دير دياري ~ يوميات

[مــهــابه]

~ اليوم [ ونـاسـه ]

بكـل ماتحمـله الكلمة من معـنى . .

[بنت الدلع]

يا الله
قلبي طااااااااااااااااح

كان عندي essay تسليمه قبل الساعه 12 فليل
الساعه 12 الا سبع دقايق بغيت اسلمه النت ما اشتغل !!
مت مت مت من الزييييغه
وهالخااايس مايقبل نسلم الشغل على ايميله لازم على الـ black board
ويوم اشتغل النت المتناحس
سويت submit بس ماكان يستوي
سويت مناااااحه في البيييييييييييت

بس الحمدالله اخر شي استوااااااااا

مااااحب هالشعوووور
اكرهه

واايد وااايد ماحبه

[ملاك الروووح]

شممممممممممممممعتي

فديتج

تستاااااااااااااااااااااا اهلين والله



أنا أبي أكون ممبر في الغروب مالكم مره ثانيه بعد

احس الشغل وياج انترستنغ وايد




يالله تستاهلين كل خير ..

والحمدلله انه تعبج ما راح ع الفاضي ..

وطلعتي انتي الصح وهي عرفت انها غلط ..


بس نحن عندنا واحد كيني .. فقييييييييييييير .. وايد وايد طيب ..

وعلى نياته .. يعني يوم يطلب مني طلب .. مستحيييييييل أقوله لا ..

حتى لو أضغط على عمري .. بس ما أرده !

:


اليووووووم الصبح رحت فرع ثاني .. عشان أتعلم شغلي كيف يسوونه ما نيوول ..

لأنه بيغيرون السستم عندنا .. وشكلي بتلعوز وايد

استاااااااااااااانسنااااا ااااااااااااا .. رحنا أنا والمنجر مالة القسم الثاني ..

كشخه سوالف وضحك في السياره .. ويوم رحنا هناك استانست وياهم ..

كووووووووووول البنات .. حسيت عمري صج ف بيت يعني ..

وكلهم جنهم اخوان وخوات .. ما حسيت انه الجو شرات الجو اللي عندنا ..


استانسوا علي كلهم الحمدلله ربشتهم شوي وييت ..

وأشوفهم عقب حليلهم مطرشيلي ايميلات .. اونه بنسوي غذرنغ ولازم اتين ملاكوه

استانسنا وياج ومادري شو ..



وأنا وربيعتي كنا شالين نفس الشنطه بالصدفه .. وحسيت انه شكلنا غلط ..

قلت لها شكلنا غلط صدقيني بيعلقون علينا أدري بهم الشباب ..


أول ما دخلنا قالنا واحد ماشاءالله فرع الـ..... يوزعون شنط لوي فيتون ..

بناااااااااات يالله يالله روحوا هناك .. بتحصلون شنط ..

آي واز لايك ! I TOLD U SO

بس فالحين حق هالسوالف الشباب



:

هالسايكوووو قاهرتني ..

متغصصه لأنه التيم ليدر ما تنزلني وايد ايفننغ في الجدول

واسمعها تتحرطم وجيه .. وداشه عند المدير ..

اونه انا وايد سكت عن الظلم .. بس من اليوم ورايح ما بسكت <<< !

عدال خفي علينا ..


وطبعاً أنا دلوعتهم .. ف المدير بيسمع رمستي أنا ..

زقرني ورمسته قلت له جيه جيه .. وهي يالسه تجرج الستف عشان يشتكون علي ..

وطبعاً بما انهم الحمدلله علاقتهم زينه وياي .. على طول يو وخبروني ..

ودافعوا عني جدامها .. وحطوا عليها .. وجان أستانس ..

قالي المدير لا تحاتين ملاك .. انا اعرف منو يشتغل ومنو ما يشتغل

واذا سمعتي رمسة البنات بتتعبين وايد .. ما عليج منها ..

وعليج بشغلج وبس .. وانتي ما ينخاف عليج ومن هالرمسه ..




مكرهتني ف عيشتي والله هاليومين .. وايد مستويه كريهة

:

أما راعي المج اليوم .. سوالي حركه لووووول

أنا أطرش حق كل الستف ايميلز توصلني يعني ..


جان يزقرني قالي ملاك تعالي شوي .. يوم سرت له ..

