دير دياري ~ يوميات

[رمــش الغـــلا]

خلاص اتـريـآ ^__^

[أنامل قلب]

اليوم : عساس انه الخميس ..
المود : .. ... .... .~ !
الموضوع :


بتكلم عن روحتي لأحد المولات اليوم ، والزحمه اللاطبيعيه اللي شفتها ..!

أحيد الناس يحشمون الشهر شوي ، بس اللي شفته العكس تماما ، صدق صدق واااااااايد كان الوضع فظيع ،
بالأول تميت مع الأهل رايحين رادين بكذا محل نشوف حاجاتنا ، وعقب طفرت جان اقولهم بسير المكتبه ومن يقعدون
بأي مكان كوفي ولا مطعم خل يدقون علي ، وهكذا !

طبعا الله لا يراويكم الوضع شلون كان ، زحمة شباب بشكل ، أساسا مو من زود نسبة المواطنين بالبلاد ،
وكأن نصهم تواجدو اهني اليوم ، ربي يزيد ويبارك فيهم بس مو بمثل هالأماكن ..

حتى مادري ليش جي تميت خايفه ^^" ، حسيت عمري صدق عبيطه ، المفروض اعصب واكشر بويهم XP
مع اني استمتعت جدا جدا جدا بالمكتبه ، احس نفسيتي ترتاح وتبتهج بهالمكان ، بس مالحقت اظهر
إلا واعتفست ، حتى وانا يايه احاسب كنت جي واقفه على اعصابي ، ماحب أحس جي ناس حوالي وزحمه ..

وعقب المأساة ، بعد ماطلعت من المكتبه كنت رايحتلهم داقين علي يقولون انهم بالكوفي شوب الفلاني ،
ما كنت ادله فسألت السكيورتي اللي الله يسامحه دلني عالمكان الغلط ، بدل لا الف يسار قالي يمين ،
والبلوه اني بروحي كنت والمول كبير والزحمه صدق ماكانت طبيعيه وكلهم شباب ، يالله رايحه راده اراكض لول ،
ماحب جي لمن امشي بروحي بالأخص لازم بتلقوني امشي بسرعه ، فكنت اتنرفز لمن اصادف احد جدامي يالله يالله يمشي ،
وانا مستعيله وحرانه وتعبانه ابي القى الاهل بسرعه ، وفوق هذا ادق عليهم ابي اتأكد انهم هناك بس محد يرد علي !

بالأخير قلت اتصل برفيجتي تونسني ، عالأقل أحس في احد معاي وما أشوف هالأشكال الجميله ،
بعضهم صدق حدث ولا حرج ، إلا واحد ههههه صدق صدق شر البلية ما يضحك ، جي صغير مال مدارس ويسو حركات ،
وبنفس الوقت مبين انه منحرج ، كان جدامي ونحن نازلين من السلم المتحرك ، وانا ماااسكه عمري أبي أضحك ،
كنت أبي أقوله : ها ماما ، ليكون ضايع عن امك الدور عليها ..! / على قولة وحده : آغو ..

وبعد هاللويه والعفسه كلها طلعو الاهل محولين مكانهم بدل الكوفي الفلاني رايحين للكوفي العلاني !
صدق صدق عصبت ، بس لمن دلوني عليه طلع بنفس الدرب اللي رايحتله ، وأخيرا ..

,

في شي صار حبيته اليوم وايد ، دوم كنت اقول لرفيجتي اني احس امي صدق ماتحبني وايد ،
لأن انا واهي صدق مانتفق على وايد شغلات ، خاصه إنها عنيده وانا اعند ، يعني ماحب أسو شي اشوفه غلط ،
ولا انه صدق شي ما يعيبني ومن هالكلام ، بس من مده قامت علاقتي معاها تصير اطيب الحمدلله ، من فوائد القعده بالبيت ..

حتى من وناستي قتلها : اوييـــــه حبيييـــــــبتي ، وانا اوني كنت اقول لرفيجتي انج ماتحبيني !
جان تشوفني جي بطرف عينها ، وكانها تبي تقولي طاع هذي ، انثبري مكانج P=
اهي من النوع الحنون بس ماتعبر ، يعني ما تبين ومن هالحركات ، عكس ابوي حنون لكن يبين ويعبر =)


ووووو صدق صدق أحب خواتي ~ .!
وأخوي الدب بعد !

وهيك ~ .

[رمــش الغـــلا]

^ أنـآمل انا شراتج

اول ماشفت هالاشكال فالمول أقول حق اختي العودة يعني حتى فـ رمضـآن هالتحف موجودين !!

