رســالــة غربــة من عاصمــة الثقافــة لـ ...( متجدد )

[صريح]

والله يالمنصوري .. يوم قريت موضوعك تذكر كل الشباب اللي اعرفهم فالامريكيه
يوم اخطف عليهم [ الدوورمز ] و اشوفهم يذاكرون و على اعصابهم
و يتأففون ليش دخلو الامريكيه و يسبون دراستها الصعبه

و يلعنون الـ Calculus 1 و 2

و اغلبهم تخرج الحين من الامريكيه و صارو مهندسين
و يوم نجتمع دوم يرمسون عن الدكاتره

اللي يمدح الدكتور زايد و اللي يذكر معاناته ويا سامي الطبش
ذكريات حلوه الكل يتذكرها و يحن للامريكيه و مبنى الهندسه
اللي مثل ما يقولون [ داخله مفقود و خارجه مولود ]



بس الصراحه تنقال اللي يتخرج بـ هندسه من الامريكيه صدق تعب على هاي الشهاده


و هالكلام اقوله بعد ما شفت 4 من ربعي و هلي متخرجين من الامريكيه
و صعوبة الدراسه فيها و جديتها [ و هالشي اللي احنا طلاب التقنيه نفتقده ]

شتان بين خريج الامريكيه و فرحته بالشهاده و خريج التقنيه و فرحته بالشهاده


الف مبرووك ع التخرج يا بش مهندس و عقبال الماجستير و الدكتوراه
و تهنأه خاص لخريجين الـ Electric engineering

[عافك الخاطر]

خليتني اشتاق للجامعة وانا ما صارلي اسبوع مأجزة .. بس يالله راجعين لها الاسبوع الياي حق الصيفي
بعدني أحيد أيام الثانوية و يوم استعنا بجدولك للدراسة .. واحيد شي نقطة في الرياضيات ناقشتها هني في الواحات .. و انا طبعت الورقة و استخدمت الطريقة في الامتحان..ودعيتلك
يااا الله ايام حلوة كانت ..
ومعاناة عيال الدورمز ويا الأكل لا تنتهي .. سواء في جامعة الشارجة والا الامريكية .. بس احلى شي يوم يخلص الدوام .. دوم اقهرهم و اقولهم انا رايحة أكل من البيت .. عيش وطباخ البيت ماشي احلى عنه
بس يت فترة كنا نتأخر فيها وكنا نطلب برجر كنج والا كنتاكي من جامعتكم > يعني لو لاها جان تمينا على أبيلا
.
.

الحياة الجامعية ممتعة ومختلفة.. و ما ادري احس ان اللي يكون معاك في الثانوية و الجامعة ..تعرفه أكثر ويبان على حقيقته على قولتهم في الجامعة أكثر ..

استمتعت وانا أقرا لين آخر سطر ..

مبروك خيو و الله يوفقك و ييسرلك :)