دير دياري ~ يوميات

[مــهــابه]

الـيوم :


السـبت ~ ! ..



المزآج :

كـول =p

المـوضوع :اليـوم كـان غـييير ، حلــو ، من بدايته كله آكشن " مال خفيف " ، آمس عيـآل ختيه رقدوا عندي ~ وكنـا طالبين من ماكدونـالز لكن عبوودي مارام يـتريـا وجبته ورقد ع ال8ونص ، 9 يـوم ييـت آوعيه جـان يسويلي مناحه ماطاع يـآكل قلت بـرآيك آرقد بيـوعك شـ آسوي يعـني ؟!

رقّـد وآنـآ رقدت ع السـآعه 1تـقّريبــا ، وع السـآعه 8 الصـبح آسمع عّـبودي يصــارخ : آي بـطني ، الـحقـوني " هالولد يضحك يوم يعـوره شي " مـووول مايتحمل وخّــواف بشكل ، يصــارخ جّنه شي مسـتوي به بسم الله

وجـان انش آنا وخته من الرقــاد وانــا مسطله مب رايمه ابطل عـيوني ومش متفـيجه ابداً ، غسـلت ويهي ، وبدلت وروحت ازقـر امــايه ، زقـرتها واول ماوصلـت
جـان يصيح عـّبودي :مـاماه بطني يعّورني اهي اهي مـاماه فــلانه " اللي هي انا " ماخّلـتني اتعشـى

عـاد الصبـح وموعـيني من رقـادي ، مول ماعكر مزاجي ، قلـت له هيه صّح قفـلت عنك المطبخ انــا =P والثـلاجات بعد ههه " دايماً يدخلـوني بالموضوع شي زين ولا شين "


المـهم

روّح عبـودي عند امايه ورجعت آكمل رقـآدي يلين 12 تقـريبـاً خلاف نشيـت وطبعـاً اليوم السبت يعني ختيه ام خليفه وخـلآفي بيروحون فـ روحت عنده ، آول شي سويـته : جان آوعيه من رقـآده ، فديييته هالولد " احببببببببه وايد انا " ، سـولفـنّـا وضحكنـّا وصيحـته عن خاطري وخلاف شفت ختيه تعبـانه تبغي ترقد امس مسهرنـهـا جان آخذه عـّنها وسبحـته ولبسته ورقدته " 10 دقـايق بس " وجان ارد اوعيه " كيـفي آبغي العب وياه =p " بيروح وبفـتقده ~ ! ..

رّوحـوا عقب الغـدا وتميت آخلص شغل ختيه وع العـصر يـاني اخويه بيروح السوق وبيخلي كتـآكيته عندي " حماده ورشوودي " ماشاء الله عليهن 2 لـكنهم عن 10

شـآفني حمـآده ع اللآب اشتغل جـآن يقول لي : يــــا قّــلبي حطي لالالا " هذي نشيده مالت طيور الجنه "

لـما نشتشهد بنروح الجنه =p ، عـاد من قـال يـا قلبي قلـت له لـه عّرب راضين عـلينـا اليوم

خّبلت به ماطعت احطيـهـآ ، جـآن يقول : نّـن نّـن ماشي " يعني مابطلعج بالسياره " اللي يقـول السويج فـ مخبـاه والسيـاره ع البـاب لوول

عقب قـآل :ككــاو ماشي ، شّنطه مـاشي "دايـماً يشوفني وانا مروحه وشـآله الشنطه مالي فيقول انه مابيخليني اروح ، آخرتهـآ هالكتـكووت بيولـيني آنا =p

ع العشـآ يلسـنآ ف الحـوش نلعـب آنا وتيمون وبـومبـآ ورشودي وحماده طبعـاً محد ف البيـت ، كلـهم طـآلعين آلا آحنـآ ~ !..

بـومبـا وايد حشره وآيد ، وضربهـا يعور وايد ، ضربـتني >< ، ورشوودي يوم تضربني يصرخ بالحيييل ، حسـآس هالولد مايحب حد يتضـآرب جدامه ، آحنا نزاعج يتحرانا نتضـآرب ويصرخ بصوت عـالي " يـاحافظ ع الحسـاسين انــا " ~ !. .

