دير دياري ~ يوميات

[أنامل قلب]

اليوم : الأربعا ..
المود: ..... ... .... .... .. .... ~ ,،
الموضوع :

اممم اليوم مثل أمس ، بس الفرق إن الأهل كانو يايين عدنا وروحو يمكن جي بعد الساعه 2 بشوي ،
وعقب قضيت الوقت عادي إلين كلت خفايف قبل اذان الفير ابـ نص ساعه ، شربنا وتزهبنا ، وهيك إلين أذن فـ صلينا ،
وقعدنا وقعدنا وبعد قعدنا وتمينا قاعدين انا واثنين من خواتي + بنت عمتي نامت واهي قاعده لول + بناتها الاثنين حاشرينا ،
تمينا جي بين السوالف والاستهبال وشوي نساير بناتها ، وشوي نهزبهم ، وشوي وشوي ، إلين كل وحده فينا طخت وفضى البتري ..

حضراتهم بنات بنت عمتي نامو بيني وبين اختي أو بالأصح شبه راقدين على بعض ^^" ،
بس الله يسلمكم من اللي شفته من الأكبر "13 سنه" ، يالله ماتقولون وحده نايمه ، طول مانحن نايمين قاعده تضارب وانا الضحيه !
مره تكفخني بيدها ، ومره مادري شلون تجلب وبثقلها علي ، زين ماتكسرت ، مادري كمن مره قعدت من النوم ،
بس مادري كيف جي اللي يتقلبون وايد واهم نايمين ، لا وماتحس بعمرها بعد ^^"
حتى اهي ما شاء الله عليها مابيني وبينها فرق كبير لا بالطول ولا بالوزن ، فـ ماعتبرها صغيره كـ حجم ..

إلين آخر مره قمت متروعه ، بكوعها على ويهي =$ / عصبت صدق جان ادزها لول ، بس ما بقول كيف دزيتها هههه ،
مع اني ماحب جي بس حتى الدزه ما شاء الله ماحست فيها ..!
ونحن يدوب نتقلب ، حتى من زود ما خلاص طفح الكيل ، قعدت من النوم وتميت جي بس قاعده !
كم بدزها ^^" ، كله أرد أقوم ابـ كفخه محترمه ..

عقب رديت رقدت الساعه 11 ونص ، كانو خلاص قامو وروحو ، وتميت نايمه إلين الساعه 1 ونص ،
الوالد أو الوالده "ما اذكر والله =#" يو قوموني ، عساس بسير عندي تدريب الليسن ..

فإلين صليت وتزهبت وييت ورحت ، على رااااحتي ، زين ما تأخرت عليهم ،
المهم الحلو إن اختي معاي ، يعني تدرب معاي وبنفس الوقت ..

+ هناك حلو استانست على كلام المدربه بالأخير ، قالتلي ما شاء الله متحسنه وايد وسواقتج حلوه P=

,

وعقب عادي ، رديت البيت سويت شي وعقب جابلت اللاب ، بالواحات شوي وبموضوع المسابقه الرمضانية ،
إلين أذن ، فطرنا ، صلينا ، شغلوني بالمطبخ وتميت اغسل المواعين ، وهيك إلين الساعه 8 الا ربع ،
رحت للمره المادري كم اتزهب ، هالمره للتراويح ، بالمسيد كانت الأجواء لطيفه جدا اليوم ، وعقبها ظهرت للنهضه ،
محاضره جميله وراقيه جدا من الدكتور عمر عبدالكافي ، وايد وايد أحب أسلوبه وكلامه ، فاتكم الصراحه !

وهيه صح ، لمن ظهرنا من المحاضره وكنت ناطره الوالد يمرني ، شفت ربيعتي الدبه كانت يايه متأخره فما انتبهت علي
وبالتالي ماقعدت عندي بالمحاضره ، المهم / بس لمن سلمت على أمها قالتلي اوه انامل قلب ضعفانه ،
اهني تشققت لول ، بس آآآاااخ من قالت جي تذكرت أخوي المزوحي ، وشكلي كان صدق غلللــــــط ،
تميت قابضه ابتسامتي عن اضحك ، أقول شو السالفه موضوع الوزن دومه وراي وراي ..

