دير دياري ~ يوميات

[شمعة أمل]

اليوم: السبت
المود: الحمدالله على كل حال
الموضوع: شكراً



شكـراً لكـل من وقف معايه وتحمل مودي الخايـس على أيام بروجكتي النحس ويا الافريقـيه المتخلفه..
اليوم طلعت علامتي في هالبروجكت


والحمدالله x 10000000000




يبت 1.. يعني 100%

مع العلم أنه أعلى علامه هالاستاذ عطى حد في هالماده 80%... وجااااااان اكسر الركووورد

الحمدالله تعبي ماضااااااااااع.. اففففف ايام السهر ومانكل ونصيح ونعصب ونتحرطم ويغمى علينا ومانرقد>.<



(حدّي مسـتانسه)


وشكـر خاص لحلم الطفوله

[قصايد غلا]

اليوم : كااااااان الجمعة و استوا السبت

المود : كان =( و صااااااااااار الحمدلله :)

الموضوع :

الصبح على الساعة 10 و شي

نشيت الصبح على صوت ابويه اللي وعّاني وقال لي نشي بسرعة و قال شي ما استوعبته و خلاف يوم فهّمني اياه استوعبته و اتنكّدت وتكدّرت و اسودّت الدنيا فــ عيوني ، لكن هالشي استمر كمن ساعة و الحمدلله الحمدلله مليووووووووووووووووون مليون مليون مليون مرررررررررررررة على التغيير اللي حصل

أحمدك يا رب على النعمة اللي أنا فيها ، يا رب تديمها علينا


=========================================
الظهر على الساعة 3 :

سرنا تغدينا في بيت خالوه لأن ولد خالي متخــــــرّج و مسوين له عزيمة

ما توقّعت إني جذه بستانس


مرت خالي ظهّرت الخبال اللي فينا كلّه ، خلّت الكبار والصغار و البشاجير يناقزون

عقب الغدا شفناها يايه هي والبشاجير و شالّة أجيااااااس و بوكسات

جان تقول
يلا تعالوا بنثّر ككااااااااو و حلاوة و بسكوت ..... إلخ "جان نضحك عليها ، تحرّيناها تتمصخر"

لكن هالبسكوت والحلاوة والككاو فيهم بيزااااااااااااااااات (من كل شي واحد "من ريال لين 500" ، يعني ريال واحد و خمس وحدة وعشر وحدة و 20 وحدة و50 .... إلخ لين الــ500) :D

و يوم نثرّت

استوا المجاتل بين اليهااااااااااااااال "عشان يشوفون منو يمّع أكثر"

أشكالهم تهلّك من الضحك ، اللي يعفد على الثاني و اللي يتناشع الحلاوة ويا أخوه واللي خلاّ بشكارته تيمّع لــه

و في النهاية فاااااااااااااااااااااااز ت بشكارة خالوه بالــ 500 و اليهال و البشاجير الثانيات حقدوا عليها

بعدين يابوا لنا أرقاااااااااااام وكل واحد خذ رقم

حد حصل موبايل وحد ساعة و حد حصّل له ورقة فيها طنازة عليه و حد حصّل هدية تضحك ، مثلي أنا (حصّلت روج لووووول) الحمدلله إنه طلع يناسبني لووول ما ضاع تعبي

أسمينا اتخبّلنا و ضحكنا على هبلنا ، صح مرت خالي حسستنا إننا مثل الزلمات اللي في المسابقات لكن وناااااااااااااااااسسسسسس سسسسسسسسسة خوّزت عنا الملل

[قصايد غلا]

شمعة عمرج طويل :)

قبل شويه أكتب وأقول وين شمعة ؟ ==> و توني شفت ردّج

مبروووووووووك الغالية، ربّي يوفقج حبيبتي

الله ما يضيّع تعب المتيقّن به :) ...

[ملاك الروووح]

:

حلم

الحين خاطري اشوف فلم هندي تصدقين ! كله منج

":


شمعتي

مبروووووووووووووووووووووو ووووووووووووووووووووووووو ووووووووووووووووووووك فديتج

تستاهلين والله



وااااااااااااااااايد استانست لج ..

