وبعدين يعني ...؟!

[مايهزك ريح]

اخويه حصان طرواده ..
انا كان عندي التكرا .. ودايما يحر ما اقدر اشتغل عليه اكثر من ساعتين .. ووايد يعلق .. بهدلني ..
عشان جيه ما احب التوشيبا ..
والستالايت كان عندي الرضيعه بعد نفس المشاكل تقريبا !

بس فيه شي حلو .. سعره بالنسبه للمواصفات اوكيه !

يعني بجيمة الفايو تاخذ اعلى واحد في التوشيبا ^_^ ( على حسب اللي شفتهن في جامبو )

بالنسبه للرام ..تقدر اتسوي ابجريد لها الموديل لين 2 GB وفيه موديلات ثانيه من فايو .. لين 4 GB * اعتقد *

[حصان طروادة]

خيال الحب

الله يعطيك العافية يا أخوي ، وكل شركة تمتاز عن الأخرى بأجهزتها وخدماتها المقدمة وإلخ ...

مايهزك ريح :

التكرا ، والستالايت ، والستالايت برو ، كل هذي االأنواع يندرج تحتها موديلات كثيرة من اللاب توبات .

إلى الآن أنا بنفسي أخذت لأشخاص 4 لاب توبات من نوع توشيبا ستالايت برو (ما أذكر الموديل بالضبط) ، والحمدلله البعض كمل معاه سنتين والبعض ثلاث وإلى الآن مافي أي شكوى .

في النهاية ، يعتمد عليك كشخص وفي كيفية انتقائك لأفضل لاب توب . بالنسبة لي ، ما أشتري أي لاب توب إلا بعد مراجعة التقييم من قبل شركات لها باع طويل في هذا المجال مثل CNET .

لذلك أنصح كل واحد إنه يراجع التقييمات الموجودة في الإنترنت واللي يسمونها (Review ) قبل لا يقدم على شراء أي جهاز إلكتروني ، ويشوف الإيجابيات والسلبيات ، وبالتالي راح يتفادى المشكلات المتعلقة بالموديل اللي بيختاره .

بالنسبة للرام :

أكيد تقدر تسوي له أبجريد ، لكن لازم تتذكر إنك راح تستعمل السلوت المخصص لشريحة الرام ، وبعدها شو بتسوي إذا احتجت لزيادة الرام مرة أخرى ...؟

أضف على هذا ، بترجع وبتحتاج للبحث عن أفضل رام يستحق إنك تحطه على لاب توب مثل السوني فايو ، وعاد شوف السعر اللي بتدفعه !!!

في النهاية ، بتحصل سعر ال2GB بدون إضافة هو نفسه سعر ال1GB مع الإضافة .

[عذبة الروح]

دخلت هني أشوف الردود على السريع
واحس إني ضعت .. وافكاري تشتت

بليييييز ارمسوا رمسه بسيطه & سلسه
أقدر أفهمها واستوعبها
لا تعقدون الأمور أكثر من ما هي متعقده !!

وشوي شوي عليّ .. ترى ما لي خص بـ هـ السوالف
احم احم



المهم


حصان طرواده

اشكرك عـ التواصل & التوضيحات
ربي يسلم يمناك على كل سطر كتبته بـ هدف المساعده


لي تعقيب على هـ النقطه

بالنسبة للرام :

أكيد تقدر تسوي له أبجريد ، لكن لازم تتذكر إنك راح تستعمل السلوت المخصص لشريحة الرام ، وبعدها شو بتسوي إذا احتجت لزيادة الرام مرة أخرى ...؟

فـ جمبو قالي المسؤول
إني الرام يتغير لـ 2G
والهارد ديسك لـ160 GB

كلامك اللي في الاقتباس عن هـ النقطه ما فهمته عدل ؟



وهيه قبل لا أنسى
ممكن توضح لي أكثر عن كرت الشاشه .. ما فهمت شو هو ؟
وشو سالفته ويا الأفلام & الألعاب

لاني مدمنة أفلام
أنزلهن على الكمبيوتر من الانترنت عقب أسيف الفيلم على سي دي
واشوفه !


===========

لي سؤال عن التوشيبا
لو بغير راي ما ادري للمرة الكم ...؟!
ورديت أفكر بـ التوشيبا
بـ أي لاب توب تنصحني & ما يزيد عن 3000 درهم
(يعني اختار لي جهاز توشيبا واحد .. واكتب لي رايك عنه)

وحط لي مقارنه بينه وبين الفايو اللي حاطه عيني عليه
يعني إيجابيات وسلبيات كل جهاز


========

ملاك الروح = على يكون زين // ونقدر عليه وأهم شي
أفهمه & يفهمني

خيال الحب = ربيعتي اليوم في المؤتمر يالسه تقولي يابت ديل & وايد زين
لكن ما تشجعت موووول حق هـ البراند :( ؟!

مايهزك ريح = شجعتني وايد بـ ردودك حق هـ الجهاز ..
تحمست له واااايد :)

[حصان طروادة]

عذبه

ما عليج من النقاش اللي بيني وبين حبيبي مايهزك ريح ، هذي مناوشات وحرب إعلامية بيننا

ـــــــــــــــــــــ

بخصوص الرام ،

هو ما يتغير ، يتم إضافة شريحة 1GB ثانية ، لأنه في العادة أي لاب توب قابل لزيادة الرام يحطون لج سلوتين وكل واحد منهم يشيل 1GB .

