دير دياري ~ يوميات

[شوق القلوب]

سوالفج حلوه يا مزن... ربي يحفظلج الوالده :)

[مزن هتان]

=) ربي يحفظ لنا أهلنا عزوتنا، تاج راسنا و كل غالي يا رب

[مزن هتان]

اليوم : الثلاثا
المزاج : لا تعليق

الموضوع

البارحه مرت أخوي العود خرعتنا عـ الساعه 11ونص بالليل طلعت من غرفتها و تنادي أختي
سألتها عن أخوي الثاني اذا موجود أختي قالت لها لأ توى طلع سكتت عاد أختي خافت قالت أكيد أخوي العود
صابه شيء، جان تسألها ليش قالت لها ماشيء و دخلت غرفتها.
نتصل في هاك ما يرد عاد انا و هاي خايفيين ننزل تحت عدها قلنا يا انه ريلها تعب وياه شيء أو مات " يا لطيف شلون متشائمات"
بعد 10 دقايق رد هاكي خبرته يتصل فيها، اول شي ما كانت ترد عليها هو خاف زياده
اتصل يقولي مزن قوي قلبج نزلي شوفي شصاير حلفت له والله ماني نازله، و هو يكلمني كانت تتصل فيه
كان وايد يحاتي، شوي اشوفه اتصل يقول تبا لوز ... تمووون الاخت و لا كأنه
عدها ريل و تمارس صلاحياتها على أخو زوجها بأنه ولد خالتها و زوج اختها

أختي قالت له لما توصل البيت اتصل فيني ننزل نطقها أنا و أنت و مزن
وقفت قلوبنا والله، قلت حق اختي بفعلها بـ لوز صدقيني.

[قصايد غلا]

شو قصة كل المعرسات يبن لوووز

بسم الله شو مستوي

ربيعتي حامل و تبا لوز ، وديت لها لوز من بيت خالوه ، مع إنه أخضر كلته
و اليوم تقول لي إنه حرمة ولد عمتها بعد تدوّر لوووز >.<

[خيال الحب]

^ ههههههههههه زين خبرتيني خلاص عيل بفتح محل بس لبيع اللوز خخخخ

اسميه اللوز طاح طيحه ولا حد ياكله

قبل يضاربون عليه اليهال والحين يتعازمون عليه خخخخخ

[قصايد غلا]

لووووول خيال يبا لك تدور على البيوت

ولا أقول لك : أسهل شي انك تسوي برودكاست على البلاك بيري مسنجر ههههههههه و تعطيهم رقمك للتواصل و طلب اللوز =D

[خيال الحب]

هههههههههههههههههههههه ماتخيل والله

ربعي بيقرضوني قراض لين ما انقرض من الدنياااا

المشكله الدريوليه مسافرين ولا بتكون تجارة غاويه خخخخ

ماشاء الله بكل مكان لوز

[مزن هتان]

أنا من السنه الجايه راح أبيع أجل، لأن عدنا شيرة لوز بس للحين خضر و اظن ما راح
يصفر و يحمر الا الحول الياي، و حاليا اللي يبي يقول بيبعه برخص لأنه من بيت خالتي
بس باخذ اتعابي من دون سعر التنبيت و السقى كم سنه =)

[خيال الحب]

لااااا يا مزن@_@ لاتسرقين فكرتيـــه

واللوز ما يتنبت@__@ لوول

[مزن هتان]

ينزرع لااااااه

[مزن هتان]

اليوم : السبت "البارحه"
المزاج : احم

الموضوع

نشيت 8 ابوي يسألني شو مقعدج من أول الصبح، أقول باجر الاحد يعني لازم ارقد من وقت
عقب قالي اروح عنه الجمعيه بما انه ميهود رحت خذت الماجلة، الضحى العود دزيت مسج حق
وحده اني اريد اشوفها و ما ارح اطول معاها بس 10 دقايق، ردت عليه انه مش مشكله بس وين و متى؟
حددت لها المكان و الوقت و كان مناسب من 3ونص نزلت المطبخ كنت ارتب كم حاجه + اسوي كيكتين
حق نسيبي و اللي بشوفها بس صارت من نصيب خواتي و اخواني. بعد المغرب طلعت عشان اشوفها و تلاقينا
كنت موديتلها شيء "ان شاء الله" يكون عيبها صج و ما تكون مجاملتني بالمسج. و قبل لا نركب سياييرنا
قالت لي أسلم عليكم "عاد ان شاء الله يوصل سلامها للجميع" تقول للي سئل و ما سئل عن أنامل قلب

لقاء عـ السريع و حلو الله يحفظ هـ البنت تدخل القلب والله
اول وحده من الواحات اخذ راحتي معاها من دون لا استحي

رديت البيت بركنت السياره توي بنزل ياني اتصال أونه الا نطلع نتعشى أوني زعلانه عاد
نعم ؟! الحين قريب الـ 8ونص و بكره دوام ما ينفع بس ماشيء كلمتهم مشت عليّه بالاخير
من رديت من السفر و هم يحاولون معاي و أنا مش طايعه أطلع مكان، غيرت جو

