دير دياري ~ يوميات

[مزن هتان]

اليوم : ....
المزاج : عادي !

الموضوع

مش عارفه اسبانيا و الا بانكوك و الا مصر و الا بلادي
أبوي بيروح بانكوك يباني اروح معاه، أمي و خواتي الاثنين بينزلون مصر و امي تباني معاها
عمي و خواتي الاثنين الثانيات قالوا اسبانيا و يغايضوني و أنا أقول كم تسوى بلادي
اقعد أجابل أم سيف أحسن لي، بس ماني عارفه راح أقعد عند منو، ماريد أقعد بالبيت

[مايهزك ريح]

^
شكلي يتم في البلاد هالصيف .. الكل امسافر .. وانا بجابل البشاكير .. ^_^
ابويه بيسافر ويا ربعه .. واخواني والوالده سايرين نيويورك .. وانا بتم بروحي ..

بس عندي سفره اسبوع اخر هالشهر بتخفف عليه .. شويه من القهر >_<"

واجازه سعيده ومفيده في دبي .. بجابل مدهش السنه !

[مزن هتان]

الحال من بعضه يا أخوي، بس ذكرتني انه أكو مفاجأت الصيف "مدهش"
يعني بطلع مع عيال أختي الحمدلله

[أنامل قلب]

اليوم : ما تفرق ..
المود : .. ... .... !.
الموضوع :


مشتهيه أنام بس عشان أرتاح من الكحه ،
مع إني حتى وانا نايمه كل شوي اكحكح ، بس على أخف لمن أغطي ويهي ،
صدق صدق هدت حيلي ، أحس روحي بتطلع ..

[أنامل قلب]

اليوم : الأحـــــــــــد ..
المود : ..... !.
الموضوع :


اممم بتخبل من الدوام ، ولا أدري ليش ،
بس خارج النص ، اليوم تفاجأت ابـ تعليق بايخ من أحدهم ، أو بالأصح مأساة ،
فجأة دخلو المكتب أهو مع وحده من الموظفات ، جي كانت محتشره بسبة مراجعه يتهم من شوي ،
وأهو شكله نفس الشي ، بس رد ابـ تعليق صدمني ، كيف جي مادري ، جذبت عمري لمن سمعت O.o !.

وبعد ، اليوم طايحين فيني تعليقات ، مادري كيف كان الجو اليوم أساسا كل شغلي مخربط ،
مرات أفتكر واضحك ، مرات افتكر واقفط ، مرات افتكر ابـ علامات تعجب واستفهام ..!؟

المهم بالأخير ، عيش مسالم ولا تفتكر بظنونك وايد ،
بعيد عن الناس ، أقرب لنفسك ..

ودمتم سالمين !.

[أنامل قلب]

اليوم : الاثنين ..
المود : ...... !.
الموضوع :


امممم ذبحوني يبوني غصب أرد ابـ هالعباره !.
جي أونه لازم من أرد على أي مكالمه أبداأ ابـ : "اسم القسم" أنامل قلب معاك تفضل !!!!!!

شو ها بعد ، للحين متعقده ، اقعد أختصرها ، بس بعدهم يردون يتصلون فيني اونه قوليها كامله ،
احم ، هو صج انه مو بكيفي ، بس اقولها : كيف جي إذا قلت كل هذا متى بسلم ،
تقولي لا تسلمين خلاص قلتي تفضل ..

وانا أبي أقول اسم القسم بس وعقب على طول السلام عليكم ، وهذا اللي اسويه للحين عالأغلب ،
بس يحليلها فلانه ما قصرت ابـ كلامها ، مع إن للحين احس مادري كيف جي ، لكن شكلي غصب بسويها !.

كله ولا يوم رجعت اتصلت ابـ موظف عدنا ، رد علي اونه بيعلق : ها "اسم محل العمل " معاك تفضل ،
ها منو معاي انامل قلب ؟
أنامل قلب : لا والله + ضحكت ما قدرت الصراحه ، قطعني ..