اونه تراج وايد اطرشيلي ايميلات .. وأنا وايد مشغول مب متفيج أقراهم .

جان اقففففففففففط جيه استويت !!!

وعقب قالي عشان جيه بعطيج البيرسونال ميل مالي وطرشيلي عليه

عشان اشوفهم في البيت وانا متفيج

وجان استانس .. سامحته يعني هاهاههااه

بس صج كان موقف .. !!

:

توني ناشه .. وشاربه كوفي ..

يعني صباحي شكلي اليوم ..

[بنت الدلع]

^ ملااااااك
good morning عيل
انا نااشه الساعه 10 فليل
هاهاها يعني ماشي رقااااد

--

اليوم: الاربعاء
كان عندنا CP LAB
اول كلاس لاب لهالماده
بس كان حلو
جيييه انترستنغ
فتحنا الـ CPU
ويبنا سكااريب لول كششخه تعجبني هالسوالف
تعلمنا على الـكمبيوتر parts من داخل
وكل واحد شو يسوي وشو وظيفته
واول مره اشوف هالشريط موجود في داخل الكمبيوتر
جيه شرات الريبون
يوصل الـ data من هالمكان لين ذاك المكان p=
يتني فتره غيرت رايي وماكنت بتخصص في هالماده
بس شكلي بعيد ترتيب حساباتي XD

---

اليوم وانا راده من الدوام مريت على شيشة بترول
كنت ارمس ربيعتي في الفون ونزلت اخذ لي بسكويتس
ما انتبهت اذا في حد عدالي
بس جيه لمحت ان شي أوادم
جان اقولها
غربلااات بلييسهم زاادو سعر الـ فليك
انا اشتريه من الدكان بـ درهم ونص وهنه يبيعونه على 3 !
هههههه هيه تمت تضحك

شوي حسيت المكان استوى صخخخخخخخخه
يوم صديت الا اشوف الكل يطالعني >.<

شو انزييين الواحد مايعبر عن راااايه

[الخنساء]

صباح الغلا للجميع


اليوم الخميس : االمووود عال العال طبعاً ....



ملاك حبيبتي والله حاسه فيج .... والحمدلله مليوووون مره اني انتقلت من دوامي وافتكيت من الليدر مالنا.... بس تدرين امس سمعت خبر ...استغفر الله ...اللهم لا شماته ..حطوا على التيم ليدر مالنا ...مديره .. وغده من الخاطر ..سبحان الله كما تدين تدااااااااااااااااااااااا ااااااااااان والدنيا صغيره وايد الحين بتحس بكل معاناتنا .....



دوامي اليديد ممتع لين الحين .... والحلو اللي فيه كله ميتنج وطلعات وجيييه ...يعني ماشيء شغل مكتبي وملل ... في الاسبوع لازم انزل اشوف قسم الكستمر سيرفس ...اتولهه على هالنوع من الشغل ...

من الحماس حاطه اغراضي في السياره ...وما برجع البيت بعد الدوام .... ابا استانس .... وابا اطلع ..وايد

الاسبوع الياي ... يوم ميلادي ابا هديه ...تكون سفره في الويك اند ... ما ابا شيء ثاني إن شاء الله تتحقق ...وعندي احساس انها بتتحقق ...

[شمعة أمل]

رمش الغلا
تسلميــن (f)

ملاك حياج.. تعالي سجلي حق كلاس السمستر الياي p:
شي اشاعه اني لازم اخذ كلاس شرات هذا عن الموارد البشريه.. يقولون انه عباره عن قروب بروجكت وبرسنتيشن وربوورت وماشي كلاسات.. من الحين يالسه انقي منو ابا
هالكلاس كلحد ايي عندي لاني وااااايد competitive في هالماده >_< لاني أعشق شي اسمه موارد بشـريه.. وناسه xD اتحدى وحده باكستانيه تحاول تتفلسف علي في هالماده لول بس آخر شي درجاتي تطلع اعلى عنها




اليوم الخمــــيس
المود مستانسه
الموضوع
البااااااااااارحه جددت ليسني روحييييييييي هالشي معجزه
أول شي كملت سنـــــــــــــــه لا بعد سايره عندهم ومب يايبه جوازي ويايه.. شو عرفنيي.. بس جددودلي اياه بدون جواز لانه بياناتي نظيفه على قولتهم
وايد مستانسـه.. انا اول وحده اسـير بنفسي واجدد ليسني عندنا واحد يسولنا هالسوالف.. بس قلت لااااا لازم اسويه روحي ونـاسه
لازم اكون independant.. شو بعد عقب كم سنه بعرس بعدين منو بيسولي هالاشياء خلني اتعود من الحينه p:

