دير دياري ~ يوميات

[أنامل قلب]

اليوم : عساس انه الاثنين ..
المود : .. .... .~
الموضوع :

ماكو رايحين رادين من الدوام للبيت ومن البيت للدوام ولا جديد يستحق الذكر عموما ،
اممم بس اليوم اشوه عن قبل بالدوام ، بديت أدخل بأجواء الشغل أكثر الحمدلله ..

الحلو ان الواحد يظل يشوف الناس ويتعامل مع الكل حتى من غير احتكاك مباشر ،
يعني تشوفون طبايع الناس ، هذا شلون يتكلم وهذا شلون يتصرف ، هذا يعصب شوي ،
هاك يسولف ويضحك ، وغيرهم يتكلمون عن شغلات أحسبها مضايقتهم .!

بكل شي أظلني بعيده ولله الحمد ..

,

في شي يضحك بالدوام ، وهو إني ماحب أستخدم اللفت ،
الحمدلله بالطابق الثاني فما يحتاج أصلا ، السلم أسرع وأسلم ..

بس اليوم كنت محتاجه أسير الطابق السادس ، وللحين ماعرفله عدل اصنصيرهم ،
دخلت كنت بروحي ، ولا اشوفه بدل لا يصعد ينزل للطابق الاول ، ودخلو اثنين ،
ورد نزل للباركنج ، طلعو الاثنين ودخلو ثلاث ، وانا بنت بروحي مستويه جي ..

رجع يرتفع قلت بخاطري " يالله الحمدلله وأخيرا رايحين فوق " بس لقيته وقف مره ثانيه عالطابق الاول ،
طلع واحد ويو بيدخلون جيش ما شاء الله ، واهني طبعا طفح الكيل ، داشه روحي ورجعت ابـ درزن ،
طلعت عنهم بسرعه وانا كاتمه الضحكه من زود ماكنت مستغربه ، ماكنت مستوعبه شلون جي من صجهم ،
اتأخرت عالحرمه عالفاضي ، لو كنت رايحه بالدري أكرم لي الصراحه ..

رديت جازفت قلت بنطر مره ثانيه ، انفتح اللفت الثالث وسيده دخلت مع وحده قبل لا نتفاجأ ابـ أحد ،
والحمدلله هالمره سيده وقفنا عالطابق السادس بـ سلام ..

بالاخير ، تعلمت إني ماجازف للمره الثالثه ..

~

بنت عمي كانت تسولف معانا ـ لمة أهل ـ عن العبي وجي ، فتقولنا شلون انها رايحه محل عبي
وتشوف موديلات عجيييـــــبه ، فـ تمت تكلم الريال بالمحل ، اونه : شوهادا عبايا كله ماتعرف هادا مافي زين ..
تقولنا إنه رد : والله ماما أنا في مالوم ، شوفي أنا زوج مال أنا في باكستان لو يلبس هادا شكل انا سوي موت / لول ..
شو ضحكنا ، اونه يقولها : انا في مالوم انه هادا كلو هرام ، بس شو سوي هازا بنات يبي هادا شكل ..

ماعرف شو أقول الصراحه !.

[العجيبة]

~

بنت عمي كانت تسولف معانا ـ لمة أهل ـ عن العبي وجي ، فتقولنا شلون انها رايحه محل عبي
وتشوف موديلات عجيييـــــبه ، فـ تمت تكلم الريال بالمحل ، اونه : شوهادا عبايا كله ماتعرف هادا مافي زين ..
تقولنا إنه رد : والله ماما أنا في مالوم ، شوفي أنا زوج مال أنا في باكستان لو يلبس هادا شكل انا سوي موت / لول ..
شو ضحكنا ، اونه يقولها : انا في مالوم انه هادا كلو هرام ، بس شو سوي هازا بنات يبي هادا شكل ..

ماعرف شو أقول الصراحه !.

في الصميييييييييم




انامل دوام شو ؟ ما شاء الله لحقتي تتخرجي من الجامعة ؟!

