البنــــات ..

[ملاك الروووح]

السلام عليكم ..

:


ماشاءالله اللي قبلي كفوا و وفوا ..

وشرات ما قال المزوحي .. نسبة الذكور عندنا في البلاد أقل من الاناث اصلا ..

وسبحان الله من يومين أسمع الشباب ويانا في الدوام يرمسون ويتحرطمون

اونه بيسوون انقلاب


قلت لهم ليش ؟ شو مستوي ؟

اونه انتوا عددكم اكثر عنّا بواااااااايد ..

وفعلاً لاحظت عقب انه عددنا ضعفهم تقريباً حتى عند قوم خواتي في الدوام ..

معظم الموظفين .. من الجنس الناعم ..


ف اتفاجأت بموضوعك اليوم لول ..

:

وبعدين أحس في الوظايف اللي تتطلب جهد بدني ... بتلاقي معظم الموظفين من الشباب ..

يعني مثلا ف دوبال ولا ادنوك ولا اي مكان ثاني شرات هالاماكن

بتحصل فئه بسيطه من البنات ..

لأنه الشغل هذا ما يناسب طبيعتنا ..

عشان جيه معظم الوظايف المكتبيه تحصلها حق الحريم ..

:

بالنسبه للراتب ..

مادري ليش الكل حاط ف باله انه ما عندنا التزامات شرات باجي الشباب ..!

انا عن نفسي بقولك شو أسوي ف راتبي ..

1400 قسط موتر أبوي .. اللي خذنها هديه حقه ..

1000 أساهم في ايجار البيت ..

1500 قسط الاثاث ..

1000 حق الوالده ..

500 حق اختي اللي في الكليه ..

و أعطي اخواني احيانا ..

يوم نروح الجمعيه مستحيل اخلي ابوي يدفع ..

هذا غير فواتير تيلفون البيت والنت .. انا أدفعهم ..

اممم شو بعد ..

الحالات الانسانيه اللي في فرنسا ..

واللي يتم لي من الراتب ..

أدفع فيه فاتورة تيلفوني اللي صكت الـ 3500 الحين

وحق الشوبنغ ..

واتم على بساط الفقر لين اخر الشهر لووول

::

نحن عندنا ف مكان عملنا ..

واااااااايد شباب خطبوا زميلاتهم ..



يعني نسبة الزواج ارتفعت صج

او خطبوهم بس ما استوى نصيب للاسف

لووول

ف أحس ف بيئة العمل المختلطه هاي .. نسبة الزواج تكون أكبر بين زملاء العمل ..

ونسبة الانحراف بتكون كبيره بعد

لوووول

:

لي عوده للموضوع

وايد أسئله انت حاط ..

يبي لها تعمق

[المقاتل]

هلا هلا والله بتحوووفة الواحات ( تحفه ) .. والله وبحســن نيّــه انا هب حاط دوبي فدوب البنـــات .. بس أمسات كنت اتناقش ويا الشباب .. وكل شخص أبدا رأيــه وبحراره عن موضوع الموظفـــات وكيف ان الموظفـــات ياخذون الكثير من المناصب وكيف انهم سبب في بطالة الشباب .. انا ما اقول ان هاي الآراء انا طرحتهـــا بالعكس هذا كلام الشباب .. وانا شفته مناسب فطرحته كونه موضوع جميل وحساس و حتى اني انا ممكن استفيد منه .. ولا شورايكم ؟؟ وصحيــح اننــا نحن بندش 2009 بس لاحظت ان الناس لازالت تتناقش في مثل هالمواضيع .

وبصراحه كلامج فيه شيء من الصحــه .. واعتقـــد وبالمختصر المفيد انتي تطرقتي إلى ثلاث نقــاط جميله .. وهيه اهتمام الشباب و استفادة الحكومه من القدرات الموجوده عندها و أن البنــت تثبت وجودها كجزء من الجتمع وو انها ما تدري شو راح الزمــن يسوي فيهــا .

بعد بسم الله .. اول شي ترا الله الحـــافظ .. يعني جيه ولا جيه ان شاء الله ما بيصير في البنت سواء اشتغلت او ما اشتغلت إلا المكتوب .. هاي نقطه .. والأخرى ان نحن كمجتمع اماراتي ولله الحمــد لازلنــا متمسكين بعاداتنا وتقاليدنا ان البنت ما تعيش روحها مثل حياة الغرب ( ولا غلط لو علط صلحولي يمكن تغير واقع الحال ) يعني .. ان هناك عائله لابد وانها تشيلها ( يعني لها سنــد ) ما اعمم وأقــــول كل الفتيات اقول الاغلبيه العظمى .. وبصراحه توني فكرت بنقطــه أخرى وهيه المرأه الي شايله عايلتهــا بنفسها .. يعني تشتغـــل من اجل انها تعيـل عايلتهــا هاي حاله مستثنــاه يعني نقطــه لصالحكم انتوا ..

والنقطه الي ضدكـــم .. هل كل البنات ممكن يفيدون الدايره الي هم يشتغلون فيهـــا ؟ مادري ليش احس ساعات انهن يغارن من بعض ويسوون مشاكـــل .. والي اييبون وياهم مشاكلهم في البيت الى الدوام .. ولا الموظفه الفلانيه مزاجههــا الله اكبر .. ما بتخلص المعامله ..