على هالتعب اللي تعبتوه .. تستاهلون هالغريد الحلو ..

الله يوفقج حبيبتي ..



::

قصووووووووده

ونااااااااااااااااسه

كشخه أحس



حلو جيه .. لمة الاهل كم تسوى والله

وخاصه يوم تكونون مسوين فعاليات واكتيفيتيز رببببببببشششششه



الف مبرك تخرجه .. يستاهل الفرحه ..

:

المود : مشتاقه حق أبويه وخواتي .. واخواني



رايحين العمره كلهم .. وكان خاطري أسير وياهم

خاصه انه ابويه اول مره يسير و كان خاطري اشوف ردة فعله يوم يشوف الكعبه !!

:

توني رمست اختي .. أقولها هاه دعيتيلي ؟ تقولي والله انتي اول وحده دعيت لج اونه

تقول يلست ادعيلكم واخر شي انتبهت اني ما دعيت حق عمري

قلت لها انتي مب لازم بعدج صغيره ادعي لنا نحن اول شي .. واهم شي هع هع

وما استحي قايله حق اخوي يدعيلي بالزوج الصالح !

:

تولهت ع الدوام وايد ..


الاسبوع اللي طاف سويت كيكه عشان ماي فيرست انيفيرسري .. وحطيت اللوغو عليه

وكتبت اسمي والتاريخ

نايس طلع شكلها ..

كلهم استانسوا عليها .. ويو يباركوا لي ..

أقولهم Hope i can survive for other Year !



أحس عمر والله .. الايام كيف تركض ..

جني البارحه متعينه .. وكملت سنه ماشاءالله !

أبي أطلع واروح مكان ثاني ..

عندي مقابله الاسبوع الياي .. دعواتكم ..

بس مستحيه وايد ومتوتره لانه اخو ربيعتي هو اللي بيسويلي المقابله

واحس ما باخذ راحتي بستحي يعني

اقولها ما بقدر اخرط وايد .. واذا نقعت بالانجلييزي بيضحك علي

ان شاء الله خير عاد ..

::

أبي أروح الستي .. باخذ هديه حق اخوي . حق عيد ميلاده

بس ما اعرف شو اخذ له

ومفتقره بصراحه ..

يبالي اسوي له طاف واستهبل اسوي عمري ناسيه السالفه

:

خااااااااااااااااااااطري أروووووووووووووووح البحر !!

[قصايد غلا]

اليوم : السبت

المود : مستانسة الحمدلله ، و تعبااااااااااانة (فيّه رقاااااااااااد)

الموضوع :

اليوم ظهرت ويا خالوه و عيالها ، حمدت الله و شكرته إنه ما عندي إخوااااااااااان ولاّ جان اتخبّلت

اشتريت كتاب حلو بس مادري متى بتفيّج و بقراااااااااه ، و الكتاب اللي أدوره ما حصّلته

و ردييييييييييييت البيت منهد حيليييييييييي ...

ملاااااااااااااااك : تولّهنااااااااااا عليج غناتي :)

هيه وناسة ، الله يبارك في حياتج يالغاليـــة


مبرووووووووك "لأنج كمّلتي سنة"

الله يوفقج حبيبتي في المقابلة ، الله يرزقج بالزوج الصالح اللي مب طايع ايّيج

[حلم الطفوله]

اليوم : نهاية السبت

المزاج : مستانسه لوناسة بنات الواحات

الموضوع :

استانست لنجااااااااااااااااح شمعة أمل واااااااااااايد واااااااااااااايد

وضحكت على يوميات ملااااااااااااااااااك لين دمعت عيوني !!! يا بنت اعقلي وبندعيلج لا تخافين

ولا تفكرين تشوفين فيلم هندي قبل ما ترقدين !!! والله طار رقادي بسبة لصيااااااااااح

قصوده ...موووووول لا تفكرين تطلعين ويا صغاريه !!! بتردين بيتكم جيه

أحس باجر بيكون أحلى يوم بحياتي .... ادعولي يعدي اليوم على خير

[ملاك الروووح]

هلا قصوده

بالعكس .. حلو يوم يكون عندج اخوان ..

