دير دياري ~ يوميات

[رمــش الغـــلا]

...وايد بزي هالفترة ><

ضغط الدوااام وغير عن التجهيزات والشوبينق وايد واااااااااايد اشيا ..
بس الحمدلله قادرة ارتب وقتي ..واستغل الويكند عدل =)


اليوم .. راجعة من شوبينق من دبي مول ..~
طبعا دبي مول له زيارة اسبوعية بس عسب الف عـ كل المحلات اللي اباها ..
واليوم تقريبـآ خلصت بس بتكون لي زيارة عقب فترة مب الحين

وراي شغل للمدرسة وااااايد ..
وان شاء الله اقدر اخلصه =)

دعوآتكم ..~

[عافك الخاطر]

كلنا نحس بنفس الشي !!
بس ان شاء الله الصيف الياي بيتغير شي
إن شاء الله بس

الله يسمع منك :)

[بنت الدلع]

(1): انتي *** صح؟

(2): لا بنت خالج

(1): هههه يالسباله، لان وحده ثانيه عندي بعد بنفس النك نيم

(2): انا **** سبشل

(1): ههههه خقاااقه بنت خالي بعد..
تعاااالي وين اخوج بغيته ضروري

(2): مادري بعدني عالفراش ماشفت العالم الخارجي

[مزن هتان]

اليوم : الأحد
المزاج : .....!

الموضوع
أحس اني مدوخه و الا مادري شلون اممم كأنه حد طاقني عـ راسي و مصدعه
جسمي متكسر ما روم امشي

ربي يصبرها و يثبتها و يهون عليها و يعوضها خير "يا رب"

[مزن هتان]

الاثنين
بعدني مصدعه

سألتني موظفه من شوي سؤال، تتحراني بستحي أقول"احم"
الدوام اليوم فاضي ماكو حد، وايد أشيا في بالي ماحب يوم اقعد أفكر
احساس غريب يلفني اليوم مش عارفه افسره !

الحمدلله ربي ما ياخذ من الانسان شي الا و يعطيه شي آخر
ربي يعوضنا بكل خير ان شاء الله

أمطار اغلقت موضوع اعترافات و عهوده كمان، وين نعترف الحين هممممم ؟!
ما شاء الله المنتدى هـ اليومين ردت فيه الحياه، تراني قلت ما شاء الله
الاداريين الجدد ما شاء الله فيهم الخير بعد

[مــهــابه]

.


.



الموضوع :



آنّ كـآن تقدر تعيش العمر
|[ من دوني
حط عينك بـَ عيني وقول ( واللـه‘

[أنامل قلب]

اليوم : الاثنين ..
المود : ..... .... ... ...... !.
الموضوع :

بتعقد ..

اتكلم عن كذا شغله وكذا موضوع ، ومن اوصل لـ هالطاري أحسني خلاص ماني قادره اتكلم ،
ويصير من عقبها كل الكلام اللي انقال { ما لي حاجه فيه / وأرد امسح اللي انكتب ..

~

اللهم اهدني إلى سواء السبيل ،
يالله ربي ، اهدني إلى سواء السبيل ،
يالله ، أسألك قلبا سليما يــــارب ..


,،

[أنامل قلب]

اليوم : الثلاث ..
المود : .. .. ... .... !.
الموضوع :


مرات أحس عادي ازل واقول وين أشتغل !.
هو عادي عندي بس تفاديا للاحراجات ، سبحان الله مافيني أحد من أهل الواحات يكون معاي بالشغل ..

امممم في شي موهقني وايد ، 1) لمن يقولولي قولي شي وهالشي "جذبه" ..
صج إن الجذبه تكون يدوب تأثر ، بالعكس ممكن يكونون صدق محتاجين لمثل هالكلام ،
بس الاعتياد عليه ، وعدم الاطمئنان للاحتمالات الوارده شي المفروض يردعنا ..
مثلا أتخيل لو صارت إني أقول لـ فلانه إن علانه عندها مراجع ، وفجأة طبت علينا هالفلانه !.
وقتها مو بس إهي اللي بتخيس ، بخيس معاها ..

وبعدين ، احيانا نروم انرقعها ابـ شغلات من غير لا نجذب ، يعني مثلا تكون العلانه فعلا مشغوله بأي شي كان ،
حتى لو قاعده لحالها فـ هي مشغوله ابـ حالها !. / اهني أروم أقول للفلانه إن علانة مشغوله وخلاص ، ليش التفاصيل الزايده ..