ختيه دقـت قـالت بـاجر بّروح المكـان الفـلاني بـتيودين ولدي ؟ ، قلـت لهــا حبكتهــا عليج انـتي يعني ، هـــااااتيه شو بــعد
تـراني صــايره بيبي ستر العـــايله :@

رغم اني مخططه آروح الصـآلون ، لكن مـاعليه ف المسـتقبل القـريب بـردهــا فيهم =p


وبس !

الحـين آقول لـ تيمـون وبـومبــا يالله رقــاد بـآجر مدآرس مب مسوين لي سـآلفه كـل وحده يـآلسه ع اللآب ومسوين طـآف حّقي

[مزن هتان]

الويك اند
خفيف و هادي

خالاتي نزلوا العمره 4 بيوت خذوا عمره يعني ما طلعنا مكان أنا و خواتي
رحنا يومين الورقا شلينا الدرجات معانا
و البارحه مودي اعتفس و السبب حفل التكريم اونه 6 ونص حفل التكريم و حضرتهم بلشوا 7:40
و مخلصين 9 الا10 يارب أنا واعده بنتي اوديها مردف ستي اتصلت فيني مري عليه بسرعه قلت لها
خلاص بيسكرون الحين جان تقول يعني ما بتمرين عليه اقولها لا ردت عليه و عرفت انها زعلت خلاص باي
سكرت و صحت خواتي اللي معاي يضحكون وصلت البيت كانت راقده =(
ما قول الا هاي هي مواعيد عرب شو نتريا منهم، صج تنرفزت البارحه
أقول ما راح اتطوع بس ماقدر خواتي يقهرون يوم انا صرت مابي هم يبون
و امي و ابوي ما بيطرشونهم بدون حد كبير

ماحب يوم أوعد الصغاريه و أخلف
لازم اراضيها اليوم

صايره كسوله هاليومين مالي خلق اسوق ابد ابد
أبوي مش مقتنع بـ موضوع الدريول، كم بشيل عنهم

[مزن هتان]

المزاج : ...!

الموضوع

مو شي جديد انِ أنسى، توي أذكر انه رفيجتي دقت لي قبل اسبوعين !
وين أودي ويهي منها، وااااخزياه ... اذا أحد اتصل و ما رديت عليه حزتها وايد زين اذا رديت
اتصلت، أقول اللي يبيني اهو يدق لي P=. و اتصل فيني أخوي العود يهزبني من اسبوع طالب مني
اكلم اتصالات عن الواير لس فالبيت ان ارساله مهوب قوي، غسل ايده مني و كلم خالتي =)

البارحه رحنا مردف سيتي أنا و شوق، ماحب أطيح المولات الا اذا عندي شغله
على طول دخلنا cite' des Enfants ساحة ألعاب قدرة و ذكاء انا لعبت معاها، على
أيامنا سندباد الغرير و ليجر النصر =) و لحقنا شوي على ماجيك بلانيت سيتي ديرة
كنت بمر شوقر دادي بس ولد خالي كان هناك و قالي انه اخذ، و العصر ولد خالتي كان جايب
لي كمان كيكة اليزر من lime tree cafe لذيذه، جربوها فـ ما مريت على طول طلعت

يجيني رقم من مصر هـ الكم يوم، البارحه دزوا لي مسج
"ايه مش عوزه تردي، براحتك يا فطفط" ما يناديني فطفط الا ولد خالتي و هو موجود فالامارات
يوم اتصلت طلعت رفيجتي !

ماحب حد يحجي بـ حلم مو زين و خاصه هاي الفتره
و مو شي ان و هم يقولون الحلم افسره, "نظرتي سوداويه هـ اليومين" فـ ماني ناقصه

[مزن هتان]

اليوم : دخلنا باليمعه
المزاج : عادي

الموضوع : بنتحر كتبت رد طويل و انمسح

كنت اقول مادري منين جايبين هـ الافكار، انو كل ما احد توفى قعدوا له سنه
يعني مثالا ماكو اعراس "ما نسوي اعراس و ما نحضر عرس" ماكو حنه، ماكو تلفزيون لـ مدة 40
يوم و مثال خالي قريب توفى الله يرحمه ما اروح ازور زوجته و انا لابسه شي ملون لازم اسود في اسود

مو كأنه هذا اعتراض على مشيئة الله ؟

مو مسألة انو مش حزنانه على خالي، ربي وحده العالم عن اللي بالقلب بس ما يصير نوقف حياتنا
الدنيا بعدها تمشي،,,

برايهم أبوي على هواهم، ان رمسنا بيزعلوا

[أنامل قلب]

اليوم : الاثنين ..
المود : .. .. .... !.
الموضوع : بزي ولله الحمد ..


