السلام عليكم


انا عندي ادمان على الفنادق ...


نبدأ ..الكوف روتانا اللي الكل مدحه ..انا ما رقدت فيه .. بس زرت المطاعم اللي فيه وما حبيتها ابداً ..لا البوفيه ولا المطعم الايطالي ... الكوفي اللي في الريسبشن حلو ...واليلسه حلوه بس وايد ضيجه ...اقصد اللي برع...

وجربت بعد فندق الهيلتون الللي في معيريض ... وايد حلو حجره حلوه ونظيفه وخدمتهم اوكي ,,, بوفيه الريوق حلو ...والمطعم الايطالي اللي فيه حلو حق عشاء..

فندق خت .. حلو في الجو البارد ..حجرهم اشوي ضيجه ...بس نظيف .. والاكل في البوفيه حلو ... واحلى شيء فيه عين خت ..


بالنسبه لفنادق دبي:

من اللي ذكرتوها ... جربت ..

الكمبنسكي ...وكان وايد حلو ... خدماتهم مميزه...

قمر الدين ... حلو ... بس الحمامات كرمكم الله شفافه ....

جراند حياه ... احب كل شيء فيه ... المطاعم والكوفي ... والغرف ... حلو وايد ووخصوصا البوفيه اللي تحت ... في انواع مختلفه من الاكلات ...هندي على ايطالي على لبناني ... بس فيه مشروب طبعا دامه في فندق ....


ومن أورع الفنادق ... رويال ميراج ... حتى لو ما سكنتوا فيه ... لازم تاكلون فيه ..لأنه المطاعم اللي ذكرتهم اختي شمعة أمل حلوه وايد .... والتمشي على البحر وعند الحوض بعد حلو ....


فندق جراند الحبتور .... حلو واحلى شي فيه البحر ويلسة البحر ... والاشياء اللي مسوينها ..حق اليهال ... انا سرت له اول ما فتح قبل 4 سنين تقريباً .. وحجرهم حلوه ورومانسيه وايد ... اضاءة الممرات حلوه ..بس مب احلى عن اضاءة رويال ميراج ...

رحت فندق البستان روتانا قبل العيد .(اللي اغتالوا فيه المبحوح).. وكانت اسوأ تجربه بس لأني كنت مضطره ابا مكان جريب من مردف والطوار ..وهالاماكن ... وندمت وايد على هالاختيار ..الحجر ضيجه وايد ..والخدمه سيئه .... ما حبيته ...حتى ريوقهم مب حلو ..وندمت ما حجزت في الفنادق اللي عند الفستفل ... لأني سكنت مره في واحد منهم بس ما اذكر اذا كان الانتر أو الثاني بس كلهم حلوين وفيهم مطاعم اوكي ...

فندق ارماني ...من اسوأ واغلى الفنادق اللي سكنتها ...مافي شي حلو غير الشاور جل اللي في الحمام الحجره ضيجه وايد ... وكتمه غير طبيعيه مووول ما حبيته والوانه وايد غامجه اونه كلاسيك ... بس ما دخل مزاجي ابداً

فندق قصر الامارات ..حلو وايد ..والحجره كانت واسعه ومطله على الحديقه ..وشرحه وايد ... واكلهم لذيذ اللي طلبناه في الحجره ... وحمام واسع وايد ... والسرير مريح ..حبيته وايد ..وكنت طالبه وانا احجز انه يسوونا ارينجمنت .. وكانت واااااااو ... السرير كله ورد ..روعه شي خيالي .. وحتى الحمام والبانيوم كله ورد ... ويابولنا كيك وعصير اول ما وصلنا ..واول ما سوينا الجيك ان عطوني باقة ورد كبيره ... شي دلع من الخاطر ..

فندق تريدرز ..تابع لشنغريلا ... وهو اربع نجوم .. حجزنا فيه يوم ما حصلنا حجز في شنغريلا وكنت مبوزه ما اباه ... بس تفاجأت الحجر واسعه ..ونظيف وايد ومرتب ... وريوقهم روعه .. البوفيه وايد متنوع والفندق هادي وايد ...وكانوا مسوين عرض فالصيف الحجره على 400 تقريبا ... وايد كانت مفاجأه بالنسبه لنا .. بس حلو حق اللي يبا مكان هادي ...

فندق العقه ...سرت له اكثر من 3 مرات ... حلو .. ونظيف ..وخدمتهم حلوه بعد .. بس خلاص ما افكر اسير له ..

في العيد رحنا لشاليهات ..روتانا بيتش اعتقد في دبا ... كانت حلوه وخدمتهم بعد اوكي ..بس المطعم اللي عندهم هو واحد ...حق ال3 وجبات ... واكله مب هاك الزود وبتأخر وايد ... بس كنا بروحنا مسوين جو ... يايبين طرادات وسكوترات ... وما كان شيء وقت حق اليلسه في الشاليه كله على البحر ....


تعبت من الكتابه ... وبعدني ما خلصت فنادق الدوله ....

انا بعد كل حجوزاتي عن طريق موقع bookin

i will be back