هو أحياناً بس ما يكون حلو


فديت اخواني والله تولهت عليهم .. !!

:

الله يبارك فيج حبيبتي ..

وبالنسبه للزوج الصالح .. ايون يا اختي ..بس الله يهدي الوالد ..

ما يقتنع بأي حد .. وسبحان الله الأمور ما تتيسر ..

وكل واحد بياخذ نصيبه ..

بس مايدري منو .. ومتى ..

بنتريه وان شاءالله خير ..

:


توووووووووووونا ردينا من الستي ..

ماخذت شي حق أخوي ..

بروح مره ثانيه .. وبتفيج أدور عدل ..

:

شريت حق بنت خالي درااااايف لأنها كانت تبا .. وعقب طرشت مسج حق اختها

قلت لها فلانه خذت لها درايف ولا ؟ قالت لي هيه

صج اني هبله ليش سألتها الحين عقب ما خذته ..

وجان أسير حق الانفورميشن .. قلت لهم جيه جيه السالفه ..

جان يضحك .. اونه شاريه حق ربيعتج درايف ليش !!!

انته اشدخلك

قلت له كيفيييييييي ..

عقب شوي زقروا المدير عسب يوقع .. ويردوا لي مستحقاتي

جان يقوله أونه ليش رديتوه حقها ؟ قاله لانها ما استخدمته .. توها شارتنه

جان يوقله يا سلام .. اونه وليش شرته عيل يوم بترده الحين !!

قلت له كيييييييييفييييييييييي واتس نات يور بروبلم واانا معصبه ..

مشكله يوم الهنود يكون منجريه ويقصون على اعمارهم

زين ما كفخته هو والمصري بالدرايف ع راسهم

:

شريتلي وايد خشاخش .. أبي أمتتتتتتتن ياخي

بروح أيلس تحت ويا أمي و بيبي خلووووودي حبيبي

[قصايد غلا]

حلم : هيه والله ، صدقتي
فظيعييييييييييييين و لين أحينه يالسين عندنا و يباغموووووون و يتضاربون


ملاك : فديييتج ربّي يوفقج و ايسّر أمرج

دخييييييييلج كلّه ولا المهندة يوم يسوون عمارهم شَيْ
و المصاروة عاد خلّيهم على صوب ...

[رمــش الغـــلا]

ملاكووووه

مبروك حبيبتي على مرور سنة عالتعيين

عاد هاك اليوم مطرشتلي الصورة وانا توني ناشة من الرقاد

واستوى خاطري ف كيك

جان اذكر ان اليوم اللي قبلهـ مسوين حفلة ل بنت اختي

سعب مخلصة KG2

وجان اسير آكل من كيكتهااا

...

يلا انشاللهـ تتوفقين فالمقابلة وطمنينا عليج عاااد ,

والله يردهم بالسلامة الأهل كلهم واهم شي يدعونلج

....

المود .. مش ولا بد !!

أمس كنت مستااااااااانسة واااااااااااايد

لانهـ الخبال كله ظهر

كنا بيت قوم يدي ويمعهـ معتاادة يعني

يلسنا كلنا ودق فراسنا نظهر

وماشي حد يظهرنا

لانهـ دريول قوم عمي مسافر !!

وماشي كل وحدة طلعت لنا علثة وما ودونا مكان !!

تمينا مجابلين بعض من الظهر لي فليل

واخر شي شافنا خالي

وكسرنا خاطرهـ وقال مهب اليوم

شو رايكم انسير البحر .. ونحن ما صدقنا خبر

على طووووووول قلنا اوووووووووكي

قال يلا بنتعشى

واتعشينا برع فحديقة البيت

والجو كااان رووووووعة

وسيدا شردة فالسيارة

ويالسين ع بعض

بس المهم نسير ونستانس طبعا طول الوقت ضحك وسوالف

لين وصلنا صوب المينا السياحي

ونزلنا عالبحر

وردينا عقب البيت عال 12

صدق

We Enjoy OuR Time There

فديتهـ خالي والله ...

