين مسج...
ظبيه:- سعيد إنته وين الحين؟!
سعيد:- عدرب سمحه بوظبي... ليش؟؟!
ظبيه:- أوكي... خلاص يوم توصل البيت دقلي...
سعيد:- ظبيه بلاج شو مستوي... تراج مب ظبيه إلي أعرفها
ظبيه:- سعيد في سالفه أريد ارمسك فيها... وما ينفع أني أرمسك وانته تسوق
سعيد:- والله تقولين... شو السالفه؟!
ظبيه:- سعيد يوم بترجع البيت بقولك...
سعيد:- ظبيه فلختيني شو السالفه؟!
سكتت ظبيه...
سعيد:- اوكي يالله رمسي وقفت السياره هاه شوه السالفه
ظبيه:- سعيد.
سعيد:- عيون وروح وحياة سعيد... آمري يا الغاليه.
ظبيه:- الاسبوع الماضي كنا مسوين عزيمه في بيتنا... وقالت ظبيه حق سعيد عن سالفة حمد... وسعيد يسمعها وهو ساكت ألين ما قالتله عن رمست أبوها...
سعيد:- وانتي ليش ما قلتيلي... ليش ما خبرتيني اول ما استوت السالفه الحين رمستي...
ظبيه:- سعيد أنا ما عرفت شوه اسوي... بعدين كنت اريد أني اقنع أبويه بس حميد مكبر راس بويه... آآآآآآآآه والله تعبت... ما أعرف .. ماأعرف شوه اسوي...
يلست ظبيه تصيح... مب قادره تمسك دموعها...
سعيد:- حبيبتي تصيحين؟! يخسي ألف ريال اينزل دمعه من عيونج... فديتج لا تصيحين.. فديتج.. دمعه من عيونج اشتريها بالف خاطر...
ظبيه:- مب قادره.. والله هذا مب بإيدي.. بس بس ورجعت تصيح...
سعيد:-فديتج ظبيوه لا تصيحين.. لو كنت غالي عليج صدق واتحبيني لا تصيحين ظبيوه.. تحبيني؟!
ظبيه:- بعد هذا كله انته عندك شك أني ما احبك... سعيد أنا احسن لي الموت ولا اكون لحد غيرك..
سعيد:- لا انشاء الله لا انشاء الله لا تقولين جيه وانشاء الله بتكونين لي حتى لو ادفع عمري فدوى علشانج...
ظبيه:- انزين سعيد... شوه بتسوي؟!
سكت سعيد شوي..
سعيد:- ما عليج.. انشاء الله ما يستوي إلا كل خير... بس انتي وعديني انج ما بتصيحين من عقب هاليوم..
ظبيه:- آآآآه ليت الافعال سهله شرات الاقوال.
سعيد:- حبيبتي.. اذا الله كاتبلنا اللقى... ما في انسان بيبعدنا واريدج تتاكدين من شي واحد اني ما حبيت ولا بحب حد غيرج..
ظبيه:- فديت روحك.. حتى انا احبك.. والله والله أحبك..
سكر سعيد عن ظبيه.. وهو مب عارف شوه يسوي.. شغل سعيد السياره وهو ضايج.. شغل الـ FM وسمع عبد الكريم يغني..( ودعتها والشوق بيني وبينها الشوق بيني وبينها بحور... ودعتها.. ودعتها.. رغم خوفي.. رغم خوفي والوله مجبور.. الحزن في ايدها قاسي يشدني.. كل درب عنها بعيد يصدني.. ما أدري المحبه ظيعتني وإلا أنا ظيعتها.. وإلا انا ظيعتها...)
وأول شي فكر فيه سعيد ربيعه علي فاتصل به على طول...
علي:- الو.
سعيد-ألو.. علي انت نايم؟
علي:- والله أنك ما تستحي متصل الساعه 3 الصبح وتتخبر اذا نايم.. اكيد نايم..
سعيد:- علي اريد ارمسك.. علي مب عارف شو اسوي..
علي:- عسى ما شر سعيد بلاك.. شي يعورك؟ تعبان؟
سعيد:- آه تعبان!! إلا بموت..فقال سعيد حق علي عن الرمسه إلي قالتها ظبيه..
علي:- سعيد ترى البنت شارتنك وقسم بالله بتكون نذل اذا ما طلبتها..
سعيد:- بس بوها قرب بولد عمها..
علي:- سعيد لا تتعلث.. بعدين انته عندك خليفه وصدقني اذا خليفه حس انك تباها وهي تباك صدقني والله بيساعدك..
يلس سعيد يفكر فرمست علي طول الليل ألين ما اذن الصبح.. طلع سعيد من حجرته بيروح المسيد علشان يصلي.. لقى ابوه في الصاله
بو سعيد:- هاه سعيد ناش اليوم من الفير..
سعيد:- ناش؟! وين ناش أنا ما نمت من امس..
بو سعيد:- بلاك عسى ما شر؟!
سعيد:- لا ماشي بس .. بويه اريد ارمسك بسالفه..
بو سعيد:- خلنا نروح المسيد ونصلي وعقب انشاء الله بنرمس..
