دير دياري ~ يوميات

[وحي القلم]

طير.. أويــه ما أتخيل 0.o

الحمدلله على سلامتكم و مره ثانيه لا تركبون في شي شاكين فيه ؛)

[أنامل قلب]

اليوم : الاثنين ..
المود : .. .... ~
الموزوع :

اليوم قبل أذان الفير بشوي حنيت ظفوري ، بعد ما خازت الحنه كلها تقريبا ، وبما إني كنت متحنيه من غير الاظافر ،
بس تمت اختي تحط علي ، اونه صج عيــــووووز ، بس حلو ، جي عايبني كل فتره والثانيه نغير ، مره جي ومره جذاك ^^،

اممم اليوم يو عدنا الصغارية ، والتهينا فيهم ، غير إني المفروض احضر محاضرات الليسن ، بس طبعا ماحضرت وبنطر إلين الاثنين القادم !
وووشو بعد إي اليوم مريت بموقف لا أحسد عليه الصراحه ، كنت توني واصله مركز التعليم ، فسيده دخلت غرفة الانتظار الخاصه بالنساء ،
وبنفس الوقت يت وحده "اظني من المغرب العربي" دخلت معاي ، قعدنا حذا بعض ، وعنها إهي ما لحقت تقعد إلا ولقيتها تنبش بالجيسه اللي معاها ،
وشكلها احليلها يايه تتغدا بالمره "فطاير" ، بس الله لا يبليكم والله ، انا انسانه مــــوووول ما أحب أسمع أحد يظهر صوت وأهو ياكل ،
تعرفون هالأصوات شلون تظهر ، جي أتنرفز وأجز وتلوع جبدي ، وهذي كانت والله العظيم أبد أبد أبد مب طبيعيه ، يعني وكأن واحد
ياي بالعماله يتقصد يظهر صوت بشكل يلوع جبدك فيها بزياده ، مااادري كيف استحملت ، تميت جي مجابله فوني احاول أركز عليه
وعالاذاعه ، وبنفس الوقت فاتحه عالرسايل اكتب ، ويالله مادري ماصدقت لمن شفتها ردت قبضت جيستها إن يعني خلصت ،
شفتها عقب فتحت الببسي ، آااااااه معاناة ثانيه ، إلا شوي كنت صدق بتخبل ، وبنفس الوقت مفتشله أقوم من عندها ،
أحس جي مب حلوه ! / لا وأخيرا بعد ما خلصت وقفت فجأة وسوت حركه انا وقتها استويت جي : !

مادري شو السالفه والله ، مرات صدق نلقى أشيا نستغرب منها ، مادري هل اهمه يعني مايلاحظون ولا يحسون بعمارهم ،
ولا انهم صدق ما يدرون إن مثلا هالشي ما يليق ولا عيب ولا ولا أيا كان ، بس في أشيا صدق الواحد ما يحتاي أحد يوجهه فيها ،
ولا إنه يقوله ترى لازم كذا ومو لازم كذا ، مادري بس الصراحه ، عانيت باختصار ، وبنفس الوقت كان بخاطري أقولها :
لو سمحتي اضيج من هالأصوات ، بس ماتخيل الصراحه اتيني هالجرأة ..

..! / أحسها مادري جرأة فيها مسحة وقاحة =$

,

وشووو بعد ، إي لعوزت الحرمه احليلها "مدربتي" ، مع انها جي أول ما تشوفها تحسها من النوع السيرياس اللي ماتبتسم ولا تضحك ،
وتحسسك إنك هم على قلبها وتبي الفكه ، بس من نقعد بسيارة التعليم وتشوفون حرصها عالشرح والتوضيح ولو كانت جديه بزياده ،
على طول ترتاحون ، وسبحان الله أكيد بتنفعني أكثر من اللي بتوزع ابتسامات وبطوف علي شغلات P=

بس لعوزتها صدق ، تقولي لو سمحتي انا الابله وانتي الطالبه مب العكس "اهي هندية فالتواصل معاها يالله يالله بالانجليزي" ،
المهم ، وشو بعد تقولي ، اي صح الحمدلله مدحتني هذا أهم شي بالليسن لول ، بس تمت تحط علي اونه الخبير اهني ما يروم
يسوق فوق الـ 40 لان المكان اصلا ما يسمح وأغلبه لفات ، وانتي ما شاء الله عاللقه قربتي عالـ 50 ، لا وهذا ثاني يوم لج ..