شو هااا الناس ماشي احترام مول وزحمة مو طبيييعييييية ..!

والله وايد مواقف استوتلي اليوم بس الوآحد يسكت أحسن لول ..!

"الله يهديييهم " ..~

[أنامل قلب]

^ على قولتج !

ربي يعافينا جميعا ..

[مزن هتان]

اليوم : من الاربعا
المزاج : =)

الموضوع
رقدت 5 الفير 6:30 نشينا تلبسنا مرت علينا بنت خالي
10 دقايق لين وصلنا المطار بركنا سيارتنا، دخلنا جناطنا تمشينا و تشرينا كم شي من سوق الحره طيارتنا 9:15 كانت خالي
كل دقيقه يتصل في بنته لين آخر شي يانا و دخل معانا لين الطياره وصلنا الكويت 10:40 اظن بتوقيت الامارات
مرت عمي قالت بتنطرنا بس مالقينا حد هناك o.O صرفنا عمارنا وصلنا الفندق نزلنا أغراضنا رتبنا عمارنا لين يوصل
التاكسي حق السوق من 10:30 لين 3 ردينا نريح على أساس فطورنا بيت عمي راحت علينا نومه لين وقت اذان
المغرب صلينا و اكلنا بالفندق نطرنا لين صلينا العشا و ردينا طلعنا ردينا 01:00 رتبنا أغراضنا قعدنا شوي سوالف ضحك غشمره
"امسكنا هاك اليوم قبل الامارات و الكويت، يقيمون الليل و نحن عبالنا الفير هع" نشينا متأخر مالحقنا نمر بيت
عمي نسلم على طول المطار وصلنا دبي 5:00 مستانسه عـ السح و الماي اللي عطونا اياه =) "استوت لنا هناك
مواقف حلوه و مراح تنّسى نحن 5 اللي مسافرين "أم سيف و ميمي بنت خالي -بعمر بعض-، أنا، أختي
هدى و مرت أخوي -بعمر بعض- أنا الغلط امبينهم

أبوي يقول لي يا خسارة التذكره ليوم واحد جيه ما قعدتوا زياده xD
"مارحنا لا عند عمي و لا خوالي =)"

البارحه اليمعه بعد صلاة العشا رحت العين زي ما قلت "أنا و أمي و شوق"
12:15 كنا بدبي

"استانست وايد هاليومين"

[الهيثــم]

^ افتقدنا تواجدج مزن ، الحمدلله على سلاامتج ..

رمش الغلا ، أنامل قلب ~ الحمدلله إني ما دخلت مول من اول رمضان .. أصلا ما احب المولات ، شو يوديني في رمضان
استغفر الله مرة بس سرت الستي عشا نالجراجة وطلعت .. ما طولت .. ^__^

[بحر الموده]

الله يرحمنا برحمته ويعينا على هاى البلاوى وعلى هالناس لى مايقدرون شهر الخير
انا شراتك اخوى خطاب مااحب المولات الا جان الاهل يبونى اخذ اغراض من الكارفووووور
والله نشبه امسات انا اتمشى فى الممر ولانه ثلاث يايات من جدام تقول اسلاس يالله عاد شوه يخوزهن
البكله طايحه على الخد والويه ملون ومسوين له باليس والسماعه مال التيلفون شرق غرب تقول مريحانه خخخخخخخخخ
الله يرحم زمان اول تسير الدكان عطنى هذا وعطنى هذاك ماتشوف هاى الاشكال لى تخوف وتخرب المجتمع

[الهيثــم]

^ هيه صدقك بوجاسم ...

الحين بالعكس يا خوك ، الريال يستحي والبنت فاصخه الحيا ..
غصب تعالوا شوفوني ... ! تعالوا تحرشوا فييني !! .. تعالوا عقوا علي رمسات ! ما بييني رقاد جي ،، ( لسان حالها يقول هالكلام )

أنا ما دري هالبنات إلي من هالفئة ، شو الشعور إلي يراودهم !!
يتحرون اعمارهن حلوات !! ولا يلفتن النظر .. ولا مواكبات الموضى !! وولا الشو بالضبط ؟؟
ترا أكثـــر الناس ومعظم الناس يشوفونهم بنظرة استحقار ودونية ، ما انقول غير الله يهديهن .. ويرد المسلمين إلى دينهم ردا جميلا ..

[رمــش الغـــلا]

والله أمس كنت اقايس نعال والا اشوف 3 بنات حذالي داشين المحل توهم والله جنهم مهرجـآت شو مسوين فـ عمارهم

كنت ابا اضحك بس مسكت عمري .. ما اتحملت اسكت ..