+ أكره ما عندي الجذب ، بس هالفتره كله أقعد أساير بهالجذبات البيضا ع رايهم ،
لكنها تظل جذبات ، أكيد ماحبني أنربط فيها ..

2) في اجراءات أخلصها للموظفين ، بس توهقني لان الاجراء بدايته فقط عندي ، ويكملونه عقب المعنيين كلن حسب موضوعه ،
بس شو يصير ، اجراءاتهم مثلا تتأخر ، يسهون ، او حتى يكون في خطأ باجرائي وينسون يردون علي بالاجراء اللازم !.
وبعدين ، تعالي يا أنامل قلب ردي على استفسارات الموظفين لمن يراجعونج حول مواضيعهم ، شو صار ، شو استوى ،
وع كل مره بتصل باللي يكملون من عقبي الاجراء ، ومادري كيف ، صدق افتشل لمن اضطر كل شوي ادق لهم خاصه لمن يتكرر اتصالي لنفس الشخص ،
ما يجاملوني حتى بإن مثلا ماعليج اختي بشوفلج الموضوع ولا ولا ، مع إنها ما تعتبر مجامله ، هذا شغلهم أصلا !.
مع إن الشغله يدوب بتكلفهم دقايق ، وان زادت ما بينشغلون فيها أكثر عن يوم ، أريح لهم بوايد من صدعة إني مثلا أقعد كل يومين أدقلهم ولا اضطر إني اسيرلهم ..

امممم مرات أحسني أسحب الاجراء منهم اسحاب "
وشكله الاجراء أصلا ما قام يخلص إلا لمن نسيرلهم ليـ المكتب ،
تخيلو القفطه ، في موظف ـ آسيوي ـ عدنا ياني يستفسر ولمن خليته يكلم بالتلفون الموظف المسؤول قال ما يصير وجي ،
وبعدها بفتره يانا موظف ثاني لنفس الاجراء ومن دزيتله المعامله قبلوها عادي ،
فاليوم ما شاء الله يايينا اثنين زياده ، اونه شو فلان قبلتو اجراءه وليش نحن والخ الخ ،
ولمن عطيته بالأخير الحل الأسلم وهو إن يروح بنفسه للموظف "لأني ماكنت شايفه أي خطأ ابـ أوراقه" ،
رجعلي عقبها بشوي يقولي اونه هيه شاف الاوراق هالمره وقال اوك بدزهم لك لول / وكنه الموضوع قام يصير بالمزاج ^^"

~

الله يكون بعوني ..

[مزن هتان]

الاربعا
ماني رايقه

ماقدر امسك نفسي أكثر من هيك، ياربي ن رمست بطينها و بخيسها بعد !!
ماحب اللي يحارشون من بعيد لـ بعيد "فيّه ضحكه عـ عمري اوني بديت أعصب"

الله المستعان

[مزن هتان]

الخميس
الحمدلله مزاجي تمام

ناشه اليوم على راحتي، رحت الكليه وديت لـ أختي لابها مدري شلون ناسيته ؟!!
قولي أوراق ملازم كتب بس لاب توب ؟
داومت 9 و نص و أنا اصعد الدري شفت مسؤولي سلم و طلع، وصلت القسم ما فيه الا 2 =)

البارحه صار شي ما عيبني في بيت يدي حتى أختي و نسيبي ما عيبهم "استغفر الله"
كلمت أمي من شوي قلت لها اليوم ماني رايحه لأنِ ان رحت يمكن أقلل من أدبِ و ماني محشمه
لا كبير و لا صغير، قالت لي خلاص حتى أنا ما بروح "أحسن لأنِ صج ماني ناقصه اللي فيني مكفيني"

افكر أروح لـ رفيجتي، زعلت منها الصبح بسير أرفع ضغطها شوي عقب برضى عنها
كشخه والله يوم تعصب هي اللي لازم تزعل بس أنا خليت عمري زعلانه
و تقولي تومي لا تزعلين حبيبتي والله

[أنامل قلب]

اليوم : الخميس وانا آخر من يعلم !.
المود : .... .. .. ..... !.
الموزوع :

اممم اليوم كان طريف نوعا ما ، رجعت من الدوام ، وصلت البيت ، درت شوي ، ومن ييت برتب اغراضي تذكرت إني ناسية محفظتي ع مكتبي بالدوام ؟!؟!
آااااخ راسي افتر ، ماتخيل إني برجع ابـ هالدرب الطويل مره ثانيه للدوام ، يا إلهي ، بس من غير لا أفكر وايد ، سيده ركبت السياره وتوكلت ،
لو بقعد أفكر بطنش وبخليها ليوم الأحد وانا مداومه بالمره ، بس مافيني أتوهق ومحتاجه البطايق ..

من وصلت اشوف بعدهم بعضهم للحين بالدوام ، السكيورتي يأشرلي ان يعني وين موقفه لول ، اشرت له اني ظاهره ،
مع ان الحمدلله محد يقولي شي !.

من رجعت البيت سيده على داري ، لقيت اختي يحليلها نايمه ، سرت حبيتها عراسها جان تقوم وتمت اتهمهم ، وكأنها تقولي حبيبتي بس وخري عني ،
ما صدقت إني رجعت البيت ، صليت العصر ، ومالحقت أقعد إلا والأفكار الرمادية بدت تشكل غيومها على قلبي ..

~

ماعرف شو أقول ، وايد أحاول أغير هالشي فيني بس ماقدرت للحين ، ماحب جي لمن أكون العنصر الخجول دائما ،
مثل أمس لمن عزمتنا وحده بالدوام (يايبتلنا غدا) ، أولا رحتلهم غصب ، ومن رحت جي ساااكته ولا يخصني ، وكلحد يقطعني ،
لأني أساسا قليل ما أروح وارجع عالأقسام ولا اقعد اسولف مع موظفات الأقسام الثانيه إلا جان في شي يتعلق بالشغل اسيرلهم ،
اللهم كذا وحده أحب اسير اسلم عليهم وجي ، وحتى وانا أبين إني اونه عاديه بس اظلني منحرجه وأحس إن أفعالي وكلامي مقيد ،
ما تظهر ردود فعلي بشكل مريح بالنسبالي ..

تمو يومها اونه : ها اليوم انامل قلب معانا أول مره ، وينج ما تنشافين ، يحليلها مستحيه ، ها يالحلوه شو تبين ،
مادري كيف جي يمكن لأني اصغرهم يتعاملون معاي ابـ هالشكل ، بس والله العظيم ماتصدقون اشكثر أحاول اني اتغير ،
يومها كنت قاعده مع ثنتين من اللي بالعاده اسلم عليهم يوميا ـ كنا قاعدين على أرض فارشينها ـ ، ولا اشوف اللي صوبي
تقول لوحده واقفه حذالي : ها فلانه صدق شيطانه ، ولمن رفعت راسي ابشوف اللي واقفه لقيتها قابضه فونها تصورني =$
اسألهم شو تسوي ، ماكنت مستوعبه ، يقولولي تصورج =/

ولمن شفت اللي معاي بالقسم بغت تروح قمت معاها "ما صدقت" ، بس تميت مرتبكه بس بسبة إني مو قادره أقولهم كلمة حلوه
ولا حتى قلت للي عزمتنا تسلمين ولا مدحت ابـ أكلها " مع انه صدق عيبني اللي سوته" ، بس جي قتلهم كمن كلمة عالسريع وما صدقت إني ظهرت ..

صج اني من النوع اللي يبالي شوي إليـ آخذ عاللي معاي ، بس بعد مو لهالدرجة ، أحس المفروض يعني هالشغلات تظهر تلقائي ،
ما يباله إني استحي من مثل هالأشيا ، والأسوأ لمن هالأشيا تتسبب ابـ شغلات ثانيه أسوأ ، نفس اللي يبي يرقع العله اللي فيه ويقوم يزيد الطين بله ..!

خاصه لمن أكون بين مجموعة ، وقتها انسوني ..

~




وايد تكلمت !.

[مزن هتان]

اليوم : السبت 13-مارس "البارحه"
المزاج : احم ...