حسيتها هزبة محترمه ، تميت اتذرع طبعا اقولها ماعرف اشكثر اضغط عالبريك وجي ، ولا اقولها ماعرف اشكثر بلف السكان ،
واهي تقولي ماعليه انتي الحمدلله تعرفين كذا وكذا ، اممم ان شاء الله بس يظهر كلامها واقع مش انه ترفعلي معنوياتي ،
وكله ولا يوم تقولي هدي الشيله وهدي الشيله ، لأن عادي وانا اسوق اهد السكان ع كيفي وارد ارتب شيلتي لول / وووو شووو بعد ،
إي صح كله ولا انها طول الوقت تقولي واتش ذا ميرور ، لفت شولدر ، رايت شولدر ، آل ذا ميرور نات اونلي ذيس !

أحس إني لو بقعد اتلفت جي ما بروم أركز ..
+ أسوأ شي إني ماروم ألف السكان بالشكل اللي احسه يريحني اكثر ، كله تقولي لا تلفين بيد وحده بالكامل !

,

اممم هذي قصة حياتي اليوم ، وحتى هذي الدقيقة وهذي اللحظه ،
وووحاليا احتمال اقلب ويهي ، مع ان بخاطري احط اضافات بموضوعي "كلمات" ..!

وهيك يعني ~ ..

[عهد الوداع]

انامل

اسميني نقعت من الضحك ..جااان سويتي عمرج تتمشين اووو ترمسين في الفون

انتي نفسي انا وااايد اتوتر من هالحركه ماعرف ليش شي لا اراادي .. يالله .....مره وحده تبييين تعصبييين عليهم لوول


وهالله هالله في السواااقه

[رمــش الغـــلا]

ما اتخيل أمر بـموقفج أنـآمل .. انا من النوع اللي اذا مريت بموقف جيه يبين عـ ويهي ..

وتتغير ملامحي ودوم اختي الكبيرة تهزبني لول ..!

وعـآدي جدا اني اقوم واغير مكـآني لول ..!


======

وعن السـوآقة بالتوفيق وهالله هالله بـ عمرج =)

[أنامل قلب]

عهد ، ضحكي ضحكي وانتي شو وراج ، وإي والله صدق كان يبالي أسو جي !
+ ان شــــاااء الله عموه ، كل مابسوق الحين بذكركم ، الله يستر عن اضحك جدام الحرمه ..

رمش ، عيل انتي نفس وحده من صديقاتي ، كل شي يبين عليها ^^"
بس لا الصراحه احسها قوية اني اغير مكاني ، والله لا يبليج بمثل هالمواقف ..!
ان شــــاااء الله ، خلاص بصطلب وما بلعوز المدربه ^-^

~ ....

[تحفه]

اليوم : الاثنين ..
المود : .. .... ~
الموزوع :

اليوم قبل أذان الفير بشوي حنيت ظفوري ، بعد ما خازت الحنه كلها تقريبا ، وبما إني كنت متحنيه من غير الاظافر ،
بس تمت اختي تحط علي ، اونه صج عيــــووووز ، بس حلو ، جي عايبني كل فتره والثانيه نغير ، مره جي ومره جذاك ^^،

اممم اليوم يو عدنا الصغارية ، والتهينا فيهم ، غير إني المفروض احضر محاضرات الليسن ، بس طبعا ماحضرت وبنطر إلين الاثنين القادم !
وووشو بعد إي اليوم مريت بموقف لا أحسد عليه الصراحه ، كنت توني واصله مركز التعليم ، فسيده دخلت غرفة الانتظار الخاصه بالنساء ،
وبنفس الوقت يت وحده "اظني من المغرب العربي" دخلت معاي ، قعدنا حذا بعض ، وعنها إهي ما لحقت تقعد إلا ولقيتها تنبش بالجيسه اللي معاها ،
وشكلها احليلها يايه تتغدا بالمره "فطاير" ، بس الله لا يبليكم والله ، انا انسانه مــــوووول ما أحب أسمع أحد يظهر صوت وأهو ياكل ،
تعرفون هالأصوات شلون تظهر ، جي أتنرفز وأجز وتلوع جبدي ، وهذي كانت والله العظيم أبد أبد أبد مب طبيعيه ، يعني وكأن واحد
ياي بالعماله يتقصد يظهر صوت بشكل يلوع جبدك فيها بزياده ، مااادري كيف استحملت ، تميت جي مجابله فوني احاول أركز عليه
وعالاذاعه ، وبنفس الوقت فاتحه عالرسايل اكتب ، ويالله مادري ماصدقت لمن شفتها ردت قبضت جيستها إن يعني خلصت ،
شفتها عقب فتحت الببسي ، آااااااه معاناة ثانيه ، إلا شوي كنت صدق بتخبل ، وبنفس الوقت مفتشله أقوم من عندها ،
أحس جي مب حلوه ! / لا وأخيرا بعد ما خلصت وقفت فجأة وسوت حركه انا وقتها استويت جي : !

