اليوم : عساس انه الخميس !
المود : ..... ~
الموزوع :

قعدت اليوم متأخر وانا ميته من الحر ، مادري شو السالفه ، يمكن بيجامتي ثقيله !
رحت غسلت ويهي ، صليت ، وتالي قعدت أنبش بكل ثلاجه بس لقيت إن التفاح عدنا خالص / غريبه ،
المهم كلت موزه ، وبعده بشوي رديت يعت فكلت قطعتين صغار من كاكاو داين او شي جي ،
تصفحت البيان شوي وعالسريع ، جابلت اللاب شوي ، ويعني هيك إلين الغدا ، وعقب انشغلت
إلين الساعه ست ، ووقتها بدا برنامج شريعة النور بالاذاعه فتميت اسمع وانا امشي ساعه ،
وطول ما انا قاعده امشي حاسه ابـ خمول وكأن فيني نومه ، الوالد وقتها كان قايلي أكويله هدومه
بس صدق كنت تعبانه وبديت اصدع فخليت اختي الاصغر تكويله وانا رحت أنام ع فراشه !

تميت جي أتقلب ولا نمت ، وعقب حسيت اذوني بدو يتحسسون وضجت من السماعات ، مافيني بعد ،
وتميت على هذا الحال اتقلب شوي وانام "اقل من الاشوي" إلين صارت الساعه 8 حسيت اهني إن خلاص
راسي بينبط ، فسيده قمت خذتلي حبتين بندول وتالي رحت أصلي المغرب ماكنت مصليه ، بس قبلها بشوي
كان الوالد ياي داره اهو واختي الاصغر عساس تحط له القطره ، فتمينا نلعوزه احليله ، والله وايد أحب أبوي ،
يقول لاختي يالله قومي بنسدح "عشان تحط له القطره" واختي مو طايعه ، وعلى هذا المنوال قعدت تحشره
واهو مزاجه رايق فتمينا بين الضحك وبين السوالف ، وانا مالي شغل =)

اممم بس بعد الصلاة مادري شوللي صارلي ..

,

قعدت أسولف مع اختي شوي ، وعقب رحت الصاله كلت من الحلاوه اللي مسويتنها اختي الثانيه ،
وعقب صبيت لي شاي مر يغطي ، ووووو بنفس الوقت تميت اقلب بالمسجات ، اقرا من الأجدم للأجدد
من مسجات صديقاتي فقط ، فتميت بين الضحك وبين الابتسامه وبين الامتنان ، ربي لا يحرمني ~ ..!

وووووهكذا إلين تعشينا وصليت وتزهبت ، وظهرنا عقب بيت قوم عمي وهيك ،
والقعده هناك يبالها رد منفصل من زود الشغلات اللي صارت ، بس كله ولا بنت بنت عمتي الزغطوطه ،
كانو اليهال كلهم ملتمين بس هذي نحطها على صوب ، مادري طالعه على منو لسانها يقطر عسل P=
حتى اللي يدرسونها يقولون مع انها شيطانه ووايد تتكلم بالحصه مانروم نقولها شي من زود ما كلامها حلو وتقردن ،
وتقعد عاد : ها أنامل قلب ما شاء الله حلو مسويه شعرج ، كشخه جي من فوق نعيم ومن تحت دواوير "قصدها كيرلي" ،
وعقب اشوف اشوف شنو لابسه ، ليش ماتفصخين العباه ، حبيبتي انتي ليش جي ناعمه ، ليش كلكم جي ناعمين ،
يا عمري ، يا بعد قلبي / مادري كيف والله يمكن لأنها زغطوطه وجي تتكلم ، حتى سوالفها سوالف كبار ،
يعني تمت عقب تكلمنا عن الاعراس والملابس ومادري شلون ، هذي واهيه بعدها توها بتسير ثالث !
كنت حاطه صورتها أظن بالواحات لمن كانت اصغر ، راعية الغمازات / ما شاء الله عليها ..

ووووبالأخير مادري شوللي ضرب بالفيوز وانقطعت عنا الكهربا لول ، جي مال ربع ساعه الين ضبطوه ،
بس استانسنا وايد ، واليهال بعد ما قصرو ما شاءا لله ، عيالنا صدق حبوبين ^___^ ..

,

امممم ..!