دير دياري ~ يوميات

[أنامل قلب]

اليوم : الجمعه ..
المود : .... ... ..... !.
الموضوع :

[ إلا أن يشـــاء الله
واذكر ربك إذا نسيت وقل عسى أن يهدين ربي لأقرب من هذا رشدا } ..

[ ومن أظلم ممن ذكر بآيات ربه فأعرض عنها ونسي ما قدمت يداه .. } ..

~

قراءة أخونا الغامدي هاديه ويظهر الأحكام بشكل واضح ما شاء الله ،
ربي يجزاه خير ..

~

كنت ولازلت أحس إني ما يمشي معاي شي اسمه [ تخطيط دقيق ] ،
يعني إني أتقيد بشي بشكل جامد جي وكأني أمشي على سستم معين يوميا ،
اممم مادري جربت أخطط كذا مره بس كنت ولازلت ما أحب أتقيد ابـ هالأشيا ،
صح الواحد المفروض يحرص على إنه يخطط لحياته ، وأحيانا حتى يدخل بالتفاصيل ،
بس في شغلات ثانيه ما تندرج بمثل هالمخططات ..

~

وايد زعلت اليوم ، صدق ماعرف شو أسوي ..

[قصايد غلا]

اليوم: بتكلّم عن 2_ ديسمبر

المود: ما ينوصف

الموضوع:

من قبل العيد بواااايد بنات خالي يبن يسافرن و يبونا "أبويه و أميه و أنا" نكون وياهم .. أبويه وافق
لكن مادري شو ياه في ليلة السفر تم متردّد و يته حمّى و قال مب لازم نسير

أنا زهبت شنطتي في آخر كم ساعة قبل موعد الطيارة عل و عسى أبويه يغيّر رايه مع اني مووول مب متحمسة للسيرة
استوا الصبح و طاف موعد الطيارة و سافروا قوم خالي


الضحى

اتصلوا بي عيال خالاتي و قالوا بنسير نتغدا في دبي و عقب بنسير القصبا المسا .. قلت لهم اوكي "على أساس ما بنسافر"

نشيت تزهبت و ظهرت وياهم .. العصر اتصل ابويه قال لي شنطتج زاهبة بس بغيت أخبرج إنه باجر الصبح بنسافر إن شاء الله

قلت له أوكي :) و أميه تكلمني على التلفون الثاني وتقول نفس الكلام


الساعة 5 المسا أبويه مكلّم أخويه و يقول له أنا بسير المطار و بتريا ربيعك عشان يصرف لي الفلوس

عقب رد أبويه اتصل به كم مرة لقى تلفون أخويه مغلق .. أميه نفس الشي


تمّوا خايفين .. شوية و ياهم رقم غريب طلع أخويه و قال لهم تعالوا لي مستشفى كلبا أنا مسوي حادث



و أنا كنت في القصبا مستانسة راكبة العبرة لأول مرة في حياتي .. يوم ياني الخبرررر

ما أقدر أوصف شعوري كيف كاااااان .. أصيح ، أدعي إن الله يحفظه ، أبا أكلمه ، أبا أكلم أبويه و أميه ، مرتاحة و اقول في خاطري "الله هو اللي حفظه في الحادث الأول السنة اللي طافت و بيحفظه في هالمرة إن شاااء الله "




فجأة لقيت عمري في البيت و أميه تصييييييح و أبويه ما يعلم بحاله غير الله .. يتظاهر إنه ما فيه شي و يالس يدعي و يقرا قرآن
مادري كيف وصلنا جلبا ، الدقيقة جنها سننننننننة ما تطووووووف .. أبا أوصل عند أخويه أبا أكلمه أبا أضمه أبا أقول له ما لي غيــــــــرك في هالدنيا انته أخويه الوحيد انته كل شــــي بالنسبة لي

في الطريج أرد على مكالمات العايلة كللللللللهااااااا .. التلفون ما صخ من كثر الاتصالات كل شوية يررررررن و يسألوني عن أخويه


