كيف أتأقلم ؟!

[ايه احبك]

لووول جان قلت لي من قبل وايد وياك جان فسرته بطريقه ثانيه ^^;
هو كيف يجرحك من اي ناحيه عطني مثال ؟؟
يعني انته اسوي شي وهو ما يعيبه ويعطيك في ويهك بدون اسلوب
او
انه يفر رمسه عنك وهي اساسا مب فيك
now
1
اذا كانت الطريقه الأولى يستخدمها فهذا يعني انته اسوي شي وهو نصحك بطريقه لا بأس بيها وما استجبت له فبتالي قام يستخدم الكلام الجارح عشان اتحس لنه يشوفك انسان عنيد غير قابل لتغير الا بالكلام الجارح
2
اذا كانت الطريقه الثانيه فهذا يعني انه مثل ما قلت قبل انه يبغي اهتمامك وهو حاس انك يالس تهتم في احد (يمكن هو يدانيه او ما يدانيه ) اكثر عنه فيطر انه يجذبك بهالاسلوب
--هاي في حالة صديق --
او
يمكن انه يبغي ياخذ شي منك مثل منصب او اجتهاد او شي معين هو يبغيه منك فبتالي يبغيك تعصب او تتنرفز وتترك له هالشي --> هاي الحاله اذا كان زميلك في دوام
لكن بتسأليني شو بتفسرين ان هو وايد يتعامل وياي
بقولك انه هني في احتماليه انه يحاول يوصل للي يباه منك عن طريقك كأن يتودد ويحاول انه يكون قريب منك عسب يعرف مثلا خططك من الناحيه العمليه -- هني صدق لازم ما تكون ساذج
--هاي حالة زميل منافس --

[المزوحي]

انا لاحظت عليه إنه كذا مره يقول إنه تخلص الشغل بسرعه او احسبك اليوم ماعندك شي واااايد

وقلت له امس الله اكبر عليك .. انا الحمدلله مجتهد .. وهو مب صديق كثر ماهو زميل ووايد ويايه في الشغل ..

وهذا اللي استغربت منه



اليوم: مادري، اتجاهلته غصب (ن) عني، وهو لاحظ‘ في شي !

تم يسألني كذا مره عسى ماشر يا فلان ... لكن أبغيه يعرف إنه كل شي له حد ...

وكلمته آخر الدوام، عن اسلوبه .. قال : لأني انا وايد وياك فخذت راحتي وأرمس جيه ..

قلت له : طيب، بس الواحد يحاسب على الرمسه .. وانت يوم تعز الناس ماتجرحهم

نحن ربعك بنتحمل اطباعك، لكن ثمن الكلام أول ..

تأسف لي كذا مره وقال : حــقك عليّه ..

[ايه احبك]

لربما فعلا شي ذاتي يصدر منه وتعود عليه كشخص انه يعق خيط او خيط
بس انتبه دوم الزميل حط له حدود حاول ما تقوله عن طريقة شغلك او حتى كلمة مجتهد او شاطر لا تطريهم جدام زملائك
لنه الأنسان معرض للحسد
خل العلاقه صطحيه لا تخليه يطلع على طريقت عملك او نجاحك لنك ما تضمنه شخص مثلا بعد عشر سنين من العشره والمجابل ينجلب عليك في لحظه فا احرص انه ما يكون يعرف اشياء ممكن تنجلب ضدك
--
اتمنى اني قلت شي يفيدك ^^

[المزوحي]

ايه احبك .. هو روحه كل شي يسويه يخاف من الحسد، حتى يوم ياكل ويشرب في الدوام، كل يفتكر نحن بنحسده

وصح الحسد مذكور، لكن الواحد مايكون جيه مب زين ...

ماحب الشخص اللي يبغي يعرف كل شي عنك وشو تشتري ووين تسير لكن هو في المقابل يدس كل شي عنك

ويخاف إنك تسأله، رغم إني مب فضولي ولا اتدخل في شؤون الغير

[أنامل قلب]

السلام عليكم ورحمة الله وبركاته ..

موضوعك يضم حاله كلنا نمر ابها ..
وهذا أمر طبيعي جدا لاختلاف الشخصيات والنفسيات اللي نختلط ابها وإيانا ..
منهم اللي يجرح وأهو ما يعي ذلك .. ومنهم اللي يجرح وهو يقصد الاساءه لسبب ما .. !!

لكن سؤال ..
جربتو انكم تكونون من الصنف الذي (( لا يُجرَح )) .. !

...

...

شي طبيعي ان بنمر بأفعال واحاديث تسيئنا ..
ولا ما بنكون من خلق الرحمن ..