[أنامل قلب]

لا شو تخرجت بعد ، تراني كبرج / صباح الخير عجيبتنا ..
بس يقولون إني ظهرت من الجامعه ولا كملت حتى يومي هذا !.

+ للحين مادري جان بكمل ولا ، يعتمد ..

[العجيبة]

ههه ادري انج كبري لوول عشان جي استغربت كيف اتداومين وانا احيد انج فالجامعة !
كملي كملي يمدحونها الدراسة ... الا اذا تبين تستوين اينشتاين > تخيلي دكتورنا يقولنا : تبون درجات شدوا حيلكم ما تبون استووا شرات اينشتاين وخلاص ... خخخ

عالعموم بالتوفييق ... حتى الشغل حلو .. خاصة اذا في مكان تطويـري مب روتيني ...

--- --- --- ---


اليوم : الثـلاثـاء

التـاريخ : 17-11-2009


الموضوع : سواالف


بكــرة يصادف العيد الوطني الـتـاسع والثـلاثيـن في سلطنة عمان ...

أخوي متصل الصبح يقولي happy birthday Qaboos لوول

والمنتخب العماني احتفالا بهالمناسبة مستضيفين البرازيل في لعبة وديّة ...
لقيت وحدة قبل المباراة تقول : أهم شي ما يفوزون أكثر عن 7 !!! >> شغل مغايض اونه
المهم كان فخاطري اسير اشوف والله رحمني رقدت وما حسيت الا عقب ما خلصت المباراة ، فازوهم 2 - 0 والفرحة مش سيعاااهم مثل ما يقولون خخخخ !!


وبهالمناسبة بعد فيه اشاعـة تضـحّك منتشرة : اونه السنة اليايـة بيستـوي العيد الوطني الأربعين ...
والرئيس اذا كمل 40 سنة معناته بيستوي امبراطور .... ههه تخيــلوا بسسس ...
عقب بيتغير اسم الجامعة : جامعة الامبراطور قابوس ههههه عجيييب والله


اممم شو بعد ...


اسوأ شي استوى اليوم : خذنا درجات احدى مواد البرمجة ... وانا وربيعتي مزفتين صح ... يايبين D ولله الحمد ...
بس الشيء السيء ان ربيعتي راحت تحذف بـالW وانا قبل اقولها عندنا مجال نعدل اوضاعنا تراه الا اول امتحان ...
وما طاعت تقتنع ... اونه هالدكتور سخيف وما اتحمل اشوفه اكثر !!!!!! وانا اقولها : هالدكتور لو يرسبني برجع اعيد وياه من كثر ما هو عجييب!! خخخ
كانت اتونسنـي فالدرب ونحن سايرين اللاب .. واحيانا هي اللي توعيني اصلا !!




امممم


أهم ما في الموضوع : ان باااجــر برجع البيــت ... مليت والله ... كل اسبوع نقول خلاص بنخلص الاسبوع الياي ... هانت هانت ...
لا الكويزات تبا تخلص .. ولا التستات تبا تخلص ... وكل شيييي ما بيخلص ..... فقررت اسوي طاااف وارجع استمتع بالويكند :)

[أنامل قلب]

^ احليلهم ، أحب أهل عمان !.
وموفقه دوم باذن الله ، حلو الدايري اللي كتبتيه ، غصب خليتيني اتخيلج وانتي تطبعين هالكلام =]

~

اليوم : الاربعا ..
المود : .... !.
الموضوع :

في شي وايد ونسني أمس بالدوام ، تخيلو دوم ينزلني الوالد بواجهة المبنى ، بس هالمره قالي بنزلج من الصوب الثاني ،
المهم صادف اني كنت متأخره شوي هاليوم ، فيعني عادي نزلت وسيده رحت صوب المبنى المعني ، ولا فجأه !!.