ما صدقنا نوصل المستشفى .. شفت أخويه
فديييييييته غمضني وااااااااايــــددد بس أهم شي إنه الحمدلله بخير
صح ويهه متيرّح و خايطين راسه و ايده متقطعة بس كل هذا يهـوووون

انقضى الليل كلللللله و أبويه كل شوي يطالع المغذي و يطالع الأجهزة اللي محطاية لأخويه و أنا على أي شي أزقر النيرس (لااعت جبدهم منّي من كثر ما أسألهم عن حالته)
ما صدقنا تمر 24 ساعة على الحادث عشان الدكتور يقول خلاص الحمدلله ما فيه شي و تقدرون تطلعون من المستشفى



و الحمدلله طاااافت الـ24 ساعة و وافق الدكتور يرخصه =)


آآآآآآه يا قلبي .. نحن قبل كم يوم نذكر الحادث الأول مال السنة اللي طافت .. يوم خبروني قلت بعععععععععععد منجلب :( .. أستغفر الله
اللهم لا اعتراض على حكمك =)



الحمد و الشكر لك يااااااااااااا رب على النعمة اللي نحن فيها

[مزن هتان]

تستاهلون سلامته يا قصايد غلا

[رمــش الغـــلا]

^ قصايد غلا

تستاهلووووووون سلامته والله ..

الحمدلله انه ردلكم شرات قبل .. ^__^

[مــهــابه]

تـسـتاهلـوون سلامته قصـووده

الحمدلله انها يـت على جيه =)


الله يحفظه لكم ويخليكم لبعض يـارب=)

[العجيبة]

قصايـد غــلا

سلامته وما يشووف شر ان شاء الله - أجر وعافيـة - ...

[قصايد غلا]

مزن هتان : الله يسلّمج من كل شـر حبيبتـــي .. هذااا كلللللللله من النيسان اللي تحبينه و أخويه يعشقه


رمش : الله يسلّمج و يسلّم غاليج رمّووش .. هيييييه والله ، الحمدلله مليوووون مرررررة على هالنعمة


مهابتي : الله يسلّمج غناتي .. آآآآآآآمـــــــــــــيـــ ـــــــــــــــن يااااااااا رب و يحفظ لج ربي و يخلي لج كل غالي


العجيبة : الله يسلمج .. الشر ما اييج فديتج
الله يعافيـــج الغالـيــة




الله لا يراويكم مكروه في عزيـــز عليــــــكم

[دمعة شوق]

^
قصوودتي
مايشوف شر وتستااهلين سلااامته ^^

[شوق القلوب]

السلام عليكم...

الحمد الله على سلامته قصوده... و طلعوا عنه دفعه بلى...

و الحمد الله انه ما جاسه شي... :)

[أنامل قلب]

اليوم : مادري أقول السبت ولا أطري الأحد !.
المود : .... .... ... .... ...... ، ... ...... .... !.
الموضوع : خبال ..

بالأول ضحكني أبوي وايد ، حضرتي اوني بسوي فيه مقلب انقلب بعد حين علي =#

كنت رايحه أرتب رفوف الكتب شوي ولا لقيت طيطار بلاستك مادري من يايبه ، وشكله يلوع بالجبد ،
المهم دق براسي وقلت بسو مقلب بالوالد ، فيبت لزقه ولزقت الطيطار عاليدار بالصاله حذال الساعه ،
جي مخشوش شوي عشان أونه يعني يبين انه صدقي ، بس وحليــــــله ابوي شو سوا هههه
ما قدرت أكتم الضحكه ، طبعا عشان لا يشرد اونه يايب أقرب شي لقاه وكان نعاله ـ تكرمون ـ ،
ومن غير ون تو ، سيده ضربه وتم قابض النعال يسألنا إذا الطيطار شرد ولا ههه

انا اهني ما قدرت تميت اضحك ، خلاص جي طحت وانا أقوله امبيه مو صدقي لعبه لعبه لول
واهو مو مستوعب ، يشوفنا كلنا نضحك ، خذله كمن لحظه ولمن شال النعال شاف الطيطار بعده مكانه ثابت ،
جان يعصب ههه ، بس جي يعني سوالف ، يقولنا اختكم تنطرني ومتأخر عليها والخ الخ واهو يضحك ،
حسيته افتشل احليله ..

