دير دياري ~ يوميات

[عافك الخاطر]

اليوم: الاربعا
المزاج: تساؤل

- بس لو كان في شي ..
المشكلة انه ما في شي..
هاي هي المشكلة!

- في فن في الحياة اسمه " فن الكلام " ، ناس ممكن تكسب اشخاص،علاقات، مناصب..الخ بس من ورى لسانها ..
للاسف تعلمت/ادركت هالشي متأخر جداً..

- براعتك في الكذب يشوفونها قوة شخصية و ذكاء .. لانه مافي شي يهزك .. عندك سيطرة حتى على كذبك .. للاسف!

[مزن هتان]

اليوم : ...
المزاج : ...

الموضوع : احساس غير، شعور غير، كلش غير

أحساس انِ فعلا ...، ربِ قدم لي الخير في كل خطوه اخطيها
ربِ ابعدني عن كل حرام، ربِ سهل أموري و يسرها
ربِ لا تأخذني من دنياك حتى ترضى عني و يرضى عني والداي
ربِ

[أنامل قلب]

اليوم : الخميس ..
المود : .. ... .. !.
الموضوع :

امم اليوم ، تفاصيل حلوه ، وتفاصيل تضيع ، وتفاصيل غريبه !.

ربي يسلمكم ، اليوم الصبح بركنت وكل شي ويايه بنزل ، لقيت واحد كذلك نزل بنفس الوقت من سيارته الحمرا ،
وعادي ماشين ليـ نوصل المبنى وما كنت ملاحظه عليه كيف هيئته ، يعني عادي شايفه دربي وماشيه ،
بس بما إنه ريال فمشيته اسرع وتجدمني ، ومن مر من جدامي صرت : !.
صدق مادري شلون ماودي أعلق بس والله إنها مب حلوه لمظهر الريال يكون بهذا الشكل ،
بالأول لا إرادي طاحت عيني على يده "كفر البلاك بيري أحمر وساعته حمرا " ،
مادري قلت بكيفه ، يمكن صادف انه مطقم ولو إن الأحمر داش غلط بالسالفه ،
وبعدين تراني من النوع اللي جي بشكل عام عادي امشي وانا اطالع تحت ، جي مادري كيف ،
المهم ماكنت منتبهه وبالي مشغول بشي ثاني ، بس لمن ييت بجتاز الـ شسمه طاحت عيني على نعاله ،
حتى نعاله أحمر "

استغفر الله مش إني أعلق والله مش القصد ، تراني ما أعلق عالهيئة ككل كونها مسألة ذوق ،
بس خاب ظني ابـ معنى الرجولة ، حسيته صدق ما يركب عالريال يكون بمثل هالمنظر ..

وبعد ، صار شي اليوم !.
مادري كيف لمن تظهر منا جذبه ، بس صدق ماكنت ناويه أجذب
لولا إني حسيت بإن أي كلمه ثانيه ممكن تتسبب ابـ مشكله ..
مع إني بالعاده لو ما بغيت أقول شي وانجبرت إني أتكلم ، عادي أعطي رد ابـ صياغة ثانيه
بحيث توحي للشخص بمعنى غير المعنى اللي أعرفه ، وهيك لا أكون جذبت ولا أكون قلت اللي ما أبي أقوله ..

لكن هالمره كنه ما نفع ، اممم أو يمكن من الارتباك !.

~

تدرون كيف ، كل مره أقتنع ابـ هالشي أكثر ، كلما كنا بحالة صمت وبعيد عن أي تفاعل واضح ،
نكون أبعد عن المشاكل والحساسيات ، وأقرب للـ بقعة السليمه ..

خاصه اللي مثلي يتحسسون من التفاصيل ،
أو يمكن الصفه اهني خاصه فيني ..!

[أنامل قلب]

اليوم : الجمعة ..
المود : .. .. !.
الموضوع :


مو من زمان راده من العزا ، كان اليوم اممم لا بأس به والحمدلله ،
بس مادري كيف ، عمي أ الريال العود اللي تكلمت عنه مره بالاعترافات ـ رفيج أبوي ـ
بنته توفت من المرض الكريه ، كانت تتعالج برا وتوفت هناك ، على حد علمي امس يابوها ودفنوها ،
مادري كيف حسيت لمن قالي ابوي إنه كان قاعد يبجي ، والله صدق لو شفتوه بتحسون باللي اقصده ،
وايد وايد وايد إنسان ترتاحوله ، أبد ما قصر مع ابوي وجدا تحبون تقعدون معاه ،
من هالشياب اللي تحسك تبي تاكلهم من وناستك فيهم ..

