وداعا 1429 - 2008

**تحفه** · 31-12-08 ||, 12:24 AM

هالسنه كانت صعبه علي! حزنت فيها وايد .. وفرحت فيها وايد ..

اكتشفت الناس بمعادنهم الاصليه ! عرفت منو يحب لي الخير من الناس. مريت بدروس مهمه فاكيد لازم اشوف كل المشاكل بمنظور ايجابي =)

هالسنه اتاحت لي فرص في كثير من نواحي الحياه .. احس انها بدايه لمسيره مهمه بتحدد انا شو بسوي في المستقبل. ولو انها كانت مثل "ومضات" بس اعتبرتها اشارات مهمه لي.

الدروس الي تعلمتها من اخطاء .. اتمنى اني ما اكرر الاشياء الغلط الي مريت فيها

**بنت الدلع** · 31-12-08 ||, 01:16 PM

السلام عليكم ورحمة الله وبركاته

2008 كانت سنة مليـــــئه بالأحداث

حسيت اني وايد صرت رزينه أكثر عن قبل
واحترام أهلي لي زاااد بشكل ملحوظ
قبل كان اسلوبهم مختلف شوي معاي، يعاملوني على اساس اني وايد دلوعه بحكم اني آخر العنقود
بس الحين وايد قاموا يعتمدون علي "الحمدالله"

اتعرفت على وااااايد ناااااس ومن شخصيات مهمه جدا في المجتمع
أبدا ماكنت متوقعه اني بدش في هالمجال وبحتك مع هذي الأجناس

اثبت للكل اني اذا ابا اسوي الشي اقدر اسويه بجداره
وهالشي عطى انطباع جدا ايجابي عني للناس
وكان كلام الناس جدا جميل عني

كونت صداقات مع شعب جدا حلو ومن مختلف الدول في جنوب امريكا
كانت ايام وايد حلوه

اقترفت خطأ كبييير بحق نفسي وواايد أنبني عليه ضميري
بس الحمدالله اتعلمت من غلطتي

وااايد تألمت في هالسنه وحزنت على اشيا صارت مع اقرب الناس لي

فارقت ناس كانت لهم معزه كبيره في قلبي

ماكنت متوقعه ان هالشي بيصير

تزاعلت مع اثنين من ربيعاتي

وصلتني هديه في عيدميلادي الـ 20
وكانت شوي تضحك من اقرب صديقه لي

الله انعم علينا بولدين وااااايد حلووووين

تطوعت مع دبي للعطاء وصبغنا مدرسه في عيمان
كانت تجربه غريبه بس حسيت اني سويت شي يفيد مجتمعي

تعلمت بعض من فنون التصوير

بنت اختي صارت وااايد تاخذ من اطباعي
حركاتها ستايلها دلعها بس جرأتها مب علي

هالأشيا الي مرت جدام عيوني

ان شاء الله سنة 2009 تكون سنة خير على الكل

**شمعة أمل** · 31-12-08 ||, 02:59 PM

سنة 2008

- استقبلناه باحلى حفله وعقبه بـ ثلاث ساعات حصلت عمري في المستشفى

- من الناحية الجامعيه، أع! هالكلمه تكفي لول.. كلاسات مسائيه وقروب لـ سمستر كامل ويا دراكولا

- زعلت من خواتي لول

- الصيف كان حلوو!! أحلى شي وجود بنت عمي ويانا! ربشتنااااا.. بس يوم بنت عموه يتنا ماعيبني.. كنت اشرد عند ربيعتي

- رمضان ماكان جنه رمضان.. مادري ماكان حلو

- كل عيد مر علي في 08 ماعيبني

- استويت انطوائيه< وهالشي مكرهني في 2008.. تولهت على كلحد!

- بس مع هذا سويت خمس عزايم لا تنسى الصراحه

- دخلت ال19 .. سنه بايخه! ماعرف الومه على هال19 ولا على 2008؟

- بس عيدميلادي كان حلو

لكن كنت وايد حزينه لانه امي وابويه كانو مسافرين

- اشتغلت لـ ثلاث شهوور وكنت أدرس في نفس الوقت .. كان كشخه!

- سرت الهند ورديت في 24 ساعه

- كنت على أخبار الأمارات

- كنت محظوظه من ناحية الشغل لانه شغلي كان يخدم الوطن وكنت اشوف الأشياء الى انجزتها او كنت ظمن هالانجاز في الجرايد ولا التلفزيون وهالشي شجعني وايد وبفضل هالشي تعرفت على شخصيات مهمه في المجتمع من بينهم وزراء وشفت الشيخ محمد بن راشد D:

- كملت سنه أسوق وسرت أجدد ليسني بروحي

< هالشي انجاز في بيتنا لول دايما يطرشون مندوب يجدد الليسن

- احلى شيييي انه ربيعاتي عرسووو .. و 2 ربو ويابو احلى بنوتات 3>

- في 2008 خلوني أسوق لين الشارجه

بس هاللي قدرت أفكر فيه الحينه!!

