دير دياري ~ يوميات

[قصايد غلا]

مجموعة : الله يسلمك من كــل شــر
مب مقصرين في النصايح .. ما نقدر نهزبه أحينه نفسيته تعباااااااانة


مب زين مجموعـة .. لااااازم تنهزب و ياخذون السويج عنك بعد =p عشان تسير الكلية مشي ولا بـ تكسي لووول


أخويه حليله كل ما اييه حد يدق بيده على الموتر و يقول له للبيع ؟
لااااااااززززم يستوي به شي

الشباب مشكلـــــــة وااايد يعيبهم يستعرضون و يطلعون خبالهم في السيايير و نحن نبتلش و نحاتي و القهررر يوم حد يكلمهم يقولون نحن مب يهاااااااااال


الله يهدي أخويه و يهدي كل الشباااااب اللي مب مدركين خطورة السرعة

[أنامل قلب]

اليوم : الاثنين ..
المود : .... ... ...... !.
الموضوع :


مستانسه ع سوالفي وربيعتي اللي اكتشفت بالصدفه انها معاي بالدوام ، الحمدلله رب العالمين ،
والحمدلله على كل شي ، كثر ما إني مرتاحه ، وكثر ما إني العكس ..

مواضيعنا كانت غريبه اليوم نوعا ما ، خاصه آخر سالفه ، صدق هالشي وايد يربكني ، ماحب حتى إني أفكر فيه ،
بس وايد ضحكنا عقب ونحن نطري المواقف ، وهيك ، مره إتي عندي ومره أروح عندها ، أول يومين كلش ماشي شغل ..

اممم تراني مو من النوع اللي آخذ واعطي مع غيري وايد ، يمكن لأني استحي ، وماحب آخذ راحتي أساسا ولا هو بيدي ،
بس الحمدلله ما حس إنهم ماخذين عني فكره غلط نفس ما يصيرلي أحيانا ، إن يتحروني جي مغروره ومال دلع =$
مع اني أساسا ماقمت أهتم الصراحه ، لو بقعد أدير بالي ع كل ظن وكل كلمة وكل خاطر بالناس ، بتم طول حياتي عايشه فيهم !.

وووو بعد ، جي سبحان الله مادري شلون لمن نلاحظ شغلات تبدي تتيسر ، مادري كيف جي ،
اممم وايد تفاصيل أستفيد منها بيومي ، مع إني لازلت أحس بنوع غريب من الفراغ ، لكن باذن الله تعدي علي ك فتره لا أكثر ..

يالله وايد شغلات ابـ بالي أتمنى إني أنالها ، أبي أكون كذا وكذا وكذا ، بس لازلت رغم كل هذا مقصره وايد ،
ماعرف شلون جي من جهة أحس براحة ما كنت أحس ابها قبل ، ومن جهة ثانيه أحس بالعكس ،
أبدا ما أرتاح بنومي ، مادري إذا يعتبر أرق ولا شلون ، يعني حتى لو بنام ما أحس إني نمت وارتحت بالنومه ..

~

كنت قاعده أشتغل ع شي مسويته بس مادري إذا بكمله وبوزعه ولا ، جي أذكار الصباح والمساء بس أحاول أخليه بشكل مختلف شوي ،
يعني بدل لا يقعد الواحد وقت فراغه بالدوام جي متملل ما يدري شنو يسوي ، يمر عليهم ويقراهم ،
وغيره ، سبحان الله يمكن ينتفع ابهم ولو شخص واحد ..

اوووو الحمدلله قمت ماخذه عالشغل أكثر ، استوعب شوي شوي نوعية الشغل واللي يصير بالأفرع ،
بس كله كوم وسالفة التلفون كوم ثاني ، مادري ليش ماحب أرد عالمكالمات ، ودومه نحيس لا يحول ولا يعلق المكالمه ولا يظهرلي أسامي ،
ع قولة ربيعنتي بما إني لازلت يديده ، من زودها المكالمات اللي اتيني الحين ، ونصهم غلط !.

وايد شغلات تضحك ، ووايد شغلات نتعوذ منها ، يعني سوالفهم شلون تصير أحيانا ،
وكيف البعض معادي الثاني ، أحس مادري شلون متفيجين ..