اليوم كنت مضغـــوووووطه ، ومحد معاي بالقسم كلهم مروحين وانا يحليلي مجابله عمري والشغل ،
وكله ولا لمن ايوني المراجعين واضطر اقولهم يردون باجر ، او ان اتصل بأي فرع لنا عساس الموظفين هناك يفيدون المراجع جان عنده استفسار ،
وكله ولا واحد إيراني ياني وشكله شايل من قبل ـ جنهم محولينه كذا مره ـ وما كان عارف يتكلم لا انجليزي ولا عربي ،
فسألته قبل إذا كان إيراني ، وسيده شفت ملامحه تغيرت واستانس ، على طول حول عالفارسي اونه يقولي بلغتهم تعرفين فارسي ،
ارد عليه بالعربي إني أعرف بس جي شوي شوي عليه لول / اوني بحاول ارد عليه بالعيمي وتميت انقع ،
شوي عربي شوي انجليزي شوي عيمي ، وكله اتمكس بشكل عجيب ، والأخ كل شوي يرد يضحك !.
ماعرفت بالأخير منو اللي قاعد يحاول يفهم ع الثاني ..

عقب وانا اجابل البيانات واشوفلي من ممكن يفيده قعد يسولف وخذ راحته بزياده ،
إلا كم عمرج ، مواطنه ولا ، وين ساكنه ، وزرتي إيران ، وين والده ، متزوجه ، عادي شسمه ولا شسمه =$
وانا ارد على سؤال واطوف سؤال ، اوني يعني استهبل واغير الموضوع او اسو عمري ما فهمت ، والبلوه إن صوته عااااالي ، فضحني !.
حتى من روح عني سيده طلعت لمكتب الادارة حذالنا ، اوني بتفنس ، حسيت جي وكأن الشغل بيطيح من راسي XP

وبالأخير ظهرت وانا مو مخلصه ، مادري إذا بحتاج أداوم باجر من وقت ،
احتمال اقعد من النوم عالساعه خمس ، بحيث عالساعه 6 اكون بالدوام ..

~

خارج النص ، اليوم عدنا خوريش سابزي =)
الحين بسير اتغدا ، يوعانه !.

[عهد الوداع]

انامل

ههههههههههه يومج كااان عجيب صرااااااااحه ,,,

[أنامل قلب]

^ اممممم !.
ودي أقبضج من أذونج =]

~

اليوم : الثلاث أظن ..
المود : ...... .... !.
الموضوع : مثل البارح ، بزي ..

مو قادره أركز ، هالشي وايد وايد شاغل تفكيري ، مادري أساسا هالأمور كلها عاديه ولا شلون ..

لو الموضوع ع طرف واحد جان يمكن ما حسيت ابـ هالأثر ، بس لمن تبدي التفاصيل والمشاعر تتكرر من ولـ كذا طرف ،
مره بقول إن هذي طبيعتي وما يخالف ، مره بقول إن السبب منهم ، مره بقول إني زليت ، بس لمن يستمر ويتكرر من كذا طرف ،
اهني غصب أبدي أحس بإن في شي غلط ..

ما أحب لمن أقعد أفكر وايد ، أنا أساسا من النوع اللي وايد يعيش ابـ هالعالم [ زحمة أفكار النفس وخليط المشاعر ] ،
حتى أحسني بديت أزل أو اممم كيف أييبها الحين ، يعني شلون لمن تعيشون الشي يوميا وتصيرون ما تحسون بتعديكم لـ بعض الأمور بسبب التكرار ،
والأسوأ إني واااايد أخاف بإن مثل هالشي يبدي يأثر فيني ، وانا عندي كله ولا هالمجازفات ، كله ولا إني أفتح هذا الباب تحديدا !.