... واليوم كان المووود اووكي

وسرنا وخبصنا فالمطبخ انا واختي وكزنتي

وسوينا Chocolate Cupcakes

وميلك شيك

يممممممممممي

وانشاللهـ بحط لكم صور ف خرابيط ^

[شمعة أمل]

قصايد
الله يبارك فييج.. تسلميلي والله
على قل في ناس كيوتين هني يتولهوون عليييه


ملاك
عقبال ماشوفج في عرسج مب تنسين تعزميني


حلممممممم
شكراا




اليوم: السبت
المود: كجره
الموضوع:

ملل


أو صح
من كم يوم
سويت مقلب في ربيعتي
هي واختها ربيعاتي .. بس هي ربيعتي ربيعتي
المهم
ربيعتي ربيعتي اعتبروها H واختها M
ربيعتي تعيـش في الشارجه بس اختها معرسه وتعيـش في دبي
يوم قبل لأسير بيتهم في الشارجه .. طلعت ويا اختها M بس H ماتدري..
اتصلت في H وقلتلها: صدق انتي واختج ماتستحون على ويهكم.. كل ماتصل فيكم كل وحده راقده.. الحمدالله انج واعيه الحيـن.. من الصبح واتصل في اختج وماتشل التليفون.. يعني كيف تبيني ايي بيتكم باجر لو اختج ماتخبرني شو الplan ؟ .. وتراني اتصلت فيها خمس مرات وماشلت التليفون.. شو تقصد؟! شو يعني مادانيني ولا شو السالفه.. لو ماتبوني ايي قولولي ترا عندي عزايم ثانيه

وردت علي: شمعووه آسفه والله وهاي M الحييييين بتصل فيها.. اكيد ماشلت لانها راقده مب لانها مادانييج لاتفكريين جيي.. الحين برمسها وبقوللها تتصل فيج

المهم بندت عني واتصلت في اختها.. بس انا رديت على تليفون اختها

أنا: السلاااااااااام عليج
H: منووو
أنا: وعليج السلاااااااام
H: شمممممممممممممعه!!!!!!!!! what the hell!!!!!!!! انا اتصلت في M
أنا: H عن الاستعباط.. هذا تليفوني جيكي عدل.. انتي متصله علي.. شو هالحركه البايخه ..يعني ناويه تزعليني ولا شوو؟ بلاااكم انتو الاثنييين!!!!!!!!!!!
H: والله اااسفه انا متأكده اني دقيـت على رقمها والله مادري كيف اتصلت علييج
أنا: لا تستهبليين!!!!
H: والله ماستهبل.. انا اسفه.. الحين بتصل بأختي وبرد عليج

هههههه صدقت الاخت

وردت اتصلت في اختها مره ثانيه وانا شليت وبعد صدقت!!!!! بس آخر شي اختها خربت علي لانها ضحكت p;

[ملاك الروووح]

:

قصودتي


دخيلج أنا تعقدت من المهنده .. بسبة هالكستمرز اللي ايونا ..

تبين تفهمينهم ما يفهمون .. استيعابهم بطيئ مادري كيف !

الله يهديهم بس ..


والله يوفق الجميع حبيبتي .. ان شاءالله ننخطب كلنا ف يوم واحد لوول

:

رمشوووووووووه

<< على فكره كتبت اسمج أول شي بالغلط صج اني فضيحه

تسلمييييييييييييييييين فديتج ..

ان شاءالله خير عاد .. ..

وعن الكيكه لووووووووول ما قلتي لي جان يبت لج من الكيكه والله ..

وايد كبيره كانت .. بس أنا كنت مصوره اللي ع صوب واحد .. لانه الصوب الثاني وايد معنقش

صج شغل هنود ..!

طرشت الصوره حق خالتج بعد بما انها ويانا .. بس طلع لي عقب انه فيلد

فديتها والله .. وايد أحبها هي وأمج

:

يااااااااااااحيكم عالاقل في حد يسوي لكم سالفه

مب نحن مالت علينا

يوم أخويه يكون متفيج بس يودينا ..

من متى أقولهم خاطري أسير جميرا بيج .. بس أكبر طاف ..

لكن حاجزين ف تاريخ 12-7 ف فندق ف جميرا .. نسيت اسمه .. وعقب بنسير بوظبي بعد

بنحجز هناك أعتقد ..

