ذنـيـنـي و المفلس في طلعة تصويـر -موضوع مشترك-

**ذنـيـنـي** · 09-01-09 ||, 12:53 AM

السلام عليكم و رحمة الله و بركاته

شحالكم, عساكم بخير

يوم الثلاثاء اتصلي المفلس مجموعة انسان من صباح الله خير
و قالي نبغي نطلع نصور و ما ادري شو و حشرني و قالي قوم يالله و تعال و سير و رد و ما ادري شو
المهم خربط علي و ازعجني و اخر شي بغيت الفكه من حشرته و قلتله انزييييييين انزييييييين بنسير

عقب الدوام رجعت البيت بسرعه سبحت و لبستلي جنز و قميص برتقالي مال هاواي "لزوم التمويه"
و رجعت صوب دبي و تواعدت ويا المفلس عند مكان دوامي بسبب توفر المواقف المجانية و المفلس يحب اي شي مال بلاش، ما يحب يخسر فلوس ابدددا

طبعا عشان محد يشك فينا انه نحن مواطنين حاولنا قدر الامكان انه يكون شكلنا سياح و لهذا السبب قمنا نرمس بلغه عجيبة يوم حد يقرب منا و يوم حد يرمسنا نتعامل وياه بالاشاير بس عشان محد يزعجنا لول

المهم

وجهتنا كانت الى سوق مرشد عند خور دبي و الهدف كان تصوير حياة الشارع
او كما يسمونه عالميا -street photography-

بتركم في البداية مع صوري و بعدها صور المفلس مجموعة انسان

يوم كنا نصور هالصورة تجمهروا الهنود و خاصة يوم كان المفلس فوق الدري
يوم نزل قلتلهم - موفي خلاص كل واحد يروح بيت -