دير دياري ~ يوميات

[مايهزك ريح]

^
كنت اتحسب عمري مخرف .. طلعت مزن .. مب منها يحليلها من الحرق ..
سلامات اختي مزن .. ما اتشوفين شر ..

[مزن هتان]

خطاب & ما يهزك ريح : =) انزين يعني بغيت اعترف هني عن خاطري
ماني مخربطه و لا انه الحرق مأثر عليه هههههه، الشر ماييك أخوي مايد

زاده الظهر كنت اتألم في اثنين هني يحشون فيني xD

أعترف
اني راده من العياده =)

بشرد عن أخرب الموضوع

[مزن هتان]

الويك اند

يوم الخميس رحنا الورقا أنا و خواتي كلنا بس ما طولنا حشرتهم أريد أرقد
4:45 فير اليمعه طيارتنا كانت أنا و شوق لـ مصر، زين لحقنا عـ النداء الاخير قاعدين نتفرفر
اممم رحنا و شفنا أمي و جان نستانس من كنا فالطياره كنت أقول لـ شوق أنا بودرج عند ماما
و برد دبي تقعد تصرخ ما تبا =) تعرف انه ملل منقرصه قبل
يوم الاحد7:30 بتوقيت مصر 9:30 بتوقيت الامارات كنا عند مطار القاهره
عاد تعالوا مسكوا مزن =( ما شبعت من أمي اريد اقعد معاها لين ترد و شوق عادي عدها
صحت شوي دخلنا المطار و كنت اتلفف "كنت اكتشف مطارهم و أخيرا سوا مبنى يديد" جان
تقولي شوق تام لا نتأخر بعد عن تروح علينا الطياره
وصلنا 3 لعوزتني فالمطار تدلع وايد و تكلم كل حد عادي
كلمت ماما المسا قبل ارقد صوتها كان وايد تعبان، كانت راده من المستشفى
سكرت عنها صحت زياده تقولي مزن لو قعدتي معاي لين ارد "وايد ضايجه و متملله خلاص تبي ترد"

ربي يشفيها و يعافيها

[رمــش الغـــلا]

^ الحمدلله عـ سلامة أمج مزن ..~


برمس عن الويكند اللي طاف ..

كنا بزي من الخاطر

الخميس .. دآومت الصبح طلعت الساعة 2 على طول رحت اتعدل حق العرس ومن وصلت البيت بس اطمنت انه شالين شنطتي وفستاني وعباتي وركبت السيارة على طول لول ..
ووصلنا العين بـ السلامة .. نزلنا الفندق وشوي وسرنا القاعة .. =)
"الله يسعدهم ان شاء الله المعـآريس" بس صدق صدق حسيت بالفرق فالعادات والتقاليد يعني العرس كل شي كان عالسرييييييييييييع اول مرة اروح عرس جيه

....

وطبعا الكل رد الفندق ورقدنا 4 ساعات بس.. ومن 8 الكل نـآش ومصحصح ..



اشوف ولد خالوتي الصغير أول واحد ياي يدق باب الفيلا يدور أخوي الصغير .. =)



وسوينا مكالماتنا واتلبسنا وكلنا سرنا الـ pool
يلسنا ويبنا الصغارية يسبحون =)



الا غلوية غمضتني ناشة وطلعت ناسية ثياب السباحة وتمت اصيح لين اخر شي اقتنعت انها ادش شوي عن خاطرها لول ..



والثلاثي المرح نشوا من الرقاد وكل واحد بـ كشته وبجامته ياي لول ..



وعقب هذا كله .. اتغدينااا كلنا واحلى مافي الموضوع انه الفندق انصد يمين ويسار كل العايلة الكريمة هناك لول ف خذنا راحتنا يعني =)

وعقب ما خلصنا من الغدآ ..

طلعنا والوجهة الاولى كـآنت لـ جبل حفيت ..

والجو رووووعة =)



ومن بعد جبل حفيت نزلنا صوب المبزرة خذنا لفة بس .. لانه وايد تغيرت عن آخر مرة سرتلها احس الواحد ما يحس انه في بلاده مول ><








ومن عقب المبزرة .. سرنـآ ويا اخوي ركبنا سيـآكل واحلى شي المغامرات هني لوووووووووول
والمكان كان فاااااضي عكس داخل المبزرة =)



والزعيم الصغير اول واحد ركب ..

وعاد انا مافيني قوّة اختي اللي اصغر مني اتسوق وانا حذالها لول ..

وعقب ها كله اخوي قال بنسير المول ونحن كيف لااء ><
عبينا خايسة =(

وكل وحدة طلعتلها عباة الثانية واللي ما عندها دبرت عمرها لول .. لانه مش كل الاغراض في سيارة وحدة

وسرنا والوجهة الاخيرة كانت للـ بوآدي مول ..!