وبالعزا ونحن قاعدين ، يمرونا الحريم يسلمون كل شوي ، اللي توهم يايين واللي بيروحون ،
بعضهم تحسك ما تبي تفج عنهم ـ يدهم لمن تسلم عليهم ـ وبعضهم يحسسونك انهم غصب يسلمون ،
وايد يهمني أنا كيفية السلام ، استانس وايد عالشخص لمن يضغط ع يدي ، حتى اذكر وحده عدنا بالدوام جي بزياده ،
فقتلها : أستانس لمن أسلم عليج ، يعيبني جي شلون تلمين ايدي / يحليلها ..

ونحن رادين ضيعنا شوي ، يحليله الوالد يبي يجرب درب يديد و"شويه" ضعنا ، بس خطفنا عالمحطه وخذيت للوالده اسكريم من ماكدولاند ،
وخذتلي جبس ولبن من المحطه ، ومن رجعت السياره كلمت رفيجتي ابيها اتي معاي الموعد ، وبالمره اشوفها واقعد معاها شويه ابـ أي مكان ،
وعقبها اتصلت ابـ وحده من زمان مو مكلمتها ، ما بينفعني اقصر ابـ حق رفيجاتي أكانو قراب أم أقل قربا ، يحتاي كل فتره قصيره اكلمهم ،
عالأقل لو نقعد اندز لبعض مسجات سوالف بنحسنا مرتبطين دوم ، غير الصديقات القراب طبعا هذول نتواصل معاهم ونستخف بعد ..

مع إن تقصيرنا صاير واضح لبعض ، بس امممم الحمدلله ، صديقاتي ما في منهن والله ، حتى باستهبالنا ،
وكيف بعد صج سبحان الله تحسون كل وحده لها مكانتها ، عادي مثلا لمن تصادفون شي وتحتاجون تتكلمون ،
مادري كيف على حسب النفسيه سيده تخطر لكم وحده بالذات ..

أحبكم !.
وربي لا يحرمني ..

[أنامل قلب]

اليوم : الأحد ..
المود : .... .... !.
الموضوع :


تدرون لمن تحسون بإن ودكم تكتبون وتكتبون وتكتبون ،
ومن تبدون بالكتابه تحسون بإن كل اللي يظهر مو أهو اللي حابين تقولونه !.

حتى بموضوع الدايري ، أحسني مزحوووومه وأبي أكتب حتى أدق التفاصيل لأنها اللي تعنيني ،
بس لمن أجرب أكتب ألقاني أبتعد لـ شوي من هذا وشوي من ذاك ، وهيك أضيع ولا أرجع !.


دائما ..

[مزن هتان]

اليوم : ....
المزاج : عادي !

الموضوع

مش عارفه اسبانيا و الا بانكوك و الا مصر و الا بلادي
أبوي بيروح بانكوك يباني اروح معاه، أمي و خواتي الاثنين بينزلون مصر و امي تباني معاها
عمي و خواتي الاثنين الثانيات قالوا اسبانيا و يغايضوني و أنا أقول كم تسوى بلادي
اقعد أجابل أم سيف أحسن لي، بس ماني عارفه راح أقعد عند منو، ماريد أقعد بالبيت

[مايهزك ريح]

^
شكلي يتم في البلاد هالصيف .. الكل امسافر .. وانا بجابل البشاكير .. ^_^
ابويه بيسافر ويا ربعه .. واخواني والوالده سايرين نيويورك .. وانا بتم بروحي ..

بس عندي سفره اسبوع اخر هالشهر بتخفف عليه .. شويه من القهر >_<"

واجازه سعيده ومفيده في دبي .. بجابل مدهش السنه !

[مزن هتان]

الحال من بعضه يا أخوي، بس ذكرتني انه أكو مفاجأت الصيف "مدهش"
يعني بطلع مع عيال أختي الحمدلله

[أنامل قلب]

اليوم : ما تفرق ..
المود : .. ... .... !.
الموضوع :


مشتهيه أنام بس عشان أرتاح من الكحه ،
مع إني حتى وانا نايمه كل شوي اكحكح ، بس على أخف لمن أغطي ويهي ،
صدق صدق هدت حيلي ، أحس روحي بتطلع ..

