ذكريات ألوان الطفولية ~ الدكّان ~

[رمــش الغـــلا]

كل شخص فينا له ذكرياته الطفوولية سواء مع الدكّان .. المدرسة .. عيال الفريج .. راعي السمبووسة ... ملعب الفريج ... الخ ..~

وإن شاء الله راح نطرح كل ذكرى طفولية بشكل دوري

وأتمنى إن كل عضو يشاركنا بذكرى من ذكرياته الطفولية ..~


الدكّان

من منّا ما سار الدكان وما كانت لهـ مواقف سواء مع "الدكان" أو "راعي الدكان" ..!!

.
.

السيرة للدكان كانت \تعتبر روتين\ يومي لأغلب منّا ..

العصر نتيمع انا وخواتي

وإلا نحن وبنات الفريج

ونسير الدكااان\\شلّة كاملة\\ ..~

.
.

ومن أحلى المواقف اللي أذكرها
إن كنّا مخصصين يوم كل أسبوع نسوي حفلة

لول ..

وهالحفلة انيمع من كل وحدة الكمن ربيّة اللي عندها

ونسير الدكان نشتري كيك عود وعصير وسوالف ثانية

ونيلس ويا بعض .. نتجاسم الأكل وناااكل ..~

.
.

و أذكر راعي الدكان ..
من ندش الدكان يتم يلحق ورانا ويراقبنا ..

شايفنّه نصرق والا لنا سوابق يعني هع هع ..!!

.
.

يمكن ساعات فخاطرنا شي وبيزاتنا أقل

أنشّله بدون ما حد يحس ..,

\
.
.

هالحلاوة Runts

كنت أحبهااااا واااااااااايد ..!

ودوم أشتريها ..

لازم يوم أرد من المدرسة نمر الدكان آخذ الحلاوة و " آآآرسي"

لول

.
.

هاي ذكرياتي الشخصية مع " الدّكان "

شاركووني بذكرياتكم الشخصية ..~

أختكم ..

بنت ألوان

رمــش الغــلا
.
.

[وحي القلم]

رمش الغلا

حلو موضوعج.. و أحلى شي أنج بديتي بالدكان *_^

أسميه كان من زمان جنه الامارات مول

أحيد يوم كنت أسير ويا بنت خالي

كنت لازم أسوي اللى هي تقوله طبعا لانها العوده

و هي ما قصرت.. قايلتلي أنه حرامي و لازم نغير أشكالنا عن يعرفنا

عشان جيه كنا نغمظ عيوننا و نمشي هههههه>> مادري شو هالذكاء أونه ما بيعرفنا يعني

.
.

من غير اني كنت وايد أستغرب من راعي الدكان يوم أشوفه لابس الكلوتي

أقول شقايل يخش راسه فالدلاغ .؟!!!!

.
.

و عن الحلاوه و العصير.. اممم.. كان يعيبني عصير أريج

و الككاو ماعرف أسمه.. هو ذايب و في بلاستك شرات الصلب شكله... كنا نسميه الطويل xp

و السموحه

[مــهــابه]

رمش الغلا :

حلاوتي ، كنت احبها ، بس كنت أفَر مالت البرتقال والليمون

ماكنت آحبهم . .




~ لي عَوده أكيييد

[مجموعة إنسان]

الدكاااااااااااااااان


امس انا ما قلت لج انتي ام عقوووص ماسكه أهلا
هع


ايااام حلوة قبل ...
وحي القلم انتي تطريين سيلااان
هذا اللي يكون اكثر من لون
صح ؟

تذكروون البيبسي القدييييم ؟




وكيرلي ويرلي هع


وتووولاااا




صدق انج جدييييمه ام عقووووص



مجموعة انسان كاااان يسرق من هذا الدكان هع

[الزرعوني]

أنا راح أشارككم بعد ... بموقف من المواقف اللي أظهرت نحااسة الدكان علي لووول ..~

في يوم من الايام .. في اجازة .. كما تعود احمد الزرعوني يطلع من الاوائل في المدرسة



يأتي أبيه و يكافأه على تميزه بالمدرسة ..


فتارة يشتري لنا العاب الفيديو و تارآ اخرى ~سياكل~ .. كما كان من اشد المعارضين للدراجات النارية التي حضي بها ابناء عمي ..



اتذكر في سنة 93 و كان آنذاك عمري 8 سنوات ..


اشترى أبي ~سيكل~ من نوع (الامريكي) الذي كان من افخم ~ السياكل ~ و احدثها طفرة ..





حيث انها كانت تتكون من 5 غيارات و ( سنغل ) من نوع اقوى من ~السياكل~ عادية المستوى ..
.
.
.
حيث آنذاك كان سعرها فوق 250 درهم و كانت الاخريات لا يتعدى الـ 70 درهم .. بما معناه اغلى بـ 3 و 4 مرات ..