بالنسبه للنقطتين الي ذكرتيهن فكلامج صحيح .. لي عـــوده

[ملاك الروووح]

مادري ليش احس ساعات انهن يغارن من بعض ويسوون مشكلات .. والي اييبون وياهم مشاكلهم في البيت الى الدوام .. ولا الموظفه الفلانيه مزاجههــا الله اكبر .. ما بتخلص المعامله ..
\

^


في هاي معاااااااااااااااك حق ..

اي مكان فيه بنات تأكد انه فيه .. غيره وحسد وفتن ومشاكل .. ونفاق ..

لكن لاحظت انه حتى الشباب اللي عندنا في الدوام استغفر الله استووا اخس عن الحريم

ينقلون رمسه .. وفلان قال وفلانه سوت ..

ويزعلون ومادري شو !!

شو هالمنكر بعد !!


يعني في بنات بصراحه ما يخصهم ف حد ..

ولا يحبون يسوون مشاكل ولا يدورون عوار الراس

بس بعد الواحد مايسلم منهم ولا من رمستهم ..

الااااااااا يطلعون شي يرمسون عنه !!


الله يعينا بس ..

[المقاتل]

ويا هلاااااا والله بـ المزوحي .. عاااش من شافكـ ياخي .. ما بغيت تحدر عنـــدنا يا ريــــال .. اقرب اقرب .. بصراحه الشباب الحمـــــدالله ينشاااافون .. سر البداير وشوفهم ولا عوافي ولا شوفهم فالبر .. مكثرهم ماشاء الله .. الله يزيد ويبارك نحن قلنــــا فئه من الشباب هم المدمنين بس مش كلهم .. القصــــد ان شي شبــــاب هب ماشي .. وبالنسبه لهاييـــل الي يداومون 10 تيام فالشهـــر هايييــــل لازم يحيلونهم للجنه الـتأديبيه عسب يستنعون ويردون يشتغلون .. او .. يطلعون قانون صارم بالنسبه للغيابات .. ( جذه صدقني بيتأدبون .. ) ترا شوف بقــولكـ .. الهيازه هالأيام منتشره .. مثل الوباء .. أدبهم بيصطلبون .. والا شو مخربهم غير الدلـــع .. امســـات والله ارمس حد من الشباب قالي تعرف منو " حمدان برتش " قتله هااه .. منو هاه .. قالي واحد .. من شفته اعوذ بالله .. هاه لو يعدمونه بيفكون العالم من شكله ..

القصد .. ( الحمـــدالله شبابنــــا موجودين .. ولا كيف يقولك 49 % نسبة بطالة الاماراتيين ؟؟ + لو يحطون قانون للشباب للـي ما يلتزم بدوامه يدخل تجنيـــد اجباري بتشـــــــوف الدواير كلها شباب هههههه ) .

دامك حدرت .. بسألكـ سؤال .. شو ميزة الشباب لو يشغلونهم ؟ يعني شو ممكن ينتجون ؟

وللجميع ليش ما ياخذون الناس الي عندها شهادات اعداديه ويطورونهم .. !!

احس وايد في طاقات ما تستثمرها الحكومـــه .

[وحي القلم]

السلام عليكم

كنت أبى أكون من المتابعين بس .. لكنه ردك هذا خلاني أحس أني لازم أشارك

والأخرى ان نحن كمجتمع اماراتي ولله الحمــد لازلنــا متمسكين بعاداتنا وتقاليدنا ان البنت ما تعيش روحها مثل حياة الغرب ( ولا غلط لو علط صلحولي يمكن تغير واقع الحال ) يعني .. ان هناك عائله لابد وانها تشيلها ( يعني لها
سنــد ) ما اعمم وأقــــول كل الفتيات اقول الاغلبيه العظمى

أولا.. أنا مب من مؤيدين فكرة أنه الحريم يشتغلن و الرياييل ييلسون فالبيوت

بس هذا مب معناته أني أعارظ شغل الحرمه

و الكلام اللى انته قلته كان ممكن أني أقول لك أنه صح قبل كمن سنه.. بس للأسف واقعنا تغير

بالنسبه للحرمه المعرسه إذا كان ريلها متكفل بالصرف كله.. فـ هاي تيلس في البيت أحسن

بس إذا الريال مب من النوع اللى يصرف.. أو أنه معاشه بسيط بتضطر الحرمه أنها تشتغل

عشان تسد حاجتها خصوصا ويا هالغلا>> و من اللى أسمعه بديت أحس أنه نسبة هالفئتين كبيره للأسف

ولا إذا كانت مب معرسه.. صح أنه عندها أهل يصرفون عليها.. بس لين متى؟؟

يعني لا قدر الله إذا استوا بامها و ابوها شي تراها بتعتمد على اخوانها

و يوم بيعرسون اخوانها و بتزيد مسؤولياتهم يمكن أنها تحس بانها عاله عليهم.. ولا يمكن ينسونها بعد

فـ ليش تخلي عمرها تحت رحمة فلان و علان و هي تقدر أنها تصرف على عمرها؟