دير دياري ~ يوميات

[مزن هتان]

ااااي صبعي، أحترقت بالفحم "قام ابخر مكتبي =)"

اليوم : الاحد
المزاج : عادي

الموضوع

وايد مضغوطه من ناحية الدوام و البيت، ما عرف اسوي شو و الا شو
الرقاد صاير بجيبي هـ اليومين قبل كنت مستحيل ارقد بعد الدوام لكن
هالفتره ارد البيت ارقد لين صلاة المغرب و بالليل عادي 11 انعس
"احس هذي هروب من الضغظ"

قام أحن عـ ابوي ينزل الكويت بعد عرس أخوي =)،يحب يلعوزني يقول ماريد لين خالي قال انهم اصلا
بيروحون كويت مش تايلند زي ما يقول ابوي بعد عرس أخوي

الجو هاليومين زفت من الخاطر كنت اريد اروح اب تاون البارحه بس وين ؟ كلش ما ينفع

[أنامل قلب]

اليوم : الاثنين ..
المود : .... ~
الموضوع :


قعدت الساعه وحده وشي ، وبعده الصداع كان مثل ما اهو من أمس ،
دقتلي وقتها اختي تقولي اذا بسير الصالون ولا بأجل الروحه ، طبعا ما قدرت بهالصداع ، فقتلها برد احاول انام وبشوف عقب ..!

تميت اتقلب واتقلب واتقلب ، الين ساعه زياده ومن غير فايده ، قمت غسلت ويهي ورحت اصلي وعقب كلت موزه عشان اروم
آخذلي حبتين بندول ، وووو عقب رديت صليت العصر ، والتهيت مع الاهل شوي ، والصداع إليـ هالوقت خف وايد فـ قلبت خلقتني
للصالون ، وهناك خلاص حفظونا ، لأن خواتي يسيرون وايد ، من دخلت كل وحده يايه تسألني شو ابي وهيك ..

بالاول وانا انطر رحت اشوف نقوش الحنه عدهم ، اممم عيبني كذا واحد ، بس هالمره ناويه أتحنى بشكل ثاني ..~ !

وإي صح مادري ليش فيني شي غريب ، لمن اكون بروحي رايحه مكان أكون أجرأ من اني لو كنت مع احد ،
والجراة تخف زياده كلما زاد عدد اللي معاي ! / فـ بما اني هالمره يايه لحالي كنت آخذ واعطي معاهم بكل أريحيه P=

الفلبينيه كانت جي بارده ، بس شغلها حلو ، خاصه لمن بتي تحط الكريم ع كف اليد بعد ما سوتلي ظفوري ،
وتقعد جي تسولي مساج ، احس كل اللي من هالجنسيه شغلهم حلو ، وطبعا ما قصرت فيها كل شوي اسولف ..

بالأخير اشوفها تقولي بالانجليزي ، اونه شلون اني لمن ابتسم عيوني تصغر جي ـ وتمثل ـ ، قفطه ،
هذي بصمة العايله جنها لول ، مهمن تكون عيونك كبيره من نبتسم ولا نضحك جي تصغر ،
ولأن رموشنا عالأغلب طويله فأحس مادري ، حتى وحده منهم مره يايه تمسك رمشي تقولي هذا طبيعي خخخ ..!

خلصت تقريبا عالـ ست وشوي ، جان ادق عالوالد والين يوصل خذتني المسؤوله تراويني النقشات ،
فتميت اقولها شلون الحركه اللي ابيها وجي ، واهي تشير علي بالأحسن من ناحية النقشات وهيك ،
المهم وصل الوالد ، رديت البيت صليت ورديت غيرت + تغديت ورديت لبست العباه بنروح المستشفى ..

مادري ظاهرلي شي برقبتي من صوب الجتف الأيسر ، اهو ما بيبن بس لمن اضغط عالمكان احس فيه ومعاه الم خفيف ،
اظني شي بالغدد الليمفاويه ، بس تدرون وسواس باباتي وماماتي الكرام ..!

خاصه أبوي ، حتى لمن وصلنا ودخلنا عالدكتوره ـ تعرفنا ـ تقولنا ما شاء الله ابوج مبين عليه وايد يحبكم ،
اقولها إي وايد وبزياده بعد ، تمت تضحك تقولي كيف بزياده ، اقولها روحج بتشوفين ، شي يسمونه الوسواس الزايد ..!

بس مبين امي بعد احليلها جي خايفه + بنفس الوقت ماتحب تقول شي جدامي اونه يعني يمكن تخوفني ،
ما يخصه اصلا ما يباله شي ، حتى لو فيه شي ، ما يباله الواحد يوسوس جي ، شو هو الضرر بالنهايه ..!

خذو مني دم حق الفحوصات ، وقالولنا بعد ساعه بنشوف النتايج ، فنحن بدل لا نقعد جي رحنا الجمعيه انا والوالد وامي ،
تمينا هناك إلين خلصنا شغلنا ، وعقب ردينا للدكتوره وهناك تفاجأنا بوجود خطأ ابـ شي ..!
شكلهم جنه شو مسويين ، حاطين اجابة الفحص مالتي تحت اسم وحده ثانيه بنفس اسمي ،
فالحين الدكتوره قاعده تفهم الوالد ان هالخطأ مني وعادي يصير وجي وبس بتغير الحين ، لكن من يفهم الوسواسيين ،
يالله شو سوى ، رايح وراد لـ قسم الفحص بعصبيه ، وبالأخير ظهرناه غصب ..!

المهم عطتني بروفين وفيتامين سي ، وقالتلي ردي بجيك عليج عقب اسبوع مره ثانيه ..

,

اممم باجر بعد بنشغل ، بسير الصالون مرتين ـ الله يعيني ـ ،
بس وأخيرا بسير أتحنى ، ان شاء الله بس يظهر اللي ابي اسويه حلو ، مافينا عاد كله ولا الحنه ،
اقول لرفيجتي ، اتخيل لو ظهر بايخ بشو بخشه ، بترس ايدي كريم اساس ولا شلون ..

بس لا ادري ان بيظهر حلو ، اممم أفكر أشل رفيجتي معاي =)