هي شغلات تختلف من شخص لآخر .. (( فاللي بالنسبة لك جارح يكون لبعض الغير عادي جدا والعكس )) ..
لكن الجميل الافصاح عن (( الشغلات اللي تضايق المعني )) للغير بشكل طيب لجعل العلاقات واضحه وسليمه ..
+ من غير السليم ان نلوم الجارح .. إن كان غير مدرك لتجريحه ..
مثل ما إن ممكن نكون بمحله فنجرح غيرنا ونحن ما نعي ذلك لاختلاف الاطباع والافكار والنفوس .. !!

:

مثال :
في حال ضايقتني رفيجتي بفعل ولا كلمه .. ما بعتبره جارح ولو كانت الشغله بنظري (( كبيره )) ..
بتضايق من الفعل كطبيعة تفرض علي ذلك .. لكني ما بنجرح لكونها ما تعي ان فعلها بالمحل يسيئني ..
والأكيد اني بصارحها بشكل طيب وممكن تلاقيني اضحك معاها باللحظه ..
لكنها بالكفة الثانيه تكون مدركه اني كنت جديه بقولي والعلاقه تبقى طيبه وعااادي جدا ..
لكن مصارحتي لها تعتبر فرض علي لابقاء العلاقه طيبه والحمدلله ..

وتظل حبابه ^_______^ ..

مثال 2 :
في حال كان الشخص غريب علي (( أو بالاحرى مو من المقربين )) وممن (( يقصد الاساءه )) لسبب اجهله + لغفله وقع ابها بشخصه .. !

اهني إذا ماكان شي مجال لتبادل المصارحه والحديث بكتفي بالصمت والابتسام ..
(( خاصه لكوني شخصية فيني علة الخجل للأسف وقليلة الاختلاط بالغير + قليلة الكلام " أدري انصدمتو :/" )) .. !!

ممكن حتى استغرب + أكتم ضحكتي لأني بعتبر فعل (( قاصد الاساءه )) ومحاولة جرحه لي عمل مضحك ..
والأكيد إني أحسبني ما بنجرح .. !!

بالعكس ازعل عليهم لكونهم وقعو بالغفله ..
لأنهم يظنون بإن فعلهم (( شي )) وهو بالواقع يسيئ لهم قبل لا يسيء لي ..

وبالتالي يبقى منظرهم هو القبيح الخاطيء المفتقر للاحترام ..
بيد أن محلي يبقى سليما رفيعا صافيا ..

ما يهم نظرة الغير بي (( حال سكوتي وابتسامتي )) إن كانت أفكارهم غير سوية ..
واهني أطري ظن البعض بضعف شخص الصامت وإن كان الصمت أبلغ عن لفظ كثير قد يقال ..

بغض النظر عن كون الصمت فن ما يملكه أي كان .. !!

اممم ببدي الفعل اللي أشوفه سليم ..
والأكيد إن ظنون الغير ما بتفيدني ولا ممكن أعتبرها مقياس لتحديد نوعية رد الفعل اللي يلزم مني ابداءه للغير .. !!

بمعنى آخر ما برد على غيري (( ممن قصد الاساءه )) رد غير لائق عشان ما يعتبرني البعض ضعيفه ولا غيره ..
بالعكس بضحك .. وابقي على نفسي (( بعيني )) سليمه ..

وربنا العالم بخفايا النفوس .. !!

....

بالأخير ..
حلاته لمن يملك المرء إن يكون من الصنف اللي لا يُجرَح ..
يملك إن يجعل قلبه صافي من ناحبة الغير ..
يدرك إنه الضيق اللي يجيسه من افعال بعض هؤلاء الغير طبيعي جدا ..
وطيب القول والعمل المتبادل امر لا بد منه أقوبلنا بالاحسان أم الاساءه .. !!

والله يجعلنا جميعا منهم ..
باذنه .. !!

وما ينسى نقطه إنه في حال رد المرء اساءة الغير باساءه ..
بيحط نفسه بنفس المنظر والمستوى الكريه الغافل اللي شافه به (( المسيء المعني أولا )) ..
ومن الكريييـــــــه جدا ان نذم فعل أحدهم .. ونتبعه تالي .. !!

:

المعذره عالاطاله وإن كان حديثي غير مفهوم .. !

احترامي وتقديري وامتناني لكم ..
اختكم أنامل قلب ..

....

[المزوحي]

اختي انامل شاكر لج الرد ... وحبيت اضيف شغله ..

من مده صار موقف مع زميل عمل، لكن هالزميل وايد وياه بحكم إنه نشوف بعض يوميا 7 ساعات ..

قال لي كلام، مابقول اتهام ... بس تقدرين تقولين إنه صرح كلام عني، وطبعا وقتها انا تميت ساكت

يمكن تصرفي غلط كوني سكتت لحظتها ولازم كنت اوضح الشغله، بدل هذا كله ...

