الســـلام عليـــكم...


أول شي.. بجد بجد بجد.. اشتقتلكم وااااااااااايــــد.. :)

..

في هاليـومين ودعنا سنة.. و طلة علينا سنه يديده.. حامله وياها وااايد من المفاجآت اللي ما نتوقعها.. منها اللي بتسعدنا.. و منها اللي بتخيب أملنا.. بس المهم انه ربي يعطينا الصحه و العافيه .. و يزرع الطمأنينه و الرضا و القناعه في قلوبنا..

في هالسنوات اللي مرت.. اتغيرت حياتي وااايد.. اتغير تفكيري.. حسيت اني كبرت بتصرفاتي.. بقراراتي.. حتى بدمعاتي.. و خصه في الايام اللي طافت .. حسيت اني لبست نظاره يديده.. خلتني أشوف أشياء .. بطريقه يديده.. بشعور يديد.. بامتنان أكثر.. للحياه اللي عطانا اياها رب العالمين..
كان ودي أكتب .. و اسجل مشاعري و مخاوفي في كل فتره.. كون الواحات أجمل أرشيف لحياتنا .. لكن للاسف.. كنت وايد اتغاضى عن هالشي.. لكن هالمره ..مستحيل..!

كان الموضوع.. مثل الحلم.. واقع مب قادره اتخيله.. ولا استوعبه.. رغم الشهور الطويله.. رغم العلامات.. و سوالف الناس.. رغم النتايج.. و البشارات.. الا في ذاك اليوم..
يوم.. أصبحت فيه الشمس بألم.. ألم أجذبه كل ما احس فيه.. معقوووله..! يعني الموضوع جد..! و صار الوقت..!!
وما مضت الا ساعات..بين ذكر الله و مخاوف اللي حواليني.. و آلااااااااام.. ما اعرف شو مصدرها.. و هل عندي القدره أتحملها ..!! كانت المشاعر مختلطه.. ألم.. و تخدير.. و حشره في الغرفه..
و ما هدى الوضع.. الا و انا أسمع.. " صرخه ".. وشي صغير بدت الايادي تتلقاه.. يااااااااا الله ..! وصل .. أخيراً..

وصـــل نور عيــوني.. اللي خلاني أحلـــى " مـــامـــا " في الدنيا..

كنت أتأمل تفاصيل جسمه الصغيرونه.. صبوعه.. عيونه اللي ما اتركز الا علي.. سبحانك ربي.. معجزه..! معجزه ما يحس فيها الا من عاش هالتجربه..
في هاللحظه بس.. عرفت غلا يديد.. لأمـــي..
يالله .. هالكثر امهاتنا عانوا.. و اتعبوا.. وبرغم تقدينا لهم.. حسيت انا ما عطيناهم ولا ربع من حقهم..
استحمــلوا تعب الحمل.. 9 شهــور طويـــــــله.. عانوا من آلام.. ما يعلم بها غير رب العالمين أثناء الولاده.. و صبروا و اتحملوا السهر .. و الزعيج.. و الارهاق النفسي قبل الجسدي ..

يالله .. ما أغلاج يا الام..

و انا في المستشفى.. يتني النيرس.. ويلست اتسولف شوي.. و اتقولي يا حظج بوجود امج وياج هالايام.. انا امي اتوفت و كان الموضوع عادي.. يعني ما حسيت بحاجتها وايد.. بس في حزه الولاده.. ما بغيت في هاللحظه غير امـــــي.. احتجتلها وااااايد .. لاني حسيت فيها و بمعاناتها..
مسكينه.. غمضتني.. كانت تتكلم و عيونها كلها دموع.


حتى الابو.. ما انكر فضله.. وقفته و محاتاته.. و فرحه عيونه بشوفة عياله..
و سبحان الله .. برغم معاناة الام.. الا انه هم الاب أكبر.. ولو انه ما يبين عليهم..

وصيه ..!

هالله هالله في أمهاتكم.. ولو ضايقوكم.. ولا حسيتوا انهم مب متفاهمين وياهم.. ولو شو ما سواو فيكم.. يكفي.. يكفي انها اتعب.. عشانك
هالله هالله في أبهاتكم.. مهما أحبطوكم.. ظلموكم.. اتحكموا فيكم.. ترى أفضالهم مالها مثيل..
..

سبحان الله..
العيال نعمه.. نعمه حلوه من رب العالمين.. التعب و السهر.. يهوووووون .. بشوفه بسمه عيونهم.. غلاهم غيييير.. و حبهم غييير.. كم يسوى يوم اتشوف هالصغيروني ما يرتاح الا بين ايديني..

..

ربي يبارك في الجميـــع..


..
همممم.. و هذي أخباري..
و انتو..؟ شخباركم ؟