دير دياري ~ يوميات

[أنامل قلب]

اليوم : الاثنين ..
المود : ..... .!
الموضوع :

امم اليوم مول ما قدرت أنام ، الوقت الوحيد اللي نمت فيه وماكانت نومه نومه ، اظني تعتبر غفوه !
وقت ما أذن الفير بالضبط ، اذكر اني سمعت الأذان بس ما أذكر عقبها بشو سرحت وكيف نمت ولا شوللي صار بالضبط ،
بس من رفعت راسي عبالي متمدده خمس دقايق ولا اشوف الساعه ست الا ربع ..!

قمت صليت من غير السنه ، وايد كنت تعبانه ،
وتميت حاولت اقاوم عساس اقعد شوي لاذكار الصباح بس ماقدرت ،
قريت كذا ذكر وكملت الباقي عالفراش ^^" ، بس حتى الاذكار ما كملتهم مادري كيف جني نمت ،
ووو يالله من هالنومه ، تعرفون لمن تحسون انكم نايمين ومو نايمين بنفس الوقت ! احلام بايخه ..
هذا غير إني كل شوي أقعد أجيك الساعه ، لأن وراي قعده وموعد لمكان ..

المهم قمت الساعه ثمان بكل برود رايحه راده ، اوني بتزهب يعني وبصلي الضحى وبلحق اقعد شوي واكمل الكتاب ،
بس ما لحقت اسو شي من هذول ، لمن دقيت لـ فلانه كانو قايليلي المفروض اتصل ابها وجي ، تفاجأت ابها تقولي تعالي الحين ،
او بمعنى ثاني طلع عندها اجتماع الساعه عشر على كلامها ، فما لحقت بسرعه بسرعه ، ولمن تزهبت لقيت اخوي الكريم بعده ،
المفروض انا اللي اتأخر مو اهو ^^" ، تميت اسير وارد عليه ، ضحكني شلون يتغتر ويتعطر ويتعدل ..

بس مادري وايد حسيته اليوم ذويق ، مادري كيف جي اونه ما يبيني ادخل بروحي ، ولمن دخل كل شوي يخليني اتجدم عنه ،
احليله شلون لمن يهتم ، ما خاز عني إلين وصلني للمكتب المطلوب ، وهناك قعدت يمكن جي مال نص ساعه ..

حبيت البنيه وايد ، حسيتها جي طيوبه وعفويه ، اسلوبها غير متكلف ، وضحكتني لمن قالت اوني صغيرونه وكتكوته ،
والله ما يخصه ، اقول بخاطري عيل الكتاكيت الصدق شو يسمونهم ، على كلام امي اونه هذول بزياده ، كيف بزياده مادري ..

الحمدلله احس جي ربي حفظني ، كنت احاتي اشيا ، بس سبحان الله شلون طلعلي هالموضوع وهاللقاء ،
اممم مادري صدق شو السالفه ، بس باذن الله خير ..

,

عقب رجعت البيت ، جابلت اللاب ، قعدت ادور بالبيت بروحي ، جان اتذكر اني مو متريقه ، اللهم العلج اللي لوع ابـ جبدي ،
خذتلي تفاحه والكتاب اللي اقراه حاليا وقلبت ويهي عالفراش ، تميت إلين الساعه 12 ، وعندي موعد اوريدي عالا12 ونص ،
الامتحان التجريبي للسواقه ، لبست عباتي وسيده ظهرت ابـ مجازفه كبيره ، تخيلو رحت للمركز ابـ تكسي وبروحي !
حسيت اني كبرت عشر سنين ^^" ، ما شاء الله محد من اللي يسوق عدنا موجود بالبيت ، والوالده مشغوله ، والوالد قايلي عادي توكلي ،
بس صدق يوم عن يوم اقتنع اكثر بفايده الليسن اللي باذنه الله باخذه قريييـــــــب وبرتاح من صدعة التوصيل ، وايد يذلونا ..

الحرمه اللي كانت هناك احليلها مادري شلون تكلمني ، وايد حسيتها حبابه جي مهتمه ووصلتني لسيارة المدربه بنفسها ،
وهي نفسها اللي امتحنتني ، انا الهبله ماعرفت اسرع الا وقت الامتحان ، تخيلو عاللفه زين ما جلبت السياره ^^"

عطتني كذا ملاحظه ، وحده اني اسرع ، والثانيه لمن اغير السيد تقولي لازم اجيك عقب احرك السياره ،
مو احركها وانا اجيك ^^" ، وإي صح تمت تقولي بزيدج حصتين وانا محتشره مابي ، اقولها ليييــــــــش ماحتاج !
تمت تتذرع بإن اساسا لستة الأحد مزحومه ، فمافي مجال يناسب كثر الثلاث ، فسلمت للأمر ، يالله خيره ..

وإي صح ، انا روحي يالله يالله توني متعلمه السواقه ، وياينا واحد صدق شكيت ابـ سلامه عقله ، قاعد يلاحق السياره ،
وجي يقربها من سيارة التعليم ، والمدربه محتشره عليه اونه آر يو كريزي ، ضحكتني ، ولا تقولي انتبهي عدل من هالسياره اللي فيها مينون !

تم جي الين ردينا المركز ، وهذا بصوب ولمن اشوف السيايير الطوفني بكوم ثاني ، ماحب جي ،
شو ها بعد اونه يعني يراووني انهم يسوقون ع كيفيهم ، دببه ..

,

ادري وايد تكلمت ، بس اليوم رحت كذا مكان ، رجعت من مركز التعليم سيده نمت ، قعدت يمكن عالخمس صليت العصر ،
وتغديت بروحي مجبوس لحم مع روب ودقوس وطرشي ، جني وايد مكست ..

بعد صلاة المغرب رحت انا واختي نتصور ـ صور شخصيه ـ بما إن الصورة اللي عندي جديمه نوعا ما ،
ومووول حاسه صدق شكلي كان غلط ، الله يستر بس الحين كيف بتظهر الصورة ، مره تقولي وايد ترمشين ،
ومره تقولي سكري حلجج =# لعوزتها صدق بس بالأخير صدق صدق صدق حسيت إني مووول ماكنت مرتاحه لمن خذت الصورة الأخيره ..

عقبها ابوي كان عنده شغله ، بييب شيل اختي من محل العبي ، وعقب رحنا الجمعيه ،
ردينا البيت يمكن جي قريب الساعه تسع ، والحين قاعده احط هالاضافه ، وبرد اظهر من الواحات ، ما صليت العشا .!

~

كل شي خيره ..