دير دياري ~ يوميات

[أنامل قلب]

لا دخيلج / P=

[بنت الدلع]

اليووووووووم : الثلاثاء
الساااااااعه : 7 وثلث تقريبااا

كنت طالعه عندي مليون مشوار ابا اخلصه
بعد ماخلصت 3 مشاوير كنت راده جدى البيت
انا واقفه عالاشاره شوي الا ترتففففففع حرارة السياااارة
وتمت ترتقل وظهر دخان من البونيت !!!!!!!

وانا متتتتتتت من الزيييييغه على طووول سكرتها قلت الحين بتنفجر السياره !!!!

اخضرت الاشارة

حاولت اشغلها
الحبيبه مب راضيه تدق سلف !!

والي ورااااااي هرنااااااااااااااات من خاااطر خاطرهم لول

وقفت مكاني ودقيت دبل اشاير

ويزاااااااااه الله الف خير والله شهم وماقصر

وجان ايون ويدزون السياره وانا تمييييت ميته من الحر لين ما الاهل وصلوا وانقذوووني

بس اهم شي وصلت البيت بالسلامه =)

شكرا يارب
في كل مكان يسّخر لنا ناس تساعدنا


وخلص الفلم ..

[الهيثــم]

^^ هذي من رحمة الله بناا ..

بس كان المفروض إنج ما تسكرين السيارة .. ومن تخضر الإشارة تمشين وشوي وشوي الحرارة بتنزل ..

..

حسستيني إنه عندج نيسان موديل 1990 وعليه تواااير 900 .. لوول ...

[بنت الدلع]

^^ هذي من رحمة الله بناا ..

بس كان المفروض إنج ما تسكرين السيارة .. ومن تخضر الإشارة تمشين وشوي وشوي الحرارة بتنزل ..

..

حسستيني إنه عندج نيسان موديل 1990 وعليه تواااير 900 .. لوول ...

خطااااااااااااااااااااب

اسمييييييك هلكتنيييي من الضحك

لوووول لا للأسف مب نيسان

كنت اسوق رنج


لا ماقدرت ما اسكرها .. يوم شفت الدخان قلت ما ينفع اخليها جي سكرتها على طول
المروحه دقت في المكينه

====

انامل .. لوول الاجزاء الثانيه وايد تضحك
مافينا عالفضايح

[أنامل قلب]

^ كمليلنا عاد الاجزاء الثانيه ، بس مثل ما قلتي نعمه من رب العالمين ، الناس الزيينه دومهم ينوجدون ..!

,

اليوم : الأربعا ..
المود : ...... .... ..!
الموضوع :

ماشي ، سلامتكم ، كالعاده بالأخير كنسلت روحتي للصالون من زود ما اني ماحب هالطلعات !
بس للحين مو مستوعبه ان خلاص باجر بشوفها حبيبتي بالثوب الأبيض ~ ..

امممم اليوم بدا سيء لأني قمت بوقت متأخر جدا ، الساعه ثلاثه !!!
ناشه متكسره ، ما احب لمن اطول بالنومه جي ، وكل الناس احسني شفتهم بهاليوم ، بأحلامي الغير مفهومه ،
بس اليوم جي عالمغرب ييت بجابل اللاب ، من قعدت لقيت اختي يايتني بالبشاره ، اونه : أنــــــــااامل قلب بسرررعه
تلبسي بنسير نسو فحص النظر خلاص وأخيرا بنقدم لليسن ^______^ ..

أنا : اوووه والله ، بس شو ها مو متفيجه اظهر الحين لول ^^"
بس طبعا ظهرت ، ما صدقت وأخيرا ما بغى الوالد يطيع ، مع اني من الأساس ماكنت ولازت أحاتي الليسن
كثر ما أحاتي لمن باخذ الليسن عقب شو بيكون محلي من الاعراب معاه ، يعني صدق ماتتخيلون ابوي واهلنا بشكل عام شلون ..

خاصه ابوي وعمي ، يالله يسوون لنا فلم رعب وهذا حال كل وحده تاخذ الليسن منا ..!
عادي نقعد سنتين ثلاث ما نسوق ^^" ..