اليوم الصبح اختي ضحكتني.. وديتها ديره عشان نسير عند دكتووور علييييييييييي .. وانا انسانه وايد اهتم في صحتي وواااااااااايد اهتم في العالم لول.. ف بركنت في آآآآآآآآآآآآآخر باركينغ جان تيلس تتحرطم.. وعطيتها محاظره طوووووووووووييييييييييييي ييييييييييله عن الارض والحياه وقلوبل وورمينغ وصحة الانسان وكيف تبا عيالها وعيال عيالها يعيشون مادري ليش تتحرطم بس لازم نمشي خمس دقايق زياده.. شو فيها يعني
لازم اعطيهم هالمحاظره كل يوم.. ينرفزووووووووووون.. أغيض يوم حد مايبند التلفزيوون.. ولا يشغلون ليتات ماله داعي يشغلونهاا افففففف اتنرفززززززززززز.. خسارة كهرباء = خسارة فلوس = يخرب الارض والحياه ويزيدوون من قلوبل وورمينغ وووووووو.. يعني مافي شي ايجابي من هالشي >_<

[ملاك الروووح]

أسميني اليوم انهزبت ..



راعي المج ويا راسه صرخ علي ع الخفيف وأحرجني جدام الستف والكستمرز



كنت شوي وأصيح !!

قلت له آسفه انزين ..

تعال اضربني بعد << ما بكون ملاكوه اذا ما طولت لساني لووووول

وحسيته جيه يبا يضحك بس يود عمره ..

عقب حس بالذنب .. راح شرى له عصير برتقال وشرا لي ..


فقيروه ..

جان أسامحه ..

أصلا هذا وأنا الغلطانه يعني أستاهل الهزبه هاهاههاهاها

أونه بس شو رايج فينا ؟

أقوله منو انتوا يعني !!

اونه نحن الاهلاويه .. خلاص الدوري أهلاوي بعد شو << متفيج



وتوني تذكرت اني مو مخلصه شغله لازم أسويها كل أحد ..

ويالسه من الصبح أتمشى وأسولف وأجيك الايميل .. وانطعن

باجر بحصلي هزبه ثانيه شكلي هاهاهاهاها

:

بسير أرقد مدوخه ..

وبدخل عقب .. سي يوووووو ليتر ..

[ملاك الروووح]

هيه صح نسيت أقولكم ..

أحس استوى شي في الدوام ..

مادري يعني اذا أنا كبرته ولالا ..

بس تضايجت منه بصراحه !!



:

كنت أمشي وشفت فجأة هالزلمه جدامي ماسكه المج مالي وتشرب فيه !!

I WAS LiKe Duuuuuuuuuuuuuuuuuuh . it's Mineeeeeeeeeeeeeeeeeee !!




جيه وقفت دقيقة صمت من هول الصدمه


وعقب مشيت عنها ولا قلت لها شي ..

مادري أحس انه شي بيرسونال يعني .. وهي تدري انه مالي ..

انا في اليوم اشرب 4 مرات كوفي .. و24 ساعه المج في ايدي ..

سو مافي مجال انها ما تعرف يعني ..

تضايجت وايد والله !!!!

مب ع المج يعني .. بس سالفة مبدأ !!

أحس انه مالي يعني .. كيف جيه !!



بسير آخذ لي واحد بداله اليوم

أصلا زين انه يت منها .. لانه البارحه شايفه المج مال ديدل وعايبني

بس ماخذته لانه عندي يعني مالي حايه فيه ..

بس شكلي بسير اخذه اليوم

[بنت الدلع]

اليوم: الاحد
المود: .....................

الموضوع:

هالايام صدق صدق مضغووووطه من الخااااطر
ابداااا ماعندي وقت حق شي
وااايد شغل عندي
واايد واااااايد

بس in the same time it's interesting
امس ظهّروني في التي في على 3 قنوات
وبابا كان ياالس
واايد استانست يوم شفت نظرته وهو يطالع
حسيت انه فخور فيني
وان شاء الله برفع راسه
بس احس ان هالشي مسؤوليه ويبااله شغل شغل شغل
والشي الحلو اني i'll be off the campus
اف فكه
بس الشغل كله بيتكوّد على راسي بعدين

[الاسطوري]

أما راعي المج اليوم .. سوالي حركه لووووول

أنا أطرش حق كل الستف ايميلز توصلني يعني ..