وووعادي ، وصلت البيت 12 تقريبا ، من دخلت سرت صوب اختي كانت قاعده تسوي سندويجات سليس ،
فسيده غسلت اديني ، رفعت كم العباه ، جبيتلي عصير برتقال ، ويالله كلي !

وبس ، رديت بدلت ، وجابلت اللاب ، والحين قاعده أضيف ردي هذا ، وكان الله غفورا رحيما ..!

~

[أنامل قلب]

اليوم : الجمعه ..
المود : .. .... ..!
الموزوع :

,

اللي كتبته انمسح ! / فـ بكمل إلين وصلت مو متفيجه أرد أعيد الكلام ^^"

المهم بعد صلاة المغرب اليوم التهيت شوي بالشغل + شي خاص + عقب رحت اسبح عالسريع لأني كنت متأخره جدا ،
وبالأخير ما سرت المسيد ! ، امممم ومن عقبها جابلت اللاب شويه وفوني شويه ، إلين دقت علي رفيجتي تذكرني بمحاضرة اليوم ،
كذلك بجمعية النهضه لكن هالمره المحاضره لأخونا عمرو خالد ، احليله صدق صدق صدق كانت محاضرته جميله ،
تعرفون شلون لمن يكون الإنسان بسيط وعفوي بتواصله مع الناس ! / أهو جي ما شاء الله ..

مثل هاك اليوم كنت مشغله فوني يسجل المحاضره ، وناوية عساس أدزهم لربيعتي اللي تدرس برا بالايميل ،
بس مادري اليوم كان صوت المايك أخف ، هو أريح لنا نحن بس للتسجيل أحسه مانفع ، يعني الصوت ظهر ضعيف شويه ..

اممم الغريبه شلون لمن دخل البعض صفق له لول ، ويعني من هالمواقف صارت وايد ، أشيا تضحك وأشيا تونس ،
وتعليقات مني ومنها على بعض ..

تكلم فيها عن 8 نقاط ربطهم ابـ رمضان ، رصيدنا / التوبة / الدعاء / العفو / صلة الرحم / الوفاء / العتق من النار ،
تفرع من خلالهم لـ أمور جدا جميله ، وقفات ما احتسبناها ، أمور قد نكون غفلنا عنها ، أفكار طيبه ..

,

بالأخير ونحن ظاهرين طبعا زحممممـــــــــــه ، وكل شوي يدوسون على عباتي إلين طفرت ورفعتها فوق ،
وتمينا عاد يالله يالتعليقات ، أقولها : تقولين وزار ! / جنه وايد زحمه ! / جنه وايد لاصقين ابـ بعض ! /
تقولين من جماعة من مال الله ! ..

وعقبها من ظهرنا برا القاعه والزحمه نفسها نفسها ماتغيرت ، شفنا اثنين "رياييل" شكلهم كان غلط جي امبينا ،
كانو بالصوب الثاني طبعا ، ومادري إذا اهم يشتغلون هناك ولا ! / أقولها شو ها شكلهم غلط ، أكيد يقولون يـــااااه كل هذول بنات ،
جَـنـّـةُ في الأرض خخخ / لا وجي يبتها بالفصحه استغفر الله ، وقت ما أخبص أصير صدق مانطاق ، ربيعتي تقولي شو ها بعد استغفر الله لول ..

مرات أحس صدق يدق براسي ، حتى بالسياره ونحن راجعين يقولي الوالد : قعدي عدل شو ها بعد انتي بالسياره !
أي بريك خفيف بتنخشين بالجامه ، يالله قعدي عدل ! > واهو مبوز على شوية نرفزه على حواجب جاده ..
أنامل قلب / حضرتها قاعده بالسياره مربعه ريولها وسانده خدها بكفها وملتهية بالفون تكتب : لا عادي تراني تكسرت من القعده هناك ،
باخذ راحتي ، والخ الخ ، إلين صدق خذ بريك فجأة مادري على أي لفه "واحد طايف فجأة" و ..