**أمطار** · 01-01-09 ||, 09:22 AM

2008 ما ادري في أي خانه اصفها؟
تعيسه + سعيده

بدايات 2008
عشت فرحه ورا فرحه
كنت دوم خـــالت حد .. بس استويت عمــه هالسنه ^^
توني حسيت ان اخواني مقصرين بالعيال على عكس خواتيــ ...!

شهر 7
كان بداية التعاسه
صارت مشكله غيرت منظوري للأمور
ولازلت اعيش تبعات هالمشكلهـ ..!

واكتشفت ان ذاكرتي شرات ذاكرة البعير (ما انسى اللي يجرحني)
وقبل كنت احسب اني انسانه مسالمه واسامح الكل وانسى بسرعهـ ..!

لكن مش هالمره!

صارت وفيات كثيره من الأهل والأقارب
ما تهنينا في الأعياد

عيد الفطر عندنا وفيات في العايلة .. قبل وبعد العيد

عيد الاضحى استوى الأدهى
ولازالت المشكله مستمره

ديسمبر يا ديسمبر
الفرحه الوحيده اللي حسيتها هي احتفالات بلادي بالاتحاد

وديسمبر رجعني 3 سنين ورا
خلاني ارجع اعيشهم من يد ويديد

وسالت الجراح في ديسمبر مع عزه
ولا زالت تسيل!

ولازال تأثير ديسمبر مستمر حتى مع اطلالة يناير 2009

وايد احداث استوت بس الفوق يكفي

وداعاً 2008

**عفاريتووو** · 01-01-09 ||, 11:35 AM

2008

- في بدايتها مرينا بموقف حسيت فيه انه اخر لحظاتنا بهالدنيا
لكن الحمدالله الحمدالله انه الله نجانا

- في هالسنة صار عندي سيارة

و قمت اروح الجامعة بروحي

- في هالسنة و خصوصا في نهايتها فقدنا واييد ناس و خبر وفاتهم اثر فيني واييد

- هالسنة بعدتني عن ناس و قربتني من ناس ثانيين

- صار عنا دانة

في العايلة

- شفت دولتين اول مرة اروحلهم بلجيكا و لوكسمبورغ

- صرت احب بوظبي

بعد ما كنت ما احب اروحلها

ان شالله تكون 2009 احلى على الكل ^_^

**تحفه** · 02-01-09 ||, 03:33 AM

١- ماتو ٢ عزيزات على قلبي بموت الفجاه! اول ماعرفت يلست اضحكت من الصدمه فالبيت زاغو علي .. وبعدني مب مستوعبه انهم خلاص راحو .. بس تدون احس اني بشوفهم احس انهم مسافرات وبيوون بس بيطول سفرهم .. وكل ما اييبون طاري انهم توفو ابتعد ولا اغير السالفه .. مابي اتقبل ولا استوعب شي ... مب وقته
ماشبعت منهم

كلهم طيبات

٢- ابتعدت عن ربيعاتي و كزناتي .. كل ما اشوفهم احزن وتضايج لاني اتذكر الي راحو *sniff .. احب ايلس فالبيت

٣- كسرت الرقم القياسي في الغيااااااااب ... كل اسبوع اغيب يوم ولا يومين ولا ثلاث ( ماتمصخر ) بس جي احب ايلس فالبيت مالي خلق الجامعه

٤- هالسنه سويت معرض صور خاص فيني انا بس ! كان حللللللم وتحقق!

٥- بتاثير من شخصيات فالعايله وبرع .. نما "الهام" يديد في حياتي .. هالسنه عرضت ٢٠ صوره من صوري والريع كله عائد للمحتاجات فجامعه زايد

٦- صرت من المعجبين الكبار ب محمد عبدو

٧- يدتي تعبت وايد - الله يخليها لي - !

٨- هالسنه حطيت حد لكحد له تاثير سلبي في حياتي

٩- غيرت رقمي وايد ... وكل ما ابي اغيره اتذكر بنت قالت لي انتي كم مره تغيرين رقمج فالدنيا؟ تسع مرات غيرتي رقمج هالسنه !!! لوووووووووول ماستوعبت اني اسوي هالشي الا يوم قالت لي البنت هالجمله! ولا قبل ماكنت حاسه بعمري!
١٠- هالسنه ... كانت طويله - قويه - صعبه - حلوه - مره - ثجيله عالنفس - انترستنغ و ممله ! ماقدرر اشرح اكثر عن جيه !