هلا حلـم، شو أخبارج؟؟ لج وحشه



ما هي أسس اختيارك لمسمى صديق ؟
ممممم يعتمد من صديقه لـ صديق
مثل ماقلتـي، فـ بنات نتعرف عليهم من المدرسه ولا الجامعه ولا من عزيمه ولا من النت! وانا اشوف انه يتغيّر لكل حـاله، بس ككل اذا قررت أسمي وحده صديقتي هو لانها صادقه معايه، وماتوقع منها تكون صادقه في كل شي ومب ضروري تخبرني كل شي، انا عادي عندي لو أعرف ولا ماعرف شي عنها، ومن أهم الاشياء اني اقدر اقضي أوقات الملل وياها وانسى عمري وياها في الضحك والسـوالف!!
وأهم شيـ أهم من الى ذكرته فوق هو أخلاقهـا! انا انسانه أحط الأخلاق فوق كل شي، لازم البنت تكون محترمه، ماتسب في رمستـها، تعرف معناة كلمة شكراً عفواً لوسمحتي، ولازم تعرف تناقشني في أشيـاء مهمه، ماحب السوالف العاديه والبايخه الى عادة البنات يرمسون عنها يوم يتيمعون! أحب ارمس عن أشيـاء مهمه!

وما هي درجة مصداقيتك مع صديقك ؟ بمعنى هل تقول له كل شيء في أي وقت ؟
أنا انسانه أحب خصوصياتي وماحب أخبر ربيعاتي كل شي، ربيعتي الى هي أقرب وحده مني ماحس اني أقدر أقول كل شي لها!!
الوحيده الى أحس عادي أخبرها كل شي هي ربيعتي من أيـام الطفوله! أعتبرها أختي، هي أكبر مني بـ 6 أيام، سبحان الله يوم أسير بيتهم وايد آخذ راحتي، حتى مرات اسير بيتهم وهي بعدها ماردت من الجامعه! أيلس في بيتهم أشوف تلفزيون ولا أسولف ويا امها ولا اختها لين ترد!
بس in general أنـا انسانه كتومه، أسمع مشاكل ربيعاتي، أخليهم يفضفضولي.. بس أنا أفضفضلهم.. نااااااادراً!


هل الحديث الدائم مع صديقك دلاله على قربك منه ؟
هيـه ولاء
يعني مهما كان لازم الصديقه اتم in touch وتحاول تتصل على قل مره كل اسبوعين، بس انه تتصل كل يوم وخمس مرات في اليوم ماحس انه هالشي ضروري


ما هي الأمور التي تتوقف عندها الصداقه ؟
الكذب الزايد ، يوم تفرّ أخلاقها واحترامها وتربيتها في الزباله، يوم الصديقه تضايجني أكثر من ما تفرحني بمعنى آخر صداقة سامه.


هل صدمت باختياراتك للاصدقاء وندمت ؟
مرتيـن
هو ندمـت، بس في نفس الوقت ماندمت!! لاني تعلمت دروس مفيـده من التجربه ومنهم بعد!
لولا هالصداقات المنتـهيه جان انا ماكنت بكون واعيـه، ماكنت بعرف مدى أهمية السعاده في حياتي، ماكنت بعرف أكوي ثيابي، ماكنت بهتم في دراستي هالكثـر.
مهمـا كان الـ ex-friends يستاهلون كلمة شكـر!







في النهـاية،
الصداقه is a two way road، يحتاج الاهتمام والراعيه والوقت من الطفريـن. نجاح وفـشل الصداقه يعتمد على مدى ارادة الطرفيـن على بقاء هالصداقه.