كيف أتأقلم ؟!

[المزوحي]

كيف أقدر اتأقلم مع ناس يجرحون .. مب مجبور !

كيف لي أن أتأقلم مع طبيعة البشر ؟!!

أبتعد عن كل من يسبب لي الألم ..

هل برأيكم أن أصر على العلاقة الاجتماعية مع من احببت وأتأقلم مع هؤلاء، أم انسحب بهدوء ؟

أريد أن أفضفض قليلا .. نــعم

فأنا محتاج انسان يسمعني ...



هل المكان الذي يجمعني معهم، يجعلني اصمت واستمر وابقي .. ؟!

أم بمجرد رحيلي استطيع النسيان والتأقلم على الجو الجديد ؟؟

[ألم ترى]

بسم الله الرحمن الرحيم ..

انا مثلك تمامآ مريض بهذا المرض ! ..

فهل من معالج ؟ ..

المعذره ..

[المزوحي]

مرحبا اخويه .. شكرا لك على المرور .. وإن شاء الله نلقى الردود ونستفيد منها

[قصايد غلا]

المزوحي : انته حاس بي لووووول

والله قبل شويه كنت يالسه ويا بنات خالاتي 2 وخالوه نرمس عن هالشي

لأني ماداني اللي يجرحني و خاصة إذا أنا اسكت عنه مب لأني ما أحب أجرح ==> لكن هالشخص يتحرّاني ماروم أرد



أنا أتم سااااكته و فجأه أطلع كل اللي في خاطري ==> عاد خل يتحمل اللي بيّيه ، كيفه هو البادي


بس بعد أحس إني ما أعرف شو الحل وياااهم هالناس ؟
وااااااااااايد وايد وايد أعاني منهم ، والله أتعب يوم أفكر فيهم

لكن أشوف أحلى شي إني يوم أشوفهم أسوي عمري لا شفتهم ولا سمعت رمستهم و إن يت عيني في عينهم أصد الصوب الثاني و عناااااااااااااد فيهم أيلس جدّامهم و أسولف ويا شخص ما يحبّونه و أضحك من خاااااااااطري ==> عاد شوف غصّتهم في هالحزة و استمتع بعذابهم

[المزوحي]

والله حركات ثرج

مب حلو هالشي ، صـح ؟

انا يوم اسكت مرات اقول السكوت احسن ..


لأني لو رمست بيكون ردي مب شي ...

[قصايد غلا]

كم بنسكت يالمزوحي ؟

مرة مرتين ألف ؟!

هالشي البايخ استوا بيني و بين وحده من هلي


مرة ييت اسولف وياها لكن ردها كان باااااايخ و سخيف و أبدا مب حلو مثل ويهها

عاااااد قصايد حز في خاطرها هالشي لووول

وتميت ساكته لمدة شهر و شي

و أمس يت ترمسني لكن ردّيت بكلمة وحدة خلّيتها تنصدم و صخّت صخة وحدة ولا ردت بــ أق ==> جان أرتااااح ، المهم إني خذت حقي و احين مب شاله في قلبي عليها "وحدة بوحدة"





نصيحة : إذا تحس إن سكوتك عنهم يخلّيك شال في قلبك عليهم لا تسكت لأنه ماشي فايدة تسكت وقلبك فيه شي على أي إنسان==> ما دايم إلاّ وجهه سبحانه ، الدنيا ما فيها شي يستاهل إننا نموت ونحن في قلوبنا كره أو حقد أو زعل على حد


رد عليه و قول له يا فلان اذكر شو سويت بي ، و انا رديت عليك بهالرد عشان تحس باللي سويته .. لا أكثــــــر




لكن إذا تحس إنه انته من النوع اللي تدخل الرمسه من اذن و تظهرها من الثانيه ===>أحسن لك تطنّش

[عفاريتووو]

حتى انا اعاني مثلكم


اول شي كنت اطنش و لا جني سمعت او شفت شي
و اقول ماعليه طبعهم جي

بس و بعدين
نحن نسكت و هم يزيدووون
يعني التطنيش ما ينفع

بس بعد ما بقولك رد عليهم خلك احسن عنهم

اللي اسوي الحين اني اتجنبهم قد ماقدر
لاني اصلا ماقدر اجوفهم
كل ما اجوفهم اتذكر اللي صار و اتضايق

يمكن هالشي يحسسهم اللي يسوونه غلط
مردهم بيحسووون

و الله يهدي هــ الناس اللي جي

[مــهــابه]

أخـويه المــزوحي :

كـل أنسـان لـه أسـلوبه وطريقـته فـ التـعامل مع النـاس ، لـذلك نـحن مانقدر نغيرهم هـم

الـتغير يكـون فينـا نحـن . .

بإعـتقادي أن الأنسان وفي معظم الاحيان تكون طريقة تعامله من الطرف الثاني تعتمد وبشكل كبير على الشخص ذاته اللي هـو قـاعد يـرمسه . .

مم تـقدر تـكون أحسن عـنهم وتنطش ، ولا جنك سمعت شي . . .

أهـم شي ذاتـك ، وانك تكون مقـتنع ، بغض الطرف عن الكلام الجارح اللي يتوجه لـك . . .

لأن رضـا الناس غايـة لاتـدرك . . .

لـكن ! . .

لـو لاحظت انه هالشخص يـتعمد يعاملك بهالأسلوب ، ولأي سبب كان أنا ما أفضل أنـك تـسكت

ليـش ؟!

