دير دياري ~ يوميات

[أنامل قلب]

اليوم : السبت ، وباجر دوام !.
المود : .. .... .. ... ...... !.
الموضوع :


تخيلو اليوم يايه بركب السياره ، ولا اسكارفي يطير عني بالكامل ؟!؟!؟!؟
ااااااخ ويهي قطعوني بالضحك امي واختي ، زين انها طارت من قعدت بالسياره وماكان في أحد ولا جان انفضحت ،
والحمدللـــــه مادري شلون تعلق طرف الاسكارف بيدي وانا قابضه مسكة الباب اوني بسكره ،
تخيلو المنظر جي الاسكارف يلعب فيه الهوى برا السياره ، وزين يوم اني تلاحقت عليه ،
ما أتخيلني أرد البيت ابـ كشتي ، عادي انذبج !"

اممم باجر بالدوام يبيلي أروح أييبلي استكر يديد للسياره ، الأخ الكريم ـ السكيورتي ـ شكله حاب يستثقل علي ،
بالخميس وانا بدخل المواقف وقفني اونه : عندج استكر ، حطيه مره ثانيه جدام ..
بغيت أقوله : احلف انته بس XP

الحينه 99,99% مو حاطين هالاستكر ، يت علي أنا يعني ،
ولا اربيعتي تقولي يا انه يستهبل ويسولج سوالف او انه ماحفظج ،
اقولها كل هذا وما حفظني ، خلوني ساكته !"

حضرتي أساسا مو ماخذه استكر حقي ، بس ماخذه الاستكر الخاص ابـ رفيجتي اللي اساسا متكنسل من السنه اللي طافت ،
قلت بحطه بالسبت ، او حتى اني بسوله طاف وبجرب آخذلي استكر بنفس اليوم ،
إلا أخليهم يعطوني استكر هالمواقف ماروم أسير ابركن ابـ أي جهه ثانيه ، بنتحر ..



وبس هيك ، باقي الكلام مستحه ، ما ادري ليش !.

[أنامل قلب]

اليوم : الأحد ..
المود : .... !.
الموضوع :


شغلات غريبه تصير ..

[مزن هتان]

اليوم : ....
المزاج : عادي

الموضوع : أبوي و أمي

أمي / على كثر نجرتي معاها و معارضة أفكار و رأي بعضنا إلا أنها الوحيده
اللي لو أقعد أحجي لها أحسها تفهمني، تسمع لي حتى أحيان اهي تبدا تحجي لي
عن أشيا تعنيني، بالسنتين اللي فاتوا صارت لي أقرب رفيجه

أبوي / يحس فيني قبل لا أتحجى، يعرف شو اللي أحبه. أي فعل يبادر فيه لي يبجيني
أبوي ما يرضى يزعلني بـ كلمه و اللي يزعل مزن عليه حساب و الا ما يصفيه معه، أبوي ينجرح
من ابسط كلمه ممكن تقطها مزن على عكس ان قالتها وحده من خواتي يمكن ما يهتم
أبوي لو يحاجيني بالتلفون يعرف ان كنت ضايجه و الا العكس، يجيني احساس انِ أحب أبوي
أكثر من أمي مادري ليش "أحيانا" ! عادي أبجي ان تكلم أحد "يمدحه أو يطريه بالخير"
خواتي يغارون أحيانا لما يطلبوا منه شي و يرفض، ردهم يكون لو مزن ما كنت ترفض
"أبوي" لو اقعد أحجي فيه ما راح اخلص

أقول حق أمي لو الجنة تحت أقدام الآباء كنت ضامنه دخولي الجنه

[أنامل قلب]

اليوم : الثلاث ..
المود : .... ...... !.
الموضوع : امممممـــم ،



مرات صدق احسني ياهل ، تظهر مني افعال وكلمات وردود فعل عجيبه ،
بس تدرون شنو أحلى وأريح شي لنا جميعا ، لمن نصير مانهتم باختصار ، ونكون نحن نحن ، دامنا ماتجاوزنا بنظرنا أي خط أحمر ..

كثر ما أقدر بحـــاااول أفض عني كل الأفكار الزايده ، ماني محتاجه لمثل هالضغط حاليا وأبدا ،
أبي أحسني مترتبه من الداخل ، بأفكاري بمشاعري بظنوني وبخواطري وبكل شي ..

ربي يرزقنا الهدايه ، ويثبتنا ، ويديمنا بنيه طيبه ،
والحمدلله رب العالمين ..

[مزن هتان]

اليوم : اليوم
المزاج : احاتي...