ذكرتيني بعضو (واحاتي) بخيل أطرشله من الدوام اشكثر ايميلات ومايطرش مول
بحجة انه محد يطرش له في الدوام، الظاهر شكلي بجرج
عليه رسوم على الايميلات من
الشهر الياي

[ملاك الروووح]

بنت الدلع

كل شي زادوا سعره وانا اختج !!

الله يعينا على الغلاء الفاحش ..


بس أنا تراني جيه مستويه وايد أيلس أرمس عمري وأتحرطم

حتى جدام الكستمرز مساكين يشكون ف اعمارهم اونه اكسكيوز مي يو آر توكنغ تو مي لوووول

:

الخنسا

ياااااااااااحيج والله

أهم شي انج مرتاحه ف مكانج اليديد .. وما ندمتي على قرار استقالتج

والفال لي ان شاءالله

انا التيم ليدر مالتي مستويه عسلللللللللللل بس في وايد اشيا ثانيه مضايجتني


عشان جيه أبي أطلع !!


وان شاء الله تتحقق امنيتج وتسافرين حبيبتي

وكل عام وانتي بألف خير

:

شمعوه

ماشاءالله عليج .. ما ينخاف عليج أصلا ..

كسري راسهم هاللي وياج في الكلاسز ..

وهالله هالله بعمرج وانتي تسوقين ..

:

الاسطوري ..

لوووووووووووووول

حليله يمكن صج ماعنده حد يطرش له !!

أنا متعرفه على بنات من أفرع ثانيه .. وحليلهم مو مقصرين فيني ..

في اليوم أستلم 100 ايميل .. بس قمت أزيغ بصراحه

لانه عندنا قسم الاي تي يجيكون وجيه .. وفاصلين كمن موظف بسبة هالايميلز

وشكلي بستوي وحده منهم جريب ..

:

اليوم اليمعه الصبح ..

المود .. مستاااااااانسه


البارحه سوينا سربرايز حق أبويه ..

خذنا له ستيشن اليديده .. وهو ما يدري ..

مني أنا وخواتي ..

رديت من دوامي الايفننغ .. واختي مرت علي بالسياره اليديده

وشفتها مزينتنها .. جيه حاطه ورود حمره على مقابض البيبان ..

شكلها وايد سويييييييييييت ..

ويالسين نمشي 10 .. نتريه اخوي يوصل قبلنا عشان يحضر الحدث


حطينا سي دي العفاسي .. وجهزناه على اغنية ( يبه ) ..

ودخلنا السياره في الكاراج ..

تيمعنا كلنا في الصاله واختي قالت السبيج

وصيحتنا كلنا .. لووووول .. وعطت أبوي سويج السياره ..

وهو بعده مب مستوعب السالفه لانه كنا حاطينه جيه مع ورد

ف هو فديته تحرانا يايبي له باقة لوووووووول

واستانس وايد يوم طلع وشاف الموتر .. ولوى علينا ..

وتمشينا شوي في الفريج وشغلنا السي دي .. وردينا البيت عقب ..

بس ونااااااااااسه ..

ما كنت متوقعه انه جيه بتكون ردة فعله ..

حسيت به صج استانس لأنه ما كان متوقع !!


يستاهل شيبتنا ..

:

وأنا متغصصه لاني نسيت المفتاح وياي

وباجر بيداومون الموظفين وأخاف يتوهقون .. وينقصهم شي

وما بيصدقون على طول ع المنجر طبعاً

مالت عليهم ..

:

محتارين ماندري وين نسافر في الصيف

كل حد يقترح مكان ..

تركيا .. ماليزيا .. تايلند .. مصر .. شمال ايران ..


أنا شفت صور حق تركيا وتخبلللللللللت .. ماكنت أدري انها جيه حلوه !!

وربيعتي بتسير في الصيف . أقولهم بنسير رباعه وياهم ..

بس طبعاً ما بيخلونا لأنه عندها اخوان كبار ..

ف يصير خير لين شهر 8 !

: