دير دياري ~ يوميات

[رمــش الغـــلا]

^ أنـآمل انا شراتج

اول ماشفت هالاشكال فالمول أقول حق اختي العودة يعني حتى فـ رمضـآن هالتحف موجودين !!

شو هااا الناس ماشي احترام مول وزحمة مو طبيييعييييية ..!

والله وايد مواقف استوتلي اليوم بس الوآحد يسكت أحسن لول ..!

"الله يهديييهم " ..~

[أنامل قلب]

^ على قولتج !

ربي يعافينا جميعا ..

[مزن هتان]

اليوم : من الاربعا
المزاج : =)

الموضوع
رقدت 5 الفير 6:30 نشينا تلبسنا مرت علينا بنت خالي
10 دقايق لين وصلنا المطار بركنا سيارتنا، دخلنا جناطنا تمشينا و تشرينا كم شي من سوق الحره طيارتنا 9:15 كانت خالي
كل دقيقه يتصل في بنته لين آخر شي يانا و دخل معانا لين الطياره وصلنا الكويت 10:40 اظن بتوقيت الامارات
مرت عمي قالت بتنطرنا بس مالقينا حد هناك o.O صرفنا عمارنا وصلنا الفندق نزلنا أغراضنا رتبنا عمارنا لين يوصل
التاكسي حق السوق من 10:30 لين 3 ردينا نريح على أساس فطورنا بيت عمي راحت علينا نومه لين وقت اذان
المغرب صلينا و اكلنا بالفندق نطرنا لين صلينا العشا و ردينا طلعنا ردينا 01:00 رتبنا أغراضنا قعدنا شوي سوالف ضحك غشمره
"امسكنا هاك اليوم قبل الامارات و الكويت، يقيمون الليل و نحن عبالنا الفير هع" نشينا متأخر مالحقنا نمر بيت
عمي نسلم على طول المطار وصلنا دبي 5:00 مستانسه عـ السح و الماي اللي عطونا اياه =) "استوت لنا هناك
مواقف حلوه و مراح تنّسى نحن 5 اللي مسافرين "أم سيف و ميمي بنت خالي -بعمر بعض-، أنا، أختي
هدى و مرت أخوي -بعمر بعض- أنا الغلط امبينهم

أبوي يقول لي يا خسارة التذكره ليوم واحد جيه ما قعدتوا زياده xD
"مارحنا لا عند عمي و لا خوالي =)"

البارحه اليمعه بعد صلاة العشا رحت العين زي ما قلت "أنا و أمي و شوق"
12:15 كنا بدبي

"استانست وايد هاليومين"

[الهيثــم]

^ افتقدنا تواجدج مزن ، الحمدلله على سلاامتج ..

رمش الغلا ، أنامل قلب ~ الحمدلله إني ما دخلت مول من اول رمضان .. أصلا ما احب المولات ، شو يوديني في رمضان
استغفر الله مرة بس سرت الستي عشا نالجراجة وطلعت .. ما طولت .. ^__^

[مزن هتان]

^ افتقدنا تواجدج مزن ، الحمدلله على سلاامتج ..

شكرا، ربي يسلمك

اليوم : الاثنين
المزاج : الحمدلله

الموضوع
أريد أطلع أغير جو و أعدل مودي
ما عرف اذا بيروحون البحرين، ملل وايد ملل
ماحب أقعد فالبيت صايرين حشره و ازعاج استغفر الله
لاعت جبدي من التلفزيون من 16 يوم و أنا مجابلته وياهم مادري شلون
يحبون يقعدون "يجيب الصداع و الهم و البلاء"

الحلو اليوم انه بنت خالتي خلصت العده
على طول زواج ماكو قعده أقولها ، ربي يتمم لهم على خير ان شاء الله

[بحر الموده]

الله يرحمنا برحمته ويعينا على هاى البلاوى وعلى هالناس لى مايقدرون شهر الخير
انا شراتك اخوى خطاب مااحب المولات الا جان الاهل يبونى اخذ اغراض من الكارفووووور
والله نشبه امسات انا اتمشى فى الممر ولانه ثلاث يايات من جدام تقول اسلاس يالله عاد شوه يخوزهن
البكله طايحه على الخد والويه ملون ومسوين له باليس والسماعه مال التيلفون شرق غرب تقول مريحانه خخخخخخخخخ
الله يرحم زمان اول تسير الدكان عطنى هذا وعطنى هذاك ماتشوف هاى الاشكال لى تخوف وتخرب المجتمع

[الهيثــم]

^ هيه صدقك بوجاسم ...