يومين على هالحال .. واليوم الثالث سألني شو بلاك متغير ... عقبها فتحت الموضوع إنه انته تقول شي عني

بدون ما تتأكد من الشي ... وصار نقاش حاد ... بس الحمدلله اتفهم الموقف وانا اكلمه مثل اول عادي وهو بعد

وصدق مافي شي في خاطري عليه ...

اما الموقف الثاني صار لي اليوم ...

صح الناس عقليات ونفسيات، وانا اترك مجال للغير، واسامح، لكن مرات الواحد مايقدر يسكت واااايد .. ولازم احس بعمري بتهجم

الانسان او برد عليه وبقوله يافلان كذا وكذا .. لسبب إني تعبت من تصرفاته ..

[أنامل قلب]

السلام عليكم ..

:

اممم أخوي أحب أبين شغله قلتها مره لوحده من رفيجاتي ..
إن الإنسان يملك يقول اللي بخاطره مهمن كانت الكلمة كبير بنظر الغير بفحواها .. !!
(( سواء كانت الكلمه مصارحه ، نقد ، توجيه ، ووو )) وتكون جدا جدا جدا خفيفه على خاطر المستقبل .. !!

كيف .. ؟
باسلوب طيب يحدده الشخص نفسه (( المتحدث الموجه .. !! ))

فـ جدا يأثر الاسلوب بتحديد مدى خفة أو ثقل الكلمه اللي تنقال بنسبة ممكن تتجاوز الـ 80% ..
والأكيد إن الاسلوب بيختلف من شخص لآخر أكان باختلاف شخص ناثر الحديث أم المستقبل المتلقي .. !!

:

وبخصوص المسائل هذي أخوي الطيب ..
فهي شغلات ما تعتمد على الطرف المسيء وحسب ..
لكنها تعتمد على كلا الطرفين برايي .. !!

في حال أخطأ فلان بحق أيا كان ..
ما نوقف عند خطاه والسلام ..
لكن نرد ونلتفت للطرف الثاني اللي وجهت الاساءه له ..

كيف تصرف وكيف كانت ردة فعله ..
سواء بصمته عن المسيء أم بمصارحته له .. !!

والأكيد إن المرء لازم يدرك متى يجدي الصمت ومتى يلزم منه الحديث لسد حاجة الموقف .. !!

كما ان (( برايي )) أهو بحد ذاته (( اللي كانت له الاساءه )) يحدد مقياس الاساءه ..
ويجعلها فعلا إساءه .. مش المسيء نفسه .. ؟!؟!؟

أتكلم بشكل عام .. وانا أهني أكيد ماسيء بكلمتي ..
بالعكس والله ^_^ .. هي مجرد محاوله مني لإيضاح الصورة بشكل أكبر ..

وتصحيح بعض المفاهيم بشكل عام للكل .. وانا أولكم .. !!

فإن كان رد فعلك اللي بان له بالسابق بنظرك غير مجدي وغير معين لا له ولا لك ..
جرب رد فعل مختلف باسلوب مختلف يعتمد عشخص المعني بالموقف .. !!

حتى ما تلقى بالنهايه شي بخاطر كلن منكم ..

وحلو انك والمعني المجهول رجعتو مثل أول ولا شليتو شي بخاطركم ^_^ ..

:

مادري .. ان شاء الله تكون كلمتي مفهومه ..
وإني عرفت أوصل الفكره وقصدي من هذا الحديث .. !!

وووو اسمحلنا أخوي عالقصور ولو طلعنا برا الموضوع .. !!

:

احترامي وامتناني ..
اختكم أنامل قلب ..

...

[المزوحي]

أحيانا أقول الاستمرار في الاسلوب ( اسلوب الجرح ) إني انا طيب والحمدلله مب ساذج ..

لكن هالطيبة والسكوت يعتبرونه شي في قاموسهم

بس لازم اتخذ موقف واغير اسلوبي .. في شي بسيط ناوي اسويه .. وبمشيه عقب يومين ..

وبشوف النتيجه

[أنامل قلب]

^^

مادري ليش بس أخاف من الردود اللي بهذي الصوره .. !!

+ (( لكن هالطيبه والسكوت يعتبرونه شي في قاموسهم ))

ما لومهم .. دام القاموس عندهم محرف على هواهم ..
وصارت المفاهيم عندهم خلطه ملطه .. !

.... ! + ! = !!



...

[المزوحي]

ليش هالتخوف، دام إني استخدمت وياهم اسلوب مانفع !

[غموض الامنيات]

نصحية .. اذا ما ترتاح لشخص اما انك تقوله .. او انك تبتعد عنه ..لانك انت الا تتعب


هذا هو الحل الوحيد والله .. ويرياح بالك