^__^

[عهد الوداع]

رمش

يا سلام كشششخه ....^^
اهم شي انكم استانستوا وغيرتوا جووو

[قصايد غلا]

مزن : الحمدلله على سلامتج .. الله يعافيــج لج أمــج و يبعد عنها المرض :)


=========================


رمّــوووش : اللـــــــه كــشخـة .. ماشا الله عليكم شكلكم استانستوا

حبااااايبييي الثلاثي المررررح .. حبيبتيييييي حمدااااااايــــة



و على طاري العبي عااااااااادي دوم تستوي هالسوالف يوم نسير أماكن بعيدة لووووول

بس عااااااادي محد يعرفنا =p ، أحلى شي اليمعة

[مــهــابه]

رمــوشه :

شـو قـلتج آنـا =p

آبـى آروح البـوآدي ، آلـعـآبهم حلـوووه لوول ، هاليمـعه بّحن عـسب يودووووني

.

.

[طير الغرام]

اليــوم : الثـلاثا بس برمـس عن أمس [ الاثنيــن ]
المـــود : ؟؟
الموضـوع : Tired

يــوم الاثنيــن أطـول يـوم وأخــس يـوم [ صــدق متعــب من ٩ ونص لين ٨ ونص ]
والقهــر كل أسبـوع أقول بـرقد عـدل اليـوم اللي قبلـه بس ماشي فايــده
وسبحــان الله بـعد كـل اثنيــن يظهــر فيني شي علـه ولا شي يعورنـي ولا أمرض ! [ من أمس حلجـي يعورني ]

اليـوم اللي قبلــه رقـدت يمكـن ٤ ونص الفيـر ! [ أو بـ الأحـرى يـوم الاثنيـن الفيـر رقــدت ! بطيــت لني كنـت أعـدل ع بريزينتيشن ]

المهــم فـ هاليـوم كان عندي تقديـم بريزينتيشن أنا وابنيـه معايــه [ الصراحـه أنا سويـت كل شي لنه هيه كان عندها امتحان يوم السبت وأنا لا
فـ قلتلهـا أنا بسوي كـل شي ،، وع أساس تقـرا البارت مالهـا قبلـه بــ يـوم بس فـ نفس اليـوم اكتشفت إنهـا ماقرتـه ]


و ع أســاس أنا جاهـزه وكــل شي بالنسبـه لـ البارت مالي وأتريـا البنت تـي الجامعـه عشان تقرا البارت مالهـا
بس !

صــار عندهــا ظــروف وما بتحضـر العيـاده من الأســاس أنا اهنيــه ارتبكــت زيــاده
وأوريدي وااايـد كنــت مرتبكــه لنـي ما أحب أشـرح جـدام البنــات والدكاتــره

صــح إني مريــت ع الموضوع كلـه لني أنا اللي سويتـه بس بعــد ما اتوقعـت هـ الشي يصيـر
ويوم رمسـت الدكتور قالي عادي قدمي البارت مالج بس المشكلـه الموضوع كلـه يعتمـد ع المعلومـات كاملـه
أمري لله قلت لـ الدكتور خلاص بقدمــه كلــه

والحمدالله مع إني صدق صدق كنت مرتبــكه
[ لـ درجـة إني أرجــف مادري ليـش وماحطيـت عيني لا ع البنـات ولا الدكاتره ياربي مادري متى بودر هـ العاده وكل شي يـكون بيرفكــت ]
بس الحمدالـه عيبهــم
والدكاتـره قالولي إنتي عنـدج ثقـه فـ النفـس لنـج قدمتيـه روحــج ،، جــان أستانــس

وغيــر الشغــل الطويـــل فـ باقي اليـوم جلعـت ضرسيــن + عقبـه كان عندنـا عيادة اليهـال وسويـت حشوتين وحده رصاصيه والثانيـه بيضا

يعني مـول ماكـان فيه مجـال نرتـاح اشوي ورا بعــض


أهــم شي إني اليـوم أووف وعوضــت ارقـاد يوميـــن

[تحفه]

دير ياري : الله يشفي كل المرضى و يعافي كل مهموم ويصبر كل الناس على مصايبهم بس خلاص الواحد يخاف من كثر ما يسمع عن الوفيات ;<

اليوم وايد حزنت عليج يا نوال الله يرحمج و يثبتج عند السؤال .. ماعرفج شخصيا لكن معرفتي انج حاربتي المرض الخبيث هالمده كلها يخلي الكل يتاثر و .. الله يرحمج ..

اخاف يوم اسمع عن حد ميت .. يتم قلبي مقبوض

[مزن هتان]

^^ آمين يا رب العالمين
ربي يعافينا و يعافي جميع المسلمين، الكانسر انتشر بطريقه فضيعه "الله المستعان"

بعيد عنكم عدنا السرطان وراثه بالعايله، بين سنه و الا سنتين لازم حد يظهر فيه

[رمــش الغـــلا]

عهودة ..

هي والله استـآنسنـآ صددق =)


مهـآبة ..

لول اشوف انا المول بكبره فاضي بس صوب الالعاب زحمة بس طبعا ما سرنا ..~


قصـآيد ..