انا بععععد اخس شي اقعد عند حد واسمع الاكل وهو ينمضغ .. اففففف انقهرر يوم احس انس في بلعوم حد!

بس موقفج لوووووول .. انا هالايام ما قمت اراعي احساس حد يختي خلاص تعبت من كثر ما اراعي الناس واشوفهم يمشون علي جني شارع

الي يفرحوني خليتهم و الي كلامهم negative قلت لهم باي باي من زمان

[أنامل قلب]

^ لا وهذي كانت بشكل مب طبيعي صدق ، والله إني شكيت انها بالعماله تظهر هالأصوات لول
بس ضحكني تعليقج ، اونه يمشون علي جني شارع ، خلاص عيل المره اليايه بستوي شريره P=

تدرون شوللي احاتيه ، اخاف اصادفها مره ثانيه هههه ..

حتى احليلها كانت بالاخير تسولف معاي ، الاسئلة المعتاده ،
وخلصنا بنفس الوقت بعد ، جان تمر علي تسلم !
وانا اذكرها الحين بديت احس بتأنيب الضمير ، عن يعتبر هذا كله حش واتوهق =$

انا قاعده اسولف من باب انها شخصية مجهوله من الكل ^^"

,

لا تخلوني اسولف وايد ،
بيقولون مراقبه وتجر عيالها للسوالف ..

[قصايد غلا]

اليوم: ما أعرف شو هو بما إني في إجااااازة


المود : اممممم عادي


الموضوع : استغلاااااااااال



أول أمس ياني أخويه متضااايق يلس عندي في الصالة .. جان يقول لي : أنا أبا الدراجة بس هالبنك الخاااايس يلوع بالجبد
و أبويه كله يقول لي زييييين هالبنك




و يبا مسااااعدتي عشان تنحل مشكلته ويا البنك الأنهم متناحسين وياه



قال شرايج تساعديينيييي .. يوم قال جي أنا متتتتتتتتتت من الضحك عليه
جنننننننه أناااااااا في ايديّه مفتاح العريش


قلت له أوكي بس بشررررط .. قال شو ؟


جان أحط ريل على ريل و أفرك إبهام ايديه بالسبّابة .. قلت له كم تدفــــــــع =p ؟


قال اللي تبييييينه بس المهم يوافقون على الطلب



و جان أسااااعده و انحلت مشكلته بدووووون ما أتكلم وايد لوووووول


جان يتم مستغرب منييييي لأنه هو ما وافقوا له بس أنا عااااااااادي



وجاااااااااان أستغل هالشي .. و أتم أتأمرررررررررررررررر


حصلت بيزات + قمت أتدلع على كيفي





و المسا سرت قصيت شعرررررررررررري




و جااااااااان أستااااانس على اللوك اليديد وااااايد و كلللللللل حد عايبنّـــه

[مزن هتان]

اليوم : الثلاثا
المزاج : احساس ودي اصفع عمري =)

الموضوع
زعلانه ليش انه رقادي اعتفس والله ماحب جيه ان رقدت يكون بعد الـ 12
صلاة الفير اتثاقل فيها و اوصل الدوام و عيوني منفخات من الخاطر
و اول الصبح يجيني اتصال يهزبوني جيه سهرانه ؟ "يكون الوالد و الوالده طبعا"
اصيح يعني مو بيدي أحاول ابجر بالنومه بس ماكو فايده
و من الصوب الثاني يهزبوني انتي ما تاكلين و انتي تعبين روحج
ناقصه أنا أكل ها ؟!! صايره رقم صفر بالانجليزي xD
^^ أنامل أنا ما اتذمر كلش مو ؟

قام أحاول من كل صوب، ضارب عندي الشوق

[أنامل قلب]

قصايد ، نعيما ، وحلو استغلالج للوضع =]
مزن ، لا مول ، بس شويه ^-^ ..
وعلى فكره ، مرات يفيد إن نتذمر أحيانا ..