شفت وحده مرت حذاي ، وجي لكمن جزء من الثانيه حسيت إني لمحت شي غريب ،
لفيت صوبها ولا لقيتها نفس الشي تطالع مستغربه وكأنها تقول اشفيها هاي تطالع جي لول

تخيلو منو طلعت ، صديقه عزيزه علي وااااييييــــــــــــــــ ـــد وايد وايد وايد ، أياااااام والله ،
كانت من الشله إلين سادس ابتدائي ، وعقب صارتلها ظروف خلتها ترد اليمن ، المهم ان رجعت لمن كانت بأولى ثنوي ،
بس من وقتها ماكنا نتواصل وايد ، مادري ليش صدق بس جي التهينا وبنفس الوقت يمكن بسبة طول الفتره اللي افتقدناها فيها ،
المهم إنها طلعت مثلي هاليوم صادف انها تنزل من هالجهه ومثلي بعد يايه متأخره ، صدق سبحان الله كيف حكمة ربي بتقدير الصدف ..!

الحمدلله ، واليوم بعد مرت علي شفتها ولحقت اسولف معاها أكثر "شويه" ،
كنت قايلتلها قبل بالمسج الدبه شلون ماعرفتني وانا عرفتها ، تقولي اونه من النظاره ، ترقعها P=
وما بقول بعد شو قلنا وكيف رمسنا ! > اللي يسمع يقول ميتين يبون يعرفون شو السالفه =#

صدق صدق صدق الحمممــــــدلله ، وتخيلو انا واهي بنفس الوقت طرشنا مسج لـ رفيجتنا الثانيه نقولها اونه : حزري منو شفنا اليوم ؟
لول سبحان الله ، مع انها ابتعدت عنا فتره طويله ، بس بعدها احسبها مثلنا ، نفس الأفكار ونفس الأسلوب ، حبيبتي والله ..

على فكره أنا صديقاتي القراب كلهم من جنسيات عربيه مختلفه ، والغريب إن ولا وحده منهم عيميه لول ولا حتى بعرج من بعيد !.

~

وووو في شي بعد جي مادري وين احطه ، بس احسه هم عالقلب ،
والله كيف لمن تحسون إنكم تشوفون شي ولا تسوون شي يعتبر قلة احترام ، وممكن نقول عيب ..!

مع ان ما يخصه يمكن ولا له علاقه فيني ، بس شي وايد استغربت منه لمن شفته ،
تخيلو في اثنين ولا ثلاث موظفين عدنا هيأتهم تبين انهم مواطنين [ كندوره ويتعصمون ] وصغار بالعمر ، بس يشتغلون مراسلين =[
والله شكلهم صدق صدق صدق غلط ، إما انهم مواطنين صدق بس يمكن ماعندهم الشهاده ولا لقو وظيفه ،
أو يمكن يكونون بدون ، ماعرف ، بس ماااعرف شو استوالي امس ، تخيلو كنت يايه بدخل المكتب ولا الفراش حسن ـ هندي ـ
يقول لواحد منهم كانو مارين من حذاي اونه ييب كاكاو تويكس حق الموظفه الفلانيه ، وانا + ..

واليوم بعد نفس الشي يايبلي اوراق ، اول مره اتعامل معاه ، بس حسيت نفسي صغيره والله جي مادري شلون ،
وايد وايد وايد استحيت ..

أحس مهمن كان ، صح الشغل مب عيب ، بس لازم يكون في تقدير أكبر لهوية الشخص ببلاده ،
مول ماحبيت هالشي ، كل ما اشوف احد منهم احس جي اتنرفز وافتشل واحس كأني أساهم بـ قلة احترام !.

يمكن يكون تفكيري غلط ، مادري ،
بس هذا اللي احس فيه ..