راح سعيد ويا ابوه المسيد وصلوا الصبح وفي درب الرده رمس سعيد بوه..
سعيد:- بويه اريد اعرس..
بو سعيد:- هذي الساعه المباركه.. حد في خاطرك وإلا تريد امك تتنقالك؟
سعيد:- بصراحه خاطريه فوحده..
بو سعيد:- منوه؟ حد من الي نعرفهم؟
سعيد:- هيه.. اخت خليفه الظاهري ربيعي..
بو سعيد:- هيه هل فلي هزاع..
سعيد:- هيه وصلت..
بو سعيد:- انشاء الله يستوي خير.. برمس امك وبخليها تروح وتشوف البنت..
سعيد:- ما في داعي بويه أنا اريد الرياييل يروحون أول والحرمات بعدين..
انتبه بو سعيد انه في السالفه شي بس ما حب انه يضغط على سعيد.. اتصل سعيد بخليفه وقاله انهم بيونهم في البيت.. ففهم خليفه السالفه وعرف سبب رفض ظبيه لحمد..
ويوم سكر عن سعيد على طول راح صوب غرفة ظبيه..
خليفه:- ظبيه.. انصلبي اليوم سعيد الرميثي..
ظبيه أونها ما تعرف منوه سعيد الرميثي:- منوه هذا؟!!
خليفه:- منوه هذا؟! المهم الريال يباج ... وقالي انهم يريدون أحدد لهم يوم علشان ايون ويرمسون بويه.. انتي شو رايج..
ظبيه:- الشور شورك
_
ـــــــــــــفي مستشفى توام ـــــــــــــــــــــــــ ***
ظبيه نايمه وكل اهلها يالسين عدالها واولهم حميد الي ما نام من يومين وهو يالس عند ظبيه.. ما طاع حتى يفارقها ثواني..
خليفه:- حميد نش روح البيت ونام .. انته من يومين مب نايم..
حميد:- ما بنام الين ما تظهر ظبيه من المستشفى.. انا السبب.. انا السبب..
نش خليفه وخذ حميد من يده وطلعوا من حجرة ظبيه وخلوا امهم وسلامه عند ظبيه..
خليفه:- حميد لا تحمل نفسك فوق طاقتها.. والي استوى خلاص من الماضي.. حط الرحمن في صدرك وروح تسبح ونام وعقب ما تنش تعال..
حميد:- ما بروح الين ما اشوف ظبيه نشت..
خليفه:- انت الله يهديك.. ما عطيتني فرصه علشان ارمسك.... دشيت عرض عالبنت حتى ما عرفت شو السالفه..
حميد:- خليفه.. انا اتصلبي حمد.. ولو سمعت شو قال جان عذرتني..
خليفه:- الي سواه حمد ما يسويه اي ريال.. وسعيد شاري ختك ويباها وبويه قال له اذا حمد رخص ظبيه بيوزه ظبيوه... والريال ما غلط اتصل بحمد ورمسه.. بس حمد ما ادري اشعنده..
حميد:- خليفه حمد يريد ظبيه وبويه قربه جدام الرياييل كيف تباه يرده الحين؟!
خليفه:- حميد بويه يوم عطى كلمه للرياييل ما شاور ظبيه.. وانته ما تقدر تجبر انسان عشي ما يباه.. كيف عيل تجبره عالعرس.. وهذي عشرة عمر.. حميد.. لا يكون مسوي هالسالفه كلها علشان ميثه..
حميد:- خليفه اذا ميثه تباني وشارتني صدق بتسوي الي سوته ظبيه وزود.. واذا هي ما تباني بتتعلث بهالسالفه عشان ما اخذها.. وهذا بيكشف غلاتي عندها..
وخذ حميد رقم سعيد من عند خليفه واتصلبه ورمسه وحدد معاه يوم علشان ايون هوه وابوه.. فطار سعيد من الفرحه بس كان خاطره يعرف اي شي عن ظبيه.. حس حميد بهذا الشي وما حب انه يزيد عسعيد فما قاله انها في المستشفى..
مريم:- عويش سكتي عموه تعبانه..
عوشه:- ماليد.. ماليد... يدوه.. ليث عموه ذبيه نايمه.. اوعيها؟!
مريم:- عويش.. تعالي بوديج عند ابوج..
عوشه:- ماليد.. اليد العب عند عموه ذبيه..
سلامه:- عواشي.. تعالي حبيبتي.. تعالي بنروح نلعب برى..
عوشه:- لا انتي ما بتوديني..
تحركت ظبيه كانها كانت حاسه بالعرب.. ففتحت عيونها..
مريم:- عموه ظبيه نشت..
ام ظبيه وهي يايه تربع صوب الشبريه:- فديتج بنتي..
ظبيه:- وين انا؟!
امها وهي تصيح:- فديتج انتي في المستشفى.. فديتج هميتينا عليج..
مريم:- خلاص عموه.. هذي ظبيه نشت لنا وهي بخير وما فيها شر..ويوم شافت ظبيه امها تصيح صاحت هي بعد.. نشت امها ولوت عليها .. وطلعت مريم من الحجره وهي تسحب عوشه وياها والدمعه عخدها..