الموضوع

أم سيف ما كنا ندري انها حامل بـ توأم، سقطت واحد قبل اسبوعين
لازم ما تتحرك وايد تعبانه، وحامها على ولدها سيف اونه ماصخ صاير !! حليله ما سوى شي
ربِ يثبت حملها و يقويها و يسهل عليها حبيبتي
زين ما صحت و انا اشوفها شلون تتحرك

و مرت خالي صيحتني شوي بس، سألتني كم سؤال عن خالي
صحنا مع بعض أوني بمسك نفسي و بقويها طلغت اخس عنها أنا بعد
الله يرحمه و يغفر له

[أنامل قلب]

اليوم : عساس انه الخميس ..
المود : .. ... ..... .... ..... !.
الموضوع :


مادري ، ما قمت أحب أفهم ، ولا حتى إني أعيش حالة [ عدم الفهم ] ،
ما أدري شوللي أبيه ولا شوللي ما أبيه ، وكأني ماشيه هكذا من غير أي توجيه مني ،
يمكن لأن في تفاصيل كثيره بحياتنا ما يكون لنا حكم التصرف بغير [ رد الفعل ] ،
وحتى بهذي نصير عندها ضبابيين ، مافينا شي واضح ، ولا شي نقدر نستشف منه [ نحن شو نبي !. ] ..

وربي وايد صعبه ..

~

مادري اشـ صار فيني اليوم ، وايد قفطت ، ما صدق ان توجهلي هالسؤال وللمره المادري كم ،
بس هالمره غير جي كاش ، أحسني كنت مثل المينونه اللي تقول كلام ، بس شو قاعده تقول محد يدري !.

تدرون شلون ، أحس دوم جي اللي نحسه بالوقت ما يصير ، واللي مانحسه وننساه بلحظات نلقاه يوصلنا ،
مرات أتمنى إني أظل طول الوقت ماحس ابـ شي ولا أفتكر ابـ شي ،
ومرات أقول ، معقوله أتمنى ذلك !..

~

[ تنهيـــده ] ..

[ذهب]

انامل باجر من تنشين اقري سورة الكهف وبترتاحين هالشيطان يالسلج

[أنامل قلب]

^ تسلمين ذهب ،
وانا اقراه أمس تذكرتج =)

~

اليوم : باجر دوام ..
المود : ..... !.
الموضوع :


ما شي ..!

[مــهــابه]

اليوم :

السّبـت


المود :

تعـبآآآآآآآآنه



الموضوع :


جسـمي يعـّورني ومتـكسر عليّه من آمس ، آبـويه سـآفر آمس وبيرد اليوم ، الجـّو متكهرب نـوعـاً مــا ف البيـت ، وآنـآ وتيمون وبـومبـآ كنـآ متمللين ونبغـي نظهــر وماعـندـآ حد يظهرنـآ =(

قلـنآ لآختيه العوده احم احم آحنـآ خواتج الصغـآر نهون عـليج ؟! تخليني جيه متـمللآت

قـآل : انزين وين بتروحون " طيبه اكثر من اللآزم "


قلـت لهــا : بروح الفسـتفال بشتري غرض وخلآف بروح امرتس مول

قـآلت : بخبر " محمد " اللي هو ولد عّمي

مـآقد رحت ويــاه مـكـآن في حيـآتي ، آآآآول مره من خذ ختيه تقريبـا من 10 سنين الحين

روحنـآ هنـآك آنـآ وتيمون وبـومبـآ ، سوينـآ شوبينغ ، مـآحب امشي روحي ، آحس اني مـآآدري كيف ، لآزم حد آكبر عّني ويـآيه


المهم روحـت كذآ محل ، خذت كذآ غرض لاختيه ام عبدالله ، وختيه ام خليفه ، وتـيمون وبـومبـا مروا ياخذون بيجامات للبيت ، و ....


وعقـب خلصنـآ ، ختيه قـآلت قبل ال 9 مابـآ آشوفكن ، وآحنـآ خلصـنآ ع ال 9 ، قلـت لهم تعـآلو بعزمكم ع سـتآر بوكس ، روحنـا هنـاك ، بـــل شقـآ زحمه ،قلـت لهم نــو ووي تقعدون وعـآد بومبـآ حشره آلا تاخذ

خذنـآ وظهرنـآ ..

عـقب بـومبـآ قـآلت شو رآيكم بدل لآنيلس ف مطعم ولآ نتفرفر ف المول ندخـل سينـما ، قلـت لهـــا نو وي ع الزحمه لي شفتهـــا بــّرع ، آوونه انــتوو امانه عندي مـآشي " طاع من يرمس "

المـهم عـقب قـّررنــا ندخل سكي دبي ، فضـــااااوه وتقزير وقت لآآكثر ،

آكثر وحده غمضتني تيمون ، والله انـهـا ام سلوم ، قـآعده تمشي وماطالعت جدامهـا وفي ياهل يسحب اخوه بقـوه وجـآن يــسحبهــا ويااااهم واطيح ع ويهـــا وتنجلب هههه ، وانــا وبـومبــتا نضحك