~

مرات أحسني محتاجه أكلم أحد ، ومرات أجرب فعلا إني أتكلم ،
بس كثر ما أحاول ما أروم أشرح ، وهذا الشي بالذات يحسسني بإني أبد ما عدت حابه أنطق ابـ كلمة ،
وكأنك بالكلام بدل لا توصف المعنى ، تقوم تبتعد أكثر لأنك باختصار [ خانك الوصف !.

[أنامل قلب]

اليوم : الاربعا ..
المود : .... ...... !.
الموضوع : الدوام ..

اممم بصراحه ماعرف شو أكتب ..!
أو بالأحرى ما عرف كيف أكتب ، اللي ابي أكتبه أحسبه ما بيظهر ،
ويايه بجرب أنسى اللي بخاطري اظهره ابـ اي سالفه ثانيه ،
بس هم ما نفع ..

لا حول ولا قوة إلا بالله !.

~

[أنامل قلب]

اليوم : الجمعة ..
المود : .... ... ... !.
الموضوع :

اممم أحس مرات إن علي تعليقات غير شكل ، مادري كيف تظهر مني الكلمة وأتوهق ،
مثلا أمس بالدوام وصلني لغز بالميل وتحمست عليه وبسرعه انحل لأن كان خفيف ،
فـ وانا أحل شكلي تحمست بزياده ، وبعد ما حزرت رقم أول شكلين عرفت إن المسألة بتنحل خلاص ،
وزميلتي كانت يايه وقتها عندي تطالع ، أنامل قلب : امبيـــة فديت قلبــــيييــــــي !.
فلانه متفاجأة : لا والله !.

قفطه ، بس ماعرفت شلون أسترجع الكلمة =#

~

كنت رايحه بغرفة الوالد اليوم الظهر ، وما انتبهت عليه متى رجع ،
واهو شكله حس فيني فـ قام ، حبيبي والله شلون ملامحه صارت غير ، وايد كبران ،
جي رحت عنده ، حبيته ع راسه ، أنامل قلب : حبيبي إنته ؟.

ودي أحفظه فيني ، يتم داخلي ..

ومن شويه كنت عند اختي بالصاله ، لقيته ياي يقولي : بابا عادي اتحطيلي الدوا ع ظهري ..
أنامل قلب : لا مو عادي ^________^ ، من صجك تسأل ؟؟؟؟

بس قلبي يعورني لمن ألمح فيه شغلات ..

~

أمس استانست وارتحت بكلامي مع دموع قلم ،
ومن عقبها نمت إليـ الساعه 10 الصبح ، جنه وايد !.
بس كنت كل شوي أقعد ..

امممم وبس هيك ، ربي يعين ..

[أنامل قلب]

اليوم : باجر دوام !.
المود : ....... !.
الموضوع :

قاعده أسو شي لااااااازم أخلصه ، وبنفس الوقت صعب أخلصه ،
بعدني ما خلصت نصه ولا حتى من قريب ، وجي تعبت !.

الله يعين ، بعد ما كلمت رفيجتي ع أفكر ما أحضر ملجة صديقتي ،
إن يعني بنحتفل فيها عقب نحن بروحنا ..!

~

قالتلي مره صديقه كلمة للحين ترن بذوني ،
[ لا تتوقعين ] ، صدق ..

[مزن هتان]

اليوم : الاحد "أحب هـ اليوم"
المزاج : الحمدلله

الموضوع

التدخين مو زين لـ صحتكم، نحن نباكم ، البارحه خالي طاح "انسداد بالشريان"
ربي يحفظ لنا أبهاتنها، عيالنا، شبابنا و يشفي خالي و يعافيه يا رب

أول الصبح طلعت من الدوام رحت المبنى الرئيسي، افهم شوي
طبيعة عمل الجماعه و شلون توصلنا الـ حالات و ايش ممكن اسوي بدون ما احشرهم
كل شوي بـ اتصال، من شوي وصلني ايميل أجندة اجتماع الاسبوع اللي فات
مادري باللي حصل بما اني ماحضرت الا توني اقرا و انصدم !!
ربي يقدرني و أكون أُهل و كفء و مخلصه بـ عملي ان شاء الله تعالى