وطبعآ تغمرني الفرحة بحيث امتلك افضل ~سيكل~ في الفريج على الاطلاق ..


و انطلقت الى الفريج حتى اتمخطر بـ ~سيكلي~ الجديد صاحب الـ 5 غيارات .. و المصنوع من الألمنيوم المخفف .. و حامل (طارة الماي) ... و كم كنت احلم اني سأملئه بالكوكا كولا (بعد ما يطير الـ Stem كله من الخض )



فمررت بالسوبرماركت الواقع في منتصف الفريج و المتميزة بمكانها الاستراتيجي بحيث يتجمع (اللوث) و اصحاب المشاكل و السوابق ..


و لمحت بأن المكان خالي تمامآ .. و ليس كالمعتاد !!


.
.


فساندت ~ السيكل ~ على واجهة السوبرماركت و الذي حجمه لا يزيد عن البقالة المتواضعه ! حتى لا اضعها بالارض و اخدش ملمسه الناعم المطعم بالالمنيوم و التخطيط الاحمر الناري ..




و نزلت بكل سلاسه و ذهبت لاشتري بعض ( الجبس - صقر الحار , و كافي , ميلكي بار , و الكوكاكولا 1.5 لتر ) كالمعتاد - و بشكل يومي ..


و بعد ان انتهيت من شراء ما لذ و طاب ... و منظر ~سيكلي~ لا يغيب عن ناظري ومخيلتي ..


خرجت من السوبرماركت و اذا أرى صاحبة الغيارات الخمس غير موجوده !!!!~!!!!

الصدمــــة !!~

ويا هي صدمة !!


نعم صدمت !!

لم اتهنى بالجميلة و الخفيفة بربع ساعه ~!!!

يا ويلتي !!


يا حسرتي !!


أين ذهبت ؟!!


التفت يمينآ و يسارآ


لا أثر لها !


هنا ارتعشت من شدة الخوف .. متخيلآ شكل أبي عن سؤاله عن ~ السيكل ~



رجعت الى البيت .. وهموم الدنيا كلها ع راسي ..


ذهبت ~سيكل~ الاحلام .. راحت


أحلم احصلها مرة ثانية


ما إن فتح أخي الباب الخلفي للمنزل


و اجهشت بالبكاء


.
.


لا اعلم كنت ابكي من شدة خوفي من ابي و لا حسرة على سيكل الاحلام و هدرآ لجهد عام دراسي كامل ( لا لعب ولا جيمز ولا طلعات و لا دكان في اي وقت ) .. هكذا ذهبت ؟ حرااااام




و بقيت حزينآ ... حزينآ جدآ .. طفل بالثامنه من عمره يحلم في سنة دراسية كامله بامتلاك ~سيكل~ .. سرقت في ربع ساعه !




ماذا تتوقعون حال هذا الطفل المسكين ؟؟

















بعد اسبوعين اشتراله اخوه العود واحد ثاني ولا افتكر في الاولاني ولا ياب سيرته

[الاسطوري]

وعليكم السلام ..

موضوع جميل وشيق ويحمل ذكريات حلوه بس حبيت أعلق على سالفة الزرعوني
ياخي هذا المفروض تكلبج عمرك فيه وماتفارقه ليل نهار
عشان ماينسرق هههههه

وفي رواية أخرى تتجلب فيه

السموحه

[حلم الطفوله]

السلام عليكم


والله ييتو عالعوق !!!

ذكريات الطفوله كلها في الدكان !!!

من يومين ولد خالتي لكبير يعايرني !!! عاد حلوم محد ادلع شراتها !!! راعي الدكان استغنى من وراها


كان كل حد يشوفني يوديني الدكان !!!

وكان بفريجنا ريال فاتح دكان بكراج بيته !!! أسمينا نتسابق عقب صلاة العصر عشان نشتري من عنده !! الله يرحمه

والله أيام

[مزن هتان]

يالله الزرعوني غمضتني
حتى أخوي انباق سيكله الامريكي
بس مش عند الدكان من البيت P:
كان يغتص يشوفها يوميا، بس الريال
عاد صابغنها بـ رش اونه تمويه.

انزين عاد انا مالي ذكريات مع الدكان
ما كنت اروح
بس سالفة العزيمه كنا نسويها كل
خميس نسوي قطيه كل شخص ربيتين

[عـكس قانونه]

من احلى ذكرياتي في الدكان


كنت اخذ بيزات للمدرسة

و ما اشتري شيء في المدرسة


و يوم يخلص الدوام


اطلع و اسير اخذ ارسي


ايخلص


اخذ غيره


لين ما تخلص بيزاتي


و استمريت جي سنة كاملة



ايام حلوة


لج جزيل الشكر على الموضوع الطيب


دمتم بوود


عكس قانونه

[الاسطوري]

وشلوا سيكلي الحبيب

ورديت البيت لا خبز ولا سيكل ههههههه

^
افاا طلعت خواف عيل
هههههههه

[وحي القلم]

وجي ما افر السيكل والخبز فر بصوب وانا اسبق الريح للبيت بصوب ...