[مــهــابه]

اليـوم :

~ الخميس

واللي مـآيظهر شسمه ...... =P


المزآج :

عـآل العـآل ولله الحمد =)


المـوضوع :


بـتكلم عـن آمس وشـوّيه من اليـوم ، مثـل مـآتعـرفوون آمس كنـآ مخططين لـ بـآربكيــوو ، خلصـت دوآم ع السـاعه 12ونص لـين رجعـت وبدلـت و ..... حطيت رآسي السـآعه 2 ونص يـلين 5 وشـويه " عـوضـت كـرآف آسبوع "

قـمت من الرقـآد وآشـوف خـوآتي الـ 3 متـصلين ورآ بـعض ، بين كل وحده دقـيقه يمكن جـآن آستغرب شـ هالحب اللـي نزل فجأه عـليهم

بـيني وبيـنكم آنـآ آتـروع ، آتحرا شي مستوي


المـهم

كـنـآ مزحـومين وآيد ، هذي تـقول آختـآري آي فسـتـآن آلبس ؟ والثـآنيه اطرش صور اللي بـّتلبسه ، واللـي تدق عدلتـي الزفـه ولآ ؟ واللـي للحيـن مـب عـآرفه وين بـتتعدل
آقولـهم آنـآ جريبه مب سـآلمه منكم وبعـيده نفس الحـآله مقـهوريـن من بـرودي وآيد

الـهم خّـلصت من سـآلفه خـوآتي ، بدت آسـتعدآدات البـآركيــووو

وطبعــاً صديقـآتي كلـهن هجـووووم ع غـرفـتي ، آعـنـآد يبون يقصـون بصل فيــهـآ ( دآيماً ف حزه الطبخ آتناجر وياهن ، يبوني آقص البصل وآنـآ مستحيييييل ، آيبون لي قفـآزات ، قلـت لهم لآتحاولوون آنسووو )

المـهم مثل ماقـلت كل وحده آتفيزرت ف الغـرفه عندي وسوآلف وضحك وآنزهب الديـآي واللـّحم والـرووب ...


ع السـآعه 8 ونص طلـعـنـآ بـّرع ، خذنـآ زآويه حلـوووه ف الـرمله ، وبديـنـآ آنولع الفـّحم ووو جـآن آتينـآ وحده تقـول عن نفسـهـآ ( آنـآ مديره سكن ) آونه محد يشوي اليـوم آحنـآ عندنـآ آحتفـآلات باليوم الوطنـي

عـآد آتخيلـوو آحنا مخططين من آسبـووع ومزهبـين وآخرتهـآ مانشوي ؟ قلـنـآ له اوكي ، وهي يـآيه تبـآ تضـآرب يعني

طـآآآف

جـآن نشـووي ، وقعدنـآ من 8 ونص ليـن 2 وآحنـآ بـّرع ، ونـآسه وآآيد

ضحـكنـآ ، سـولفـنـآ ، كنـآ يـآيبين اللآب توب وحـآطين سمـآعات == > نسوي جّـو لعـمـآرنا

وصلـت الغـرفه وآنـآ هلكـآآآنه خلآص ، يلست آرتبهـآ وجيه وحطيـت دخوون ، لآنهم وصخوها حقي ومن الخـآطر

وع الـ 2ونص ، 3 آلآ آنـآ ف سـآبع نـوومه يلين اليـوم السـآعه 10

والحيـن ورآي دّرب وع طـول بـروح آتحنى ، وبالآحد عندي آمتحان ميد =(


مـآفي وقـت


هـمسه :


~ / ( مـوزه ) يـآ ~ محمـد
بآيدك ( آماااااااانه )

.


.

.

[أنامل قلب]

اليوم : الاحد ..
المود : ..... !.
الموضوع :

اممم ، مادري والله ، مشغوله وماني مشغوله بنفس الوقت ،
كيف لمن تحسون بإنكم فعلا ماعندكم وقت لشي ، وبنفس الوقت كله تحسون بـ فراغ بالوقت ..!

^ شوللي قاعده أقوله مادري ، اللي هو يعني ..

