الثلاثـاء 18 أغسطس 2009 ~
السـاعـة 7 المسـا : كنـت يـالسـة عالواحـات وأحوط في النـت ....
الساعة تسع المسا : كنـت في العيـادة أفحص عن ألـم بسيط وخذت عليه أدويـة ورجعت البيت.

الأربعاء 19 أغسطس 2009~
منتصف الليل : كنـت في المستشـفى لأن الألم زاد والأدويـة ما استقرت فـ بطني !!
الساعة 1.30 صباحا : دخلت عند الدكتـور وسـوولي فحوصات عاديـة ومغذي.
الساعة 4 الفجـر : دخلـت عنبـر الباطنية والجراحة - نساء ... لأول مرة في تاريخي أترقد في المستشفى !!
الساعة 9 الصبح: جاء الدكتور يخبرني عن حالتي وان لازم حد كبير ايي ايوقع على اوراق الموافقة على عملية جراحية عاجلة !!!!!
بين 9 و 10 الضحى : اتصل منييي ومنااااك ابغي حد ايينـي يشوفـون شـو السالفة واني ابا اظهـر ههه خلاص ما فيني شي .... طبعا لان المرافقة اللي عندي هي اختي الصغيرة وراقدة ولا داريـة شو مستـوي خخخ
الساعة 10.30 : أمـي يـت ووقعـت عالأوراق
الساعة 11 تقريبا : اتصال لأمي يقولولها فيه لا توافقي على عملية بدون أشعة !!
الساعة 11 وربع يمكن : يـاي دكتـور التخديـر يبـا يودينـي غرفة العمليـات !! رفضت امي رفضا قاطعـا ... وقالت لازم صـورة
ربع ساعة زيادة : كانت فيها الممرضات والدكتور يحاولون يقعنـون أمي ان أحسن بسرعة وان العوارض كلها تدل على المرض ونتيجة فحص الدم سلبية ... وامي مستحيـــل إلا تسـوولهـا أشعة
الساعـة 2 الظهر : سـوولي أشعـة وما ظهـر شي ...!
الساعة 4 تقريبا : دكتور ما ادري شو يا يقنع أمي بأهمية العملية، امي مب عارفـة تقـرر ... أبـوي مب عارف شـو يقول .. آخر شي ... توكلـوا على الله ووافقـوا !!!
الساعة 6 او 6.30 : رحت غرفـة العمليـات ... بروحي طبعا :/ ... ما ادري شـو استـوى .... ههه بس كنت اتويييع واايد وفجأة شفت امي وياي ومبلسينها أزرق ... استغربت وهديت شوي اقولها متى بيسوون العملية خخخخ قالت خلااااص خلصوااااا الحمدلله.... وعقب ما ادري وين راحت امي .... سوولي مسكّن .. وتميت اطالع ....
الساعة ما ادري بها كم : رديت العنبر ... وهناك قالولي انها الساعة 8 وربع !!! افااا كيف جي طولت انا في العملية ؟؟ انا احسبها عشر دقايق وخلصت ... ما حسيت بالوقت !!


الخميس 20 أغسطس 2009 ~
قضيـت اليوم بين الادويـة والفحوصـات وزيارات الاهل والاصدقاء وعدى الوقـت الحمدلله على خيـر ....


الجمعـة 21 أغسطس 2009 ~
مـر الوقـــت بطيء جدا ... ليلة الجمعـة جدا بطيئة عانيـت فيها من آلام الجراحة وآلام الاعصاب وآلام إبرة العملية !!
الساعة 9 الصبح : يـا الدكتـور قال عاادي شووو يعني لازم بيعورج كل شي ... هههه انتي صبية وانتي ما ادري شو ... ما تحتاجين دوا ...
الساعـة 12.30: أنا في البيـــــت ^__^ وأخيـرا


السبـت 22 أغسطس 2009 ~
رديــت الواحات مرة ثانية ههه ^_^


الاثنـيـن 17 أغسطس 2009 ~
وصـل طـرد من امبـوسـت على اساس مطرشين بطاقات ثقة ... من كل افراد العيلة ... واصلة بطاقتي بس !!!!
فـيه تعليق انقال في البيت في نفس اليوم : هذه الوحيـــدة اللي ما تمرض ويابـولها هي البطاقـة ونحن اللي دومنـا في المستشفيات ما يابوا بطايقنـا !!!! خخخخ طبعا انقال على سبيل المزااااح وصااار اللي صـار عقبـه ..




وأولا وأخيرا ... الحمدلله على كل شيء .... كان شيء جديد تعلمـت منه وايــد ..... عرفـت منه وايـد أشياء ....
ولـولا الألم اللي أحس به الحين كنـت بحسبـه حلم !!