وناااااااااااسه بنسير نغير جو .. ع قولة اخوي بنصيف في البلاد ..

بنتريه صور الكب كييييك عيل .. ويوم بي بيتكم سوي لي منه هاه

على فكره أمس أخويه كنا نرمس وجيه .. قالنا ليش ما تسيرون بيت أهلنا ..

روحوا زوروا الناس .. زوروا فلان وفلان .. وكان اسمكم على راس القايمه

جان أقوله هيه والله فديتها رمشوه من متى وأنا أقولها بني بيتكم وما رحنا

قالي مالت عليكم بس فالحين تروحون الاسواق والسينما صح بس بيت هلنا ما تدلونه ..

ف ان شاءالله ان شاءالله جريب بنزوركم

::

شمعوووووه

أفاااااااااااا عليج انتي بس ..

انتي أول المعازيم ..

وما يخصني بتحضرين يعني بتحضرين ..

سبشلي اذا كان في المكان اللي خبرتج عنه




لووووووووووووووووووول

حرام عليج سبلتي في البنت .. وخليتيها تشك ف عمرها ..



:

مادري ليش تذكرت موقف استوى لي من سنتين تقريباً ..

اختي كانت خلاص بتربي .. ورقدوها في المستشفى ..

وأنا كنت بطاليه .. ف قالت لي أبات عندها .. لأنها ملانه

وأنا أحب أبات في المستشفى .. وناسه أكلهم حلووو لوول

ف مره اختي كانت داشه تتوضى .. وأنا كنت منسدحه ع شبريتها .. ومتلحفه

جان تدخل النيرس .. أول مره أشوفها يعني ..

جان تعطيني فيتامين .. وقالت لي شو صحتج الحين ؟

اأنا كنت بقولها انه مب أنا المريضه .. يعني ما تشوف انه مافيني كرشه

بس عقب قلت خل استهبل وأعيش الدور شوي

قلت لها الحمدلله بخير .. بس احس اني ديزي شوي اليوم ..

قالت لي خلاص ماعليه خذي هالفيتامين وان شاءالله بييب لج غدا الحين

لازم تاكلين مب زين حقج وحق الجنين .. انتي وايد ضعيفه تراج

وأنا ميوده عمري أبي أضحك بس مب قادره .. وأوني حاطه ايدي ع ظهري ..

اقولها ان شاءالله ان شاءالله آي ويل .. لوووووول والله ما أتخيل لو اختي كانت طالعه ف هالوقت

شو بيكون موقفي هع هع

ويوم طلعت خبرتها السالفه ويلسنا نضحك


سخافه صح ؟

مشكله يوم تكونون في المستشفى ترى ملل ماشي شغل

::

وناااااااااااااسه المنتخب للحين يايب هدفين

فديت سمعه ومايد والله عفيه عليهم ..

الشباب اللي في الدوام سايرين الكويت يحضرون المباراه

متفيجين والله

بسير أشوف يمكن يصورونهم بالغلط ولا شي .. هع

[رمــش الغـــلا]

ملاكووووه

لا بليييييييز عن الفضايح

الا اسمي هههههههههههـ ^^


فديتج والله تعبت وانا اتريااااااكم

حليلهـ أخوج والله فيهـ الخير

يلا نتريااااااااااااااااااااا اكم كلكمـ بتونا هااااا

من متى حاشرة أمي انكمـ بتونا ... ,, ولي الحين ما ييتوا !!



,,,,,

هي خالو أمس كنت عندهم ما قلتيلي والا جان راويتها الصورة ^^

[ملاك الروووح]

::

هلا رمشوووووه


لووووووول لا ما عليج بحاسب قبل ما أحط الرد بقراه ستين ألف مره قبل

:

خلاص بطرش لها باجر الصوره

سلمي عليها سلامن جثير ..