[أنامل قلب]

اليوم : الأحـــــــــــد ..
المود : ..... !.
الموضوع :


اممم بتخبل من الدوام ، ولا أدري ليش ،
بس خارج النص ، اليوم تفاجأت ابـ تعليق بايخ من أحدهم ، أو بالأصح مأساة ،
فجأة دخلو المكتب أهو مع وحده من الموظفات ، جي كانت محتشره بسبة مراجعه يتهم من شوي ،
وأهو شكله نفس الشي ، بس رد ابـ تعليق صدمني ، كيف جي مادري ، جذبت عمري لمن سمعت O.o !.

وبعد ، اليوم طايحين فيني تعليقات ، مادري كيف كان الجو اليوم أساسا كل شغلي مخربط ،
مرات أفتكر واضحك ، مرات افتكر واقفط ، مرات افتكر ابـ علامات تعجب واستفهام ..!؟

المهم بالأخير ، عيش مسالم ولا تفتكر بظنونك وايد ،
بعيد عن الناس ، أقرب لنفسك ..

ودمتم سالمين !.

[أنامل قلب]

اليوم : الاثنين ..
المود : ...... !.
الموضوع :


امممم ذبحوني يبوني غصب أرد ابـ هالعباره !.
جي أونه لازم من أرد على أي مكالمه أبداأ ابـ : "اسم القسم" أنامل قلب معاك تفضل !!!!!!

شو ها بعد ، للحين متعقده ، اقعد أختصرها ، بس بعدهم يردون يتصلون فيني اونه قوليها كامله ،
احم ، هو صج انه مو بكيفي ، بس اقولها : كيف جي إذا قلت كل هذا متى بسلم ،
تقولي لا تسلمين خلاص قلتي تفضل ..

وانا أبي أقول اسم القسم بس وعقب على طول السلام عليكم ، وهذا اللي اسويه للحين عالأغلب ،
بس يحليلها فلانه ما قصرت ابـ كلامها ، مع إن للحين احس مادري كيف جي ، لكن شكلي غصب بسويها !.

كله ولا يوم رجعت اتصلت ابـ موظف عدنا ، رد علي اونه بيعلق : ها "اسم محل العمل " معاك تفضل ،
ها منو معاي انامل قلب ؟
أنامل قلب : لا والله + ضحكت ما قدرت الصراحه ، قطعني ..

حتى حضرتي شو مسويه ، اوني حاطه استكر عالكمبيوتر كاتبه عليه العباره ،
اونه كل شوي اقعد اقراها ، وبالبيت اقعد اعيدها ، أبي أعود لساني عليها ولا اني استثقلها جي ..

حشى مب عباره ، كابوس ..

مشكلتي ما أحب الشي الجامد ، مع انها يمكن سلبيه توهقني ابـ أحيان كثيره ،
بس واااايد ما أحب إني أكون جامده ابـ أي شي كان ..

[مزن هتان]

اليوم : الثلاثا
المزاج : احم ..

الموضوع

امممم استغفر الله يا رب ماحب اذم المكان اللي أعمل فيه
الحمدلله مرتاحه !! بديت اتقبل الاغلبيه بس بعدني احيانا لساني ينربط
ما ارد عليهم لما يحاجوني ..

أبيّ أصلي على راحتي بس هذا اللي ابيّه

[أنامل قلب]

اليوم : الثلاث ..
المود : ....
الموضوع :

مثل مزن ، مواضيع الدوام ما تخلص ، بس أحلاها لمن تكون بغض النظر عن كل شي ، لـ حالك !.
المشكله الأكبر بس في كوني أسكت عن شغلات أحس المفروض ما أسكت عنها ، مش إني أقعد أعلق عالدقه ،
بس بعد فتره المفروض اللي خلاص صرت أتعامل معاهم وايد أصير أقولهم هالأشيا عادي ، ولا إني أحطهم ابـ ذمتي ،
يعني مثلا : صج إنهم لازم يقولولي عن أخطاء الغير ، منها أدير بالي ومنها أتفادى مشاكل كثيره ممكن اني انحط فيها مستقبلا ،
بس بالكفه الثانيه ما يصير يفضحون الناس بالاسامي ، مادري ما أبلع هالنوع من الكلام بالساهل ، مع إني طاف عالأغلب ،
يعني لو يكون شو ما يكون تعاملي مع المعنيين مثل ما أهو ما يتغير ، بالأخير أتعامل ع أخلاقي آنا مو أخلاق غيري ،
بس هم ما يصير كل شي ينقال ، خاصه إن ممكن يوجهوني ويطرحون ملاحظاتهم بشكل مختلف ،
+ موضوع التقليل من قدر الغير واااايد ما أحبه ، عالخطأ والزله والدقه ،
وايد أحس يتم التساهل بطرح كلام اعتبره غريب جدا وشي أبد ماني حابه أعتاد عليه ..

