دير دياري ~ يوميات

[أنامل قلب]

^ احليلكم =)
رمش ، ربي يحفظه لكم ..
اختي الا انا ، تستاهلين تستاهلين ،
وعن المدربه فـ عني أنا مو من النوع اللي يناجر احد ولا اني اقعد افاتن ،
ما يخصني بهالسوالف ولا أحبها أساسا ، ولا قتلها كلمه ! ، بس مشكلتي إنها تسو شغلات صدق ماحبها ،
فتلقوني أحيانا أتنرفز وفوقه مو من النوع اللي يتكلم ، عشان جي اصير بارده معاها ،
وفوق هذا بعد ما يرضيها لول ، مو كافي اني كاظمه غيظي P=

مع ان ممكن يكون من حقها الصراحه ، اكيد تقول احر ماعندي ابرد ما عندها !
ولو إن إهي اللي تحط نفسها بهالمواقف ، بس اممم مادري يمكن لأنهم يبون يخلونا نسوق
بشكل يرضي اللي يمتحنون ، تدرين بعد فلسفتهم =/

,

اليوم : الجمعه ..
المود : .. ..... .... ..... .... .!
الموضوع :

أحلى وقت لقراءة القرآن بعد صلاة الصبح ، خاصه لمن الكل يكون نايم ،
ووو بعدني ما قريت سورة الكهف + كنت أبي أقولهم إيوني البيت بس شكله ما بينفع اليوم ،
وهيه ، في برنامج كل ما ارد اشوفه باليوتيوب أرد أحس بنفس الاحساس ، ربي يجزاهم عنا كل خير ،
صدق والله جي تميت أفكر شلون الناس تطرح شغلات وعقب يمكن ينسونها ، ولا حسبالهم ،
لكن مثل ما إني ييت وشفت ورديت شفت وبعد برد اشوف ، ولازلت أحس بنفس الأثر ولازلت أقول يزاهم الله خير ،
يعني أكيد في غيري وايد ، وكل هذا بميزان حسنات كل مبادر باذن الله ..

,

أمس كنت يايه ألبس الشيل اللي يابولي اياها للبيت ، اجرب شو الاحلى ^^" ،
مع إن نحن عايلتنا ماعدنا سوالف ان نقعد كلنا مع الكل ، اقصد رياييل وحريم ، الا اللهم جان ماكو احد غير الاكبار ،
وهذول بعد يعتمد اذا من المحارم وشنو صلة القرابه ، الا بالعيد ، اممم عيالهم كذلك ايون يتغدون عندنا ،
فنقعد كلنا وقت الغدا مع بعض ، وعشان هالنص ساعه متوهقه !

لمن ييت أشوف الشيل شلون حسيتهم شوي خفاف ، مع ان طولهم حلو والقطع كذلك حلوه ،
صدق مووول ما كنت متفيجه افكر اقعد اغير هدومي وعقب ارد البس اللي كنت لابسته ! ، لكن شكله لا مفر ..

,

مرات أقول أشيا مادري كيف استغفر الله تزل من لساني ، نفس امس ونحن بالمسيد انا وربيعتي ،
بعد ما صلينا اربع ركعات ما لحقنا نقعد شفنا الامام رد قام وقف بيكمل ، فربيعتي تقول غريبه ليش جي بالعاده بنطر شوي ،
قتلها : يمكن بيطوفه المسلسل =# ، استغفر الله والله صدق مادري كيف طلعت من لساني ، ضربتني وتمت تضحك بنفس الوقت ،
يمكن لأنها كلمه صارت تنقال وايد ، وانا شكلي يبالي كفخه ..

وهيك يعني ، يالله أذن العصر { ادعولنا ..

[أنامل قلب]

اليوم : السبت ..
المود : .. .... ~ .!
الموضوع : وللمره المادري كم / تدريب الليسن !!"

,

اليوم عاد يقولون إني وصلت حدي ، صيحتني !

قتلها خلاص رديني المركز ، مابي أسوق ،
إلين وقفتني ع طرف الشارع بالباركنج ، وتمت اونه بتكلمني ،
وانا مااا احب اني ابجي جدام احد ، خاصه لو هالأحد ما لي علاقه فيه ولا هو قريب لي ،
جي تميت اصد الصوب الثاني ، وارد ابتسم مثل اللي تضحك على روحها ، استهزاء على استنكار يعني !

تمت جي تبي اونه تفهمني ولا تبررلي اهي ليش جي ، وانا ماكو مو قادره اسمع ولا طايقه اسوق اصلا ،
ظهرت برا السياره ورديت قعدت ورا ، قتلها خلاص قعدي مكاني ورديني المركز ! > اتشرط بعد ..