::

مبروووووووووووووووووووووو ووووووووووووووووووووووووو وك فوز المنتخب



أففففففففف صج أعصااااااااااااااااااااب

صوووووووووووتي رااااااااااااااااااح

أحلى شي يوم سيف ياب الغووووووووووووول يا سلااااااااااااااااااااااا اااااام

يلسنا نزاعج أنا واختي .. جان تطلع هنوده بنت اختي

اونه خالوه شو هاه انتوا زيغتوا البيبي مالنا .. حرام عليكم

شو يعني يابوا غول أفففف

ضحكتني


وتوها يايتني اونه خالوه طلعي ثيابي .. عشان تلبس بيجامتها ..

وانا فتحت العقم اللي جدام . وحسيت انه فتحة الرقبه ضيجه صعب أطلعه ..

ويالسه أسحب وأسحب .. وعلق راااااسهااا اونه ااااخ خالوه عورتيني ..

وحليلها اتصيح .. شكلها يضحك .. شغاباتها طالعه .. واذونها عالقه هع هع

أقولها اتريي بقص القميص .. وعقب بالغلط شفت انه القميص فيه زرار

يلست اضحك على عمررررري

:

أف مالي بارض حق الدوام باجر ..

واتصدقون اني للحين ما كملت غونغ !! بسير أشوفه الحين

اختي تقول هاي احلى الحلقات فيه ..

يالله سي يووووو حبايبي

[أنامل قلب]

:
.

اليوم : ما يفرق ..
المود : ....
الموضوع :

عـ أيام الدوام نطلب الاجازه ونشكي همه .. ولمن اتينا الاجازه نبتلش بالوقت اللي نضيعه من غير شي مفيد !
انام بعد صلاة الفير وأنش قريب الـ 2 .. ومــــــــــــااادري كيف يمر الوقت علينا بلا حاسيه !!
احس بتأنيييـــــــــب الضمييـــــــر طول الوقت .. وطـــــــــــووول الوقت أخطط ذهنيا براسي واحددلي كمن هدف لول ..

الحلو باليوم لمن قعدت مع اختي وتمينا نسولف .. لعبنا شوي لعبة ماعرف اسمها .. جي اسئله عن الاسلام ونشوف من بيوصل للكعبه قبل ههه
عقب تمينا نتكلم عن الوالد وسفراتنا واذا كنا بنسافر هالسنه .. ومتى بيردون أخوي والوالد وكيف باباتي حاب يسفرنا ونحن مب متفيجين :/

ذكرتني بموقف صارلي الله لا يبليكم بولا موقف قافط أمر فيه .. عقولة ربيعتي .. عكثر ما أنامل قلب تستحي عـ كثر ما انها تمر بمواقف لا تحسد عليها .. !

تخيلو كنت مع ربيعتي اسبنس خاطرنا بكاكاو ولمن رحنا نحاسب لقينا الصف مطوله .. واللي يضحك ان نحن قابضين هالكاكاوتين واقفات آخر شي .. واللي جدامنا طبعا مب مقصرين لول ..
كنا جي انا واهي واقفات حذا بعض وجدامنا واحد عاطنا جتفه وكأغلب الريايل عملاق ههه .. يعني امم نحن نروم نشوف شكله واهو بعد يروم يشوفنا ..
بمعنى ثاني مب عاطنا ظهره وعادي واقف حاله حال خلق الله .. امبلا صح وعمره جي مبين عليه قريب الـ 40 ..
بالعاده انا اللي اكون هاديه ومصطلبه وربيعتي اللي تكون يعني حركيه اكثر وتخبص لول .. لكن هالمره مادري كيف الادوار انقلبت ..
هو الريال مبين عليه "بنظري" هندي او باكستني مع انه ابيضاني وجي .. المهم .. تميت ارمس وصوتي ماكان همس يعني عادي مثل ما ان ربيعتي تسمعني الريال بعد يوصله صوتي "اللي اتحراه باكستناي" يعني ما بيفهم علي .. !

