منــظـر عالسريع ( لوحة )- قروب المافيا

[الا انا]

الا انا

مقامج ارقى في موضوعج

وهاي الرسمه لو اتعرفين كيف سهولتها

بتعرفين انه الخوف هو سبب كل صعوبه (حتى بالنسبه لي احياننا )

عليج بخوض الميادين وتجربة كل شي

..

ومشكلة التلاعب اللوني جداً بسيطه وحلوة

ييبي لوحة خاصة بالالوان المائيه ورشي عليها ماي اشويه

وعقب ييبي الالوان إلي في خاطرج وامزجيها واترييها تنشف او عليج ب ( السشوار )

واذا اللوحة كانت ممزوره ماي وألوان حركيها جنج اتحركين صحن فيه ماي عشان تتوزع الالوان

وقبل ما تنشف اللوحة باشويه بالكلينكس اضربي على اماكن من اللوحة عشان تعطيج آثار للغيوم

وهكذا

وناسه ما بعدها وناسه يبالج اتجربينها

جداً شاكر لج مرورج الطيب

محاق

.^
اذكر مره خذت دوره وكان الاستاذ عراقي .. وعلمنا هالحركه مالت الغيوم وانه نرش ماي وجذي ..

بس بعد احسها صعبه بالنسبه لي ..
يمكن ليش اني قطعت الرسم من زماان وما قمت امارس واطبق كل خطوه يديده اتعلمها ..
واتجهت للكريكاتير اكثر ..
فنسيت كل شي .><
..

تسلم محاق ..
بكل رسمه اتشجع اني ارد للرسم ..
جدا شاكره لك نصايحك..

..

إحترامي لك واترقب لوحاتك اليديده

[بنت الدلع]

بنت الدلع

اولاً ليش تستحين اتردين في مواضيعي ( اذا شي ما عيبج في الموضوع بنغيره كرمالج )

بس انا اعتقد انج ما قمتي تستحين إلا من عقب ما سرتي الخباز ( عند عمو )

.....

يسلم لنا هالذوق الطيب والله يجمل العيون ويديم عافيتها عشان اتشوف الجمال دايماً

وان شالله دوم ارسم الي يعجب الجميع ويعجبج طويلة العمر

واللوحة طبعاً بالألوان المائيه .. ليش في شي غريب في اللوحة

...

بالنسبه لأخويه ما يهزك ريح

هو اخويه في الواحات

وكنيته ب ولد خالوه تقرباً له واحتراماً لشخصه

عنا نحن معشر الشباب مب الكل خلنا انقول موووست اوف ذيم

نستخدم ولد عمو و ولد خالوه للتقرب من بعض

شاكر لج هالحضور الراقي بنت الدلع

وان استحيتي (بشن عليج حرب كرتونيه ) فاحذريني

كل التقدير

محاق

انزييين شوي شوي عليييي

ليش استحي ارد في مواضيعك ؟؟ سؤال جيد بصراحه
لان اخاف الكلمات ماتوفيك حقك في الرسم والابداع
وبعد مايصرفني احدر واشوف لوحاتك وما اعلق "ما قدر اخلي شي فخاطري " اعبر عن مشاعري يعني

ههههههههه ذكرتني بالفلعه الي حصلتهاااا عموووه ههههههههههه


خخخخ لا مافي شي غريب في اللوحه
بس خل هالشي بيني وبين نفسي "منعا للاحراج "

اوووه آي سييي
شراات ابن عمييي يعني (المتدارك)
وانا اتحريت ولد خالتك صدق وقلت كييف جيه محد خبرني
على فكره يعني مب تتحرا اني فضوليه


تسلم على ردك الطيب
وان شاء الله دايما تمتعنا بجديدك

[المحاق المشتعل]

سكون

مرحبا في موضوعج من جديد واشكر لج حرصج في التعلم لأنه هالشي يسعدني جداً

ونبتدي بالإجابه على أسئلتج بقدر ما نملك من إجابات بإذن الله تعالى

وقبل ما نجاوب إلي تامرين فيه هو إلي بيصير والرسمه مب عالسريع

ومشاعركم عالعين والراس

ورسمة شجرة الخير ( النخله ) مر عليها الكثير منا في ايام الدراسه وكنت احب اسمها واتفنن فيها