بالاول تمت تزقرني ، وعقب تمت تحاول معاي ، اقولها بس مهمن كان الواحد يكون طيب بالتعامل مو جي ،
انا ماعندي اغلاط جايده وجي كل شوي شاده اعصابها / اللهم على سالفة الميرورز والشولدر ، عيل لو كنت من اللي مول شو كانت بتسو فيني ،
وردت تتكلم وتتكرم وتتكلم ، وانا ســــااااكته كالعاده ، إلين قالت أونه أنامل قلب مهمن كان أنا أكبر عنج مو لازم جي تسوين ،
اهني صدق والله واااايد زعلت ، قلت بخاطري الحين انا من شفتها وليـ يومي ما قتلها شي ، وحتى اليوم ما قتلها شي واتكلم معاها بالزين ،
وتشوف شلون صيحتني ، بالأخير تقولي هالكلمه ، والله جي حسستني شلون إن ما شي يبين بعيون الناس غير اللي يبون اهمه يشوفونه ،
وقتلها بعد ، الحين بعد كل هذا تقولي هالكلمه ، الحين بالله عليها هذي كلمه تنقال جي ..

وماشي ، تمت تتكلم وتتكلم وتقنعني وتقولي ان اونه لو كانت اختها مكاني جان تمت توجها بنفس الأسلوب ،
لأن على كلامها اونه يعني جي بتتعلمين وبتنتبهين وبتركزين اكثر ، وانا اكثر منج أبيج تاخذين الليسن ومن هالكلام ،
حتى ردت قالتلي اونه حطي نفسج مكاني ، ماكنتي بتكونين مثلي / قلت بخاطري بسم الله علي الرحمن الرحيم ..!

وكالعاده أساسا ماحب أحط نفسي بهالأشيا ، آخر همي والله إني أحط موضوع الليسن باعصابي ،
رجعت مكاني ورديت اسوق / بس مادري اممم ماعرف كيف أييبها ، تعرفون لمن تحسون أحد ماخذ موقف من كل المواطنين !
هذي أحسبها جي ، مادري اذا صايرلها شي ولا ان تكرر معاها كذا موقف ، بس كله جي أحسها ،
حتى قالتلي مره اونها تعرف عربي بس ماتحب تتكلم هاللغه ! تقولي بس جي ماحبها =/

بغيت أقولها لا دخيلج حبيها !

,

قلت حق الوالده ، اونها المره اليايه بتي معاي ، ولا بتخبر ابوي واهني الطامه الكبرى ،
طبعا ما بخليها ، حتى ما قلت للوالد عن الموقف ، مافيني والله على صدعة الراس ،
وبعدين كاهي شاطره وشدتها نفعتني ابـ أشيا ، وزين الموقف اليوم بيبينلها شوي إن في تجاوز صار ..

,

هيه صح ، وأخيرا خذت موعد لامتحان الباركنج ، ما بغيت الصراحه ! صدق وايد تأخرت بس لأني مالحق عليهم ،
هالمره ابوي راح قبل لا يخلص دوامهم ولحق عليهم ، ووو عقبال الامتحان الاخير ..

وبس ..

[عافك الخاطر]

الأحد
13.9.09
المزاج: اشتياق مبعثر ..
- عندما تصطدم رغباتهم بمبادئك .. هنا فقط عليك أن تضع الحدود الحمراء بثقة و تنصرف بهدوء. محاولات الاندماج مع الآخرين لا تعني بالضرورة أن نكون قابلين للانسياب في كل لحظة...
- لا أمل الانتظار.. اعتدت عليه ..لكن اليوم بعد أن اوصدت ابواب المكان و بقيت وحدي..شعرت بوحشة كبيرة لم أعلم مصدرها..انعكاس وجهي في المرآة كان انعكاساً لأشياء أعمق في ذاتي.. كأن كل ما حرصت على كبته في داخلي رأيته أمامي يطفو مع أشياء كثيرة كنت اظن انني لن أتمكن من رؤيتها تبزغ من جديد...
أحتاجك الآن أكثر ..
- جميل أن تلتقي بأحدهم بعد يوم شاق طويل كدت فيه أن تفقد الأمل من كم الاحباطات التي تنهال عليك من كل الجهات ، ليخبرك بأن الأمل كان كل ما يملك ليواجه به شدة مرضه و المحنة التي انتهت به ببتر ساقه ..
لسببٍ ما..أنا ممتنة لك كثيراً
- كان عمر اللقاء اسبوع واحد فقط .. لكنه ترك أثراً عميقاً في نفسي.. أحببت (اللهجة) قبل كل شيء.. ربما كان الاهتمام جزء من تأدية الواجب بالنسبة لهم ، لكن كان يعني الكثير بالنسبة لي .. مُنحت إحساس لم أحظ به منذ زمن قديم .. إحساس بالثقة و بأن كل شيء ممكن ..