همم ،، عدنا !

وأنا كنت بإنتظار عودتكم، أوني عاد أبين اني قد التحدي لووول

بعد ما عرف لنا الضيف الكريم شخصه ،، وتجولنا عالخفيف حول الواحات ..
نحب نضيفه (تي) وندردش معاه حبتين حول قضايا العصر الحديث والجيل الأخير !

لو سمحتوا بغيت الشاي ويه حليب وشوية شكر
عشان أستدرج الذاكرة


يعني مثل ما تعرف أخوي شر البلية ما يضحك ،،
ومن أطرف الطفرات اللي صارت عدنا ،، وبالبدايه // عشان نضحك شوي !

ـ قضية كثرة الأبراج بالدوله ،، بس مش الأبراج اللي نشوفها بالشوارع لالا ،،
الله يسلمك عندكم المراكز والجامعات والكليات سلمك ربي وغيره !

فـ ما رأيك بـ موضة برج العرب ،، أو بالأحرى برج دبي الدارجه حاليا لدى الفتيات ..
وسؤال يطرح نفسه ،، معقوله الأهل ما يشوفون بناتهم واهمه ظاهرات من البيت ؟

والأطرف من كل ذلك ،، إن عـ كثر ما يتصادمون ابـ تعليقات وذم ،،
نلقاهم يزيدون من طول البرج طابق // وهكذا ؟

في الحقيقة هاي تعتبر من الأمور الدخيله على مجتمعنا في الألفيه اليديده يعني لو نرجع مثلا 15 سنه ورا بنشوف بناتنا بصورة مختلفه تماماً مقارنة بما هن عليه الحين وهذا له أسباب كثيرة مابدخل فيها لأنه جانب متشعب وايد، عن نفسي اعتبر هاي من الامور اللي تشوه صورة البنت الاماراتيه جدام هل البلاد قبل الغرب وماشوف انه شي حلو يوم تخلي راسها قد جسمها 4 مرات! هذا غير انها بالطريقة هاي تخلي الشيله مرفوعه من ورا وشعرها نص الوقت ظاهر للخلق وهي ماتدري وماننسى بأن الاسلام حرم هالشي وهذا بحد ذاته سبب كافي يخلي البنات يتركون هالعاده ومايتبعون كل شي غيرهم يسويه بدون تفكير لأن مب كل يسويه فلان وعلان يناسبني فليش امشي وراه حتى لو بين لها انه حلو في الوهله الاولى

:

ـ لاحظنا بالأونه الأخيره قضية يتبادلها الشباب فيما يتعلق بـ غلاء المهور وتكاليف الزواج ،،
فما هي وجهة نظر الأسطوري حول هذي الأزمة ،، وهل هي فعلا غفله يقع بها الإناث !
أم أن من يجب توجيهه حقا هم أولياء الأمور قبلهن ؟
يعني الريال يشكي ،، ومن الصوب الثاني يبادل المعرس اللي ياي لاخته بنفس المطالب !

غلاء المهور وإرتفاع تكاليف الزيجات حسب وجهة نظري الشخصية للواقع اللي أشوفه من الأسباب الرئيسية لإنحراف شبابنا واللي يترتب عليه بالتالي إنحراف بناتنا، مجتمعنا وللأسف يحب الترف والبذخ في الأفراح وخاصة ليلة الزفاف حتى لو كانت العائلتين على قد حالهم لأن هاي صارت من عادات المجتمع الاماراتي اللي مايستغنون عنها، من حق البنت انه تطلب اقامة ليلة زفاف حلوه لأنها ليلة في العمر ولكن في المقابل لازم تشوف امكانيات الزوج هل بيقدر يوفر لها كل هذا ولا لأ فليش تحط عليه ديون ثمن لمجاملة كثير من المعازيم، دول ثانية ماتسوي جيه مثلا في الكويت يملجون وعقب يسوون حفله صغيره في البيت وعقب يصرفون اللي يبونه بروحهم في شهر العسل عشان يستانسون

الاسلام اعطى المرأة حق المهر في الزواج ولكن ماحدده بشي يعني ممكن يكون مصحف ويمكن يكون أمور ثانيه تخلي هالزواج مبارك من رب العالمين، غير ان المرحوم الشيخ زايد حدد المهر بـ 20 الف في الدولة ولكن شي طبيعي ان هالمبلغ مابيكفي حفلة زفاف فارهه دام كل وحده تبى تتحدى الثانية بعرسها على حساب راحتها وسعادتها!

المثل يقول علي وعلى اعدائي فطول ما هالظاهره مستمره بيظل الغلاء مستمر وفي ازدياد إلا من رحم ربي ويطلب مهر معقول أو مايطلب مهر ويخليه على حسب قدرة المعرس والقهر انهم يقولون مجتمعنا يعاني من العنوسه وهم المتسببين في هالشي يعني اغلب اللي ماتزوجوا من البنات يكونون على الاقل رفضوا لهن 5 الاول ماكان وسيم والثاني مب عايله معروفه والثالث شغلته مب حلوه والرابع مب مكمل دراسته والخامس يقرب لناس هم متضاربين وياهم وكلها أسباب مب منطقيه يرفضها الاسلام! وهذا يعود لأخطاء في التربية لأن البنت تعودت انها تحصل كل شي فل اوبنش ماذاقت قسوة الحياة فهي في هالخطوة ماتدور الزوج المؤمن اللي يستر عليها لأ هي تدور فارس الاحلام اللي بتراوي المجتمع كله ان هذا زوجها فيوم ماتلقى مواصفاتها الخاصة ترفض وعقب تتفاجئ انها بالغت وايد فتبدأ تقلل من شروطها شوي شوي لين توصل لمرحله تطلب فيه زوج وبس مهما يكون ولكن بعد مايفوت الفوت ماينفع الصوت

وما رأيك بالآراء القريبه من : بإن الزوج بيستهين بالعروس ! //
والألفاظ كثيره وكأن البعض فاهم المهر على إنه استغفر الله تثمين للبنت ؟


شوفي هذا شي وارد مابقول ولكن بنسبة بسيطة جداً عند البعض من اللي هم بعاد عن الدين وخاصه اذا كانوا شايفين نفسهم وايد على الناس لأن كل شي متوفر لهم وقبل ماينطقون بالحرف يتلبى الطلب فشي طبيعي مابيقدرون الزوجه وبيعتبرونها واجب اجتماعي عشان يحافظون على صورتهم جدام الناس او اذا كانوا مايأدون الفرايض اللي عليهم ويرتكبون الكبائر ترا مستحيل ترتاح وياه مهما عطاها وفي منهم بيوفرون للزوجه كل شي تباه بيت سيارات فلوس غيره ولكن هم مابيكونون موجودين لهم يعني هو لاهي بحايته وشغله وصورته الاجتماعيه وهي في عالم بروحها تتحسر يوم تشوف رياييل الباقيات وياهن طول الوقت لأن في الغالب الريال الدين الخلوق (مهما كان شكله ولونه وأصله) اللي حس بتعب الحياة وكد على عمره لين وقف على ريوله مابيقدم على الزواج إلا وهو عارف نفسه انه مقبل على مسؤولية بيت وأسرة ومفكر في الموضوع الف مره ومستعد له وقادر يصارع عشان يحافظ على زوجته ويوفر لها الراحه والسعاده

واللي يقول آخذلي مغربيه أكرم لي !

شوفي حسب وجهة مهما كانت المواطنه او خل نقول الخليجيه فيها علل وحروف جر وعطف تظل افضل من الباقيات بكل المعايير يعني نارهم ولا جنة الباقيات خاصه غير العرب اللي في منهم يدخلون على طمع وباجر تسوي له شي عشان تتخلص منه وترد تدور واحد من نفس ثوبها تاخذه عقب ماتكون كلت الاخضر واليابس ونشفته هذا اذا كان بعده عايش، واحد من ربعي أسمر البشرة ومصر انه يوم بيتزوج بياخذ شاميه ومايبى مواطنه وحاولت اتناقش وياه في هالموضوع وأوصل لحل بس الحبيب مب مقتنع أبداً وهالشي ماصار إلا من اللي يشوفه من بنات البلاد خاصه انه شخص على قد حاله وحليله مايدري ان بياخذ شفاطه حتى دمه بتمصه وبتطرشه بلادها

ـ بالمقابل ،، ما رأيك بتزايد قضايا الطلاق عدنا بالدوله ؟
عافانا الله وإياكم جميها ..

هاي ردة فعل طبيعية لكل اثنين ماخذين بعض مب عشان الدين والاخلاق هالاشياء تدوم وتخلي الواحد يخاف ربه في زوجته وهي تخاف ربها فيه وبالتالي حتى لو ماكانوا يحبون بعض بحكم انها خايفه تعصي رب العالمين بتكون اوكيه ويه ونفس الشي من ناحيته هو اما اذا هو بس يدور الجمال وهي بس تدور الغنى والمكانه الاجتماعيه العاليه ومواكبة ربيعاتها بآخر الصيحات وكلاً مايهتم بالثاني اكيد العلاقه مابتستمر ولكن ماننكر بأن في حالات طلاق تصير بسبب جانب واحد وبدون مبررات مقنعه يعني طلاق عقب 3 شهور او 6 شهور او سنه بحجة انهم ماأرتاحوا لبعض أو ماتحملوا بعض احسه سبب أبداً مب مقنع يعني الشخص لو كان جاد لازم يحاول ويما حريم غيروا رياييلهم من الفساد للإيمان والرياييل نفس الشي بعد ومافي حد بيحصل شي جاهز كل واحد بيتعب في بداية حياته الزوجيه لأن مافي اثنين على وجهة الكرة الارضيه يتفقون في كل شي 100% لابد يكون في اختلاف ولو بسيط وبالتالي الاختلافات كلها تبين بعد الزواج لما يعيشون تحت سقف واحد ولازم كل منهم يتنازل عن بعض الامور ويضحي عشان المركب يتحرك لأن لو كان واحد يبى يروح في طريق أكيد المركب بيغرق

:

(( خارج الشاشه ))

ـ هممم ،، عباره قالها أخوي المزوحي مره يزاه الله خير // بما معناه :
ما شي سيايير عند المسيد // فاضي ،، تجاوزنا أيام الشهر الكريم ؟

تعليقك // يمكن كلمتك تفيد من غفل ..

الموضوع واضح للأسف مجتمعنا فيه نسبة كبيرة من فئة الشباب واقصد بها الجنسين ماعندهم شي اسمه صلاه ايام الاسبوع بس في ايام الجمعه وفي الاعياد وشهر رمضان ونادراً جان كان طالع ويه حد وصلوا بيستحي على ويهه وبيصلي عشان مايقولون عنه شي ولكن من نفسه هو ماعنده وقت لرب العالمين وبالتالي تكون حياته مليئه بالمشاكل والاكتئابات وهذا كله بسبب ضعف الايمان والابتعاد عن رب العالمين وبصراحه في ناس مهما كانوا مشغولين مستحيل تفوتهم صلاة حتى لو ماصلاها في المسيد مثلا على درب دبي بوظبي شوفوا وقت الصلاة كثير من الباكستانيين اصحاب التاكسي يوقفون سياراتهم على يمين الشارع عشان يصلون ماقالوا عيب مابى الناس يشوفوني وماقالوا مكان خطر صلاتهم قبل كل شي وعقب شغلهم وغيره، عن نفسي بصراحه مابقول اني مداوم على صلاة الجماعة ولكن الحمدلله من أكثر من عشر سنوات ماطوفت ولا فرض حتى لو أصلي متأخر بروحي لأن ماحس بالراحه إلا وانا مصلي وتراها ماتاخذ إلا دقايق فليش الواحد يتهاون في عمود الدين ويضيع دنياه وآخرته

:


(( بعيدا عن المجتمع الخارجي ))

ـ لاحظنا أزمة واحاتيه تتعلق بـ قلة حماس الأعضاء لـ طرح المواضيع ،،
والتواصل ككل من خلال الردود !

فما هي آراءك أخي بهذا الخصوص ؟

مابلوم الأعضاء كثر مابلوم الإدارة شبه المنقطعة عن الأعضاء وهذا شي طبيعي ترتب على غيابها والحل بيكون بتنشيط الادارة من خلال تفعيل دور الاداريين وخاصه مع الاعضاء أو انهم يشلون الاداريين اللي مايقدرون يعطون ويردونهم كأعضاء لهم احترامهم ومكانتهم بين الاعضاء ويحطون مكانهم من هم أجدر اللي يقدرون يطورون ويغيرون وهذا اللي يصيرعلى مستوى الشركات والدوائر في هالحاله

:

(( ! ))

ـ (( الصراحه ،، اللباقه ،، المجامله ،، الذوق )) //
من فتره ليست بالقصير أردت طرح موضوع يضم هذه المصطلحات ،،
وكيفيه اللبس فيما بين بعضها البعض ،،
ومانلحظه من تجاوز الناس أحيانا بتمسكها بأحد هذي المصطلحات // وقد أكون منهم ! ..

فـ لو طلب منك تعريفها لنا أخي ،، بالحدود التي تحسبها بها ،، وكيفية ارتباط كلن منها بالأخرى ؟
+ اذا ما فهمت السؤال علمني برد أوضحه ان شاء الله =)

هو مافهمت بس عادي بحاول ابين لج الدمج بينهم حسب وجهة نظري في قضية وحده على مستوى الحياة الخارجيه، احس كل من هالمصطلحات مرتبط بالثاني بطريقة أو بأخرى يعني مثلا ماقدر أكون صريح وأقول جدام الخلق لـ (سين) من الناس خاصه اذا كانت ماتربطني به علاقه قويه انت واحد ماتستحي على ويهك في الشي اللي سويته لأنه مابيتقبل مني هالجمله وبتكون ردة الفعل عكسية علي وعلى التصرف وفي نفس الوقت مابجامله على حساب مبادئي لأنه راح يتمادى في هالشي اللي سواه فاذا كنت شخص عندي ذوق بحاول أبين له رايي وأعرضه بشكل انفرادي بأسلوب لبق عل وعسى يتقبل هالنصيحه