~

اممم الحمدلله امس لحقنا تشرينا للعيد ، وتقريبا خلصنا ،
بس وايد انكسر خاطري امس من اشيا شفتها ، والله أحس صدق تعبت نفسيا ،
اليوم اكلم دموع قلم أقولها صدق قمت أشك إني غلط وكل هالشغلات عاديه ، ولا شلون !

جي أحس صاير عندي تشبع موطبيعي ، يعني مثلا قبل اشوف واعدي علي اشيا من غير لا علق ،
ماحس أصلا يناسب إني أعلق ، بس الحين عادي تفلت مني كمن كلمه من غير لا أحس ..

~

آآاااااخ !

أحس خلاااص والله بنفجر ، مادري جي أحس بكبت مو طبيعي ،
أكثر شيء أحاول أركز عليه ، أكثر شي أحتاجه ، أهو نفسه أكثر شي مقصره فيه ، كيف برتاح !

~

وإي صح ، قاعده اكتب وانا لابسة كندورة ابوي ههه ، بس ماقدر اقول ليش السالفه بطول ،
وشسمه بعد ، شو بغيت أقول !

امبلا صح ، يوعانه !.

[أنامل قلب]

اليوم : الثلاث ..
المود : .. .... ~.
الموضوع :


امممم ، ماعرف شقول ، بس صدق صدق صدق أبي أخفف فيني هالخجل اللي معقدني صــــــــــــــــدددددق ،
اففــــــف ، تخيلو موقادره أخلص الاجراءات مثل الاوادم بس عشان اوني أستحي ، والله إني أبط جبد عمري ..
احليله جواز الريال صارله يومين عندي ، اتخيل لو ضاع ولا شي ، بتكفخني إ ..!

~

ضحكتني الحرمه اليوم ، يمكن عشان اسلوبها بالكلام وقعدة البنات ،
أول مره اشوفها بس شلون تسولف عادي ، جي فجأة صدت صوبي تسألهم : ومنو هالصغيره > جي باسلوب اللي يتعامل بلين وود ^^"
حسيت عمري ياهل ، صارلي سامعه هالكلمه عشرين طعشر مره ، صغيره !.
مرات اضايق شوي ، أحس مادري وايد شايفيني صغيره ،
يعني مابي جي يتعاملون معاي عساس إني اونه يعني .!

يمكن مقارنة ابهم امبلا صغيره بس مادري ليش أحسهم مبالغين ^^"
أظني يتحروني جي توني متخرجه من الثنوية ، مع اني احس العكس يعني مبين علي عمري ..


~

في شي ماحبه فيني ، بس ماعرف شلون أشرحه ..!

اممم ، مادري كيف بيكون باجر ، بس ان شاء الله ما يكونون جي داشين ابـ بعض وزحمه وسوالف ،
مادري حتى إذا كنا بنتم بالقسم ولا بنتم رايحين رادين باللي مسوينه ،
ان شاء الله بس ما احصل احد يزن فوق راسي تعالي وعادي ولا تستحين والخ الخ ..

~

رسالة لأحدهم خلف الشاشه :
كيف لا أحزن والدنيا هي الدنيا ،
كلها اختبارات ، وكلنا عايشين قصة امتحان ..

...

[أنامل قلب]

اليوم : الخميس ..
المود : ...... ... .. ....... !.
الموضوع :

امممم مادري محتاره وايد ، بس الحمدلله مرتاحه من هالناحيه كثر هالـ وايد ..

تعرفون ، وايد قمت آخذ موضوع الـ ظن بجدية ، يعني أهتم به واعرف بتأثيره قبل ، بس الحين غير ،
وايد وايد وايد قمت الاحظ تفاصيل بسيطه تكاد لا تذكر يوميا ، وكلها تكون مثلا إن نفسر شغله على إنها بديهيا تعني شي ،
بس ما يكون هالشي صحيح ، والتفسير بسيط جدا ، مجرد إن الموقف اتخذ مسار آخر ، عاده كيف بشرح هذي مادري ..

