~ ياحليله السيكل . .
ضحّكتوني والله ،
أصلاً قبل كشخة اليهال بسياكلهم ، لي عندهم سيكل ومعدلنه ، وحاط فيها اخضر واحمر ومادري شو ، يعني هذا واحد كاشخ لحد يرمسه . .
~ بالنسبه لي انا والدكان ، كانت عندنا وحده في فريجنا الجديم تبيع في بيتها ، وهذا بيتها جريب لبيتنا ، يعني ممم بينا شارع بس . .
وطبعاً كل يوم الصبح قبل لايروح ابويه الدوام ، ولأني كنت الوحيده اللي ماعنديه روضه ولا مدرسه ، يلف بي لفة ع الدكان من الساعه 7 الصبح ، يشتري لي حليب أو عصير المهم ويرجعني البيت
طبعاً انا مستحيل انزل وماعنديه ، 5 ربيات ولا 3 ، المهم يكون فإيدي بيزات
~ وجان ماعطاني ، ما انزل ، ويتأخر هو ع الدوام . .
المهم ( انا مخي أقتصادي )
هالبيزات اخليهن للعصر ، وأول مايظهرون الرياييل من صلاة العصر ، انا شردة بيت يرآنا
احيان اطلع بدون لا اخبرهم بعد
ومثل ماقلتوا ( الهوبي ، والأريج ، ومثلج أهلاً ، وهذيج الحلاوه مالت البقر كنت احبها وايد )
وآروح واشتري
أحيان تكون الحرمة محد ، وعندهم ولد نحيس للحين أذكره ، اسمه نصوور ، مايطيع يبايعني موليه . .
لأنه هالحرمة ماعندنا غير 12 ولد بس ، المهم
يوم مايبايعني ، ارد البيت أصيح لأمايه ، واسحبها ويايه عسب تشتري لي ~ !* . .
غير جيه كان ولد عموه ، يوديني بالسيكل ماله للدكان يعني يردفني ، ونروح
مَره ، كنا بنروح الظهر الدكان
وعمووه راقده ، قال اصبري شويه ، راح وخذ بيزات من غرفتها ، هو سحَب 500
ويتحراهن 5 دراهم
عاد يوم وصلنا الدكان ، صارت الوهقه راعي الدكان يعرف عمووه ، وماطاع يبايعنا
عاد اونه انا بريئه مايخصني بشي
المهم ردينا ، وشوي ونسمع هالهندي الحشره ياي لعموه ومخبرنها ، للحين مب قادره اسى شكل ولد عموه كيف
وكل مايقول لي شي الحين ، اذكره بالموقف
واقول له خل عيالك يكبرون بخبرهم الحكايه بعد
استوت فيها احداث بس مابخبركم حرام، عن افضحه
ألوان تسلمون على هالموضوع :)
مواقع النشر (المفضلة)