ولمن يبدي يشوفنا شلون بنسوق يتمون جي ، لاتسوين كذا ، وسوي جي ، لادوسين جي ، منو عطاج الليسن انتي ،
ماتعرفين اتلفين عدل ، اوووووه انتبهي ، نزلي اقولج نزلي بتجتلين الخلق وبتجتلينا معاهم ..!

ولا بعضهم اونه ما يوسوسون بسوالف ان والله ممكن البنيه مابتعرف تسوق عدل ولا بتتعرض لأحد ويصير لها شي ،
لا يخافون على سالفة والله يمكن يوقفلها واحد ولا يلعوزها أحد ولا ولا من هالأشيا ،
اونه من بتتعطل سيارة البنيه الرياييل ما بيقصرون ..!

المهم ان بالأخير رحنا سوينا الفحص الغريب وردينا ، كان فعلا غريب ، عاد قلنا خلو الحروف صغيره بس مب جي ،
بس الحمدلله طلعت سليمه لا نظارات ولا غيره ، مع انه قالي لازم ادير بالي عن اونه احتمال احتاجه قريب ،
فال الله ولا فاله ^^"

,

وهيك يعني ، التهيت عقب ازهب لـ باجر ،
وحاليا مجابله اللاب =)

[الهيثــم]

خلاص ولت المكيينة ..

ههههههههههههه عن تسمعج دهن العود بتتخبل ،،

[بنت الدلع]

والله مادري عاد شو صار بها
انا رديت وهم يابوها عالونج


ليش بتتخبل ؟

[الهيثــم]

تحب الرنج وايد ..

[وحي القلم]

بنت الدلع

أويه.. لو أنا بدالج جان نزلت من السياره أظني

.
.

أنامل

أحيده شرات فحص النظر العادي.. سويتيه في عياده ولا محل نظارات؟

حلوه السواقه بتعيبج

[أنامل قلب]

لا محل نظارات الجابر ..
بس ماكان نفس الفحص العادي ابـ لوحه ،
كان جي بالاضاءه ، والحروف صغيره زياده عن اللزوم ،
حتى لمن قعدت وشفته يسألني عن الحرف ، كنت اتحراه يتغشمر ^^"

واي بخاطري اتعلم السواقه من زمان ،
ولا مره جربت اسوق =)

[العجيبة]

خخخ سلامااات بنت الدلع ما تشوفين شـر .... هذااا مصير اللي يتخلى عن البي ام ويسير حق الرنج > يتحمل العواقب لول



مبـــــروووك أنااامل خخخ شــدي حيلــــــج ... انتي عكسي ما تسوقين وبتظهرين ليسن ... انا اسوق وما ابا اظهر ليسن !!!

[طير الغرام]

اليـــوم : اليمعـــه

المـــود : FeelinG Tired + HaPpY

الموضـــوع :
MY WeeKend

هـ الاسبــوع قررنـــا انغيـر جـــو وانســوي اشويــة ريــلاكسنــج
فـ سرنــا The Cove Rotana اللي فـ راس الخيمــه [ يــوم الأربعــا ]
الصــراحه المكـان وااايــد حلـــووو وعــالم ثـــاني




وأول ماوصلنــا ريحنــا اشــوي عقــب قررنــا انســوي توور ع المكـــان وعشـان يحــلى التور
طلبنــا ايوونــا بـ بقــي بــدال البــاص العــادي >> وحلاتهــا القعــده ورا







ومن خلصنــا التــور حجــزنا لفــه نــص ساعــه بـ الـ banana boat وليتنــي ماركبـــت معاهـــم
أنا الصراحه أول مره أركبــه وما كنــت أعرف إنه جيــه اتوقعــته شرى القارب عــادي

حتى اللي قبلنــا كانوا يهــال ومعاهــم بنــات وطاحــوا فـ نص البحــر





وصار موقــف الصــراحه واحنــا قاعديــن نتريــا دورنــا ما أجــوف إلا حــرمه يايه من بعيــد تشـبه أمايه
>> تـرا مكـان الفيــلا بعيــد عن المكــان اللي كنا قاعديــن فيــه [ والحرمـــه طلعــت أمايـــه ]