~

في موضوعين ، وايد وايد وااااايد مضايجيني بالدوام ، مادري للحين كيف أتصرف ،
حتى وانا نايمه قمت اشوف كوابيس بسم الله الرحمن الرحيم ..

~

مواقف مسؤولتي ما توقف ، صدق انها تحفه بكل النواحي ،
اليوم قاعده اشوفها تتكلم بالتلفون مادري مع منو ، واسلوبها مادري شلون بغيت آكلها ،
فجأة صديت صوبها وانا أضحك ، اونه : فلانه أحبـــج

وبعد شوي رجعت دخلت عندها بما إن الأخ ع موجود بمكتبها ـ السايق ـ ،
فقتله عن موضوع عساس المفروض يخلصه ، وريحته بإن بيتابع معاهم باجر مو اليوم ، أعرفه مو فايق ،
المهم اتحرطم شويه ، جي سوالف كالعاده ـ بس للتوضيح تراه ريال عود ـ ، وماكو رجعت المكتب والا اشوف مسؤولتي ترد تزاعج ،
أنامل قلب تعالي بسرعه بعطيح انذار ، خلاااص لازم انذار ، ويوم رحتلها اشوف شو السالفه ـ ادريبها بسوالفها ـ ،
اونه : خلاص بعطيج انذار ، شو مسويه فيهم ، فلان يقول عنج حبوبه
أنامل قلب بخاطري "مسكين مادري منو قص عليه" ، وعلقنا عالخفيف ، بس والله وايد يضحكون ،
ع كثر ما يقولولي بتكرهين عيشتج بسبة الموظفين وبيحشرونج والخ الخ ، بس أحس مع ذلك اجراءاتهم الأخف ،
اللهم لمن يكررون السؤال عن شغله أكون خلصتها بس المعنيين بعدي ما كملو الاجراء ، فاتوهق اهني بما إنهم يقعدون يراجعون حضرة جنابي ..

اممم صج إني وايد صرت أخبص واحيانا اضيع وع كثرة سؤالهم احسني خلاااص دووومي متأخره ،
بس الحمدلله قمت ألقط الشغلات اكثر ، واتعود ع نوعية الشغل اكثر ، وبعدني بلقط اكثر واكثر ..

أحلى شي بالدوام إنك تظل على تواصل مع الناس ولو من بعيد لبعيد ،
تقعد تلتهي ابـ مهام ، تتعلم أشيا ، كذلك احساس إنك شايل مسؤوليتك ومعتمد ع حالك ..

وهيك ، وايد رمست ..

[أنامل قلب]

اليوم : الاربعا ..
المود : ....
الموضوع :






يالله تعبت ..

[أنامل قلب]

اليوم : الخميس ..
المزاج : .... ... .. .... !.
الموضوع :


في شي وايد محسسني بتأنيب ، وابـ نفس الوقت مادري شلون ما أحس ابـ عمري لمن اكون بهذي الصورة ،
في أشيا كثيره نسويها ما نقصدها ، لكنها تظهر بشكل يأثر ابـ اممم ما بقول إنه سلبي ، لكنه بعيد عن القصد ..

ما أدري أساسا إن كان ينفع أوصفها بالـ [ قصد ] ، أهو ما يخصه أحس شي وأمور تمر ابنا بشكل عفوي ،
التفاصيل الي تظهر منا من غير تفكير ، ويا كثرها ..

~

ما أحب لمن أحسني محاصرة ، مع إن الكلمة قويه ، بس فعلا أحسني كذلك من غير ولا نتفة مبالغة ..

~

كان يا مكان في قديم الزمان ،
الناس تعيش الأمس ، وهي تتأمل الغد ،
ولا حاضر لها ..