الموضوع
كنا في دبي مول العصر "كأنه مسوين مسيره"، خلق الله مستغربين من العدد =)
طلعنا المغرب، ردينا البيت خذنا خواتي الثنيتن طلعنا نتعشا
البارحه فالقروب عـ البيبي خالاتي يرمسون مرت خالي راحت بيت أهلها
يوم يت الحزه انه بتروح امها طلعت برع تترياها و هي مو طايعه تطلع ما تبي تروح
كلهم صاحوا، و هي خايفه انه خالاتي يقولوا لها قعدي عند اهلج و انه خلاص ما عاد نبي نشوفها

ما رحت أشوفها مع انها أكدت انه كل حد يجي عشان تسلم علينا
أقرب وحده من حريم خوالي لي بما انها بعمري، بنروح لها باجر بإذن الله تعالى

مرهقه، ناشه اليوم من 3 و نص
"اللي يبينا عيّت النفس تبغيه
و اللي نبيه عيا البخت لا يجيبه"
مزاجي مو ذاك الزود هـ اليومين بس أقص على عمري

[قصايد غلا]

اليوم : الاثنين

المود : ما ينوصف من حلاااااته الحمدلله

الموضوع : قبل 4 ساعات ردّيت من بيت الله



استوت أشيااااااء وااااااايد ونّستني و ضحّكتني بخباااال
و استااانست وااايد لأنه بنات خالي ويانا

من 11_3 من أول اللحظات في المطار و نحن نضحــــك الحمدلله .. و استوت لنا مواااااااقف تضحّحححححك


و اليوم عند الكعبة حليليييي مستانسة سايرة أشم .. و من عقب ما شمّيت و فرحت
ياني واحد أندونيسي مادري ماليزي داسني دووووســـة بكعب ريله
خلااّ الدموووع تنزل أربع أربع
و أبويه حليله هو و أميه ودّوني و غسّلوا ريولي بـ ماي بارد و ليين أحين تعوّرني و مزرقّــة

على قولة أميه "دوسة خيييل هاااي" =D




و أحللللللى شي يوم وصلنا المطار استقبلنا أخويه و يايبين بيبي موّاااازي حبيبتييي "بنت خالي الصغيرة" و لابسة تي شيرت مكتوب عليه "موزة تقول لكم : تقبل الله طاعتكم " فديييييييييتهاااااا يا ربّــي حبّيييييت شكلها
و يوم شافتني تمّت تناااقزززز


الحمدلله الحمدلله مرتاااحـــة نفسيًـــا

[مزن هتان]

تقبل الله عمرتكم قصايد
ادعوا لي، ربِ يكتب لي عمره قريبه


اليوم : الثلاثا "البارحه"
المزاج : تمام

الموضوع
البارحه رحت فرع بر دبي بما انه عدنا اجتماع، شفت سيارة عمي وقفت مره
عند المبنى نزل يشخط البطاقه لما طلع كنت واصله شافني هاي اول مره من داومت
اشوفه داومت شهرين معاه في نفس المبنى كلش ما شفته. مستغرب اونه شو
تسوين هني احيدج في ديره ههههههه.
بعد ما خلصت الاجتماع تخبرني ربيعتي تقولي مزن لما طلعتي اجازه عشان العزا
ياينها مسوؤل التدريب يسألها اللي يداوم هني شو يصير لـ مزن =)

البارحه سوينا زياره حق مرت خالي =)

[أنامل قلب]

السلام عليكم ..

اليوم : الاربعاء ..
المود : .... ... .... !.
الموضوع :

طول ما انا نايمه أحلم ابـ أشيا غريبه ، ولا بالحلم قاعده احك يدي ، وكل شوي أقوم "وانا نص نايمه" أحج يدي ـ أصابعي ـ
بس أتحراني بعدني أحلم ^^" ، وعالساعه 5 ونص قمت شفت يدي حممممرا ، متحسسه من الأكل الحار ،
ما أتوب الصراحه ، صج إن مو دوم تظهرلي هالحساسيه ، بس المفروض أحاسب ..

وصلت الدوام اليوم من وقت ، بسرعه الصبح لحقت أطبع الرسايل / وعقب تذكرت إني ما قريت الاذكار ،
سويتلي كوفي بسرعه وعقب قعدت أجابل فايل الأذكار شويه ، وتالي دقت علي رفيجتي المكتب تسألني شو بتريق !.
أنامل قلب : مادري اللي تحبونه / صدق ماعرف ما يفرق عندي / لا لا مابي زعتر / نووو مابي لبنة وزعتر / أقول خذيلي جبن ، الخ ..

وبعدها بنص ساعة تقريبا استأذنت ورحت لهم فوق نتريق ، اهمه بالدور السابع ، بس لمن ييت برجع للدور الثاني ، علق اللفت علي !.
ياربي شلون اخترعت ، وانا على طول يديني يرجفون بشكل مو طبيعي من ارتبك ، وقلبي أحسه خلاص بيسيح ،
جي فجأة وكأن ضرب ابـ شي مع إن ما لحق يتحرك ، من السابع للـ سادس وعلق ..