بس عقبها جي بكمن ساعه ، قتلهم خلو الطيطار مكانه إلين إيي أخوي ، وهذا ما بستغرب جان شرد عنه !.
لكن انا الفالحه كنت اوني متمدده بالصاله اشوف التلفزيون وما حسيت بعمري كالعاده ونمت بالوقت اللي رد أخوي فيها البيت ،
وصار الموقف وشكله زاعج عليهم يبيهم إييبوله شغله عساس يمسكه فيها ، وانا فزيت مخترعه من زعيجه =$
والله قلبي وقف ، كل مره يصير فيني جذي مادري شلون بسرعه اتروع وافز ..

ويعده للحين الطيطار البلاستك مكانه !.

~

هالمواقف تشغلني عن التفكير باللي ماحبه ،
أحيانا صدق تكون النفسيه عندي سيئه ، كل شي مخربط ،
فـ صدق وناسه جي قعدات الأهل ، والحين الحمدلله برد أداوم بما إن الاجازه خلصت ..

اممم كنت طالعه اليوم مع الوالد محل عبي ، كانت قايلتلي عنه بنت عمي ،
المهم ، فشلني صدق ، مع إني أساسا ماحبيت المحل ، خاصه إن كان فيه غيري موجود وقتها ، وكل وحده يبالها مال ساعه ،
والأهم إن واحد من الرياييل شكله ولهجته سعودي ، فـ نو واي بقدر أتصرف ولا بعرف اتكلم ، وفشيله ..

بس لمن ييت بدخل محل ثاني ، تم ابوي بصوت مسموع ، اونه شو هالعبي بعد ، شو هالأشكال ،
كجره جي ، هالعباه تنفع لعشره مثلج لول ، قفطني وايد صدق صدق ، حتى كنت قاعده أحاجي الريال اسئله عن العباه ،
واشوف ابوي يزقرني ويأشرلي بعيونه ، وكأنه يقولي طلعي ولا ياويلج لول

طبعا ظهرت بكرامتي ، بس تميت اكلمه واقوله كيف جي بعد =#
ما فيني أدخل محل ثالث وبرد يسو فيني جي ، والحمدلله طلعت الثالثه ثابته !.
مع إني للحين مو مقتنعه باللي نقيته ، ان شاء الله القطعه تظهر زينه ..

وآخر اليوم ظهرنا تعشينا برا ، عازمتنهم أونه بمناسبة انتهاء الاجازه ، صدق متفيجه ،
وللحين حاسه بثقل مع اني ماكلت وايد ، حتى الشاي الأخضر ما نفع ..

~

تصبحون على خير ، ودامت أيامكم بـ كل خاطر جميل ،
مادري كيف بقوم للدوام ..

[أنامل قلب]

اليوم : الأحد ..
المود : ..... ...... !.
الموضوع : بس جي هذره ..

اليوم كلمن يبدي كلامه بالتهاني ، حتى بالتيلفون ،
بس ما كان فيه هاك الشغل ، ملل يعني ، وللحين ما نقلت الأشيا اللي أبي أنقلها بالفلاش ،
عالأقل لمن ما بيكون عندي شي أسويه بلتهي ابهم ، ممكن اسو بروشورات وأكمل سالفة كتاب الطبخ ،
وغيره من الأشيا اللي تسليني وأحسبني أنتفع ابها ..