بس الجميل إن هالتفاصيل الصغيره تصير لنا بالمثل ، كلنا نعيش هالأمور ،
لكن قليل منا يفتكر يحط ابـ باله هالأشيا لمن يتعامل مع الناس ..

المفروض نكون سلسين بالتعامل ، مرنين بتلقينا لأي أمر ، ونحط كل الاحتمالات من غير لا ننشغل ابها ..!

~

أمس كان يوم جميل ، قضيت اغلبه مع ربيعتي بالدوام ، الحمدلله الكل كان رايح راد ع كيفه ومحد تم يلح علي ولا غيره ،
بس شوي تفاجأت بعدد الشباب تحت بالطابق الأول ، ماكنت متخيله إن ممكن يكون عدنا هالكم الهائل من الجنس الخشن عدنا =#

يمكن لأن كذا اداره وكل اداره لها اقسامها ، اللهم من باب المبنى للمكتب ومن المكتب لمكتب ربيعتي والعكس لباب المبنى !.

وكانا بدينا إجازتنا ، ما بنرد انداوم إليـ الأحد الياي بعد اجازة اليوم الوطني ..

~

{ ربنا آتنا من لدنك رحمة وهيئ لنا من أمرنا رشدا ..

[أنامل قلب]

أحب هالموضوع !.

~

اليوم : الثلاث ..
المود : وايد وايد وايد ..... .. .. ... !.
الموضوع :

مادري ، صدق صدق مادري ، مشاعري مخربطه وايد ،
بكل علاقاتي حتى مع نفسي ، وفي موضوع وايد معقدبي ،
أصلا كل شي مستوي معقد ، مادري شلون أييبها ..

تعرفون شلون لمن تعيشون تتواصلون مع الكل عادي ،
بس من داخلكم كل شي مخربط ، كل شي غير مستقر ،
بحاجة لإني أتكلم وأكتب وأرسم وألون وأشخبط وأخربط وكل شي ،
لكن مادري ليش من أبدي بشي من هالأمور ، أحس إني ما أرتوي ،
يعني ما أحس بـ أثر الحاجة اللي منها لجأت لإني أكتب ولا أرسم مثلا ..

مثل لمن اتون بتحطون رد بالواحات على موضوع لفتكم وايد ،
بس تحسون إن الرد ما يناسب أو مو هذا اللي تبون تكتبونه ..!

~

ودي أشق عمري !"

[حلم الطفوله]

اليوم : الاثنين

المزااااااااااااج : صار رااااااااااااااااااايق

الموضوع : مممممم أهم شيء بأحداث اليوم إني علمت ناس معنى الاحترام

صار موقف استفزني واااااااااايد .... وأول مره أتخذ موقف بهالجرأه عشان أعلمهم إنه إلي سوووه سخافه وقلة احترام

والأحلى من كل ها ........ إنه الكل استانس على تصرفي وخصوصا إخواني ( فديتهم ولا خلاني منهم يارب )

أنا حبيت أوصل لهم فكرة ( من تواضع لله رفعه ) لأنه بعض البنات الله يهديهن ما يفرقن بين معنى الاتكيت و عادات العرب

يعني تشوف تصرفات تخليك تعصب وتقول الله يهديهن ،

بس لما يكون هالتصرف يخص المكان إلي إنته متواجد فيه فلازم تواجه الأمر بحسن تصرف يخليهم يعرفون إنه الحركه إلي متعودين يسوونها ما ترضي الله

المهم .... اليوم كان حلو وأحداث هالأسبوع أحلى وأحلى ، والإجازه صارت أحلى وأحلى وأحلى بالناس الطيبين إلي اجتمعت فيهم :)

[مزن هتان]

الثلاثا
المزاج : عادي

عيد و مزن قاعده في دبي ربيعاتي مستغربين كل ما اكلم وحده اونه ها فالعين ؟
هـ العيد مالي خاطر شي، اقولهم عقوني فالبر يوميا العصر و مابي شي زياده