حتى حضرتي شو مسويه ، اوني حاطه استكر عالكمبيوتر كاتبه عليه العباره ،
اونه كل شوي اقعد اقراها ، وبالبيت اقعد اعيدها ، أبي أعود لساني عليها ولا اني استثقلها جي ..

حشى مب عباره ، كابوس ..

مشكلتي ما أحب الشي الجامد ، مع انها يمكن سلبيه توهقني ابـ أحيان كثيره ،
بس واااايد ما أحب إني أكون جامده ابـ أي شي كان ..

[مزن هتان]

اليوم : الثلاثا
المزاج : احم ..

الموضوع

امممم استغفر الله يا رب ماحب اذم المكان اللي أعمل فيه
الحمدلله مرتاحه !! بديت اتقبل الاغلبيه بس بعدني احيانا لساني ينربط
ما ارد عليهم لما يحاجوني ..

أبيّ أصلي على راحتي بس هذا اللي ابيّه

[أنامل قلب]

اليوم : الثلاث ..
المود : ....
الموضوع :

مثل مزن ، مواضيع الدوام ما تخلص ، بس أحلاها لمن تكون بغض النظر عن كل شي ، لـ حالك !.
المشكله الأكبر بس في كوني أسكت عن شغلات أحس المفروض ما أسكت عنها ، مش إني أقعد أعلق عالدقه ،
بس بعد فتره المفروض اللي خلاص صرت أتعامل معاهم وايد أصير أقولهم هالأشيا عادي ، ولا إني أحطهم ابـ ذمتي ،
يعني مثلا : صج إنهم لازم يقولولي عن أخطاء الغير ، منها أدير بالي ومنها أتفادى مشاكل كثيره ممكن اني انحط فيها مستقبلا ،
بس بالكفه الثانيه ما يصير يفضحون الناس بالاسامي ، مادري ما أبلع هالنوع من الكلام بالساهل ، مع إني طاف عالأغلب ،
يعني لو يكون شو ما يكون تعاملي مع المعنيين مثل ما أهو ما يتغير ، بالأخير أتعامل ع أخلاقي آنا مو أخلاق غيري ،
بس هم ما يصير كل شي ينقال ، خاصه إن ممكن يوجهوني ويطرحون ملاحظاتهم بشكل مختلف ،
+ موضوع التقليل من قدر الغير واااايد ما أحبه ، عالخطأ والزله والدقه ،
وايد أحس يتم التساهل بطرح كلام اعتبره غريب جدا وشي أبد ماني حابه أعتاد عليه ..

~

في موضوعين ، وايد وايد وااااايد مضايجيني بالدوام ، مادري للحين كيف أتصرف ،
حتى وانا نايمه قمت اشوف كوابيس بسم الله الرحمن الرحيم ..

~

مواقف مسؤولتي ما توقف ، صدق انها تحفه بكل النواحي ،
اليوم قاعده اشوفها تتكلم بالتلفون مادري مع منو ، واسلوبها مادري شلون بغيت آكلها ،
فجأة صديت صوبها وانا أضحك ، اونه : فلانه أحبـــج

وبعد شوي رجعت دخلت عندها بما إن الأخ ع موجود بمكتبها ـ السايق ـ ،
فقتله عن موضوع عساس المفروض يخلصه ، وريحته بإن بيتابع معاهم باجر مو اليوم ، أعرفه مو فايق ،
المهم اتحرطم شويه ، جي سوالف كالعاده ـ بس للتوضيح تراه ريال عود ـ ، وماكو رجعت المكتب والا اشوف مسؤولتي ترد تزاعج ،
أنامل قلب تعالي بسرعه بعطيح انذار ، خلاااص لازم انذار ، ويوم رحتلها اشوف شو السالفه ـ ادريبها بسوالفها ـ ،
اونه : خلاص بعطيج انذار ، شو مسويه فيهم ، فلان يقول عنج حبوبه
أنامل قلب بخاطري "مسكين مادري منو قص عليه" ، وعلقنا عالخفيف ، بس والله وايد يضحكون ،
ع كثر ما يقولولي بتكرهين عيشتج بسبة الموظفين وبيحشرونج والخ الخ ، بس أحس مع ذلك اجراءاتهم الأخف ،
اللهم لمن يكررون السؤال عن شغله أكون خلصتها بس المعنيين بعدي ما كملو الاجراء ، فاتوهق اهني بما إنهم يقعدون يراجعون حضرة جنابي ..