والموقف كان كالتالي .. اول ما شفت الريال قلت حق ربيعتي "شو ها المفروض يشوفون ان نحن مو قابضين شي ويخلونا نجدم .. " وانا اتحرطم لكن بغشمره وابتسامتي معرضها ^______^ ..
اشوف ربيعتي ساكته الطالعني وتبتسم .. وانا مستغربه منها اونه بلاها متأدبه على غير العاده لول ..
عقبها لمن انتبهت عالريال أكثر قلت بنفس مستوى الصوت "أمبيييـــــــه احليييـــــــــله عيونه ملونيييــــــــن بشكل ملفت .. ذكرني بالوالد بس الوالد عيونه احلا :/" .. ولمن صديت عـ ربيعتي اشوفها بنفس الموقف وساكته .. كأنها منحرجه أو مستغربه !
اقولها "اشفيج لبنووو" تقولي بهمس " هذا الريال عربي" .. وانا ارد عليها بصوت عالي "تنكتين ولا من صدقج .. اصلا باين انه باكستاني او هندي .." واهي ترد بنفس الموقف تسكت وكأنها منحرجه ..
عقب يابتلي طاري وحده تقولي "احليلها الله يعافيها" وانا سرحانه بشي ثاني .. رديت عليها " الله يعافي قلبها .. ويعافي خاطرها ..
ويعافي لفظها .. ويعافي ... . والخ " ولا طعت اسكت .. أصلا مب منتبهه لروحي ونحن لازلنا بنفس الوقفه والريال مجابلنا بجتفه ..
ليمن قالتلتي بهمس "شوفي الريال يطالعج ويضحك .. وأول ماييت أصد صوبه تكلم الريال وقال بالعراااااااقيييـــــي
" حياج الله اختي تجدمي ...... والخ " وكمل بعد بس ما أذكر كلامه ولا سمعتله اصلا من هول الصدمه ..
تميت واقفه اطالعه واانا فاتحه ثمي ليمن بديت استوعب شوي وانا اشوفه يكمل كلامه واهو مبتسم .. جي مبين عليه فيه ضحك .. وكأن يقولي صادو .. ماحزرتي ..
رديت وانا صوتي يرج "إإإإ لا لا والله عادي أخوي " وأهو يرد يلح عساس انه ناسي شغله وبيرجع..
انزين اذا ناسي شغله روح بدون لا تقولنا تفضلو .. ليش الاحراج .. ويهي احتررررررقققــــــق ورفيجتي تقولي قتلج والخ
وانا ........ ولمن تجدمنا ياني واحد ثاني يقولي لو سمحتي اختي ممكن اتجدم اونه باخذلي بطاقه وجي .. كأن وقته لول ..
قتله تفضل أخوي .. ولمن صديت شفت العراقي يطالعنا واهو مبتسم من الخــــــــاااطر .. تقولون واحد من الأهل >_<

آآآآآآآخ ويهي تقطططــــــــع وحسيت اني قوييـــــــة عين .. أقول لربيعتي أمبيه كأني اتغزل بالريال عيني عينك لووووول

أصلا نادر ما أظهر بدون لا يصيرلي موقف .. والله يستر ..
وأغلب مواقفي مع الجنس الخشن .. لا بلاكم الرحمن ..

جان يعتفس مودي لول !

:.

[ملاك الروووح]

^

^

لوووووووووووووووووووووووو ووووووووووووووووووووووووو ووووووووووووووووووووووووو وووووووول

ياحليييييييييييييييييييلج أنااااااااااااااااااااامل

عادي الحياه حلوه



أنا تصير لي وايد شرات هالمواقف ..

احس استوى عادي عندي الحين حتى .. ما أقفط

مره ياني كستمر .. من هالمواطنين اللي مسبلين في اعمارهم انزين

وأنا اتحراه هندي .. جان أقوله Yes Sir .. have a Seat Plz ..

جان ايي ويقولي لو سمحتي الشيخه أبي جيه جيه

وحدث ولا حرج يعني !


ومره كان واقف جدامي كستمر .. شكله انجلييييييييييييييييييييز ي

جيه شعره كيييييييييرلي حلووووووووووو وأبيييييييييييض

جان أقول حق ربيعتي أووووه أوووه شوفي شعره انتي بس .. عجيب هاه

ويالسه اضحك جان يشوفني وابتسم .. أنا يلست اقول ف خاطري حليله ما يدري انه نضحك ع شعره

ويوم يلس قلت له Good Morning Sir ..

جان يقولي صباح الورد ..

آي واز لايك هااااااااااااه


يعني عادي وايد تستوي هالمواقف .. الحياه حلوه ترى