سيده رديت اتصلت ابـ رفيجتي ، زين إني كنت شاله فوني معاي ، اقولها وانا ماسكة عمري عن اصيح : فلاااانه لحقي علي علق فيني اللفت ،
واهي حضرتها ما شاء الله قاعده تضحك من الخاطر ، وانا باللفت أقعد اضغط على كل الأرقام واشوف الارقام تضوي ،
مع إن اللفت أساسا نازل المفروض ما يرد يضوي بالأرقام اللي فوق ، وتم جي يتحرك تحسونه لاهو قادر يرتفع ولاهو قادر ينزل ولا البيبان طايعه تتبطل ،
بس الحمدلله ما طول ورد رجعني لـ فوق ، ومن اتبطل قعدت اتحرطم على رفيجتي ، تتحسس دقات قلبي وتشوف يديني واهي تضحك ،
إلا كانت بطيح غشيانه من الضحك مادري شو صارلها ،كأن وقتها ، اقولها : لا وبعد بروحي كنت بموت / تقولي : أتخيل لو في معاج أحد ههههههههه > جي تضحك وتكملها تعليقات ..

والله بغيت انجلط منها ، والسكيورتي مرنا يجيك عاللفت ، بس طبعا حرمت ، نزلت بالدري ليـ الطابق الثاني ، أصلا ماعندي مشكلة ولله الحمد باستخدام السلم ،
حتى مرات اصعدلها من الثاني للـ سابع بالدري ، فالنزله عندي شي هين لولا إني كنت مستعيله ..

اممم بالدوام اليوم بدر شي مني ما حبيته ، وايد متلومه والله بس ماعرف كيف جي بديت اتكلم مع إني ماحب اللي جي ،
ماعرف كيف أييبها ، بس في عدنا عامل أغذية موووول ما أحب اتعامل معاه ، واليوم مادري شلون كنا نتكلم عن واحد ثاني نمدح فيه ،
جي صح ان ما يفهم كل شي بس وااايد يستحي وتحسونه ما يرد طلب ، فـ تلقائي ظهرت مني كلمة : مو مثل الثاني !.
وعقب بدل لا اتلوم وكأني ما صدقت أفج الكلام ، مادري شلون جي وااايد واااااايد ما أحب أتعامل معاه ، جي أحس في عليه حركات ،
بس عقب ما تكلمت وخلصت ، تميت أفكر !. اممم اتمنيت لو أقدر أسحب الكلام ، الله يهديني ..

~

عقب الدوام مريت على اختي بدوامها ، وعقب رحنا الخياط أخليهم يقصرولي كذا ثوب ،
وتالي رحنا المستشفى نزور يمه ـ خالة أمي ـ يحليلها والله شكلها وااااايد غمضني واهي نايمة ، مادري كيف حال الإنسان يتغير ،
وايد وايد واااايد حبوبه وسوالفها حلوه ، متعوده عليها كله تتكلم وسوالف وجي ، بس من فتره اتعبت يتها جلطه خفيفه ،
وبعدها كله يلقونها نايمة وحالتها غريبه ، عقب عرفو انها ماقامت تشوف ، والحين يتها جلطة ثانيه ولازالت بالعناية ما قامت للحين ..

بالأول دخلنا بغرفة الانتظار ، خالاتي كانو قاعدين ، حتى خالتي ن يت من الكويت ، والحمدلله يسولفون وجي عادي ،
وقطعوني بعد ، خالتي من الكويت نستني شكلها ، تقولي انتي اصغرهم صح ، اقولها لا قبل الاخيره ، اونه وايد متغيره والخ الخ ،
وعقبها بشوي رحنا عند يمه نشوفها ، من زمـــااان ما شفتها ، وايد وايد مقصره بحق هلي ، صج اني قليل ما أظهر ومتعودين علي ،
بس ما ينفع أقول متعوده ، الغلط يظل غلط ، وماندري بالحال باجر كيف يصير ..

~

اممم بتينا خالو ن باجر باذن الله ، احتمال امر عليها بعد الدوام ، او يمرها أبوي إذا كان هاك الصوب مع الوالده ،
بترد تسافر بالجمعة ، اممم وانا بخاطري أسافر ، مادري شوللي مستويبي هالفتره كله أفكر بالسفر ..

اللي عدنا ما يشجعون !...