رفــقــاً بـبــعـضـكـم

[طفلة من هذا الزمان]

أخوي "ما يهزك ريـــح " ،،

اتفق وياك جــدا ان موضوع السؤال ممكن يعتبر راي شخصي كونته بنفسك عن الشخص ، و اتفق وياك أكثر أن الخلافات اللي ممكن تصير مع الزوجين في وقت لاحق بسببهم مب من الناس اللي شجعوا أهل الزوجة على الموافقة عليه ....

بس انا ماقصد الخلافات العادية اللي تحصل بين كل زوجين في الدنيا .. الأمور الوارد حدوثهــا جدا و تعتبر من الصغائر اللي الواحد ممكن يلتفت لها .. اتكلم بوجه الخصوص عن الأزواج اللي ينفصلون لأسباب أكبر من الأمور اليومية ..

مثال واقعي ...

وحده اطلقت بعد فترة من زواجها لاكتشافها أن زوجهــا سكير "عفانا الله وإياكم " .. قبل الزواج يوم كانوا أهلها يسألون عنه كان الكل يمدح لهم إياه و محد ياب طاري الخمر ..

الحين شوف الفرق و انته قــرر ،،

بعد ما انتشر خبر طلاقها منه .. نفس النااااس اللي مدحووه هم نفسهم اللي ذموووه ..
يوا عقب قالوا :: و الله نحن كنا نعرف بس ما بغينا نتدخل "" كيــف يعني ؟
تراه كان تدخل بعد يوم قررتوا انه زين وريـال و النعــم ،،


أما الراي اللي يقول و الله طيب و تعامله مع الناس زين و عقب طلع العكس .. هذي اشيا برايي الناس مالهم ذنب .. هذا فعلا رايهم وهم أحــرار ....

كلامي عن الناس اللي تعطي عمرها الحق تدخل و تقرر عن البنت و أهلهــا .. الناس اللي تعرف ان هالشخص فيه عيب ما ينسكت عنه و مع هذا تفترض ان الريال يوم بيعرس بيعتدل فمايقولون عيبه !! هذا شي راجع للبنت و أهلها فقـط ،،

أكــرر .. ماقصد ابدا اللي تنفصل عن زوجهـا بحجة انه ما طاع يسفرها البلد اللي اختارته أو لأنه غلط و إتأمر عليها تسويله شي "اليوم سامعه سالفه جي و انقهرت من البنت " ..

اقصد العيوب اللي المفروض كمسلمين ما نتغاضى عنها .. و إذا نعرف شي لاااازم نقوله و مانخاف و نقول مالنا خص...