:
.
السلام عليكم ..
اليوم : الخميس ( برمس عن أمس واليوم) ..
المود : .. ... .ــــــــــــــــــــــــ. ... .. !
الموضوع :
اممم مرت ولد عمتي وعيالها بايتين عندنا من كمن يوم بما إن ريلها المصون مسافر ..
فاليوم (الاربع) ظهرنا نتحوط شوي وبالأخير رحنا الغرير نتشرى للصغاريه دانه وهاشم ^________^ ..
وووصارلي موقف عبيط جدا ><"
كنت شاله هاشم ورافعتنه فوق والعبه (7 شهور) .. بعد مانزلنا من الصلاة وكنا واقفين قروب مادري يسولفون عن شو .. !
وانا مب منتبهه بس مالقيت الا واحد ياي قابض يد الاصغير يضحكله وحط بحضن كفه 3 كوبونات واهو يقول
"ان شاء تفوز" وشي جي .. ما أدري كيف صاغ الجمله ولا أذكر كالعاده + طبعا ردة فعلي.. !
لا والاصغير مب مصدق قابض الكوبونات بالقو ههه ..
هو احليله وبنفس الوقت! .. وانا اقول حق امه (ماتعرف عربي) شو قال الريال لمن عطاه الكوبونات ..
وإهي الفالحه سمعة كلمة تفوز = تموت أستغفر الله بسم الله عليه .. وما يحتاي أقول كيف كان ردة فعلها خخخ ..
طول الدرب تقريبا مرقدتنه بحضني وشالتنه من مكان لمكان .. ولا حصلت مكان محترم أقعد فيه وأريح ><" ..
وكل شوي أحد إييني يلعبه ويقبضه .. واللي تشله .. والخ ..
حبــــــــــوووب ما شاء الله عليه .. صدق ما شاء الله عليه .. جي كله يضحك ويسير عند الكل لول ..
لمن قلنا للوالده عقب كيف كل شوي أحد اييه ويلعبه وجي .. لقيت امه (مرت ولد عمي) تقولها أكيد بعد شو ..
اونه من آل البيت .. هاشم الهاشمي شو تبون بعد لــــــــــــوووول .. !
:
عقب عالساعه 12 وأخيييـــــــــــرا بديت أسو التبوله .. من هاك اليوم وانا أشتكي ييبولي بقدونس ..
ولمن يابولي اياه بديت أنشغل خاصه إن نظامي اليومي جدا سيء .. !
كل شي فيه اوكي وحلو ماعدا البقدونس ><" بعد ما نظفته وغسلته جابلت الطماط والبصل .. وما أدراكم مالبصل ..
بالعاده أخلي الوالده تقص البصل لاني صدق صدق اتعقد .. انا ادري انه يحرق العين مب يعميها :/
صدق اوصل لدرجه اني ماروم افج عيوين كلش وبالتالي ماقدر أشوف كيف قاعده اقطع والله لا يبلاكم باللي صار بخشمي..
تحسست الله لا يوفجه من بصل يوم انه غربل مناخيري..
اممم .. المهم .. خلصت وخبصت عـ كيفي .. ولمن ييت عالبقدونس تكسرت من الخاطر ..
لأن يدي لينه للحين ماتعلمت كيف اقصه بسرعه شرات الوالده .. يعني بطول أكثر وظهري تكسر .. !
تقولي قبضي كميه أكبر وبهالشكل (تأشرلي) وانا أقولها ما يستوي انتي ايدج أكبر :/
عقب تميت اعصر لومي .. وخلطتهم وجهزته وحطيته بالثلاجه ولا خليت حد غيري يذوقه لول ..
اونه زهبتلكم اياه لباجر اللي هو اليوم .. !
صورته بفوني ووويمكن أحطه عقب .. اونه اعزمكم عليه نظري لول ..
بس صدق صدق التبوله غرام
وعقبال ما أسولهم ورق العنب .. يمي يمي
:
يالله أذن .. بسير أصلي ..
ما بنسى أدعيلكم ان شاء الله..
:
السموحه ..
ادري مقصره بس لظروف أكيد ..
وربي يعينا وإياكم عاللي فيه الخير .. .
:.
رد مع اقتباس
مواقع النشر (المفضلة)