اليوم : السبت ..
المود : ... !
الموضوع :

اليوم كان مثل غيره ، قعدت من النوم جي بحدود الوحده ، صليت وجي ،
تريقت موزه ، وعقب قعدت أجابل اللاب ، يعت مره ثانيه ، رحت كليت من هالسليس المجفف / نص القطعه ،
مادري شو يسمونه بالضبط ، وجبيتلي شوي من غرشة البيبسي ، وماكنت ملاحظه ان ابوي موجود ،
طبعا هزبني ، ونفس المحاضره اونه انتي ماتاكلين مثل الاوادم ، واذا بتاكلين تخربطين ،
الحين في أحد عاقل يشرب ببسي ابـ بطن فاضي !

المهم عقبها سرت أقطع للسلطه ، حق الغدا ، وبعدها رديت قعدت عاللاب ،
وشسمه ، عقب عادي لهيت عمري بالأشيا المعتاده ، تقريبا ..!

,

المسا رحنا تعشينا برا بكوفي شوب ومن هناك سرنا بيت الاهل ،
حسيت شوي مادري ماكانت حلوه مني ، طول القعده وانا قابضه فوني اتكلم ، وكل شوي أسير مكان ^^"
مره عند الصغارية ، ومره المطبخ ، ومره الصاله ، ومره الغرفة الفلانيه ، زين ما رحتلهم الديوانية !

حتى لمن كنت ظاهره من الصالة ، بدل لا البس نعالي لبست نعال عمي ، اونه يعني عالسريع ،
فعقب طول ما انا احوط لابسته ، ولمن يينا بنروح كنت بالمطبخ ، فسيدا من هناك
ظهرت لهم بعد ما سلمت وجي من غير ما احس بعمري ، ولا حسيت إلا وانا شايفه
عمي قابض نعالي ونحن بالسياره ، اونه تعالو منو اللي ناسيه نعالها لول ،
آخ ويهي صدق فضيحه ..