~

جنه كل كلامي صاير عن الدوام ، ملهيني وايد ، ومنه التهي بغيره من أمور ..

[دمعة شوق]

اففففففففففففففففف لااا توني كااتبه رد اشطووله وانمسح في ثاانيه عاااااا مااااحب هالحركه السخيفه


\

اليوم : الاربعاء
التاريخ : 9 \ 12 \ 2009
المزاج : تـغـرق آلغـرقآن آكـثر ,,!

امممم اليوم كنت نشيطه وقايمه من 6 ونص وقعدت عند اخواني لين ماراحوا المدرسه وبعدها استرخيت
وبديت اتزهب للجامعه وخظفت على ربيعتي وداومنا رباعه ،،

كان الجووو في غاية الجماال يشجع للدراسه والوناسه والحمدالله كنت مستانسه وكانت النفسيه اوكيه
وكنت اقول فخاطري ان الجو يغير من النفسيه ،،

خلصت كلاسي ساعه 11 وعقب ترييت ربيعتي تخلص كلاسها لـين 2 ،، وشلينا غدانا تيك اوي وقعدنا برا اقصد في مظلات الجامعه وكاان الجوو مشمس مغيم لوول ،،، واتفقنا يوم يكون الجو جميل نتغدا برا بدل حشرة البنات ولوعتهن

عقب الغدا تناقشنا فـي امور عده ،، واخر موضوع كان مهم بالنسبه لي لانه يعنيني جدا وحساس جدا ،، صح هي ماكانت توجه لي كلامها بس انا وااايد تحسست واكتئبت من فتحنا الموضوع :(
مااحب افتح هالمووضوع او حد يكلمني فيه صددق اتضاايق واكره الكل
قعدنا لين قريب المغرب وكل وحده ردت بيتها ،،

وحاليا قااعده اتريا الوقت يمر عشان ارقد ،،


افففف وكل مره اضحك فيها وااايد واستانس اقول اللهم اجعله خير اللهم اجعله خير
لاني اعرف في اخر المطاف شي ببستوي بيخرب علي وصددق بكره الساعه اللي ضحكت فيها :(

امممممم الله المستعان ماعرف كيف يفكرون او كيف عايشين هالفئه من الناس !

اعرف كلامي متلخبط ومختبص بس خطفوا

[أنامل قلب]

^ لا بالعكس ، وربي ييسرلكم كل ضائقه ، ويوفقج ويحفظج وهلج دنيا وآخره ..

~

اليوم : الأربعا ..
المود : ...... ...... !.
الموضوع :

اممم محتشره انا ورفيجاتي ، مره اكلم فلانه ، ومره ادز للثانيه مسج ، ومره ارد اكلم الثانيه ، وهيك ،
ربي يحفظهن جميييــــــــــــــعا ، ويجمعني وإياهن تحت ظل عرشه يارب ..

~

في شغله وايد تتكرر معاي ، يعني شي مثل هذا لمن يتكرر يكون غريب ، أو أعتبره أنا غريب ،
بس مادري شلون ، وايد بسببه أنحط بمواقف ما أحسد عليها ، أشيا تحرج ، وحساسيات تصير ،
وأحيانا أبدي أحاسب نفسي زياده عن اللزوم ، كله أحط علي ، لاني قادره أكون ع طبيعتي ،
ولاني قادره أحس بالعكس ..

ماعرف شوللي فيني يتسببلي بهالأشيا ، واهني المشكله ،
وغيره ، لمن أقول عادي ، بس أشوف هالعادي يتحول لـ شي ثاني ..

~

اممم بس خلاص !