[مزن هتان]

اليوم : من دون تحديد
المزاج : اممم عادي

الموضوع
استغفر الله يا رب و ربي يهديهم و يبعدهم عن هـ الفعل
و ربِ ياخذ حقنا من أي شخص تحجنا فينا من ورانا، عيب لمن فلان يستأمن عـ شخص
و يقوم يشهّر فيه "حسبي الله و نعم الوكيل" هل هذا مرض ؟ امبلا أكيد مرض
ينطبق عليهم هـ البيت "يعطيك من طرف اللسان حلاوة و يروغ منك كما يروغ الثعلب"

بعيد عن الموضوع اللي سبب لي أرق هـ اليومين ^^

البارحه استانست و أنا احفظ الكم كلمة من أختي و انقلها لـ رفيجتي، هزبتهم شوي
ليه انه دراستهم سهله و حلوه بس هم ما يذاكرون، عدهم حاجه تتسمى مقالي =) عبالي اختي تتريق
عليه يوم تقول تذاكر مقالي عباره عن نقطه و منها 10 بنود و تحت كل بند بعد كم نقطه !!

يقولكم في قانون الاقتصاد يكون للمدين احقية الاختيار في استرجاع الديّن للدائن بعد 15 سنه ام لا
يعني ربيعتي تسلفني و بعد 15 سنه تقولي ردي خردتي أقولها مالج حق عندي، بس طبعا فالقانون الشرعي واجب استرداد الديّن
و شي اسمه الوفاء الاعتياضي "الوفاء بالمقابل" يعني ان يتفق الدائن و المدين باستبدال العين بشيء آخر مثال انه بدال الخرده
اللي عطيتها فلانه تعطيني سيارة. التخصص احسه اي شي لو دارسين موارد بشريه، علاقات عامه أحسن لهم
أشتقت للدراسه والله =(

[مزن هتان]

اليوم : الاثنين "البارحه"
المزاج : الحمدلله وايد حلو

الموضوع

رديت من الدوام قعدت مع خواتي و كلمت أمي و بعد صلاة العصر رقدت
نشيت 6 ترتبت و طلعت عند أخواتي اسأل منو من الصغاريه يانا ان جان حد من عيال اللي نعرفهم يعني
وصيت الخدامه تيب لي رطب بس قريب الاذان يوونا خالتي و مرت أخوي + الصغاريه وزعنا عليهم
بعد المغرب يتنا أم سيف و بابا رد من وقت تعشينا يميع و أخواني كذلك

احب أقعد اجابل ام سيف، ترد لي الروح هـ الانسانه

خواتي اللي اصغر مني وحده بالكليه و الثانيه اولى ثانوي
دوم يقولن لي مزن انتي تفكيرج شرات الرسوم المتحركه =)، مدري افرح و الا أزعل
ما راح اتعب عمري و اعطيهم من أفكاري مره ثانيه
ها يزا الاحسان ؟


أفتقد شمعة أمل و أنامل قلب عن جد

[مزن هتان]

اليوم : الخميس
المزاج : اتمنى يصير أحسن

الموضوع

من رديت من السفر لاحظت على عدد من الأعضاء ان يسون لي طاف =)
"يا ربي أنا شو مسويه، حد منهم دزيت لهم رسالة بـ هالخصوص -قبل السفر-و قالوا ماكو شي عادي"
عادي برايكم بس حبيت أقول اني أنا ما أوقف مع حد ضد حد، أنا ما اتحجى من
وراء ظهر فلان، لو يصير سوء فهم امبيني و بين شخص مستحيل أشيل بخاطري على الشخص والله

أحب أجدم الاحترام قبل كل شي و حسن الخلق
يقول الله تعالى : (ولا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ) فصلت:34
لو يظلون يسوون لـ ردودي طاف بعد بدز ويهي، يمكن اطيب خواطرهم
اذا كانوا زعلانين على فعل لابد انه بدر مني من دون قصد و لو اني عارفه نفسي
خاصه معاهم مستحيل أقط كلمة او أشد معاهم بالحجي.

أهل الواحات كثار منهم تغيروا
وين اللي كنا نقول عنهم اخوانا و خواتنا، ما يحتاي نشيل بخواطرنا على بعض
أنا ماريد أجبر أحد انه يرد عليه، بس هذي من مبدئ الاحترام انه إذا أحد يحاجيني
اني أرد عليه لو حتى انا انزعج منه.

كلامي هذا عن 3 أشخاص، وايد مضايقني هالشيء

[قصايد غلا]

^ يمكن مشغولين أو ما شافوا رسايلج =)

و إذا مطنشينج عمداّ ، خلاص سويتي اللي عليج
بيي يوم و بيردون مثل ما كانوا و أحسن

لأن اللي معدنه طيّب لو زعل و تكلم بلسانه قلبه يبقى مثل ما هو و يرد مثل ما كان لو عقب سنيييييييين
لا تشغلين بالج ، الله أعلم بالنوايا =*