,

اليوم : الثلاث ..
المود : .. .... ~
الموضوع :

اليوم نمت متأخر وكنت حاطه المنبه على وقت الصلاة ، بس بعد ماقمت ><
مع إني اذكر بإني انتبهت للمنبه وشلون سكرته ، بس مادري ليش ما قمت ،
لمن يصير جي أبدي أحس بإحساس جدا جدا جدا بايخ ، جي وكأني ما أستاهل أأدي صلاة الصبح بوقتها ..

,

امممم ، استلمت اليوم مكالمه جميله ، وعساه خير باذن الله ،
كنت قايمه يمكن من الساعه 10 وشوي ، وعقب تميت اتقلب ، شوي ارد انام وشوي ارد أقوم ،
وجي إلين خلتني هالمكالمه أصحصح ، وعقبها رحت اغسل ويهي وجي / الين انتبهت لعيوني ..!

كله ولا العيون أحس ، لا ويبين جي الجفن محمر من الجنب على انتفاخ خفيف ،
والبلوه ان عيوني لمن تتحسس ماتتحسس مره وحده وخلاص ، لا تتأثر بشكل تراكمي ،
يعني اذا اهملت كذا مره وتعرضت وايد للشمس واشعة اللاب ومن هالأشيا تظهر عندي مثل هالحساسيه ،
ومرات يصير ان بنفس الوقت تدمع عيني ومن هالسوالف / بس لمن تتحسس جي اتلعوز صدق ..

الحين بتم احط مره ـ اظني هذا اسمه ـ وكمادات حاره ، والله يعين ..

,

حشروني عيال بنت عمتي ، يبون يتحنون وعساس بيسيرون الصالون مع اثنين من خواتي ،
فيايين عندي إلا يبوني أسير أنا بعد ، اونه انتي تعرفين احسن وبتنقين شغلات أحلى =/
طبعا ما سرت ، صدق ماكنت متفيجه وبنفس الوقت ماله داعي ، وللحين ما ردو !
أبي أشوف شلون تحنو ، عايبتهم الحركه اللي سويتها لمن تحنيت ، فصارو حابين يتفننون بزياده =)

,

بعدني ما تغديت ولا تريقت ، بس قبل شوي يعت فسويتلي فيمتو + كلت 3 قطع بسكوت ،
مادري شو اسمه ، جي اصابع طوال ، وخفيف ..

ووو ما صليت العصر ، بسير اصلي الحين ، بسني وايد جابلت اللاب ..

~ ..

[رمــش الغـــلا]

قصـآيد .. نعيما ..، انا ابا اقص شعري بس ما يخلوني ><

=====

اليوم المزاج .. مش ولا بد !!

اليوم نشيت مب قـآدرة مب عـآرفة شو اللي مستوي فيني من يومين أحس بشي فظيع يستويبي من ابا انش حق الدوام !

كل ما حد سمع اني اسوي هالاشيا فالصيف !! يقولون لي انتي فيج طاقة غير عن الناس !! وما تتعبين

[ الله يسـآمحهم ] ..

و مسؤولتي فالدوام خربت أعصـآبي ومزاجي اليوم !!

اتصلت فيهـآ ..

أقولها عندي ظروف ما أقدر أداوم لـ كمن يوم ..!

اونه تعـآلي بتكسي !!

شو تستهبلين وين عايشين نحن !!!

يالله كيف تنرفز ! وانا ماشي لسـآني متبري مني أرد عليهـآ ردود أخس عن كلآمهـآ ..

وفوق هذا اونه ضغط الشغل وآيد تعالي باجر !!

اقولها ما أقدر اتقولي لا تعالي يعني تعـآلي..!

وانا اقول في خـآطري أشتغل صيفي عندكم مب موظفة اتعامليني جيه

بس عرفت ان في نـآس ويههم الثاني يطلع بسرعة !!

