أحلى برامج رمضان ...

[شوق القلوب]

السلام عليكم...

تبى الصدق اخي الكريم... أحس بتفاهه كل من يتكلم عن شو اليديد من مسلسلات السنه في رمضان.. و كأنه شهر المسلسلات و متابعه مليون قصه من مأسي و سخافات اضحك..!

من يدري.. هل بنعيش هالكمن يوم عشان نستشعر حلاوة رمضان الياي..؟؟ و كم رمضان بنعيشه في سنواتنا اليايه ..؟؟!

مدراء القنوات.. قبل شهور يستعدون لرمضان عشان يتحفونا بمسلسلاتهم.. و امس اسمع د. محمد العريفي يقول.. انه الصحابه قبل شهووور يدعون الله سبحانه انه يبلغهم رمضان عشان يظفرون بالمغفره و الرحمه اللي فيه..

صح.. صعب الواحد يعزل عمره في حجرته ويقول انا ما بشوف شي طول الشهر.. و يمر على اهله و هم متيمعين و يسولفون في الصاله وهم يتابعون التلفزيون.. خصه عقب الفطور..

لكن اقل شي.. انه الانسان يأدي اللي يقدر عليه من قرايه قرآن و صلاة.. خصه وقت ماهو صايم.. ولا يساعد حد او يسمع محاظره دينيه.. اطهر قلبه و اتصحيه من غفلته..

وتراها مب شي مستحيل.. انه اتقول هالسنه انا ما بتابع ولا مسلسل.. و من ترك شيئاً لله عوضه الله خيرا منه..
و بعدين.. شو المهم في هالمسلسلات عشان اتابعها..؟؟! لو خاطرك اتشوفها.. تراهم يعيدون المسلسلات كلها مليوووون مره طول السنه .. ع الاقل الواحد يستغل رمضان.. و ما يطوفه على شي ما يستاهل..

ترى والله الدنيا شاغلتنا وايد و املهتنا وااايد عن حلاوة القرب من رب العالمين.. فالواجب على الانسان يخلي رمضان نقطه بدايه لعلاقه يديده مع ربه.. يروض فيها نفسه و يطهر قلبه من ذنوب الشهور اللي مرت..

الحياه مب مجرد وقت و انقضيه بأي شي.. الحياه هذي قصيره.. و وراها حياه خالده احنا غافلينا عنها.. وراها جنه و نار.. وراها فوز و عقاب.. وراها لحظه.. ما ينفع فيها الندم و التقصير..

..

الله يهدينا أجمعين ..