وصدقيني انا واثق انه رسمج لهاي الشجره ابداع بس ( الحرامي ما بيقول انا حرامي ) هاهاها شو يخصه

وعن رسم النخله

بسيطه تقدرين تبتدين من السعف او من الجذع ما يفرق

بس السهوله والدقه بتكون افضل لو بديتي من الجذع لأنه من الجذع تطلع الاغصان وهكذا

وعن طريقة رسم الجذع هم بسيطه

سوي خط الغصن بالفرشاه بلون بني مثل لون الخشب خط عادي جدا وعقب ييبي لون اغمج

سوي حركات على الغصن بكيفج او مثل حركات تشوفينها على النخل

بالنسبه للرسم بالرصاص مش ضروري اذا كنتي تتعلمين التلوين

يعني في لوحتي هاي امركز اكثر على التلوين لأني ما اعاني من مشاكل في الرسم

وافتقر للخبره في هاي الخامه التلوينيه ... ومثل ما تفضلتي سكون ايضاً

انا ما احتاج لقلم الرصاص اذا كانت الرسمه بسيطه ومب محتاج لوجود خطوط محدده

لكن نرجع لعامل الخوف إلي يخليج ما تتخيلين انج تبتدين من غير قلم الرصاص ( اكسري هالعامل )

والشي الآخر مب معنا كسرج للعامل هو استغنائج عن قلم الرصاص .. لا طبعاً

قلم الرصاص للدقه وللأداء المتقن ... لكن في بعض الاحيان لازم اتريحين اعصابج من غير سجن قلم الرصاص

وتلونين وانتي مرتاحه من غير خوف ... هذا يعطيج احساس مريح وجميل في داخلج

....

وعن اليوتيووب

انا من فتره كنت ادور شغلات وما حصلت فأي وصله عندج ليش ما تفتحين موضوع لها في واحة الفنون التشكيليه

عشان نستفيد منها ( طبعاً بعد اذن سيادتج )

... و آخر شي أوووووف مرورج الطويل .....

صدقيني مرورج الطويل جداً استمتع فيه فلا تحرمينا منه

كل التقدير

محاق

[أنامل قلب]

/

يزاك الله خير أخوي المحاق المشتعل ،،
واسمحولنا يعني ^^"

+ زين تسوون // دوم قولو إن الرسمه مب عالسريع ،،
وإنكم خبصتو الدنيا من زود ما فريتو لوح ليمن وصلتو لهالنتجه الطيبه ،

بس حلوه هذي سالفة الحرامي !

:

احم ،، انزين الله يسلمني ..

كنت ابي أرد عـ كل فقره بس قلت مب حلوه أشتت الأعضاء لول ..
بس حبيت اقتبس هذي الكلمه لـ غرض في نفس يعقوب !

لكن نرجع لعامل الخوف إلي يخليج ما تتخيلين انج تبتدين من غير قلم الرصاص ( اكسري هالعامل )
والشي الآخر مب معنا كسرج للعامل هو استغنائج عن قلم الرصاص .. لا طبعاً
قلم الرصاص للدقه وللأداء المتقن ... لكن في بعض الاحيان لازم اتريحين اعصابج من غير سجن قلم الرصاص
وتلونين وانتي مرتاحه من غير خوف ... هذا يعطيج احساس مريح وجميل في داخلج

:

بالأخير بخصوص موقع يوتيوب // فمستحيـــــــل ماتكون محصل شي !
إي لو آنا اللي بقول هالكلام عادي ،، لأن أغلب اللي اشوفه يكون لمستوياتكم مو لمستوى المبتدئين لول ..

بس بعد أستفيد أكيد وكافي متعة تأمل هالفن الطيب ..
وان شاء الله ليش لا ،، بحط لنكات كثر ما أقدر لأن الملفات كثيـــــــــره ..