[دمعة شوق]

^
اجمعيييييييييين يالغاليه
ا

[مزن هتان]

اليوم : بتكلم عن البارحه
المزاج : مستانسه
الموضوع
البارحه رحنا أنا و خواتي من قبل صلاة اليمعه عند خالاتي
حق الغدا يو خوالي و عيالهم و عيال خالتي
قلت كلمه كلهم جلبوا عليه بنات و شباب و خالاتي بعد أونه مزن لا يكون
سنوايت انتي :) والله ماقصدت بس حتى تذكار أيدتني بالرمسه هههه
المسا طلعنا جبنا كيكه حق مرت اخوي "مسوين لها كيكه على النمر مال اذ هاردي"
كملة ١٩ مفاجئينها أنا و خالاتي بعدين بدينا نشوي وصل خالي عبدالله
يقولي مزن بسوي عيش مشخول ع الفحم عيش و ع العشا :0
المهم خالتي شوت الدياي و نحن البطاط و الذره و خالي العيش و خالتي العوده البيض
و ها كله طبعا ع الفحم و البشاكير سوو نوعين سلطه
بعد هالعشا قلنا لازم نتحرك طلعنا أنا و خواتي و ٢ من خالاتي و بنات خالاتي
مع اثنين من أولادنا
نتمشى و مشينا لين بيت خالي احمد دخلنا يلسنا وحشني خالي ماشفته بالعيد
و قعد يقولي مزن تعشي معاي أقول والله خالي شبعانه وايد أكلت
و طلع معانا وصلنا لين قريب البيت و رجع
اخر شئ يوم قاعده بالسياره انطر أمي و خواتي ياني خالي عبدالله
ميت من الضحك قالي شو سو أمي و خواتي و مرت اخوي
ههههههاي و اتصلوا فيني خالاتي ميتين من الضحك للأسف فاتني الموقف
هذا كله خوف من وحده فالفريج مينونه عبالهم داخله البيت :) وطلعت اخت زوجة خالي
والحين بنشيل غدانا و بنطلع مع خالاتي

[أنامل قلب]

اليوم : الأحد ..
المود : .... ... !.
الموضوع :

الجو اليوم صدق غرام ~
ماكنت مسويه حسابي ، مع إن المطر من الصبح قبل لا اظهر ، بس مادري ماهقيت إني بتوهق ^^"
عالأقل كنت بلبس بنطلون ولا شي جي يكون أريح ، مو ثوب طويل =/
حتى شيلتي اليوم وايد توهقت فيها ، مووول ما تثبت ولا اروم ألفها عدل ، شكلي اليوم كان صــــــدق غلط ..

اونه ابوي خذيلج مظله ، ما يبيني أخيس على هالكمن خطوه اللي بمشيهم ،
واليوم بعد كنا رايحين عندي فحص دم الظهر بيشوفون اذا بعده الحديد عندي نازل ،
المهم ، صدق الشوارع كانت غيييـــــر شكل ، وسواقة أخوي حدث ولا حرج ما شاء الله ،
وايد ياخذ راحته ولا يحب ينطر ، مره يمين ومره يسار وأحسبه مسرع بالنسبه للجو ..

المهم إن ما أثر بنومي ، طبعا دايخه من الخاطر ،
فـ إلي يمر ع اختي اللي بالكلية كنت انا خلاص رايحه فيها وغاطه ..

وإي الحمدلله ، في شي ناويه أرد أسويه والحمدلله ماشيه فيه للحين بشكل مقبول ،
يارب والله عساني ألتزم هالمره أكثر ، صدق نفسيتي بتتعب جان رديت أهملت ..

+ برد !.

وهيه تذكرت موقف عبيط ، رفيجتي اليوم الله يسامحها دازتلي ايميل صدق ذبحني ،
وااااايد ضحكت منه ، جي مووول مب شي لمن تبون تضحكووون والتمون ماسكين عماركم عن الفضايح ،
حتى دمعت خلاص وصلت حدي ، وبنفس الوقت ياني مراجع يسأل عن موظفه ويباني أجيك عنها شي ،
المهم وأهو قاعد يحاجيني أنا جي حاطه يدي ع حلجي لول ، والله صدق مادري كيف تحملت ..!

[أنامل قلب]

اليوم : السبت ..
المود : .... ... ..... !.
الموضوع :

الكل رجع عادي ، والحمدلله رجع عادي ،
بس للحين ماعتبرته شي عادي ..

هالخواطر اللي اتيني ماحبها ،
وابـ أحيان أتمنى لو كانت الذاكرة عدنا مجرد لعبة تركيب ،
ممكن نستبدل قطعه منها وقت ما نشتهي ، ومثل ما نحب ..