=====

ومن الظهر وانا اجهز لـ تقييم باجر =(

عندي تقييم الوزارة وعقبه مقابلة راح ياخذ اقل شي 4 ساعات ونص لانه نحن 18 بنت

دعوآتكم >< من اليوم أحـآتي انـآ

[مناير]

رمش الغلا

ربي يوفقج واتحصني عنبوا من شافوا حد نشيط
يحطون عليه

موفقه:)

[تحفه]

ررمشش: نعيييييماا يا أمرررر


انامل : لوول XD انا يوم نجحت في امتحان الليسن كان كاااابووووس!! تخيلي انا وحده مواطنه و فلبينيه و هنديه و لبنانيه وهالشرطيه وصلتنا السطوه نمتحن وقت الزحمه كان شي ابدا مب متوقعععع! الحمدلله نجحت من اول مره احمم احمم طبعا لول

بس والله فالامتحان بغينا نموووت! تخيلي عل يوتيرن تم واحد خايس يدقدق هرنات وكانت فلبينيه تسوق و زاغت و طلعت فالشارع فنص اللفه وقفت السياره وكانت سياييرر بتدعمنا والشرطيه الخايسه ما حلالها اتصرخ علفلبينيه الا ونحن فنص اليوتيرن والفلبينيه تصيح ووييييه اياااااام كنت ميته من الزياغ زين ما مشو علينا الشاحنات ومتنا والله كان امتحان عصيب مادري كيف قدرت انجح بعد هالفلبينيه الي تصيح طول الوقت لين ما خلصنا امتحاناتنا وردينا المعهد T.T

[رمــش الغـــلا]

مناير.. ثانكس حبيبتي ..~





بتكلم عن أمس ..

اليوم الاربعـآ ..
المزاج .. الحمدلله بداية كنت متنرفزة ومتوترة بس عقب الحمدلله مستـآنسة وراضية عن عمري ..=)



الصبح مريت عـ الغلا ورحنا الانترفيو .. اللي كانت مدته من الساعة 8 لي 1 ونص تقريبـآ ..
====

اول شي كنت فالقروب اللي بدا بالمقابلة الشخصية ..
اول مادشيت يقولون انتي "رمش" اقولهم هي انا ..، يشوفون الصورة اللي جدامهم ويشوفوني !
يعني لـ هالدرجة شكلي غير لول !!

يسألني اول سؤال شو معنى اسمج لول =) وعطيتهه المعـنى ..~
وبدوا بالاسئلة الحمدلله عطيتهم اجابات مقنعة لكل الاسئلة الا سؤال واحد حاولوا اني اغير رايي بس بطريقة تنرفز
لكن تميت مصرة ع رآيي واعطيهم اسباب مقنعة ..
وطلعت وانا رآضية عن اللي سويته ..
بس أحلى شي انه واحد من اللي سوولنا المقابلة سألني سؤال بـ [ العربي ] وقالي ردي بالانجليزي ..!
بس حاولت اركب اللي قالي ايـآه ما فهمت السؤال ..
لانه شي يخص دراستي ومصطلحات غريبة شوي بالفصحى ..
فطلبت انهم يقولون لي اياه بالانجليزي لول [ وتموا يضحكون انه كيف ما نستوعب المصطلحات اذا استوت بالعربي ] ..=)

======

بعد المقابلة اتريقنا .. وبدينا القسم الثـآني ..،
اول شي يخلون كل وحدة ترمس عن نفسها [ معلومات السي في ] بس بشكل عـآم
وبعدين كل بنت تدخل مع وحدة من لجنة التقييم ..، تقيم طريقتها فالشرح وتطلع
وايد استاانست علي اللي تقيمني وحبت الافكار اللي كنت مسوتنها [ الحمدلله ] ..
وبعدهـذا كله كان عدنا نقاش عن موضوع معين لمدة نص ساعة يبون يشوفون مدى اسلوب كل وحدة فالنقاش ويقيمونـآ عليه ..
واكتشفت انه في وحدة ابدا ماعندهـآ أسلوب وبس تقاطع الكل عسب تلفت النظر لها هي وبس !!><

=======

رجعت البيت اتغديت .. وخذت بريك لين المغرب

نشيت يلسنا ويااهلي بنات عموتي اخواني وحريمهم والصغارية نتريا خواتي يوصلون من السفر
والحمدلله وصلوا بالسلامة
وكنت طآآيرة من الونـآآسة من شتفهم..
[ الله لا يحرمني منهم ] ..
وبنت اختي الصغيرة كل شوي تبا حد يشلها مب مصدقة شافتنا فديتهـآآآ ..

[الهيثــم]

^^ هالموضوع بالذات ما عرف أكتب فيه لول ..