1- شو كان اسم المدرس او المدرسه في الصف الاول؟
أبله أمينة الأساسية + أبلة عليا ^^
2- منو المشاغبين إلي كانو امسويين جو في الصف ؟ وشو كانو يسوون ؟
ما أذكر شخص ولا مجموعة عـ وجه التحديد لأن السؤال ما يحدد المرحلة الدراسية ..
3- شو كنت كاتب على طاولتك في المدرسه ؟
كنت أرسم + تعليقات وعبارات بسيطه ...!
4- شو التصرفات إلي كنت تكرهها من بعض المدرسين ؟
لمن يكون المدرس من صنف الـ (( أنا يايه أشرح الدرس وخلاص ! ))
بمعنى أصح اللي ما يتفاهمون مع الطلبة !!
بس بشكل عام ،، الحمدلله أبلواتي كلهن حبابــــااات ^___^ ..
5- من المواقف الطريفه إلي صارتلك في ايام الدراسه ؟
واااااااااايـــــــــــد ،، مثلا لمن طحت عـ ويهي بنص الساحه وبوقت الاستراحه وجدام الاداره !
مب إلا طحت عـ ويهي ،، طرت بالسما عقب تمددت عالأرض ،، جني الا قاعده انظف الساحه بمريول المدرسه
حتى التمو علي بنات نصهم ماعرفهم لول ^^"
+ في مواقف ما تنذكر ،، أخاف تفهمون السالفه غلط يعني^^"
6- منو كان الضحيه إلي مختارينه عشان اييب حق ربعه من المقصف ؟ وشو البهدله الي واجهها ؟
بعد يعتمد على حسب المرحلة ،، بس بشكل عام قليل جدا جدا ما أسير المقصف بروحي =#
حتى أذكر مره اضطريت بما إن ربيعاتي ارتبطو بشغله ،، فرحت أوني بشرتلي وباخذلهم معاي ..
تخيلو اوني استحي اتجدم شرات ما يسوون البنات وتميت جي واقفه أوسعلهم الدرب لول
ليمن دق جرس الحصه ورديت الصف وانا مو شاريه شي ،، وانهزبت يومها من رفيجتي
صدق ماعرف اشتري ،، حتى أذكر بالثنوية إما إن نسير قبل الاستراحه أو عقبها (( بين الحصص ))
أو إن أخلي وحده من رفيجاتي تشترلي + أحيانا اختي الأصغر 
!
على فكرة مرات صدق يكون منظر المقصف شنيع !"
7- اخســاس سويته في ربيعك / الفراش / المدرس / المدير ..!
الحمدلله الحمدلله الحمدلله علاقتنا مع المدرسات جدا طيبه ،،
والعاملات كذلك نسلم عليهم ويسئلون عنا ونسولف ^___________^..
يعني مووول ماعدنا هالسوالف لأن مهمن كان تظل الحدود موجوده ،،
إلا مع ربيعاتنا ،، خاصه لمن نستخف 
..
+ كنت بذكر شغله سويتها لـ دموع قلم لمن لعبنا (( تهادو تحابو ))
تخيلو عـ حظي ظهرلي اسمها وسويتلها شغلات لا تغتفر ههه ..
حتى كنت بحط عنها موضوع بالواحات ، اونه : دموع قلم تركض في ساحة المدرسه P=
بس غمضتني عقب ،، ربي لا يحرمني منها 
..
8- كم مرة جازفت ونقعت شلق في المدرسه ؟
ما يخصنا نحن بأبسط من هالسوالف ،، وانتو تقولولنا شلق 
!
أصلا ما جربت أنقع شلق بحياتي كلها ،، يمكن مره وما فلحت بعد لول ..
مادري عاد اذا هذا شلق ،، بس واحد من الاهل قص علي (لمن كنا صغار)
وحمسني عشان أجربه ،، جي حجمه صغير ومدور ولونه أبيض // ينقط بالارض بقوه عشان ينقع !
تميت أقطه مره مرتين ثلاث ،، عشره ليمن نقع ومالقوني إلا وانا شارده 
!
عبالي بتستوي حريجه 
..
9- كم مره غسلك المدرس ( ضربك ) ؟
محد غسلنا ولله الحمد 
،، بس أذكر كمن مره انضربت بالمسطره 
..
آخر مره لمن كنت ثالث اعدادي ،، مجموعة منا لأن ناسين نحل الواجب والابلة اونه بتظربنا جي بغشمره =]
حتى أذكر وايد كنت معاها وانا الوحيده اللي تميت زايغه أسحب يديني عنها والكل يضحك ،، حتى الابله 
..
10- كم مره شردت من المدرسه ؟؟ وكم مره عفدت من فوق اليدار ؟ وكم مره زخوك ؟
بيني وبينكم ،، مرتين لول // اتخيل ..
سؤال خاص بالشباب 
!
11- منو أكثر استاذ كنتوا تلعوزونه .. !
هممم !
12- في أي سنة من السنوات الدراسية خليتوا الأساااتذة يصيحووون دم بدال الدموع .. !
الحمدلله ما وصلنا لـ مرحلة تسريب الدماء 
!
ووو عدنا أبلوات صاحو معانا مو بسبتنا !!!
يمكن في حالة شاذه بس الذاكره ما تسعفني الصراحه 
"
13- اذكر لنا أحد المواقف المحرجة بين الطلبة والمدرسين .. !
واااايـــــــــــــــــــ ـــــد ،، بس ما بقول ..!
14- هل صـادفت موقف إنك انزخيت في الامتحان وانت مبرشـم أو متلبس في حالة غش ؟
من غشنا فـ ليس منا !
إن نبرشم مستحيل ،، ما يخصنا اصلا لول ^^"
بس تمينا فترة جي نغشش بعض شفويا =#
عقب اصطلبنا ولله الحمد =]
{ اسئلة ازقررتيه شوي }
15- مدرس تعلمت منه الكثير لكن خارج نطاق المنهج ؟
وايديـــــــــــــن ،، أصلا كل الأبلوات تقريبا بس البعض منهن بشكل كبيـــــــــر ،،
حتى أذكر مره وحده من الأبلوات قالتلي شغله بهالخصوص خلتني صدق جي ^______^ ..
صدق صدق صدق فضل الأبلوات علي كبير والرب شاهد ،،
حفظهن الرحمن جميعا ،، وكتب لهن خير الدارين يارب ..
16- موقف حسيت إنك ممكن تنظلم فيه من قبل الإدارة لكن المدرسين وقفوا معاك .. !
ما شي ولله الحمد ،، ماعدنا ملف اجرامي ..
17- بعض الأفكار لتقوية العلاقة بين الطالب والمدرس بحدود احترام المدرس ووجود هيبته .. !
الجواب بالسؤال نفسه ،، ياما نشوف أساتذة علاقتهم مع الطلبة ممتازه وتوصل لدرجة السوالف والمزح
+ التم العلاقه لخارج اطار المدرسه بالهاتف والرسائل لكن يظل لهم هيبه طيبه والاحترام متبادل ..
+ العكس أحيانا ،، نشوف الأستاذ شديد وعصبي ويالله يشرح الدرس ويظهر ،،
لكن ماتلاقي الطالب يحترمه ولا يعمل له حساب !
أو ان يكون الاستاذ لين لدرجة غير صحيحه وتسيء له بالنهايه !
هممم المسألة أبسط من طرح أفكار ،، لأن الموضوع يعتمد بالدرجة الأولى عـ شخص الأستاذ وتفكيره ،،
+ يذكر إنه كان بيوم من الأيام طالب على مقاعد الدراسه + يحرص ان يكون متفهم وما يمشي على وتيره وحده أبدا !
//
رد مع اقتباس
وانا غلطت مرتين ثلاث تقريبا وانضربت 
هههههه
مواقع النشر (المفضلة)