غـآمرنـآ وآيد دآخل ، في يـآهل خبلت به من الخـآطر ، حآط دوبه من دوبي كل شويه يفـرني هو واخته ، وآنـآ ماقصرت ههه ، حسيت اني صرت يـاهل امس

رجعـنآ

حصلـت ورقه ع بـآب الغرفه روحي الثـلاجه لـج اهداء


روحت : حصلت حليب بوش من العزبه ، قـلت : ايـوااا

والله ما اشربه


حسيت في نـآس زعلـوا عليّه >< ، بس طّنشــووا وسكــتوو عـّني

اليوم آتشـآور آروح العين الظهر واوصل هنـآك ارقد ، ولآ آروح بليل

اخاف اروح بليل وما اداوم بـآجر

كل آسبوع هالحكـآيه ، آخويه يزعل يوم مـآ آروح ويـآه يتحرآني آنـآ مـآحبه يوديني بس آنا مب جيه والله



خـآرج نطـآق الخدمه :

آتوحشتهم ، ف الويك إند مـآفضى حقهم آنا ادري

بس صدق آتوحشهم واااااااااااااايد

[مزن هتان]

اليوم : الويك اند
المزاج :ماني رايقه

الموضوع

أم سيف كانت عدنا من حزت الغدا، ملتمين حول بعض انا و خواتي ما تحركنا كلش لين 11 و شوي
اليمعه رحت فستيفال اول الصبح خذت جوكلت و بسكويت من بتيل، 2 الظهر وصلنا العين أنا و خواتي
و عيال أختي من دون أبوي و أمي بعد المغرب طلعنا ردينا 10 تعشينا و تمينا قاعدين لين 2
نشينا اول الصبح بنت خالي يتنا 2 طلعنا رادين دبي

صلينا العصر طلعنا خلصنا كم مشوار و ردينا البيت. ولهت على أمي و أبوي و شوق السوده :hugzzz:
سويت نيو لوك و الحين خايفه من أخوي العود و لسانه "مزن شبلاه شعرج مصدي" يعيّبه بس ينكر

طلعت برع دبي + صبغة شعري بس عشان أغير مودي بس للأسف ما تغير شيء
الله المستعان و الحمدلله عـ كل حال

البارحه بنت عمي تسألني متى بتتزوجين مزن =)
شو أرد عليها ؟

[عافك الخاطر]

اليوم: الاربعا
المزاج: تساؤل

- بس لو كان في شي ..
المشكلة انه ما في شي..
هاي هي المشكلة!

- في فن في الحياة اسمه " فن الكلام " ، ناس ممكن تكسب اشخاص،علاقات، مناصب..الخ بس من ورى لسانها ..
للاسف تعلمت/ادركت هالشي متأخر جداً..

- براعتك في الكذب يشوفونها قوة شخصية و ذكاء .. لانه مافي شي يهزك .. عندك سيطرة حتى على كذبك .. للاسف!

[مزن هتان]

اليوم : ...
المزاج : ...

الموضوع : احساس غير، شعور غير، كلش غير

أحساس انِ فعلا ...، ربِ قدم لي الخير في كل خطوه اخطيها
ربِ ابعدني عن كل حرام، ربِ سهل أموري و يسرها
ربِ لا تأخذني من دنياك حتى ترضى عني و يرضى عني والداي
ربِ

[أنامل قلب]

اليوم : الخميس ..
المود : .. ... .. !.
الموضوع :

امم اليوم ، تفاصيل حلوه ، وتفاصيل تضيع ، وتفاصيل غريبه !.

ربي يسلمكم ، اليوم الصبح بركنت وكل شي ويايه بنزل ، لقيت واحد كذلك نزل بنفس الوقت من سيارته الحمرا ،
وعادي ماشين ليـ نوصل المبنى وما كنت ملاحظه عليه كيف هيئته ، يعني عادي شايفه دربي وماشيه ،
بس بما إنه ريال فمشيته اسرع وتجدمني ، ومن مر من جدامي صرت : !.
صدق مادري شلون ماودي أعلق بس والله إنها مب حلوه لمظهر الريال يكون بهذا الشكل ،
بالأول لا إرادي طاحت عيني على يده "كفر البلاك بيري أحمر وساعته حمرا " ،
مادري قلت بكيفه ، يمكن صادف انه مطقم ولو إن الأحمر داش غلط بالسالفه ،
وبعدين تراني من النوع اللي جي بشكل عام عادي امشي وانا اطالع تحت ، جي مادري كيف ،
المهم ماكنت منتبهه وبالي مشغول بشي ثاني ، بس لمن ييت بجتاز الـ شسمه طاحت عيني على نعاله ،
حتى نعاله أحمر "

استغفر الله مش إني أعلق والله مش القصد ، تراني ما أعلق عالهيئة ككل كونها مسألة ذوق ،
بس خاب ظني ابـ معنى الرجولة ، حسيته صدق ما يركب عالريال يكون بمثل هالمنظر ..