الحين بالعكس يا خوك ، الريال يستحي والبنت فاصخه الحيا ..
غصب تعالوا شوفوني ... ! تعالوا تحرشوا فييني !! .. تعالوا عقوا علي رمسات ! ما بييني رقاد جي ،، ( لسان حالها يقول هالكلام )

أنا ما دري هالبنات إلي من هالفئة ، شو الشعور إلي يراودهم !!
يتحرون اعمارهن حلوات !! ولا يلفتن النظر .. ولا مواكبات الموضى !! وولا الشو بالضبط ؟؟
ترا أكثـــر الناس ومعظم الناس يشوفونهم بنظرة استحقار ودونية ، ما انقول غير الله يهديهن .. ويرد المسلمين إلى دينهم ردا جميلا ..

[رمــش الغـــلا]

والله أمس كنت اقايس نعال والا اشوف 3 بنات حذالي داشين المحل توهم والله جنهم مهرجـآت شو مسوين فـ عمارهم

كنت ابا اضحك بس مسكت عمري .. ما اتحملت اسكت ..

قلت حق أختي في ناس صدق صدق كجرة والغباء كله انه في 3 اولاد اكيد مثل عقليتتهم بعد يتمشون ورآهم ..!

والله ان البنات اشكالهم مال المدارس صغار يعني ..! [ الله يهديهم بس ] ..~

[أنامل قلب]

أخوي خطاب ، بس نحن مو مثلكم ، مو كل مكان نروم نظهرله ،
وحاجاتنا موجوده بهالمراكز بالأخير ، فإلا مانسير لها ..

+ بس لي تعليق على كلمة قالها أخوي خطاب بخصوص الرمسه اللي تنقط ،
فاللي نشوفه الحين إن الرمسه تنقط عالكل الصراحه ، مو كل من بتنقط عليها كلمه ولا بيرقمها أحد
تكون من اللي طريتهم ، البعض ربي يعافينا صدق ما يحشمون أحد ، والبعض ما يحتاجون يقطون لا كلمه ولا رقم ولا حركات ،
تحسون أحيانا يطالعون بشكل تقولون أول مره يشوفون فيه بنات ، مادري نستغرب ولا نعصب ، نتكلم ولا نسكت !

أخوي بحر ، مثل ما قالت رمش هذول أظني أغلبهم صغار ، مال مدارس ،
واللي اكبر فـ هممممم ، مادري الصراحه بشو أعلق !

رمش ، مره شفت وحده كوبي من موضة بنات المدارس ، بس كان مبين عليها جي بالثلاثين !
حتى أذكر مره ع أيام المدرسه ، كنا رايحين اجتماع بمكان فبعض من اولياء أمور الطالبات حضرو ،
فكنا تخيلي من أيامها شايفين ولية أمر يايه حالها من حال اللي طريناهم ، صدق وايد استغربنا يومها ،
يعني جي عباتها كلها ملونه والقصه شلون صايره والميك اب الثفيل !

~.

[الهيثــم]

^ ليش معصبــة ؟؟

تعليقي انا وبحر المودة كان عن الفئة هااييج ، والي حاشمه عمرها تراها تعرف عمرها ، ما يحتاي إلي يعق عليها رمسه يقولها تراج حاشمه عمرج ولا فاصخة الحيا ...

والي فاصخة الحيا كذلك تعرف ومتأكدة إنه نحن نعرف بأنها فاصخة الحيا .. ولكنهم في سكرتهم يعمهون ..

[أنامل قلب]

^ الحين منو قال إني معصبه !

بس صدق الواحد يضيج لمن يشوف الملاحظات تتكرر على أشيا من غير أشيا ..

[مناير]

اخواني وخواتي

ترا البنت المحترمة تنعرف من البنت...... بشكلها العام

عشان جيه اللي تبي الرمسه عليها تتحمل شو اللي اييها وربي يهديهن ويعافينا لأنهن ابصراحة

زادن....

[الهيثــم]

^ بالضبط ، حتى مرات في فئة من الشباب إلي " يدورون " بنات ، في فئة منهم ما يعرفون يميزون بين البنت المحترمة والبنت الـ غير محترمة أو المنحرفة أيا كانت التسمية ..

تلاقيه يتحرش بـ أي شي ، حتى لو ما تتشاهد ، المهم بنية ..
بس في النهاية نقولكم ، ترا من الجنسين فيه الزين والشين ..

واايد بنات محترمات وينضرب فيهن المثل ، وينحطن ع الراس
ووايد شبـاب ينضرب فيهم المثل وموضع تقدير واحترام من الجميع وبشهادة الكل

وفيه العكس كذلك ..

ونسأل الله السلامة والعافية ..

[أنامل قلب]

اليوم : اليوم ..
المود : .. ..... .... .. ..... .!
الموضوع :

وانا بالمسيد دزتلي صديقتي تقولي ان اسير النهضه اليوم ، لأن عندهم سهره / جي خواطر واسئله وسوالف ،
فـ شديت حيلي ومن خلصنا التراويح سرتلهم ، بس إهي حضرتها كالعاده تأخرت شويه ، فتميت قاعده روحي بالصف الثالث انطرها ..!