بخصوص الهارد درايف ، إذا بيغيره وبيحط 160GB بيكون شي حلو .

بس شي واحد حطيه في بالج ، شوفي فرق السعر كم بيكون .؟ لأنه مستحيل يسوون لج شي ببلاش .

بخصوص كرت الشاشة ، له علاقة بالألوان ، وفي حالتج ما أظن تحتاجينه ، لكن حلو لما يكون مستقل .

بخصوص التوشيبا ، بمر السوق وبشوف إن شاء الله لاب توب بسعر 3000 أو في هذا الحدود ، عطيني لين يوم الجمعة وإن شاء الله برد لج خبر .

ـــــــــــــــــــــــــ ــــــــــ

عموما ، أنا مع السوني فايو ، ولا تظنون إني ضده ، وفي نظري وإلى الآن السوني فايو من أفضل اللاب توبات على مستوى العالم وما أخالف أبدا .

ولكن لابد نحط في بالنا أمور :

1- سعره في العاده يفوق أغلب اللاب توبات مع قلة مواصفاته .
2- لو أنا أبدل لاب توبي كل سنة أو سنتين أفضل شي في هذي الحالة إني آخذ براند أقل بمواصفات عالية ، وأحط في بالي إني أقدر أمدد الضمان لسنتين بدال سنة واحدة ، وبالتالي أفك عمري من صدعة الراس .
3- أما إن كنت ناوي أخليه لمدة 3 أو 4 سنوات أو أكثر فالفايو بيكون أفضل حل .

بالنسبة لي كناصح ، أحاول أقدم لج حلول اقتصادية قدر الإمكان ، وفي النهاية الإختيار لج

[مايهزك ريح]

الأبجريد تقريبا بـ 600 درهم للرام ..ويسوونه في مركز خدمة العملاء في الرمول (ديره ) وياخذ 45 دقيقه ويسلمونكم اياه .. هذا والله اعلم ..

وبالنسبه للدردشه ويا حصان ما عليج منا نحنا ناس فاهمين في الكمبيوتر ( تخصصي علوم حاسب آلي )

المشكله يا حصان طرواده اني كنت ابا واحد كل شي فيه ..
وما عندي مشكله في السعر .. و كنت ابا هالموديل بالذات ..
بس للأسف الوقت اللي اشتريت فيه ما كان من هالموديل نازل الـ 2G رام ..
اما الحين نزل في كمبيو مي ..
وبسعر اقل عن اللي انا اشتريته في جامبو .. تخيل .. اسميني مقهور .. >_<

انا دايما آخذ وقت لين اشتري شي .. بس هالمره مادري ليش استعيلت

[ملاك الروووح]

والله راسي افتر


اكتشفت اني ميييييح ف هالسوالف



:

الحين آخذ الفايو ولا شو ؟




<< وهم من الصبح شو يالسين يشرحون ويقولون

:

خل استلم بس بيزاتي وباخذه ان شاءلله داش خاطري وايد

وبعدين انا ما بستخدمه الا حق تنزيل الصور وحق المسن وبس ..

سو أحس ات دازنت ماتر .. مش فارأه معي أنا أهم شي عندي الشكل لووووول

[عذبة الروح]

مشكورين اخواني
وربي فيكم الخير




شكلي ما بغير رايي عنه!



لانه أنا اباه لفترة طويله يعني ممكن توصل لـ أكثر عن 3 سنين
والفايو يخدم ونقدر نستهلكه وايد


المطلوب الأخير

وين أقدر أشوف لاب توبز حق الفايو غير عن جامبو & بلقز إن



يعطيكم العافيه

[مايهزك ريح]

كمبيو مي .. وجاكيس .. موجودين في مول الإمارات ..
كمبيو مي جريب السينمات .. وجاكيس في الدور الثالث في سيد دبنهامز .. جريب على مصلى الحريم فوق .. وعداله Lenotre كافيه !

[عذبة الروح]

احم احم

:)




فـ بوظبي

[مايهزك ريح]

اوووه نوووو ما اعرف في بوظبي .. انا من دبي .. ^_^
ان شاء الله الجماعة ايساعدونج

[حصان طروادة]

وأنا بعد من دبي

إن حصلتي شرف دي جي بيكون ممتاز

عموما ، سواء جمبو أو بلج إنس ، في العادة أسعارهم وحدة ، وهذي ميزة السوني

مبروك عليج اللاب توب مقدما

وعقبال العزيمة على كثر النصايح اللي حطيناها

بس شرط واحد

ما تعزمين مايهزك ريح

[مايهزك ريح]

وحليلي ليش ;_;

[عذبة الروح]

يعطيكم العافيه اخواني
ما قصرتوا ...

اونه عزيمه !!

بروحي اقولكم ما عندي بيزات بتسلف من خواتي
ما يصير تركبون علي ديون ..حق العزيمه بعد !


جثت ثوالف .. :)

إلا ما بعزمكم
يبالي اعزم الواحات بكبرها :)
لا خلى ولا عدم
يسلمووونيشن

[خيال الحب]

انزين انا ابا اشتري لاب تووب حق اخواني التوام ..

يعني مابيه يتعدى ال3000

استخدامه للانترنت+power point & word

can some one help me

[مايهزك ريح]

خيالووه .. في عروض في جمبو .. وشرف دج اعتقد على اللابتوبات .. وشفت شي في هالحدود ..
مر وشوف اللي يعيبك ..
في مول الإمارات حاطينهن عند الباب اول ما تدخل .. ^_^