وبعد ، صار شي اليوم !.
مادري كيف لمن تظهر منا جذبه ، بس صدق ماكنت ناويه أجذب
لولا إني حسيت بإن أي كلمه ثانيه ممكن تتسبب ابـ مشكله ..
مع إني بالعاده لو ما بغيت أقول شي وانجبرت إني أتكلم ، عادي أعطي رد ابـ صياغة ثانيه
بحيث توحي للشخص بمعنى غير المعنى اللي أعرفه ، وهيك لا أكون جذبت ولا أكون قلت اللي ما أبي أقوله ..

لكن هالمره كنه ما نفع ، اممم أو يمكن من الارتباك !.

~

تدرون كيف ، كل مره أقتنع ابـ هالشي أكثر ، كلما كنا بحالة صمت وبعيد عن أي تفاعل واضح ،
نكون أبعد عن المشاكل والحساسيات ، وأقرب للـ بقعة السليمه ..

خاصه اللي مثلي يتحسسون من التفاصيل ،
أو يمكن الصفه اهني خاصه فيني ..!

[أنامل قلب]

اليوم : الجمعة ..
المود : .. .. !.
الموضوع :


مو من زمان راده من العزا ، كان اليوم اممم لا بأس به والحمدلله ،
بس مادري كيف ، عمي أ الريال العود اللي تكلمت عنه مره بالاعترافات ـ رفيج أبوي ـ
بنته توفت من المرض الكريه ، كانت تتعالج برا وتوفت هناك ، على حد علمي امس يابوها ودفنوها ،
مادري كيف حسيت لمن قالي ابوي إنه كان قاعد يبجي ، والله صدق لو شفتوه بتحسون باللي اقصده ،
وايد وايد وايد إنسان ترتاحوله ، أبد ما قصر مع ابوي وجدا تحبون تقعدون معاه ،
من هالشياب اللي تحسك تبي تاكلهم من وناستك فيهم ..

وبالعزا ونحن قاعدين ، يمرونا الحريم يسلمون كل شوي ، اللي توهم يايين واللي بيروحون ،
بعضهم تحسك ما تبي تفج عنهم ـ يدهم لمن تسلم عليهم ـ وبعضهم يحسسونك انهم غصب يسلمون ،
وايد يهمني أنا كيفية السلام ، استانس وايد عالشخص لمن يضغط ع يدي ، حتى اذكر وحده عدنا بالدوام جي بزياده ،
فقتلها : أستانس لمن أسلم عليج ، يعيبني جي شلون تلمين ايدي / يحليلها ..

ونحن رادين ضيعنا شوي ، يحليله الوالد يبي يجرب درب يديد و"شويه" ضعنا ، بس خطفنا عالمحطه وخذيت للوالده اسكريم من ماكدولاند ،
وخذتلي جبس ولبن من المحطه ، ومن رجعت السياره كلمت رفيجتي ابيها اتي معاي الموعد ، وبالمره اشوفها واقعد معاها شويه ابـ أي مكان ،
وعقبها اتصلت ابـ وحده من زمان مو مكلمتها ، ما بينفعني اقصر ابـ حق رفيجاتي أكانو قراب أم أقل قربا ، يحتاي كل فتره قصيره اكلمهم ،
عالأقل لو نقعد اندز لبعض مسجات سوالف بنحسنا مرتبطين دوم ، غير الصديقات القراب طبعا هذول نتواصل معاهم ونستخف بعد ..

مع إن تقصيرنا صاير واضح لبعض ، بس امممم الحمدلله ، صديقاتي ما في منهن والله ، حتى باستهبالنا ،
وكيف بعد صج سبحان الله تحسون كل وحده لها مكانتها ، عادي مثلا لمن تصادفون شي وتحتاجون تتكلمون ،
مادري كيف على حسب النفسيه سيده تخطر لكم وحده بالذات ..

أحبكم !.
وربي لا يحرمني ..

[أنامل قلب]

اليوم : الأحد ..
المود : .... .... !.
الموضوع :


تدرون لمن تحسون بإن ودكم تكتبون وتكتبون وتكتبون ،
ومن تبدون بالكتابه تحسون بإن كل اللي يظهر مو أهو اللي حابين تقولونه !.

حتى بموضوع الدايري ، أحسني مزحوووومه وأبي أكتب حتى أدق التفاصيل لأنها اللي تعنيني ،
بس لمن أجرب أكتب ألقاني أبتعد لـ شوي من هذا وشوي من ذاك ، وهيك أضيع ولا أرجع !.


دائما ..