سبحان الله، الحمدلله، لا إله إلا الله، الله أكبر

[أنامل قلب]

اليوم : الأحد ..
المود : ... !.
الموضوع :

اليوم الصبح قعدت متأخر شويه ، جي عالساعه 6 ، قعدت أتزهب ع كيفي [ لأن عندي موعد ] ،
بمستشفى دبي بركنت مجابل البوابه الرئيسية وماكنت ادري إن ما يصير لول ، المهم ساعه احاول اظهر سويج السياره ما كان ينفع ،
إلا شوي كنت بكسر السويج وانا اسحب فيه ، والبلوه ان مب رايمه أرد أشغل السياره حتى ،
بالأخير اكتشفت إني حاطه عالـ D ..

المهم من خلصت رحت خذتلي شي من جلوريا ، ومن وصلت السياره اشوف السكيوريتي واقف حذالي ،
جي قفطه ، قالي كيف اني موقفه غلط والخ الخ ، عافانا الله روحي يالله يالله واصله غصب ..

ووو من وصلت الدوام انشغلت إليـ آخر الدوام ، ماحب جي لمن أحس كل شي حولي زحمه ،
يبالي من الخاطر انظم شغلي أكثر ، وكل شوي حد يتصل واحتاج اتصل ابـ مادري منو ،
ولمن خلص الوقت قعدت انطر المراجع يروح عن زميلتي ، مافيني أخليها بروحها يحليلها ..

من وصلت البيت تفاجأت ابـ أخوي ، ما قالولي بيرجع اليوم من السفر ، وكالعاده من نصافحه ينزل راسه ،
ـ اونه يعني بوسيني من راسي ـ ، قتله : نظيف خخخ ، أخوي : صدق ما تستحين ع ويهج / نستهبل ع بعض ..

المهم ، مريت عالوالده ورحت داري اعق اغراضي وسيده ييت عاللاب افتحه
وكملت دربي للمطبخ اسلم على روز واشرب الكركم العجيب ـ غصب ـ
وتالي رجعت جابلت اللاب ، والحين أنا اهني أحط هالاضافة !.

وبس هيك حاليا ..

[أنامل قلب]

السلام عليكم ..


اليوم : الاثنين اظن !.
المود : .. ... ...... !.
الموضوع : المراجعين ..


مع إن شغلي ما يخصه بالمراجعين عالأغلب ، بس بعد التغيير حطوني بالواجهة يعني معظمهم يمرون علي قبل ،
البايخ بالموضوع إني للحين ماعندي المام كامل بالشغل ، يعني لمن انسئل عن الشي الفلاني ولا العلاني
ما أكون متأكده 100% إن المراجع المفروض يروح عند فلانه ولا علان ..

كنت قاعده عادي مجابله كمبيوتري اللي احسه ولله الحمد يغطي شوي عن اللي رايح واللي راد بمكتب الاداره ،
بس لاحظت إن في واحد واقف متردد مايعرف وين يدخل ، فشفته فجأة ياني وكأن نظرتي له شجعته ، يقولي بلهجته المصريه :
كنت ناوي اروح مكتب الاداره قبل ، بس قلت على هالابتسامه بييكم قبل ..
ما كنت حاسه إني مبتسمه لول ، مرات جي تظهر منا شغلات عفويا ، بس وايد كان حبوب ،
جي نفس اللي نشوفهم مرات بالمسلسلات المصريه ، فيه صحه ما شاء الله ، وفيه شيب ~ *

واليوم بعد وانا رايحه لعند مسؤولتي أشوف موضوع عندنا ، لقيت مراجع وايد إيينا ـ هندي ـ معاها ، جي ريال عود وفيه رزانه ،
راكز وكلامه كله هادي ويقعد يعطينا من هالنصايح الغير شكل ، واليوم بعد استلموني بخصوص اكمال دراسة الجامعة ..

كلامه حلو ، ومسؤولتي شكلها ما صدقت ، اونه : ومن قالك نحن بنهدها غصب بنخليها تكمل ،
بس خلها تكمل سنه عدنا وعقب بتصرف معاها / !.