هي والله عاد مواقفنا ويا العبي وآيد لووووول =)




* الله يشفي جميع مرضى المسلمين ..~

[أنامل قلب]

اليوم : من بداية الاسبوع لـ هاللحظه ..
المود : اممم ليس بسيء ولا هو بـ جيد ..
الموضوع :

الحمدلله مرتاحه لاختياري لأكثر من سبب ولأكثر من جانب ،
مع اني للحين بفترة تدريب ، وشكلها الفتره بطول بحكم نوع الشغل ،
يعني ع كلام المسؤولة يبالي يمكن سنه إلين أكون ملمة بشكل كامل بالمطلوب ،
ومن السنه اللي عقبها ببدي أشيا زياده ، تقولي صدعة راس ، بس مادري حابه نوعية الشغل ،
+ بيئة العمل والموظفين مريحيني وحبيتهم صدق ، الحمدلله جي المكان ككل مرتاحتله ،
استانس لمن ألقاني انحط بين ناس طيبه وأحسب فيهم الخير ..

وايد شغلات تصيرلنا مانكون عارفين ابـ سببها ، أو يمكن مانكون منتبهين لها ،
إن كانت خير أم سوء ، شو الحكمة من تفاصيل حياتنا هذي ،

بس بعد فتره وفتره تبدي كل حكمة تبان ، الحمدلله دائما ..

~

اممم وبعد للحين مادري هل آخذلي سيارة ولا أأجلها لشهرين ثلاث ،
ولا ادري اذا آخذلي شيء مقبول مؤقتا ولا بالمره آخذلي شي سنع يعيبني !

أحد يقولي خلج سنه ع سياره وعقب غيريها ، وأحد يقولي اختصري الدرب ،
لا تخسرين عمرج مرتين دام سواقتج حلوه ..

مشكلتي فاشله درجة أولى بهالسوالف ، يعني العلم بأمور السيايير ،
خلفيتي بهالأمور يدوب تكون مقبولة جان بجامل عمري ..

~

وايد كلام بخاطري ، لدرجة إني أظلني ساكته بأحيان كثيره ،
مثل اللي يكون مزحوم فوق ما يستوعب ، وتالي يصير غير قابل لابداء أي رد فعل شافي ..

~

جديا أفكر بسالفة المشروع ، عالأقل أكون لنفسي خلفية مقبولة ،
أنظم وأخطط مؤقتا ولو عالورق ، وعقب يصير خير بفضل الله .!

بالأول والأخير شيء أحبه ، ليش ما أمارسه ، ولو بمحاولة أسعد إبها ..

~

ربي يحفظنا ، ويجعلنا أصحاب قلوب سليمة ..

[مــهــابه]

اليوم :


الآربعـآ

( آخر آيام الدراسه ف الآسبوع بالنسبه لي )


المزآج :

مسـتآنسه =)


الموضـوع :

بغّـض الطرف عن الضغوطات ، وبغض النظر عن الزحمه اللي حولي والآشيـآ اللي صدعـت برآسي من كثر مـآ آفكر بهـآ


وبـغض النظر عن الآشيـآ المب حلـووه قـآعده تـصير آنـآ مستـآنسه


( حّـبيبي رآجع لي / وبـتفرح " عيوني "
فـي رّجعـته لـيّـه بـتنور الدنيــا

.

.

[رمــش الغـــلا]

اليوم :


الخميس

أحلى أيام الاسبوع لانه ويكند واخيراً )


المزآج :

مسـتآنسه وايد واااااااااااااايد "الحمدلله"


.........

من وصلت من الدوآم ، خبروني انه بو سلطـآن بيي عقب المغرب ، والكل بدا يتيمع فالبيت

ووصلوا قوم اخوي من بوظبي وواختي وبناتها كانوا عدنا واخر شي وصل بو سلطان ..
ضحكتني بنت أختي من زود ماهي مستـآنسة

قالت "اسم اخوي" يـآ .. حليلها نست تقول خالي عقب استوعبت ..

وكلنا سيدا عن السيارة

متغييييييير صدق 40 يوم خلته يسمر "تاان طبيعي" اقوله .. ورجيييم من الخاااااطر بعد

بس صدق ردت الاجواء والحشرة للبيت ..

[أنامل قلب]

^ الحمدلله ع سلامته ، وزين زين ترى السمار أحلى عالشباب ..

~

اليوم : لازلنا بالسبت ..
المود : .... .~
الموزوع : خربشه ..

اممم اليوم كان ممل جدا ، في شي سويته استانست عليه بس ما كملته ،
وووو ماعرف كله أحس ابـ لوعه من زود ماني ماكله شكر ، حلاوه على بسكوت على رطب على حلاوه .!

واليوم أول يوم أتغدا فيه بعد اسبوع كامل ، حتى أمس ماتغديت ..

~

اوووو كنت كاتبه اشيا بس مسحتها ،!
ماعرف من زود ما أحسني أبي أكتب قمت ماعرف شلون أكتب ..!




ربي يوفقنا جميعا ..