خالتي تكلمني عـ البي بي تقول خلنا نسير العين باجر من الصبح و نرجع المسا
والله مالي خاطر دخل الشتا و بديت البيات الشتوي مالي أنا =)
ماريد ابتعد عن أختي هـ الفتره و أنا عارفه انها تعبانه نفسيا و مش قاعده تقول اللي بخاطرها

غير ذلك بابا ساحب علينا هـ الاجازه بالقو !!
هاليومين وايد نتضارب أنا و أم سيف وايد تحارشني و أنا بسرعه ألبق شكيت انها حامل لأن نفس
الحاله تجيها لمن تحمل الدبه ماعرف ازعل منها

[أنامل قلب]

اليوم : طلع اليوم اهو الثلاث لول ^^"
المود : اممم !.
الموضوع ..

مادري ، بس وايد استانست اليوم ،
الحمدلله ..

~

امممم في شي أسويه لمن أحس إني محتاجه لـ نصيحه ،
أفتح كتاب الله على أي صفحه جي ، أو أحط ابـ بالي أي رقم بسرعه من غير لا أفكر واقراها ..!

صدق صدق واااايد هالشي يريحني ، والله دوم أوقف عند آيات مادري شلون ،
يعني تكون مرتبطه بنفسيتي وحاجتي بشكل مو طبيعي ، صدق للي ماجرب يسويها ،
سووها باقتناع تااااام ، وكأن رب العالمين يناصحكم جل شانه ..

جي سبحان الله وايد بترتاحون ، مادري كيف أشرح ..!

~

صدق صدق صدق وااااايد مقصره ..

[أنامل قلب]

اليوم : الاربعا ..
المود : ...... .... ... !.
الموضوع :

ماكو ، البدايه كانت سيئة ، وقعدت من النوم متأخر بما إني أمس خربتها من الخاطر ، ان شاء الله بس ما يأثر وايد ،
وشسمه ، تريقت وانا مجابله اللاب ، وللحين مجابلته أنطر شغله ، وعساس بنسير نتغدا برا ، واحتمال نحوط شوي ،
بس ماودي نحوط ، ان شاء الله نرد بسرعه والحق أسير أفصلي عباتين بما إني كل يوم أأجل ، أو بالأصح ما ألحق ..!

المهم ، خارج النص ، قمت أحس فعلا أسلم شي إن الواحد منا ما يكترث لراي غيره ،
ما أقصد الآراء العاديه ، لا لا أقصد يعني إن من يبي يسو الآدمي شغله ممكن تلقاه يتردد لأنه مو واثق من راي الناس بهالخصوص مثلا ،
مادري اذا التفكير هذا صحيح ولا العكس ، بس صدق أحسبه أسلم وأريح شي ، خاصه إن تصير تتعامل مع نفسك والغير بأريحية أكثر ..

~

المبدأ الوحيد اللي مقتنعه فيه صدق ، إن الأساس دومه المفروض يكون ثابت عندي ،
وتعاملي مع الناس ما يغير شي ، لأن ردات فعلي بالأخير ما بتكون إلا مني ، بغض النظر عن شخص اللي أتعامل معاه ..

مول مو مقتنعه بمبدأ إنك تعامل الناس بالمثل ، يعني بالطريقة اللي يمشي عليها وايدين ..

~

وشو بعد ، اممم امبلا صح ، بسير أتحنى باذن الله ، وناسه ،
بما إن هاك العيد تعقدنا من الزحمه قلنا ما شي مجال نجازف مره ثانيه ،
وفوق هذا أساسا شغلهم بالعيد ما يكون مثل الأيام الثانيه بسبة الزحمة ..!

وبس ، وايد رمست ،
ماعليه تحملوني شوي النفسيه اليوم ما تساعد !.

[أنامل قلب]

اليوم : الخميس ..
المود : ..... .. ......... !.
الموضوع : سوالف ..