وشلوا سيكلي الحبيب

ورديت البيت لا خبز ولا سيكل ههههههه ...

اتخيلت الموقف

.
.

مجموعة انسان

تقصد العصير؟؟

[مزايا]

أحلى شي يوم تدش دكـان في فريج ماتعرفه ,الاهم راعي الدكان ماكانت له معرفه سابقه فيك
وتشتري واااايد من عنده وتسجل حســاب ومن عقبها العين ماتشوفك P:

[رمــش الغـــلا]

وحي القلم ..~

أحلى شي عاد يوم تغيرون أشكالكم

ههههههه

[ صدق يهال ] لووول ونصدق أي شي ينقالنا هع

.
.
انا حتى كنت أحب اريج توت أكثر شي ..

ولي الحين ربيعاتي من يحصلونه أييبون لي إياه [ لوووول ] ..

والكاكاو شكلي عرفته جيه يكون شرات المخروط أظن...
>> مادري جان هذا اللي تطرينه وإلا لا <<

أشكر لج تواجداج حبيبتي ..
.
.

مهــابهـ ..~

طلعتي تشاركيني نفس الحلاوة ..

بس أنا ما كنت أفر شي ... كلّه يعيبني ^^



بنت ألوان ..

رمــش الغــلا

[شوق البدو]

آآآآآه ايااااااااااام الدكاااااان

اياااام حلووووه كنا نحرس الدكااان العصر نترياااه تحت القاافه الين مايطلع من المسيد

ونوصله دكااانه نفتح الدكااان ويااه ,,

ومراات اياام الامتحانات نطلع من المدرسه من وقت ونمر ع الدكان ونشتري مأونة ونسير فووق بيتنا
والا فووق بيت ربيعتنا ,,

من اهم مشتريااتي

الهوووبييييي اذوبه عقب اكله هع

وعصيييير اهلاااا مثلج هذاا الين يوومكم اشتري منه

استوالي موقف خلااني احرم اسير الدكان الا وهو

مره سرت بروحي الدكان ولقيت مصبنة الفريج هناك وانااا اركض عشاان ما اجووفهم الا ويزقرني وااحد

وهالوااحد يالس يدووخ خوفني قالي تبييين ويمد ايده دورووني عاد ذيج الساعه ما جاافو الا غبرتي

ومن يوومها ادق للدكان وييبلي للبيت


___


جاااان استااانس عالموضوووع
تسلميييين رمش عالموضووع الغااوي

[العجيبة]

ههههههههههه ضحكـت من سالفة السياكل ، وخاصة سالفة الزرعونـي


نحن الحمدلله ما انسرقت سياكلنـا ولا حتى الشرطة شلتهـا ....

السياكـل اشترولنـا اياهـا كهدية نجـاح اووونـه ... كنـا من الاوائـل وكاااان شي عجيـب ان ولدك او بنتك يكون ترتيبهم الأول ... فمـا بالكم اذا امي وابوي عندهم 3 وكلهم ماخذين هالمركـز !!!!

سرنـا خذنا السيااااكل واستانسـنـا وايد ... جنه العيد .... وقمنـا نسير الدكـان اللي شوي بعيد من البيت ، بعد ما يصير نسير الدكان القريب ونحن عندنـا سياكـل ....

طبعـا السيرة بسباااااق ، والردة بسبااااااااااااق

و نفس الشي ما تمت السياكـل وايد عندنا ، اختربت وكانت نهايتهـا للبتاني اللي يشتري الحديد ....!!

يوم كبـرنا اكتشفنـا انه المـامـا ما تحـب السياكـل ولا الدراجـات النارية ، فكـانت تدعي عليهن بالخراب في اقرب فرصة !!!! :(



على طاري حلاوة الرنتس ، نشتريهـا عشان الموز بسسس !

راااعـي دكـانـا ( أقصد الدكـان اللي وايد قريب من بيتنـا ) كـان شيبه ، ونحن مع إنــا صغاااار لكـن الشياطييين راكبة رووسنـا نستعبط عليه، ومنـاك هو حاط دوبه من دوبنـا ، عاليومين ياي بيتنـا يشتكي ! هيهيهيهي يعني لدرجة انه كان ينقهر اذا بنمشي بالسياكل جدام دكااانه :/



عيل الشيء العبـط ، يوم كانـت يدوة فـ بيتنـا ، عمري 3 أو 4 سنوات وأونه عيـب اطلع الدكان
كبـرت شوي وطلعت يدوه من بيتنـا ، فـاستـوى حلال اسير الدكـان هيهيهيهي



موضوع حلو وخفيف .... دمتم !