إلا شوي ، شفت حرمه يت قعدت عندي ، استغربت شوي مادري ليش ^^"
يمكن لأن المكان كان بعده فاضي ، الكراسي اللي جدام حتى اللي حولي ، فماتوقعت إن أحد بيي يقعد عندي على طول ..

من قعدت ما شاء الله تمت تسولف ، وكان مبين عليها وحده جي دينه وبنفس الوقت خاطرها صافي ،
يعني تسولف عن الحفظ والبنات اللي ينشدون ، وسوالف البرامج ، عن نفسها وعيالها ومن هالكلام ..

وعقب يت وحده بعد قعدت حذاها تعرفها من قبل ، فعرفتني عليها بالأول وعقب قالتلي صادقيها هذي طيبه وجي ،
فبالأخير ما قدرت أقوم من مكاني واسير صوب صديقتي ، فشله ، وبنفس الوقت كنت حابه سوالف المرا ، جي تتكلم بحماس ،
بس شوي كانت سوالفها غريبه ، دخلت بالجو وايد ما شاء الله ، وكنت شوي مفتشله مادري كيف ..

وايد تمت تتكلم عن عيالها ، شلون انهم اقربلها ، او بالأصح بما إنها تقضي وقت اكبر معاهم فطبيعي بياخذون منها أكثر ،
وتمت تمدح بولدها العود ، وانه ماخذ من الاثنين وعاقل ، بس الثاني شوي طايش ، اما بنتها الاصغيره فلازالت صغيره !

وعقب شوي ردت قالت تدرين إنج وايد طيبه ^^" ، بغيت أقولها حبيبتي لا تقصين علي =#
وبعد شوي ردت تسألني إنتي أهلج كلهم مثلج جي طيبين ، قلتلها لا أهلي أطيب عني p=
وردت قالتلي تشبهين فلانه بنت يارتنا ، عيونج بالذات ، وعقب تمت توجهني لأشيا ، هذا كذا وهذا المفروض يكون كذا ،
حسيتها ما شاء الله عليها واعيه وتحب جي تكلم الناس عن الأشيا اللي اتعرفها ، وكالعاده الأسئله اللي ماحبها لازم تنطرح ،
مادري ليش أحسها تحقيق ، كم عمرج ، تدرسين ، ليش ظهرتي ، تشتغلين ، متزوجه ولا ، وين ساكنين لول
حتى استغربت لمن قالت انتي قوم منو ، تمت جي تحاول تتلفظ به وماتعرف ، لول انصدمت حسيت مادري كيف ماتعرفه ،
وتالي تمت تقولي انج متواضعه ، وحضرتي معروفه ماحب لمن يمدحني احد اختبص ماعرف بشو ارد ^^" ،
وزين يوم غيرت الموضوع عقب ..

,

غريبه صدق ، يعني ما اعتبر من النوع اللي ياخذ ويعطي وايد مع الناس ، ماتعرف عالناس وايد ، ولا أحب مثل هالأشيا ،
بس جي اصادف ناس أحيانا مادري كيف جابلتهم وكيف تكلمنا وكيف وكيف ، ما شاء الله عليهم ..

تبادلنا الأرقام ، احليلهم ، الحرمه يمنيه ، والبنيه الثانيه مصريه ، وهذي الثانيه كانت وااايد جي خجوله أحسها ..

ووو بالأخير ، كنت رايحه أساسا لأن ربيعتي قالتلي تعالي ، بس يدوب شفتها ولا قعدت عندها !
+ كله ولا يوم شفت طيطار عود عاليدار وراها ، لمن رحنا برا القاعه ، احليلها تخرعت فجأة شافتني ازاعج واراكض ،
اونه تمساح ، مالة علي ..

بس وااااايد وااااااااااايييــــــــد كانت الأجواء طيبه ، وجي تستانس لمن تشوف الناس تردلك الابتسامه باللي ازين منها =]

ربي يوفجهم دوم لمثل هالأعمال ، ويرحمنا جميعا باذنه ..

~

[عافك الخاطر]

الثلاثاء -15.9.09
المزاج: أرق
- يبدو أنه قُدر للأشياء التي احببتها واحبها سرعة الفناء..
- ليت للنسيان طرق مختصرة نتجاوز من خلالها مرحلة الاشتياق المؤلم لكل تفاصيل الغياب
- الأرق (ذبحني)، و ساعتي البيولوجية في تدهور مستمر ،و كتاب ضخم مطلوب مني اعرف كل شبر فيه .. وانا مسوية طاف للعالم..
محتاجة اقطع وسائل الاتصال مع العالم الخارجي....
- الصبر هو كل ما احتاج..