لوحات مائية تعليميه خربشيه

[المحاق المشتعل]

السلام عليكم ورحمة الله وبركاته

في هاليوم الطيب حبيت اتواجد وياكم بعد فترة انشغال

وهي لوحات مائية منها اكثرها خربشة.... بالنسبه لكم اكيد خربشه

بالنسبه لي هي ممارسات تقوي الذاكرة وتعودني عالدمج اللوني واستخدام

الفرش في لوحات مستقبليه قادمه ان شاء الله تعالى ( اذا انكتبلي نصيب فيها بإذن الله )

طبعاً الالوان المائيه صعبة الاستخدام بس فيها شي غريب يجذبني ماعرف ليش

وكل ما اسير مكتبه اترك كل الكتب واسير لكتب الألوان المائيه على الرغم من اني

ما ارسم بهاي الالوان إلا نادراً لكن يوم افتح الكتاب ما ودي افج عنه مادري شو السبب.

المهم بعد قصة بوباي وبلوتو اعرضلكم الصور وان شالله تستمتعون بالعرض


.
.
.
.
.
.
.
.
.
.
.
.


.
.
.
.
.
.
.
.
.
.

.
.
.
.
.
.
.
.
.
.
.
.

.
.
.
.
.
.
.
.
.
.
.

.
.
.
.
.
.
.
.
.
.
.

.
.
.
.
.
.
.
.
.
.
.

.
.
.
.
.
.
.
.
.
.
.


محاق

[المحاق المشتعل]

إضافه فريش قبل الردود

صبحكم الله بالخير

[عمة العيم]

ثالث وحده عايبتني احس ( اســــتجــمام)

سلمت انناملك يا محاقنا

(^_^)
...

[أنامل قلب]

:
.

السلام عليكم ورحمة الله وبركاته ..

ما شاء الله ..
أحب اشوف الخربشات على قولتك استاذي ^_^ ..
يعني نلاحظ طريقة الغير بالتعلم .. !

اممم انزين عندي سؤالين لو ممكن يعني ..

1 : بالألوان المائيه .. لمن تبدا الرسم تركز عـ نفطه تبليل ورق الرسم ..
ولا يعتمد على نوعيه الصورة اللي تبي توصلها .. !

واذا نعم .. كيف تبللها ><"
يعني مرات لمن آي اجرب احس اني ابلل الورقه بزياده ..
ومرات العكس + احس ان تحكمي بالالوان صعب .. ؟

2 : لمن تبي ترسم زرع ولا شير ..
كيف تلون الاوراق .. يعني اممم لمن آي اجرب الضرب بالفرش
أحس مادري .. البقع عندي تبين شنيعه :/

هل تعتمد على فرشاه معينه .. ولا تعتمدون على الخبره وحسب !

+ اسمحلي اخوي عالاطاله ..
وخذ راحتج .. لا تجاوب عالاسئله ان كان وقتك ضيق ..
فلك العذر أكيد ..

:

احترامي وتقديري ..

:.

[عافك الخاطر]

ذكرتني بأيام حصة الرسم ..التلوين بالمائية كان أتعس شي عندي > كنت اخبص الدنيا فيه ..

انا شفت اول رسمتين وقلت " ها من صجه " بس عقب اتذكرت انك قلت انهم تجارب..
بس الباقي حلوين ..خاصة مالت البحر والسفن
نترقب اللوحات الياية..
.

[المحاق المشتعل]

السلام عليكم ورحمة الله وبركاته

اصحاب الردود الطيبه اعود لكم من جديد

عمووو

اشكر لج ردج الطيب وان شالله بحاول ازيد كمية اللوحات في نفس الموضوع

ولكن ان شاء الله بحاول اخليها للأحسن دامها ابتدت من خربشات

على فكرة انا عيبتني ثالث وحده بعد اكثر

لأني انا ابغي اوصل للوحاتي بهاي الصورة من البدايه لكن الممارسة هي ان شالله

إلي بتعطيني الاجابه الشافيه بإذن الله

شكراً عمو عالمرور

[المحاق المشتعل]

انامل قلب


سعدت جداً لوجد ردج الطيب

واشكرج ملياً على روعة كلماتج وذوقج في اختيارها في اي موضوع كان في الواحات

بالنسبه لاستفساراتج فإن شالله ما اقصر في الاجابه عنها ابد

بالنسبه للسؤال الاول

طبعاً تختلف الطرق في الوصول لموضوع او لرسم فكرة معينه

وانا عن نفسي ما درست هاي الطرق إلا من قرآءة الكتب الاجنبيه

وهالشي ما بيعطيني الحريه التامه في هالمجال لكن اتعلمت الكثير الحمدلله

فتقدرين ترسمين بالطرق المائيه إلي هي عباره عن الرسم على السطح الجاف مباشره

وهي الطريقه الاعتياديه .

والطرية الاخرى هي انه نرسم على سطح مبلل وتسمى هاي الطريقه ( ويت إن تو ويت )

يعني المبلل في المبلل يعني الفرشاة المبلله + اللوحة المبلله

وفي هالتكنيك المعروف عنه الانتشار اللوني

.. اما بالنسبه لتبليل اللوحة كنت في بدايتي من فترة بسيطه اعاني هاي النقطه

لكن إلي غلب ضعفي كلمة المؤلف في الكتاب انك ما بتحصل

على اي نتيجه من غير ممارسه او ما شابه من هالكلام

فعن طريق تجربتي اخلط اللون إلي ابغيه بالماي لكن بكميه كبيره من الماي واسوي الباك قراوند

ويكون بفرشاة 19مم ويكون بالتسطير العمودي او الافقي ( واحد من الاثنين )

وخط خط لين ما يكتمل الباك قراوند إلي تبينه

عقب طبعاً هاي النقطه ما كنت وايد حاطنها في الحسبان لكن لقيت هالفنان المتمكن

يعمل بها فاستغربت ... يقول انك لازم تمسك اللوحه واتحركها

وما اتخلي الماي يتجمع في مكان معين وبالأخص في الباك قراوند مال اللوحة

ويوم سويتها قبل يومين استغربت من جمال لون الباك قراوند وهني بديت في النشاط

من اول ويديد ...