اممم كالعاده ، إما إن ما نظهر موليه ، أو الطلعات تصير زايده إلين نمل ،
واليوم بعد عساس بنسير نتحنى بس ماشي اختي مرتبطه ابـ شغله واحتمال نأجلها للسبت ،
يعني اليوم وأخيرا في مجال أسير أشوف محل العبي ..

~

صارلي موقف يضحك مع الوالد ، ترى جي أحطله زيت الحبه السوداء ع ظهره وجي لأن يتويع ،
فـ كل مره عادي تكون الغرشه في لها غطا ثاني جي بفتحه صغيره عساس ما ينجب منه وايد ،
يعني أتم اضرب الغرشه بالقو عساس ينزل منها شوي شوي ، بس هالمره فتحت غرشه يديده
اشوف مابها غطا صغير ، يعني عادي فتحة الغرشة العوده ، وبالتالي لازم احط من الزيت ع ايدي اول
عساس ما ينجب منه وايد ..

المهم ، كالعاده آخذ واعطي مع الوالد وسوالف وجي ، واقوله بعد شو ها هييج الغرشه أحسن وجي ،
المهم أول مره جبيت من الزيت شوي ع ايدي عساس امسح فيه مكان الويع ، وهيك كل شوي اوزع الزيت ،
بس حضرتي نسيت إن الغرشه مابها غطا ثاني ، فلمن ييت اجب الزيت للمره الثانيه جلبت الغرشه بالكامل وبالقو
يعني مثل ما كنت اسوي بالغرشه الجديمه ، وكــــــــل الزيت انجججــــــب مـــــره وحــــــده لول

ما استوعبت اللي صار لكمن جزء من الثانيه ، ولمن استوعبت شهقت وصرت جي ، وعقب أوني أرقعها ،
أقوله امبيه شو صار ، نسيييــــــــــــت ..!

بس صدق ماخله شي ما خيسه ، سرير الوالد ، خيست عمري ، وجسمه كله صار زيت بزيت ، حتى هدومه ،
اصلا هالزيت تحسونه جي وايد دهني ، قفطت بالقو ، وتم يتحرطم عليه اونه شو ها ، ومو قادر يتحرك ههه ..

كلهم يو عدنا من الاصوات الجميله ، شوي نضحك وشوي نحط ع بعض وشوي نزقرهم ،
الوالده واختي لمن شافو المنظر ما قدرو ، يضحكون شوي ويطنزون عليه شوي ، والوالد يقولي
افف احس جسمي مادري شلون صاير ، احليله والله ابوي ، صدق وايد وايد وايد أحبه ..

~

أمس تم يعلق علينا ، اونه في أحد يتغدا هالوقت / كنا رايحين لمطعم ايراني بالفستفال ،
ووقتها صدق كان المكان صوب كوستا زحمه مو طبيعيه ، مادري شو كان عندهم اظني في عرض هاك الصوب ،
بس وااايد كان زحمه جي لزقه ابـ بعض ، ونحن نبي نظهر من الباب من هاك الصوب ، والحمدلله ماظعنا ^^" ،
ووو استانسنا عقب ، قليل ما نظهر نتغدا برا ، عالأغلب يكون عشا ، بس هالمره جنه جمعنا الغدا والعشا !

+ أحس هذول اللي بالمطاعم الإيرانية يستانسون لمن يكلمهم أحد عيمي ،
وبما إن الوالده معانا فما قصرت إهي تمت تاخذ وتعطي معاهم ..

وووقبله كنا بالستي ، وقبله بدبي مول ، أحس خلاص صار عندي تشبع ،
ماحب لمن أظهر كذا مره جذي ، حتى نومي اخترب ، وشسمه بعد ..

~

اممم وايد قمت أحس ابـ أشيا غريبه ،
في شغلات ماحب أشوفها ، وشغلات ثانيه أتفاجأ ابها ،
مادري كيف أييبها ، جي أجز ..