فـ الوقـت اللي انته تعتقد بأنه بسكوتك راح تتقي شرهم ، هم بيتحرونك أنك ضعيف ومب قادر ترمس وتدافع عن عـمركـ

لـذلك . . .

رد ولـكن بأسلوب يخليهم يستحون على ويهم ومايحاولون تجريحك

مم يعني رد الإساءة بالأحسان ( وجان يحسون ، راح يتجنبون هالشي )

امـا إذا هم من النوع اللي ماتنفع هالأشيـا وياهم

ردهـا لـهم بالمثل . . .


ونصيحة :

عـيش مثل مـا أنته حاب ومقتنع ، ولاتعيش مثل مـا الناس يبونـك . .

لأنه ب جيه يرتاح اللي حولك وبتتعب انته

والعكس صحيـح . . .



والسموحه منك

[ملاك الروووح]

وأنا رايي من راي عفاريتو ..

واللي باي ذ ويي عايبني توقيعها وايد

حاولوا قد ما تقدرون انكم تتجنبونهم ..


أو ممكن تنبهونهم حق هالشي ف شخصيتهم ..

بس ما أعتقد انه بييب نتيجه !!

لأنه صعب الواحد يغير طبعه !!



:

بس مب مجبورين تتحملونهم وهم يجرحونكم ...

ابتعدوا عن هالاشكال وايد أحسن لكم ..


والله يعينكم عليهم !

[المزوحي]

اهلين قصايد ..

واحد من ربعي .. هو يشتكي من هالشي وخاصه في دوامه .. بس صدق هو خلوق وغيره

وبقولج إنه يطنش شراتي لكن يتم حاط بخاطره .. تدرين شو قال لي ؟؟

قال : انا أحيانا أرد على الشخص بكلمه، يعني مايكون وقح ولا يرفع صوته .. بس يرد عليهم بطريقه

إنهم يفهمون، لكن تامين وياه، ما ابتعدوا عنه ...



يمكن هذا هو الحل وأفكر استخدمه

[المزوحي]

مرحبا عفاريتووو .. إذا هالناس انت وياهم كل يوم، عايشين وياج، يعني في احتكاك بصورة كبيرة ..

انا ما أذمهم ولا انا كامل .. بس

كيف انسان يكون وااايد وياج وفي نفس الوقت، يتم يفر رمسه بدون ما يحاسب ..

هالشي مب حلو ..

رديت مره مرتين ... بس اقول لا .. انا اخلاقي ما تسمح لي أكون جيه او أغيّر طبعي علشانهم ..

همم هذا الشي يحير

[المزوحي]

مهابه عيبني ردج ....

آخر مره صار هالشي، سكتت .. مارديت ولا قلت شي .. يتوقعون إني بلومهم ..

لكن حسيت إنه الويه تغير ... سكوتي خلاهم متوترين اكثر ...

وصح كل انسان له اسلوبه ..

يعني أنا أعامل هذا غير عن ذاك .. مب لأني أفرق من بينهم .. ولكن لأنه هذا نوعيته غير

وهذاك مواضيعه تختلف ...

بس كل شي له حد !

[المزوحي]

هلا ملاك ...

طريقة تجنبي ليوم واحد حسستهم‘ إنه في شي .. وكان إييني اتصال وراء الثاني منهم، يتحججون بالاسئلة عن أي

شي ... طبعا مافي سؤال مباشر لي : شو بلاك ؟ لكن يبين عليّه إنه في شي .. مع هذا ماسويت طاف

للاتصال ..

[ايه احبك]

أنا من راي مهابه
لكن اعكس الأدوار
يعني اتمدح الشخص اتمدحه دوم اتكلم عنه بالزين وين ما رحت لكن لا ترمس جدامه اكتف بابتسامه
بيقول اهبل او ما عنده سالفه الخ
لكن في الأخير بيسمع من الغرب انك ما تخافه ولا تكرها لكن تكن له الأحترام
بالعاده الأنسان الي يبغي يشد انتباهك ويحصل على اهتمامك هو الي يتعمد جرحك
فالأفضل انه ما تبين اهتمامك جدامه بينه من خلال الناس الي حولينه الي اكيد طبعا بيوصلون له عن نظرتك فيه
وشي اساسي ما تمدحه جدامه واكتف بفن الأتكيت معه يعني كون راقي في تعامل معه
بهاي الطريقه بغير اسلوبه معك

طبعا
اتطنيش ثاني شي وانا ما احبذ هالفكره ابد ابد مع انه تنفع مع شخصيات بس مب كل الشخصيات
وانا دوم احط في بالي انه بقدر ما كان الشخص الي جدامي سيء بقدر ما هو خير وطيب بس جانب يطلع جدامي اكثر عن الأخر بالتالي انا احدد طريقة التعامل

يالله اتفلسفت لين ما قلت بس XD

[المزوحي]

مرحبتين ايه احبك

افكر بردج يوم قلتي :

بالعاده الأنسان الي يبغي يشد انتباهك ويحصل على اهتمامك هو الي يتعمد جرحك
فالأفضل انه ما تبين اهتمامك جدامه بينه من خلال الناس الي حولينه

ممكن يكون كلامج صح .. تدرين ليش ؟؟؟


لأنه هو أكثر واحد ويايه عن البقيه .. لكن اكثر واحد مايثمن الرمسه .. يعني هو الوحيد

اللي يكلمني جيه عن الغير ... استغرب كيف انه مع شخص وايد وتتعامل وياه بــ هالطريقه



فــشو رايج الحين ؟