وشو بعد ، امبلا صح قمت أقضي وقت أطول مع ربيعتي ع ، وصرت آخذ واعطي معاها أكثر الحمدلله ،
بس مشكلتها مكتبها آخر طابق ، وحليلي صدق دوم ابتلش باللفت ، وبالأخير ألجأ للدري وأوصلها منهد حيلي ^^"

بس ما يصير صدق لازم أحد بيي يوقف ، واللفت يكون فاضي فما بدخل مع ريال بروحي ،
مع إني أكون واقفه قبلهم ><" ، دببه ، على حظي نحيسة باللفت كل ما أبي أستخدمه أصادف أحد ،
الاول يدخل وارد انطر ، ايي غيره وارد انطر ، وقفطه لمن يكونون ناطرين عبالهم بدخل ، فشيله الصراحه ،
الحمدلله إني أحب الدري ولا جان رحت فيها ، خاصه لأن شغلي بالمكتب ، تدرون القعده تهد الحيل ،
فـ سالفة الدري اظنها بتفيدني =)

وشسمه ، صدق الشغل مفيد جدا جدا جدا جدا جدا جدا جدا جدا جدا جدا جدا جدا ..!


~

اممم مــــــــــاااادري !.
أحس خلاص عادي استخف حد الاستخفاف المطلق الذي لا رجعة بعده / =# ..

[قصايد غلا]

دمعة شوق : الشر ما اييج حبيبتي .. الله يسلّمج و يسلّم غاليــج يا ربّــي


شوّاقة : الله يسلمج فديييتج .. الحمدلله الحمدلله من هالناحية أنا سويت كــــل اللي أقدر عليه من قبل لا نوصل حتى المستشفى و نشوفه في يوم الحادث

الحمدلله رب العالميــــــــن .. هاي أكبر نعمة وهبنا إياها ربّــي إنه حفظه

[مجموعة إنسان]

تستاهلين سلامته قصااايد
واهزبوووه شو هااا متهور يسرع وايد شكله !! هههه
عيل بس انا انهزب كل يووم

عاد على حظي انا كل ما ارجع من الكلية ابوي يكون راجع البيت يايب اختي من المدرسة
ودخلة فريجنا شوي غبية لازم ندخل في شولدر وانا اي مسرع وادخل الشولدر وهو يشوفني يوم اوصل البيت انهزب هههه


,,

امس الأحد ,,
هممم

بتكلم عن الساعه 12 المسا اول الالصبح مادري المهم الليل

كاانت فيني حمى مب طبيعية امس مع زجاام
وعندي بروجكت في واحد في القروب خون فينا مع ان من البداية ماكنت ابغيه بس الأستاذ قال انتوا الثلاثه في قروب
المهم ان هذا كان متفق معانا ان يسوي 3 بارتات من البروجكت وانا اسوي 3 والثالث يسوي البرزنتيشن وجذي
وهذا اللي بيسوي ال3 بارتات سافر وما سوى شي ومنو اتوهق طبعا انااا!
وامس اشتغلت شغغغغغغغل كررررف
سويته نصه
اخر شي هلكت ماقدرت اكمل من بعد 12 ساعه على اللاب

رقدت جذي 3 قمت 6 سبحت عالسريع وطلعت عسب اروح الكلية
من ركبت السيارة اشوف البترووول خلاااااااااص مخللللص
وقفت في زحمة المحطه ولما خلصت طلع باقي نص ساعه على الكلاس وانا شي اسمه تأخير ما احبه
يا اني اغيييب وارقد او اني احضر بدون تأخير
الحمدلله وصلت بالوقت والمزااج اي شششششششي

ما خليت واحد في الكلاس ما هزبته ههه
معصب على عمري بعد ما اعصب على الصغارية هههه

رجعت البيت الساعه 3 من بعد كلاس دروينج أررف
يعور الراااس
نرسم رسمه بالرصاص والقياسات كلها على 1 سانتي هههه
تخيلوا انتوا بس !!!