~

كلامه ضحكني بالسياره ، يقولنا كنت أحسني بحلم ،
ومن شفت السوداني فوق راسي بغيت أزاعج / ..

~

وضعي سيء جدا ،
غير مستقره أبدا ، ولا ابـ أي شكل ..

[أنامل قلب]

اليوم : مو محدد ..
المزاج : ..... .... .. !.
الموضوع : اختي الاصغر ..


مرات عليها مواقف صدق أستانس عليها وايد ، على كثر شطانتها وسوالفها ،
بس مادري شلون جي تفاجئني أحيانا ابـ فواصل جميله ..

حساسيتها من صوبنا "ولنا" شغله حلوه ، طفوليه بشكل مختلف ،
يمكن لأنها أصغرنا ، ومع إني أقولهم أحيانا لا تعاملونها جي لي متى بتعتبرونها ياهل ،
بس ماشي فايده ، إذا أنا للحين يعتبروني ياهل ، عمرنا ما بنكبر بعيون والدينا ،
وفوقه كوني قبل الأخيره ولله الحمد ، نكون بالنص أسلم لنا ..!

وعن اختي هذي ، لو فيني شي ولا بضيج وبفكر ألجأ لأحد من خواتي ، فأكيد بيكون لها ،
أذكر لمن رحتلها بعد اللي صار ، مع إن كان خلاص مر عالموضوع ، بس ماقدرت ولقيتها على طول يمبي ..

حتى لمن يصير شي تعرف إن نحن مانحبه ، وايد تضايج ،
وتضحكني لمن أكلمها أحيانا بـ سوالف عشوائية واوقف عند أمور ضايقتني ابـ أفعال مثلا ،
التم جي اتحط عليهم حتى لو ماتعرفهم وابـ هبل جميل ..!

حنونه على اختها ..

~

الموضوع : صغيره !.

اممم ، وايد تصير معاي إني أحس بالناس يعاملوني عساس إني صغيره ،
مادري يعتمدون على الفكرة اللي ياخذونها عني من الظاهر ، ولا لأني قليلة الاحتكاك ابهم ..

وما عندي مشكله أبدا ، أريح لي ، إلا لمن بضطر أبدي ردود أفعال ما يتوقعونها أحيانا ،
مثلا إني أبدي شدة بخصوص مسألة ، ردودي على أشيا ، عدم اختلاطي بالغير بشكل واضح ،
وأذكر مره ما عيبني شي لدرجة كبيره ، واهني ماهتميت كالعاده وسويت اللي احسبه المفروض اسويه ،
بس حسيت باللي كانت طرف بالموضوع استغربت وماعرفت شو تقول ..!

مرات صدق في أشيا ابنا ماندري عنها إيجابيه ولا سلبيه ، ولا الاثنين ،
كل اللي نعرفه إن نحن نحن بالاطار اللي ما نملك الخروج منه ..

~

الموضوع : ريـ فرش !.

ما تصدقون اشكثر اني محتاجه أسولي إعادة ترتيب لكل شي يخصني ، كـــــــــل شـــــــي ،
من أتفه التفاصيل لأثبتها ، من أصغر نتفه ألحظها لأوسعها ، من كل جانب ومن كل بين ،
أبي أشوف نفسي بـ صورة أنا راضيه ابها ، يالله ماتتخيلون اشكثر الأفكار والخواطر ، مزحومه ..!

[أنامل قلب]

اليوم : الاربعا ..
المود : .... .... ..... .. !.
الموضوع :


هالـ فعل بالذات من أكثر الشغلات اللي تريح النفس ،
أحس بروحي تصير شرحه ، والخاطر أنيس ..

~

فيني شي غريب ، كوني حساسه جدا وشلون أصير لا مباليه جدا ،
بس لأني حساسه جدا !. كيف جي لا تسئلوني ، روحي مادري ..

وكأني ألقاه الـ حل الوحيد لتفاصيل كثيره أمر ابها ،
ما تصدقون اشكثر أتحسس واشكثر ممكن أتأثر من وبسبب تفاصيل صغيره جدا ،
ولهذا السبب لمن بيي أحلها ، تكون لي ردود فعل شديده جدا ، من غير لا يكون ابها أي شدة واضحه ..!