اممم صج إني وايد صرت أخبص واحيانا اضيع وع كثرة سؤالهم احسني خلاااص دووومي متأخره ،
بس الحمدلله قمت ألقط الشغلات اكثر ، واتعود ع نوعية الشغل اكثر ، وبعدني بلقط اكثر واكثر ..

أحلى شي بالدوام إنك تظل على تواصل مع الناس ولو من بعيد لبعيد ،
تقعد تلتهي ابـ مهام ، تتعلم أشيا ، كذلك احساس إنك شايل مسؤوليتك ومعتمد ع حالك ..

وهيك ، وايد رمست ..

[أنامل قلب]

اليوم : الاربعا ..
المود : ....
الموضوع :






يالله تعبت ..

[أنامل قلب]

اليوم : الخميس ..
المزاج : .... ... .. .... !.
الموضوع :


في شي وايد محسسني بتأنيب ، وابـ نفس الوقت مادري شلون ما أحس ابـ عمري لمن اكون بهذي الصورة ،
في أشيا كثيره نسويها ما نقصدها ، لكنها تظهر بشكل يأثر ابـ اممم ما بقول إنه سلبي ، لكنه بعيد عن القصد ..

ما أدري أساسا إن كان ينفع أوصفها بالـ [ قصد ] ، أهو ما يخصه أحس شي وأمور تمر ابنا بشكل عفوي ،
التفاصيل الي تظهر منا من غير تفكير ، ويا كثرها ..

~

ما أحب لمن أحسني محاصرة ، مع إن الكلمة قويه ، بس فعلا أحسني كذلك من غير ولا نتفة مبالغة ..

~

كان يا مكان في قديم الزمان ،
الناس تعيش الأمس ، وهي تتأمل الغد ،
ولا حاضر لها ..

[مزن هتان]

اليوم : الثلاثا
المزاج : الحمدلله على كل حال

الموضوع

بسرعه أعصابي تفلت
ماحب لما أحد .....
و لمن أسوي شيء و اندم عليه، و أحساس بايخ ....

هل ... و إلا ... ؟

"يا رب"

[أنامل قلب]

اليوم : الاربعا ..
المود : .... .... .. ... ....
الموضوع :


سبحان الله ، ما يحسون فعلا إني ماخذه الليسن إلا لمن أقولهم : لا ما قدر أوصلكم ،
بس الوقت اللي نكون حاضريلهم فيه ، ما يفتكرونه ..

الطريف ، إن هالحكايه تتكرر وايد فينا كلنا باختلاف الأطراف ، بس ياليتنا نفتكر ..

~

اليوم الصبح مريت ع رفيجتي بعدما ضيعت الدرب كالعاده ، ماكنت ادري إن العوير جي كلها مزارع كنه !.
والحمدلله يوم ان الناس فيهم خير ، صج انهم ما دلوني عدل عالدرب بس ولا إني أتم ماشيه كـ ضايع سبيل XP

وعقب بين السوالف والضحك والهموم وكل شي ، وصلنا الدوام بس بحالة شبه هستيريه ولله الحمد ،
مادري اشفيني وكأني من الخاطر مغفيه ، وربيعتي هم مثلي ، بما إني يايه من دربهم فكانت الدليني الدرب يمين ويسار والخ ،
فـ من دخلنا المواقف يايه تقولي بالغلط : لفي يسار ، وانا الخبله من قالت لفي يسار حطيت اشاره يسار ،
وإلي استوعبت فطسنا ضحك ، الله يستر من كانو وراي أكيد يقولون بلاها هذي مضيعه !.
اااخ وعقب لمن ييت ببركن ، آنا أبي أبركن عادي وإهي إلا تخليني أبركن ريوس ، وموقفين السيد مالت علينا ،
إليـ سويتلهم درب ، وبالأخير ولأول مره بركنت ريوس بشكل ممتاز ولله الحمد ، بس منظرنا كان تحفه الصراحه ،
اللهم لا شماته =#