عوشه:- ماليد.... ماليد.. مماتي ما احبج اليد عموه..
فجت مريم عوشه الي ربعت صوب حجرة ظبيه.. وراحت مريم صوب خليفه وحميد الي كانوا يالسين في غرفة الانتظار وهي تصيح..
مريم:- خليفه.. ظبيه نشت..
نش حميد يربع صوب حجرة ظبيه ووراه مريم وخليفه.. أول ما دخل حميد وشاف ظبيه وهي لاويه على امها.. صاح وراح صوب ظبيه ولوى عليها..
سلامه:- حرام عليكم شوه مسوين فلم هندي!.. ويلست تضحك ودموعها تنزل غصبا عنها..
شوي ودخل خليفه ومريم.. وهدت الاوضاع شويه..
عوشه:- باباتي.. باباتي.. اليد الوح الحمام..
الكل يضحك من عوشه..
سلامه :- تعالي بوديج.. امبونه الله بلاني بج.. يالله عاد ظبيوه عن هالحركات.. انا ادريبج ان انتي ما فيج شي بس تتميرضين تبيني ابتلي بعويش المقروده..
عوشه:- انا مب مقلوده.. انتي الي مقلوده..
ويلسوا يضحكون عسلامه وهي تتواجع مع عوشه..
حميد وهو يكلم ظبيه بصوت واطي:- ليت ايدي انقطعت قبل ما امدها عليج..
ظبيه:- حميد انته لو ما كنت خايف عليه ما سويت هذا كله..
حميد:- فديتج ظبيوه سمحيلي .. فديتج..
ظبيه:- مسموح يا الغالي..
حميد:- يالله نشي عاد.. والا انتي عيبتنج يلست المستشفى..
ظبيه:- بصراحه هيه.. خلتكم كلكم عندي..
خليفه:- من هالناحيه لا تتخبرين.. حميد من يوم ما دخلتي المستشفى ما ظهر منه.. ايعفنا بريحته قلناله روح تسبح ما طاع.. قال ما بروح الين ما تنش ظبيوه ..
حميد وهو يفر خليفه بغرشة الماي:- مالت عليك.
النهـــــــــــــــــــــ ـــــــــــــــــاية
***ــــــــــــــ في البيت بعد يومين ـــــــــــــــــ***
حميد:- بويه ظبيه ما تريد حمد.. وبصراحه عقب الي استوى ما احس ان حمد يستاهل ظبيه..
بو خليفه:- حميد انا عطيت كلمه للرياييل..
حميد:- بويه قدها الكلمه الي تنقال اغلى من حياة بنتك؟!
بو خليفه:- والله يا ولديه الي تشوفونه انته واخوك..
اتصلت ظبيه بسعيد اول ما سمعت رمست ابوها وقالتله الرمسه...
سعيد:- قولي والله.. صدق.. يعني نيكم الحين؟!
ظبيه:- حبيبي.. حبيبي... شو تيي الحين.. صبر الين ما يتصلون بك خواني ويعطونك موعد عشان تيب هلك..
سعيد:- وانا وين فيني صبر؟
ظبيه:- حبيبي.. صبرنا هالشهور كلها ما بنصبر هاليومين..
سعيد:- فديتج والله.. انا ما اعرف شو كنت بسوي بلاج..
ظبيه:- الله لا يفرق بينا..
سعيد:- آآآآآآآآمين...
***ــــــــــــــــــــ يوم الملجه ــــــــــــ***
ظبيه:- فطوم.. فطوم الحريم ين؟
فاطمه:- هيه ين.. ما شاء الله هاي الملجه جذيه عيل في العرس شو بيستوي..
أم ظبيه:- ظبيه.. شوه ما خلصتي؟!
مدام انصاف راعية الصالون:- ولو.. بس باإي شوي.. بس لو هيه تكن شوي..
فاطمه:- معذوره اليوم بتكون حرم سعيد الرميثي..
ظبيه:- فطوم..6
بعد ما خلصت راعية الصالون من ظبيه.. ظهرت ظبيه عند الحرمات.. ومشت الين ما وصلت عند الكرسي الي بتيلس عليه..وزقر بو ظبيه ظبيه ووقفت ورى الباب عشان يسالها القاضي عن الملجه.. وبعدها بدقايق صارت حرم سعيد الرميثي صدق..
بو ظبيه:- هاه المعرس تريد تريد تشوف العروس..
سعيد وهو مستحي:- دام حرماتي شافنها ما في داعي اشوفها..
علي يرمس سعيد بصوت واطي:- يا قلبك.. ما تريد تشوفها؟
سعيد:- ألا بين علشان اشوفها بس حالف ما اشوفها الا وهي لابسه الفستان الابيض تترياني في الكوشه..
_
واتمنى انها عيبتكم..والسموووحة...
<img src="http://oasis.bindubai.com/emoticons/rock.gif" border="0" valign="absmiddle" alt='???'></font>
رد مع اقتباس
مواقع النشر (المفضلة)