لو خذنا كل مصطلح على حدى بنشوف ان كثير من الناس تجامل بعضها البعض عشان العلاقات الاجتماعيه والمحسوبيه وان الشخص الصريح تكون له نظرة مب حلوه من اللي حوله حتى لو كان على حق لأنه ماأحسن التصرف بطريقة عرض صراحته وخاصه لو كان فيها نوع من التجريح اما الذوق واللباقه في الغالب لهم نتايج ايجابيه


(( بالأخير ))

ـ قضيه حاب تتحدث عنها مهمن كانت ،،
لك الحريه هنا لتناول ما تحب أن تتناوله مهما كان بسيطا بظنك ،، والعكس ؟!

هي فكرة أكثر من كونها قضية، كل شخص يملك اختارين في أمور حياته وهو اللي يقدر يختار من بينهم اما ان ياخذ الموضوع بإيجابية أو انه ياخذه بسلبيه، مثلا شخص اول ماينش من رقاده مثلا شاف الوقت متأخر عنده اختيارين اما انه يتأفف ويتذمر من الدوام او الجامعه او غيره ويبدأ يومه مكتأب أو انه ياخذ الموضوع بايجابيه بانه يتبسم ويحاول يتلاحق عمره قبل مايتأخر أكثر ويحاول انه يتعلم من هالشي عشان مايتكرر وينحط في نفس الموقف وعقب مثلا وهو يسوق سيارته في أحد الشوارع ومره وحده واحد لف عليه عنده اختيارين اما انه يعصب وبنفعل ويحرق اعصابه لين يرد فيه نفس الحركه او انه يتم في حاله ويحاول يكون متعاون ويه الناس ويتعلم من اللي صار وعقب مثلا وهو في الدوام يته عدة اشغال مره وحده عنده اختيارين اما انه يكره حياته ويكره الدوام ويعلن اليوم اللي اشتغل فيه ويطالع الساعه كل شويه يتريا نهاية الداوم او انه يسويه هالاشغال من خاطره بنفس مفتوحه وتحدي للعمل عشان يثبت نفسه فيه وعقب مثلا في بريك الغدا يروح يطلب له وجبه من مطعم وعقب مايحط الصينيه وييلس يكتشف انهم ماحطوله الاشياء اللي هو يباها او في اشياء ناقصه عنده اختيارين اما انه يصعب ويروح يضاربهم ويلعن اسلافهم ويخرب المود اللي هو فيه عشان وجبه او يروح لهم بهدوء ويقولهم يعدلون الطلب لأنهم مغلطين وياخذ الوجبه اللي هو يباها وييلس ويتهنى بالاكل وعقب مثلا يرد البيت واول مايدخل تستلمه زوجته بكمية من الطلبات والاسئله والتذمر من العيال عنده اختارين اما انه يرد عليه بطفره وانه تعبان ومب فاضي لها ولعيالها ويسبهم وترد عليه وترفع صوتها وتزيده أكثر ويرتفع ضغطه ويوتر عياله او انه بهدوء يحاول يسمعها لين تخلص وعقب يبين لها ان الامور بتنحل بس تحتاج شوية وقت لين هو يرتاح من ضغط الشغل ويبدأ يشوف أسرته وبيته شو محتاجين وقيسوا على هالامثله كل الامور الحياتيه فالواحد دايما وابدا عنده اختيارين اما ياخذ الفعل بإيجابيه او انه ياخذه بسلبيه، الايجابيه بتريحه وبخليه في مود حلو وبتمشي الامور بسلاسه والسلبيه بتخلي موده ومود اللي حوله في توتر وبيعيش يومه مهموم وشايل الدنيا على راسه عشان امور ماتستاهل فكل واحد منكم عنده الاختيار الحين انه ياخذ الامور بسلبيه ويقول الاسطوري عنده سالفه ونحن مب ناقصين عوار راس وفكنا من هالرمسه الزايده او انه ياخذ الموضوع بإيجابيه ويحاول يطبقه على نفسه في تصرفاته ويه الغير من اليوم ويلمس الفرق

^
أتمنى تكون الفكرة وصلت وإذا جربتوا هالشي أتمنى تخبروني عن النتايج سواء كانت
مرضيه او لأ وعلى فكرة تراني ماخذ الفكرة من
ايميل وصلني من زمان