~

بصراحه ما أتخيل شلون الناس ممكن تتمادى بهالشكل ، صدق صدق احباط نفسي !.

قمت أحسني صغيره جدا جدا جدا ..

[أنامل قلب]

اليوم : كان الجمعه !.
المود : .... .... .. !.
الموضوع :


1. وانا قاعده مع الصغاريه ، يقولي حمود ، اونه هيه أقولج شنو كان قاعد يقولي عبدالرحمن ،
اونه ما يستحي ع ويهه ، قاعد يطالع البنيه ابـ أناشيد طيور الجنه ويقولي شوف هاي حلوه ،
بس أنا ما قلت شي ، قتله مادري ما بقول شي !!!

عبدالرحمن كان مفتشل ويقعد يتهرب ولا اونه : ما قلت جي ، وشو ها وايد يفتن والخ ..

2. بنت عمي كانت داخله اللفت مع بنت اختها الصغيره واللي تخاف من الاصنصير بس قاعده تستقوى ،
بنت عمي : ها لطوف خايفه ، لطيفة : لا لا عادي ..
ولمن أحد يطري شي يزيغ واهي بمثل هالأماكن ، مثلا إن اللفت ممكن يوقف ،
ترد عليهم جي بانفعال : بسم الله الرحمن الرحيم ، بسم الله الرحمن الرحيم ..
أو : قولو استغفر الله قولو استغفر الله .. لول !.

3. أحمد من صغره واهو وااايد يندمج باللي حوله ، خاصه بالتلفزيون ،
حتى امه ماتخليه يشوف أي شي لمن كان اصغر ، مثل سوالف الباتمان وغيره عن يعفدله من فوق شي ،
مثلا يكون قاعد يشوف الشخصيه قامت تتحرك وتركض يقوم معاها ،
ومره ما أذكر أي رسوم كان قاعد يعق هدومه ، وهذا جدام التلفزيون هم قاعد يعق هدومه من غير لا يحس !.
بسم الله شلون كل ياهل يظهر ابـ شكل ، بس تعالو شوفوه من الصوب الثاني كيف يشد حيله مع خواته ،
اهو الوحيد بين اربع بنات ما شاء الله ، من يظهرون ولا ايون مكان يقعد بالأول يتأكد إن كلهم قاعدين معاه ،
يعني مسوي فيها ريال البيت من الحين ، حتى عادي ايرهم من ايدهم وما يحب أحد يلعوزهم !.

4. يحليلها بنت عمي وأخيرا يابت بنت بعد ثلاث اولاد ، الحمدلله ،
وربي يسهل ع اللي يايين بالدرب ، ويسلمهم جميعا ..

5. سوالف اليهال حلوه ..

[أنامل قلب]

اليوم : الجمعه ..
المود : .... ...
الموضوع :


مادري كيف ، فجأة يصيبنا كل أشكال وألوان الارتباك ، الخوف ربما ،
وفجأة نصير ما نفتكر بكل ذلك ..

[مزن هتان]

اليوم : الاثنين
المزاج : عادي

الموضوع:

أحاول أمسك نفسي كثر ما أقدر، خايفه يكون في شي !!
نفسيتي كلش بالحضيض استغفر الله يا رب، مو قادره أسوي حاجه
البارحه قبل لا أرقد يتني مرت أخوي تقيس لي الضغط زين ما انجلطت، احم
مع انه ما فيه ضغط بس وايد كان مرتفع، الله يستر

دعواتكم