مثل ما يقولون ، حتى الصمت له حده ، وربي يعيني على فك هذي الصفات السلبيه فيني ..

~

ليـ هاللحظه ، ولازلت أعتبر الخجل فيني عله ،
عادي أهلوس ولا أصير وكأن وحده سكرانه : تقول ما لا تعيه !.

كل ما يذكرون الموقف وللحين يردون يضحكون عليه ،
أونه قوية من الخاطر ، دببه ..

+ خارج النص ، للي حاب يسمع تلاوات جميله ،
أنصحكم بسماع مقاطع لأخونا ناصر القطامي ، صوته جميل وتلاوته زاكيه ما شاء الله ..

[أنامل قلب]

اليوم : الجمعة ..
المود : .... !.
الموضوع :


أمس كنت صدق مدوخه ، ماقدرت من حطيت راسي طحت بعالم ثاني ،
بس قعدت من النوم مبجر نوعا ما ، جي قريب الساعه تسع ، ومن بغيت أجابل اللاب لقيت أبوي يزقرني ،
ظهرت معاه نقضي حاجتنا ، وبالرده مرينا عالمحطه ، كنت يوعانه ..

فيني طبع صدق بايخ ، إني أحب أشكل بالأكل وبنفس الوقت لمن أكون يوعانه أطلب بزياده فوق ما أحتاج ،
خذتلي 3 قطع / بالاول كنت متلذذه بالفطاير ، بس بالأخير لاعت جبدي من زود ماكنت شبعانه ، أحس خلاص ماشي مكان ،
والوالد يحط عليه ، اونه محد جابرنج ، وكأني قابضلج العصايه إلا غصب تاكلين !.

رديت البيت سيده عصرتلي لومي ، وبعد شويه بشرب جاي أخضر ،
وووو احتمال نظهر عالمغرب مره ثانيه ..

~

أمس حاشره أبوي ، كل شوي أقوله : بابا أحبك ..!
الين آخر مره فالي : شو تبيني أقولج ، حبج برص ههه / لول قتله بضحك : لا المفروض تقولي حبيبتي انتي !. > غصب هو ..
يقولي : انتو مو بس حبايبي ، عيوني انتو / وقعد جي يقولنا كلام > كنا بالسياره وقتها انا والوالده واثنين من خواتي ،
بس كانو مسوين حشره ، فـ ماخذينها سوالف على جد على امممم ، مادري !.

ربي لا يحرمني منهم دنيا وآخره ..

~

اليوم شفت اضافه لـ عهد الوداع ، استانست / ماكنت شايفتلها تواصل من فتره ..

[أنامل قلب]

اليوم : السبت ..
المود : .. ... !.
الموضوع :

اممم مادري ..

~

قاعده الساعه تسع تقريبا ، وتميت افكر بشي ، مادري هيه ولا لاء ،
كان الوالد توه بيظهر ، واختي الثانيه توها اقعدت رايحه تسويلها ريوق ،
فـ ماكو ، رحت وييت رحت وييت رحت وييت ، وتالي سبحت بسرعه وصليت وتزهبت ،
وللحين ما ظهرنا ، المفروض انا اللي احتشر لأن ابي الحق أدور ع كذا شغله ،
بس اختي الاصغر كالعاده دووووم من اييبون طاري الطلعه تلقونها قصة بحالها ..!

يبون يسيرون السينما ، كلنا بنظهر من غير الوالد ،
وشسمه كنت قاعده احاجي رفيجتي ، أحب سوالفنا حتى لمن تكون مال عبط ،
تقولي عن اختها عساس داخله كلية الشريعه مؤقت بس شكلها استحلت القعده بعد ما التقت بربعها ،
مع انها ماتحبذلها انها التم لكذا سبب ، المهم ، فتميت أقولها إذا بغيت أدرس شريعه بتشجعني ولا ـ اهي بالشريعه ـ ،
ودخلنا من عقبها بسوالف ، بس مادري ليش بعدني ما أميل وايد لاني أدخل أكمل رسمي ،
أبي أحضر المحاضرات من غير لا أدرس وأتخصص رسمي وأحصل شهاده ..