حتى أحيد كانو يناجروني من زود ما أقعد مجابله اللاب بسبة هالملفات لول ^^"

مادري شو الشغلات اللي تدور عنها ،،
بس أحب أنبه إن مش كل شي ينشاف ،،
+ اوجه اعتذار مسبق لكون الكثير من هذي الملفات تحوي نوع من الموسيقى ..
بس طبعا في اختراع لـ خرس الأصوات P=
وووصح ،، أغلب اللي اشوفه يكون أجنبي ،، إن ماكان كله !

بس أكثر شغله تقهر ،، إن نشوف أداءهم يكون مريــــــــح ،،
مب نحن شوي وبنشد شعورنا ،، مانخلي شي إلا ويخيس ..
حتى خشومنا لول !

:

بالأخيــــــــر ،،
شكرا عالاطراء ،،

.... { واحترامي ~
كما جل امتناني لوقتك + حسن تواصلك وإيانا ..

دمتـــم بـ طيب ،،

.. .

[المحاق المشتعل]

هاهاهاهاييييي

حلو هالاكشن عموووووووو

بس جني شايفنه في فلم هندي ... وانتي جنج بطل هندي نذل ههههههه

.....

هالصروال مشكله

الصراويل مال الخبازين تنفع تنحط اشرعه حق السفن هاي الايام ( مب جني طلعت من صلب العصير .. الموضوع )

وعلى فكره عمو الصروال هذا سيتكلم عنه التاريخ والفضل سيعود للمحاق

....

موضوعي الفني استوى موضوع للصراويل شكلي باحذف الموضوع كله بلا فن بلا بطيخ

بس بتفيج للكركتير

...

اميييه من عموووو هوورووورررررررررررر

[المحاق المشتعل]

الا انا

كم استانس يوم اعرف انه طرح شجع شخص للرسم

شو تبين في الكركتير وخرابيطه

رسم الطبيعه غيييير

تبحرين في خيالج غييير

ليتج اتحسين مثل ما احس جان عرفتي ان الرسم له عالم مريح لج بعيد عن الازعاج

وبالعكس انا بقدم كل ما عندي اذا حسيت انه حد بيشاركني افكاري

بكون كلي سعاده وبراحه اتمناها لكم اجمعين

تقبلي خالص امتناني بمشاركتج الكريمه

محاق

[المحاق المشتعل]

بنت الدلع

اولاً خذي راحتج والموضوع موضوعج لا احراج ولا فضول

كل شي مسموحلج في موضوع المحاق وخذي راحتج عالاخر

ثانيا

كلمة توفيني حقي ( مالها أي داعي ) لأني مالي حق ولا اطالب حد ولا حد يطالبني اي شي

إلي اباه بس انه لوحتي تسعدج وتسعد الناظرين لها ... واذا ما اسعدتهم فأنا عليه حق اعتذر للناس بتقصيري

.....

وفلعة عموو خليها عنج احينه

شو الشي إلي ما كتبتيه منعاً للأحراج قمت اشك في عمري ترى

وحاضرين للطيبين دوم

ان شالله اي جديد بتلقينه في واحتج ان شالله

وما ننحرم من اطلالتج الطيبه ابد

محاق

[المحاق المشتعل]

انامل قلب

مافرينا لوّح إلا للوناسه مب بقصد التعلم من بداية الامر

...

وليش ما رديتي على كل فقره

باترك لج حرية الاختيار لانج حرة في كل مواضيعي

وليش اقتبستي من غير تعقيب ؟؟؟

هممممم

ردج هذا فيه وايد ألغاز

...

عن اليوتيوب اكيد اكثر الاطروحات بتكون بالانجليزي بلا شك

وعن نفسي ماعندي مشكله في اللغه لأني اعرف انه البرامج العربيه تكاد تنعدم في هذا النطاق

وصدقج عشان ما تاخذين اثم من تتبعنا لأشياء تحتوي على مقطوعات موسيقيه او غير افضل

ان اقوم بالبحث لوحدي والتطلع

شكراً على تواصلج أيضاً

وان شاء الله نستمر بهذا التواصل الطيب دائماً

محاق

[بنت الدلع]

شو الشي إلي ما كتبتيه منعاً للأحراج قمت اشك في عمري ترى

ههههـ لا ماعليك
مابا احرج عمري

[المحاق المشتعل]

علا راحتج لكن مافي دروس باستيل ههههه