هالمره لازم نوقف ويه بعض وقفة شخص واحد

الامارات او دبي بالتحديد مب طايعه تعترف انها متأثره بالازمه لأن هالشي بينعكس عليها سلبا وبيشردون نص الناس وبيضطرون ينزلون الاسعار وبتتراكم عليها ديون و و و و و و فهم يحاولون يوهمون الناس ان الامور اوكيه وماعندهم اي مشكله وكل شي طبيعي وانهم بيستمرون على نفس الموال ولكن هذا كلام جرايد لا أكثر الواقع شي مختلف تماما لأنهم مايبون العماله الموجوده تطلع لأن راح نتضرر بان السيوله كلها بتطلع من البلاد وبالتالي راح يكون في نقص كبير والبنوك بتتأثر بشكل كبير ولو بنك واحد عندنا يطيح راح يطي وراه باقي البنوك لأنهم مرتبطين ببعض واي مشكله بتأثر على الباقين فهم يحاولون يعيشون حالة تقشف عشان يتجنبون هالمشاكل خلال الفترة اليايه وياتصيب ياتخيب

نحن مب في الجاهليه عشان ينقص علينا ونصدق كل شي بدون ادله، اغلب مشاريع دبي مالها تمويل اليوم ودبي ضاغطه على عمرها بقوه عشان تحاول تكمل المشاريع اللي بدت فيها مع تمديد الوقت واغلب الشاركات الضخمه متوهقه في السيوله اللي شبه انقطعت عنها بسبب خوف البنوك من تمويل المشاريع الكبيرة عشان مايطيحون اذا تعذر التسديد، المشاكل مابتيبن الحين خلال السنه اليايه بتشوفون مشاكل وبلاوي يديده من ورا هالادعاءات اللي بتخلي الناس يعيشون في غفله ويتفاجؤون انهم ماستعدوا للي ياي بسبب تصريحات الحكومه والمسؤولين

بالنسبه للسيارات في بعض الدول الغربيه الاسعار وصلت للنص وهني حاليا مب طايعين ينزلون فلس واحد لأن منطقة الخليج معروفه بانها اكثر منطقه في العالم يمشي فيها سوق السيارات والناس تحب المظاهر وحتى اللي ماعنده ياخذ السيارة بتمويل وحسب احصائيات الوكالات نفسها بان حوالي 85% من اللي يشترون سيارات ماياخذون كاش حتى لو كان عندهم بل يفضلون التمويل، البنوك تقريبا شبه وقفوا التمويل وبدوا يتنقون بعض الاشخاص اللي بيعطونهم قروض عشان ماتصير مشاكل في التسديد وبالتالي عجز في الميزانيه، معناته الوكالات رضت ولا مارضت المبيعات عندها يتنزل حوالي 70% هذا في احسن الحالات اذا ماكان اكثر بعد يعني السيارات اللي توصل الحين لو قدروا يبيعون نصهم قبل في نهاية 2009 هذا يعتبر انجااااااااااز لأن عندهم في المخازن سيارات بالهبل أكثر من عدد شعر راس أكبر مدير فيهم، خفض الاسعار هذا شي الزامي عشان المبيعات تمشي وترد لهم شويه من السيوله اللي تجمدت في هالسيارات وقالوا الشركات الام راح تضغط على منطقة الخليج عشان تنزل ولكن الظاهر مايفيد وياهم إلا المقاطعه مثلما الكل يقول وهذا بالفعل اللي صاير محد يبى يشتري الحين كل حد يقول بنتظر الاسعار تنزل وبالتالي الوكالات تعيش بداية الازمه لأن محد يروح لهم ومب قادرين يبيعون المتوفر عشان يفكرون يطلبون زياده

فحسب وجهة نظري لو مانزلوا الاسعار عقب فترة بنشوف الوكلاء اللي عندنا يطيحون ويعلنون افلاسهم واحد ورا الثاني وعقب بتنباع السيارات برخص التراب عشان يستردون شويه من المبالغ اللي اندفعت، قبل يوم ارتفع سعر البترول كل شي زااااااااااااد سعره وبدا الغلاء والحين يوم سعر البترول تقريبا صار او بيصير ارخص من الماي مانزلوا عندنا تقريبا ولا شي بس فالحين يستنزفون الشعب ويمصون دمهم عشان يغطون على غلطاتهم وان شاء الله الاسعار تنزل والشعب يكون المستفيد الاول وأتمنى أتمنى أتمنى أقل شي 50% من الاجانب يطلعون من بلادنا عادي راضين مانبى مطاعم ومحلات راقيه و و و و و بس على الاقل بنحصل راحة البال وبنعيش بهدوء والواحد عقب بيعرف يربي عياله ويعطيهم حقهم

السموحه بس فيني قهر ونار فحبيت
اعبر واطلع من اللي في
خاطري شويه


نعم للمقاطعه ولا للغلاء بعد اليوم