,

امممم يقولون بخاطري أشيا ..

[ تنهيده ] ~

[أنامل قلب]

بكتب الدايري من الملل الزايد + مادري ليش مب قادره انام اليوم !

المهم ، اظني اليوم هو الاثنين بس بعتبره الأحد ..
المود : .. ... ... .. ..... ....... .!
الموضوع :

اليوم كان اممم مادري ، قبل الفطور يمر الوقت عادي كالمعتاد على أغلب الأحيان ،
بس اليوم قبضتلي كذا كتاب مريت عليهم عالسريع ، جي كنت امر على كتبي ارتبهم شوي ،
واكتشفت إن عندي أشيا حلوه محتاجه لقراءه ! / مادري هل كيف أعرف إن عندي الكتاب الفلاني مثلا وللحين ما قريته !

المهم ، عقب جابلت اللاب كالعاده ، إلين أذن المغرب ، ومن عقبها انشغلت إلين حزة ما يعرضون كرتون خوصه بوصه ،
وكل ما اسمع اغنيته اذكر المعفوصه عايده الله يحفظها ، كيف كلما تشوفهم حطوه تقعد تترقص مثلهم هذول اللي باغنية الكرتون !
كنا قاعدين عادي إلين يا أخوي وضاف جو من الفكاهه والضحك ، ماعرف كيف أقول شو تم يسوي لول احليله ..

عقبها كنا بنظهر مكان ، بس قبلها تميت اقايس اللي ماخذته للعيد وامر على اهل البيت ، بما إن اخوي والوالد ماكانو قاعدين ،
فتميت ماخذه راحتي رايحه راده ، حشرتهم ، بس مادري ماحب جي مو مزهبين للعيد عدل ، احس ماشي وقت !
بعدني ماخذتلي جلابيه سنعه ، ولا شرينالنا شيل للبيت ، ماعرف قلت بسأل م أكيد عندها فكره بدل لا نلف وندور عالفاضي ..

وماشي ، عقبها ظهرنا انا واثنين من خواتي ، رحنا خذنا حاجاتنا وتمينا ندور بالسياره شوي ، وعقب ردينا البيت ،
من رجعت رحت اسو هالحلى اللي تكلمت عنه بالخيمه عالسريع ، بس طول شوي علامه يسيح المارس ،
واختي كلما تمرني تشوفني قابضه شي آكل ^^" ، لأنها عكسي مووول ماتلتفت لشي وقت ما تحضر ، أي شي كان
حتى وااايد الطول ، جي تبي كل شي يكون مرتتتــــــــب زياده عن اللزوووووم !

مو آنا ، شوي شاني / شوي رول سليس بالكيري ، وشوي سمبوسه ، وارد اشرب شاي ، وشوي آكل من المارس !
بس صدق شكله بالذات وايد عيبني ، مع انه موووول ما فيه شي ..

بخاطري أجرب أشيا يديده ، ومن متى قايله بسويلي كتاب ألملم فيه كل الأشيا الحلوه اللي جربناها ،
مني ومن اختي ومن رفيجاتي ومن اللي انعرفهم وهيك ، بس للحين ماكو ، ما بديت فيه حتى !

وناويه بعد آخذلي كمن كتاب ، إلا ويطلع امبين هالصفحات أشيا حلوه ..

,

وهيك عدا اليوم ، وإي صح كلمت وحده بعد من ربعي ، صدق ماستحي على ويهي توني أباركلها بالشهر =#
والثانيه دقيت عليها وانا ادري عالأغلب بتكون بالمحاضره ، بس جي استنذل ، واهي الدبه سدت ع ويهي بعد رنتين ،
عقبها طرشتلي مسج تقولي إني فشلتها ، أكيد حاطه رنتها هييج النشيد اللي عقدتني منها ، أحسن تستاهل =)

اونه : شو تبين / لول !

بس والله إني أحبببــــــــــــهم ، والحمدلله رب العالمين ~ .