~

وفي مراجعين ثقيلييييــــن دم ، مااااحب اللي يظهر قلة احترام عافانا الله ، شخصيته تظهر ركيكه جدا ، ولا تسئلوني من وين يبت هالمصطلح ؟.
خاصه لمن اسحب مكالمات مسؤولتي ويكون المراجع حفظني ، مثل وحده الله يهداها ، لا واسمها على اسمي !.
بغيت أعطيها محاضره مره ، كنت بعدني اتكلم اشوفها سدت التيلفون ابـ ويهي !.
بغيت أقولها حمدي ربج غيرج يتمنى XP ، اسولف طبعا XP ، بس صدق كنت بعطيها ملاحظه ،
اوك قلنا امشي واساير وأحب أتعامل ابـ لين ، بس وقت ما بصادف فعل قبيح عادي يكون لي رد ـ بنظرهم ـ أقبح ،
لأن اللي عليهم هالحركات ما ظني بيحبون أحد يوجهم ولا يرد عليهم بشكل يحسسهم بإنهم سوو شي بايخ !.

حتى مره أذكر إن أحدهم بعثلي رسالة مول ما عيبني فيه الاسلوب ، فرديت عليه برسميه مبالغ فيها
وبالأخير كتبت [ وبالأخير يرجى استخدام اسلوب أرتب في كتابة النص ] ، بس حسيت وكأن زميلتي وقتها تفاجأت ،
يعني ما توقعتي ممكن استخدم اسلوب شديد شويه ، صج اني تندمت شوي مع إني أبدا ما استخدمت اسلوب مسيء ،
بس قلت اممم لأن الطرف الآخر اكبر بوايد ، اساسا بقسمنا حضرتي أصغر موظفه ، وبالاداره اظني من المجموعة الأصغر إن ماكنت الأصغر =$
فـ مادري كيف اقوله استخدم اسلوب ارتب =# ، بس وقتها صدق كنت ضايجه ، حتى اذكر اني دمعت ولولا القفطه جان صحت !.

احم ، مادري شو شايفيني بالضبط ، هل لازم اكون دفشه ولا كيف !.

~

وبعد ، أحس وايدييـــــــن ما يميزون بين المجامله المطلوبه والمجامله البايخه ،
إني اعامل شخص ابـ أدب واحترام ولين شي ، وإني أزيد بالكلام لـ شي ماعرفه أساسا شي ثاني ..

+ بعيد عن اللي فوق ، أحس بعضهم يظهرون تقدير مبالغ فيه بالتعامل ،
ماحب هالأسلوب أحسه مادري شلون !.

[مزن هتان]

اليوم : الخميس
المزاج : حلو الحمدلله

الموضوع

هـ اليوم أحب اقعد فيه مع أبوي و أمي و خواتي و عيال أختي و أخواني
بس اليوم بيصير شي ان شاء الله =) بتكون عدنا لمة أهلنا، ربي يتمم علينا فرحتنا يا رب
و ما يصير شي يكدر خواطرنا "اللهم آمين".

امممم يا رب على كثر استمتاعي بـ عملي الحالي، الا انه من يومين
أحس كـ إنِ بـ ساحة جهاد، "ربِ وفقني لما تحبه و ترضاه، ربِ سخر اللي الأرض و ما عليها"

[أنامل قلب]

اليوم : أمس إليـ اليوم ..
المود : هالخانه بالذات ما أحب أعلق فيها بغير الـ ن ق ا ط على عدد حروف الكلمات !.
الموضوع :


أمس بالدوام ، لا جديد يذكر ، ماعدا شغله اممم مادري ماحب أطريها اهني أحسها مادري شلون !.
في أشيا نكون محتاجين نفضفض عنها ، بس يمكن لأن حتى نحن ماندري عنها شنهي بالضبط ، ولا ليش تحسسنا بكل هذا ..