ودي أدخل بدوره ولا كليه بس لـ فتره قصيره ، حتى لو بدرس دبلوم بس إني أتثقف زياده بالمجالات اللي احبها ،
لكن مادري أحس إني متقيده بشي اسمه تبريرات ، ع كل خطوه لازم بشرح وبقول وبألف ،
ليش ابي اسوي كذا ، وليش حابه شسمه ، وكيف ، ولما لم أفعل ، وماذا إن فعلت ، والقصه ما بتخلص !.

~

ربي يهديني ، ويوفجني للي فيه الخير ..

[عافك الخاطر]

اليوم: الثلاثا
المزاج: مبعثر
- عقلي المرهق تزدحم فيه المشاعر ..لا شيء بات يثير فيني الحياة.. كأن الكون فيني انخمد ..
- بعد غياب شهور ،اقتصر الحديث على الطقس / تزييف الاشتياق/ و تزيين كذباتنا الصغيرة التي فشلنا بجدارة في إخفائها..
أنا مدركة تماماً أسباب ابتعادك، فحجم السلبية التي خلقها وجودي لا تطاق..
- أشعر برغبة شديدة في تجميد أحاسيسي تجاه الأشخاص والأشياء.. سئمت تعليق الآمال على الطقس/الاشخاص/أحلامي الكبيرة منها والصغيرة /

[أنامل قلب]

اليوم : الاربعا ..
المزاج : .. .. ~
الموضوع :

اليوم الدوام كان سيء نوعا ما ، ماحب الأجواء الممله ، ولا إني أقعد أغطي ع غياب البقيه ، أتوهق أحيانا !.
وشسمه ، من الصبح إليـ قريب العشا ماكنت ماكله شي غير الكوفي وقبل لا اظهر من الدوام خذت من عند وحده
قطعة كاكاو صغيرونه ، اظنها كانت سبب العوار الشنيع اللي ياني عقب ..

من ركبت السياره بديت احس ابـ ألم خفيف بالمعده ، وعادي طنشت قلت بيي وبيخوز بروحه ،
بس من وصلت البيت خلاص حسيت إني مو رايمه أتحمل ، نسيت اليوع وامه ^^"
سيده طحت بهدومي والعباه ، اقول لاختي بطنيييييــــي واسولف معاها شوي واتحرطم شوي ،
بس لقيتها عادي مو مهتمه ، غريبه يعني ، اونه شو ما يبين عليه إن من صجي ،
تقولي يمكن لأنج تسولفين وتضحكين فأحس إن يعني مو لهالدرجة تعبانه لول دبه

شربتني أمي ماي نعناع ، وسرت اسبح عالسريع عبالي الويع بيخف بس زاد ،
ومن ظهرت طخيت من غير لا الف ولا ادور ولا كليت ولا شربت ولا هم يحزنون ، حتى ما صليت العصر ما قدرت ،
بس الحمدلله قعدت من النوم عالـ 6 ونص والويع خف واااايد ، بس كله كنت أحسني بالدوام ،
بعدني أعيد وأزيد في أسامي الموظفين والمراجعين وانا نايمه !.

المهم ، نشيت صليت ، ومن فضيت كليت اللي المفروض يكون غداي ،
وللحين محتشرين عدنا ومشغولين بكذا شغله ..

اممم !.

[مزن هتان]

اليوم : السبت
المزاج : الحمدلله تمام

الموضوع

أمي و خالتي الصغيره عاملين لنا قلق ربي يشفيهم و يعافيهم
خالتي الحمدلله تطمنا عليها بس ربي يهديها و يصلحها و تكمل علاجها لين يخلص
و هذا احنا ننطر نتيجة أمي و ان شاء الله خير بعد =)

قرت عيوني يوم الخميس 31-12-2009 "آخر يوم بالسنه"
كان يوم حلو شفت زميلاتي و أحد ثاني بعد "خبلت ابهم من أول الصبح"
ودي يجي بكره بس لأجل شي واحد -يا انهم يصدموني أو أصدمهم-