بالنسبه لأوراق الشير

فأنا اكثر واحد كنت اعاني من هالشي

تقدرين اتسوين نفس الاوراق إلي سويتها في لوحة الصحراء

بواسطة فرشاة التوقيع ( شي غريب صح ) ؟

فرشاة التوقيع هي الفرشاة الطويله وايد والرفيعه في نفس الوقت

ويسمونها بعد لاينر برش او الهيير برش حق رسم خطوط الشعر

وبهاي الفرشاه اتحطين اللون إلي تبينه ممزوج بالماي

وعقب هذا تاخذين ورقه خارجيه ترسمين عليها بهاي الفرشاه بطريقة جانبيه

يعني مب من راس الفرشاة من اطرافها الجانبيه ( وعقب ما يخف الماي عن الفراشاه )

ارسمي على اللوحة الحقيقيه على المكان إلي تبين فيه الاوراق بنفس الطريقه

والحكمه من الرسمه على ورقه خارجيه هي انج نشفتي فرشاتج

فيوم بترسمين عقب على اللوحة الاصلية بيعطيج لون او خط متقطع لونياً

والشي الآخر إلي بيفيدج اكثر انه الورقه الخاصه بالالوان المائيه مب مستويه او فيها تعرجات

او ثقوب شبه مرأيه وهاي الحركات كلها اتسهلج عملية رسم اوراق الاشجار بدون اي تعب

بس مع كل هالكلام لازم تكون الممارسه اقوى واقوى

وحاضرين للطيبين واستمتع بأسألتج واسإلي وقت ما بغيتي اختي انامل وانا تحت امرج

محاق

[المحاق المشتعل]

عافك الخاطر

جزيل الشكر على هذا الحضور الطيب من شخصكم الطيب

ايام الرسم بالماي صدق كانت اكبر معاناه لي واكثر شي كان يحبطني في الرسم

لكن يوم اشوف الجمال إلي اشوفه في قصص الكتب

استغرب كيف هالجمال من هاي الصعوبه

وسبحان الله خطوة الألفين تبتدي بخطوة

وانا وايد سعيد بخطوتي وان شالله بطورها


عافك الخاطر

شكراً على الإطراء الجميل وطبعاً ان شاء الله ايي اليوم إلي اقدر فيه

اوصل الصوره او الافكار إلي ما اقدر انفذها بهاي الالوان لكم وان شالله اوصلها بنفس الالوان يوماً

لأنه لهاي الالوان طابع احب الكل يشوفه ويتمتع فيه مثل ما استمتع فيه

شكراً جزيلاً عالمرور الطيب

محاق

[المحاق المشتعل]

إضافه جديده من خربشاتي

فكره عالطاير

[عمة العيم]

جميله جميله اخر وحده

شو بلاها عدسات عيونك تربع في عيونك خخخخخ

سلامات

(^_^)
...

[أنامل قلب]

:
.

كفيت ووفيت أخوي المحاق ^_^ ..
ما شاء الله عليك .. وانا شغاله كوبي وبيست للكلام ><"
نستغل هالنصايح في حال نسينا ..

+ الرسمه الأخيره جدا جدا جميله ..
يبالي أقعد أجرب واتدرب عالألوان كلها وأنزلي موضوع عقب :/

:
.

ماتقصر .. ولا هنت ..

:.

[المحاق المشتعل]

عمة العيم

شكراً وايد عالرد حمسني وايد

خربتي مخي عمو انتي شو يالس اتخربطين


انامل قلب

ايضاً شكراً وايد عالرد زاد من تفاؤل ألواني

وحاضرين للطيبين في اي معلومه واي نصيحه

بس ترانا بعدنا في البدايه نتعلم ان شالله

[شوق القلوب]

السلام عليكم..

بصـــراحه.. احنا محظوظين بوجود فنان مثلك في الواحات.. و بصراحه أغبط اللي يشاركونك دايما و يجربون يمشون على نصايحك..

والرسم المائي كان بالنسبالي لغز.. كيف تتحكمون بالالوان بهالدرجه من البساطه.. و الحير عرفت السالفه من شرحك..!

و عيبتني رسمه الصحرا.. و الرسمه الاخير..
يا اخي انت مبدع.. ماشاء الله :)

..

اتمنى ارجع ارسم..

[المحاق المشتعل]

والله ردج هو الفنان

والله ردج وردود اعضاءنا هو إلي يعطي الحافز في الرسم

شوق رسمج جميل .. وفنج في الرسم لذيذ

فليش تحرمين نفسج وتحرمينا هذا الفن العجيب

اشكرج على كل كلمه قلتيها

ساندتيني من بداية مشواري ... فأشكرج من الاعماق

وشجعتيني في كل مواضيعي في بداية المحاق ومابنسى هالجميل ابد

شكراً شوق القلوب

محاق

[أنا فقط]

أبهرتني أستاذنا :)


ماشاء الله .. روعة ولا تكفي