قلت حق أختي في ناس صدق صدق كجرة والغباء كله انه في 3 اولاد اكيد مثل عقليتتهم بعد يتمشون ورآهم ..!

والله ان البنات اشكالهم مال المدارس صغار يعني ..! [ الله يهديهم بس ] ..~

[أنامل قلب]

أخوي خطاب ، بس نحن مو مثلكم ، مو كل مكان نروم نظهرله ،
وحاجاتنا موجوده بهالمراكز بالأخير ، فإلا مانسير لها ..

+ بس لي تعليق على كلمة قالها أخوي خطاب بخصوص الرمسه اللي تنقط ،
فاللي نشوفه الحين إن الرمسه تنقط عالكل الصراحه ، مو كل من بتنقط عليها كلمه ولا بيرقمها أحد
تكون من اللي طريتهم ، البعض ربي يعافينا صدق ما يحشمون أحد ، والبعض ما يحتاجون يقطون لا كلمه ولا رقم ولا حركات ،
تحسون أحيانا يطالعون بشكل تقولون أول مره يشوفون فيه بنات ، مادري نستغرب ولا نعصب ، نتكلم ولا نسكت !

أخوي بحر ، مثل ما قالت رمش هذول أظني أغلبهم صغار ، مال مدارس ،
واللي اكبر فـ هممممم ، مادري الصراحه بشو أعلق !

رمش ، مره شفت وحده كوبي من موضة بنات المدارس ، بس كان مبين عليها جي بالثلاثين !
حتى أذكر مره ع أيام المدرسه ، كنا رايحين اجتماع بمكان فبعض من اولياء أمور الطالبات حضرو ،
فكنا تخيلي من أيامها شايفين ولية أمر يايه حالها من حال اللي طريناهم ، صدق وايد استغربنا يومها ،
يعني جي عباتها كلها ملونه والقصه شلون صايره والميك اب الثفيل !

~.

[الهيثــم]

^ ليش معصبــة ؟؟

تعليقي انا وبحر المودة كان عن الفئة هااييج ، والي حاشمه عمرها تراها تعرف عمرها ، ما يحتاي إلي يعق عليها رمسه يقولها تراج حاشمه عمرج ولا فاصخة الحيا ...

والي فاصخة الحيا كذلك تعرف ومتأكدة إنه نحن نعرف بأنها فاصخة الحيا .. ولكنهم في سكرتهم يعمهون ..

[أنامل قلب]

^ الحين منو قال إني معصبه !

بس صدق الواحد يضيج لمن يشوف الملاحظات تتكرر على أشيا من غير أشيا ..

[مناير]

اخواني وخواتي

ترا البنت المحترمة تنعرف من البنت...... بشكلها العام

عشان جيه اللي تبي الرمسه عليها تتحمل شو اللي اييها وربي يهديهن ويعافينا لأنهن ابصراحة

زادن....

[الهيثــم]

^ بالضبط ، حتى مرات في فئة من الشباب إلي " يدورون " بنات ، في فئة منهم ما يعرفون يميزون بين البنت المحترمة والبنت الـ غير محترمة أو المنحرفة أيا كانت التسمية ..

تلاقيه يتحرش بـ أي شي ، حتى لو ما تتشاهد ، المهم بنية ..
بس في النهاية نقولكم ، ترا من الجنسين فيه الزين والشين ..

واايد بنات محترمات وينضرب فيهن المثل ، وينحطن ع الراس
ووايد شبـاب ينضرب فيهم المثل وموضع تقدير واحترام من الجميع وبشهادة الكل

وفيه العكس كذلك ..

ونسأل الله السلامة والعافية ..

[مزن هتان]

^ افتقدنا تواجدج مزن ، الحمدلله على سلاامتج ..

شكرا، ربي يسلمك

اليوم : الاثنين
المزاج : الحمدلله

الموضوع
أريد أطلع أغير جو و أعدل مودي
ما عرف اذا بيروحون البحرين، ملل وايد ملل
ماحب أقعد فالبيت صايرين حشره و ازعاج استغفر الله
لاعت جبدي من التلفزيون من 16 يوم و أنا مجابلته وياهم مادري شلون
يحبون يقعدون "يجيب الصداع و الهم و البلاء"

الحلو اليوم انه بنت خالتي خلصت العده
على طول زواج ماكو قعده أقولها ، ربي يتمم لهم على خير ان شاء الله