رجعت البيت تغديت رقدت وقمت الساعه 6 تقريبا

ومن الساعه 7 لين الحين وانا بعدي على البروجكت بس ابي اخلصه واطرشه لربيعي عسب يطبعه ويسوي البرزنتيشن


شو بعد ؟
شو الأخبار ؟ ههههه

[قصايد غلا]

مجموعة : الله يسلمك من كــل شــر
مب مقصرين في النصايح .. ما نقدر نهزبه أحينه نفسيته تعباااااااانة


مب زين مجموعـة .. لااااازم تنهزب و ياخذون السويج عنك بعد =p عشان تسير الكلية مشي ولا بـ تكسي لووول


أخويه حليله كل ما اييه حد يدق بيده على الموتر و يقول له للبيع ؟
لااااااااززززم يستوي به شي

الشباب مشكلـــــــة وااايد يعيبهم يستعرضون و يطلعون خبالهم في السيايير و نحن نبتلش و نحاتي و القهررر يوم حد يكلمهم يقولون نحن مب يهاااااااااال


الله يهدي أخويه و يهدي كل الشباااااب اللي مب مدركين خطورة السرعة

[أنامل قلب]

اليوم : الاثنين ..
المود : .... ... ...... !.
الموضوع :


مستانسه ع سوالفي وربيعتي اللي اكتشفت بالصدفه انها معاي بالدوام ، الحمدلله رب العالمين ،
والحمدلله على كل شي ، كثر ما إني مرتاحه ، وكثر ما إني العكس ..

مواضيعنا كانت غريبه اليوم نوعا ما ، خاصه آخر سالفه ، صدق هالشي وايد يربكني ، ماحب حتى إني أفكر فيه ،
بس وايد ضحكنا عقب ونحن نطري المواقف ، وهيك ، مره إتي عندي ومره أروح عندها ، أول يومين كلش ماشي شغل ..

اممم تراني مو من النوع اللي آخذ واعطي مع غيري وايد ، يمكن لأني استحي ، وماحب آخذ راحتي أساسا ولا هو بيدي ،
بس الحمدلله ما حس إنهم ماخذين عني فكره غلط نفس ما يصيرلي أحيانا ، إن يتحروني جي مغروره ومال دلع =$
مع اني أساسا ماقمت أهتم الصراحه ، لو بقعد أدير بالي ع كل ظن وكل كلمة وكل خاطر بالناس ، بتم طول حياتي عايشه فيهم !.

وووو بعد ، جي سبحان الله مادري شلون لمن نلاحظ شغلات تبدي تتيسر ، مادري كيف جي ،
اممم وايد تفاصيل أستفيد منها بيومي ، مع إني لازلت أحس بنوع غريب من الفراغ ، لكن باذن الله تعدي علي ك فتره لا أكثر ..

يالله وايد شغلات ابـ بالي أتمنى إني أنالها ، أبي أكون كذا وكذا وكذا ، بس لازلت رغم كل هذا مقصره وايد ،
ماعرف شلون جي من جهة أحس براحة ما كنت أحس ابها قبل ، ومن جهة ثانيه أحس بالعكس ،
أبدا ما أرتاح بنومي ، مادري إذا يعتبر أرق ولا شلون ، يعني حتى لو بنام ما أحس إني نمت وارتحت بالنومه ..

~

كنت قاعده أشتغل ع شي مسويته بس مادري إذا بكمله وبوزعه ولا ، جي أذكار الصباح والمساء بس أحاول أخليه بشكل مختلف شوي ،
يعني بدل لا يقعد الواحد وقت فراغه بالدوام جي متملل ما يدري شنو يسوي ، يمر عليهم ويقراهم ،
وغيره ، سبحان الله يمكن ينتفع ابهم ولو شخص واحد ..

اوووو الحمدلله قمت ماخذه عالشغل أكثر ، استوعب شوي شوي نوعية الشغل واللي يصير بالأفرع ،
بس كله كوم وسالفة التلفون كوم ثاني ، مادري ليش ماحب أرد عالمكالمات ، ودومه نحيس لا يحول ولا يعلق المكالمه ولا يظهرلي أسامي ،
ع قولة ربيعنتي بما إني لازلت يديده ، من زودها المكالمات اللي اتيني الحين ، ونصهم غلط !.

وايد شغلات تضحك ، ووايد شغلات نتعوذ منها ، يعني سوالفهم شلون تصير أحيانا ،
وكيف البعض معادي الثاني ، أحس مادري شلون متفيجين ..

~

جنه كل كلامي صاير عن الدوام ، ملهيني وايد ، ومنه التهي بغيره من أمور ..