المهم ، الاهل كانو بيوم عدنا المسا ، ودايما يطيحون فيني جان بغو شي من برا ،
وأمس صدق حسيت إني يبالي إعادة نظر ابـ سواقتي ، صدق أحس عادي تكون خاتمتي حادث مروري بسم الله عليه ،
لا وبعد ما رجعت البيت ، طبعا كلهم وصلو ما عداي ، لقيتهم يقولولي بعد ردي اطلعي ييبي مادري شو ،
ع كيفيهم هو ، ما طعت اروح جان يظهر الوالد عني ، ماقدرت الصراحه ارد اظهر غير اني استحي عقب ادخل اسلم ،
ومع اني وااااايد احب القعده معاهم ، بس مادري شو استوابي امس معظم الوقت مجابله الصغاريه ،
هو يمكن عشان وحده فيهم ـ باسمي ـ كل ما تشوفني إلا تلح علي : يالله أنامل قلب تعالي لعبي ، يالله أنامل قلب بتي معانا ..
بس صدق صدق صدق لاحظت الفرق الشــــااااسع بين البنات والاصبيان ، يالله شي ما ينوصف ،
دفاشتهم غيييــــــر ، صدف مب طبيعيين الأولاد ، من صغرهم الدفاشه تسري في عروقهم !.

هذا يفلع الثاني بمادري شو ، وصوتهم مافي أعلى وأغلظ منه ، وكأن يظهرون الحروف من خاااطر خاطرهم ،
أما البنات فديت قلوبهن والله ، كانو بس ثنتين + انا واختي ، تقولون ملايكه بين شياطين استغفر الله يعني

حتى لمن نزاعج عليهم يكون صوتنا أهدأ عنهم ، عافانا الله ،
بس شـــووو لعبنا لعب مخبل ، بالأول قعدت عندهم لمن كانو يلعبون اونو ـ صحن ـ
جي نفرش الاونو بالجلب على شكل دويره ، ونقعد نسحب بالدور بحيث كل واحد ياخذ الاشكال المتشابهه ،
واذا شكل من الاشكال طلع عند حد كذلك نشل اوراقه ، واذا الشخص نفسه ما انتبه وحط الاورقه بالنص وفي منها شبه ،
نقوم نحن ونشلها عنه بسرعه ، وجي يعني هذا اذا انفهم شي !.

المهم من الحماس الزايد ، وابـ بداية اللعبه بعدهم الاولاد مب لاقطينها عدل ،
فواحد فيهم ظهرله رقم ثمانيه وفي منها شبه بالنص لكنه ما انتبه ، ومن حطها عالأرض كلنا فجأة هجمنا بنفس الوقت
وكلنا ضربنا ابـ بعض ، وبالأخير محد خذها ، وحمود عصب جان يفر الاوراق كلها اونه : ايه انتو شو استوى ..
ولا احمداني ياي يتحرطم عاللي باسمي ، شو ها بعد اللعبه عدنا بالإمارات مب جي ، روحي الكويت العبي ع كيفج !! ، صدق انه دب !.
حتى اختياراتهم للألعاب غير شكل ، الاولاد يعني ..

+ متخيليني ألعب معاهم شرطه حرامي ، واقعد اراكض ، كنت ظاهره الحوش ابي اكلم احد بالفون ولا اشوفهم برا ،
ونفس الحاله البنوته إلا اونه أنامل قلب لعبي ، جان احط فوني ع صوب ودخلت معاهم اللعبه ،
بس ما لحقت اصير حراميه إلا وحولوني لشرطيه ـ اختي الدبه مسكتني ـ
ومن شافتني اللي باسمي إني انمسكت اونه لا خلاص غيرو اللعبه ، خلنا نلعب ثلج ماي ،
اونه هاللعبه نروم نفرج فيها عن بعض ، واتي تقولي انهم عقب بيفرجون عني ..

ووو بالأخير كنا قاعدين نلعوز بعض ابـ الغاز وسوالف ،
اونه منو يقدر يقول بسرعه ويعيدها عشر مرات : شمخت خشمي خمس شمخات !.
ولا منو يقدر يقول : جيس طرشي ابـ إيد شرطي ، جيس طرشي ابـ ايد شرطي ...! > هاي اسهل
ولا هذي : حوش خالي خليل خوش حوش / !.

آاااخ أحس جي ها خلاص هلكنا أمس ..
واليوم ! ، وااايد حلمت ابـ أشيا ، ما أحب لمن أنام وأحلم ابـ شغلات ما تنفهم وكل شي يكون داش ابـ بعضه ..

ودي أختار أحلامي بالمنام ..