جافت البنــات يوم طاحــوا وزاغـــت تتحــرانا إحنــا يــت تربــع ويوم سرنــا عندهــا تمــت اتحبنـــا وتلــوي عليــنا
وخواتي قالولهــا عادي ما يخــوف ،، والريـال قال إنه البنــات هم اللي طلبــوا انــه يجلبهـــم
وأنا لين الحيــنه موووول هب حاطــه فـ بالي إنــه في احتمــال انطيــح أو ننجلـب
>> لـ درجـة إنيه حاطــه فوني فـ مخبايه + فـ المخبـى الثاني اكستــرا ميمــوري حق الكــام يديده وموول ما استعملتهــا

المــهم بدينــا التـــوور فـ البحـــر وكل شي تمـــام التمـــام وأنا كل حيــن أوصي خــواتي وأخويــه اتمسكــوا عــدل اتمسكــوا عـــدل

٥ دقــايق وإلا اتطيــح وحــده من خواتيـــه ،، أنا زغــــت عليهـــا
ويـوم قال الريــال إنه تحتهــا أرض عادي تقــدر توقف قلت افـ خاطريــه عيل ما عليهــا شــر تتدلــع
وعقــب أخــويــه مسكهــا وخــلاهــا اتــرد تركــب

وكملنـــا اللفـــه ،، جــيه مال كمــن دقيقــه ازيــاده ولا جان تنجلـــب البنــانا بـ اللي فيــها [ يعنــي احنـــا ]

أنا من كثــر ما أنا متقبضــه انجلبــت وطاحــت البنانا فــوقي والصــراحه أنا خوافه درجه أولـى
بطيـت تحــت وشــربت ماي وايــد ماقــدرت ،، ومن ظهـــر ويهــي فــوق تميـــت أقـــول بمــوت بمــوت بمـــوت ما أقــدر
>> والله شكليــه كــان ع قــولة خواتيـــه وخشميــه احـّمــر وااايـــد
بس والله كنت زايغــه وما أعــرف أسبــح >> لــولا اللايف جاكـــت جان أنـــا رحــت فيهـــا
وبطينــا ليــن ما كلنــا ردينــا ركبنـــا [ ماشاءالله العبــي روحـهن ثجـل وغير إني كنت لابسـه جينـز يعنـي ذكيـه ماشاءالله ]

وكملنــا اللفــه هـــاي اللي هب طايعـــه اتخلــص أنا خــلاص أبا أرد ما أبا أكمـــل بس لازم انكمــل وخواتي وأخويــه امكيفيــن الصــراحه

المــهم يــوم كملنـــا وهــو يســرع ما خليـــت معوذات وما خليــت أذكــار وآيــة الكرســي
أقولهــن وأرد أعيــدهن وختيــه تضحــك عليه اتقولــي بــلاج خايفــه
>> لـ درجــة إنيـه استغفــر الله قبل من كثــر ما كنت زايغــه غلطــت فـ الآيـه من كثــر ما أعيــدها استغفــر الله

واشــوي وإلا انطيـــــح اووهـــوووو وأرد أعيـد اسطوانتيــه بمـــووووووت هههههه
والله إني اتقبضــت فـ ختيه وحطيــت اريولي ع جتفهــا من الزيغــه ههههه

وأقــول حق الريــال خــلاص ما نبا نركــب ،، احنا بنتقبــض عــدل وانتــه اسحبنــا
خواتي تمــن يضحكــن عليــه وقالوولي يالهبلــه قــوة المــاي بتعورنــا !
أنا ع السحــب اللي سحبونــي إيــاه اتكســر جسميــه الصــراحه

ما بغينــا انخلــص هـ التــــور

يـــوم خلصنــا ذكــرت إنه فيه فــون فـ مخبايــه >> عليـــه الســـلام والميمــوري بعــد
[زين إني كنت يايبــه رقميــه الثانـي بـدلت الفـون والحمدالله الرقـم يشتغـل والميمـوري مالت الفون كانت صاحيــه
أنا أوريدي حاطـه فـ بالي أغير الفــون بس بعـدني مارسيت ع واحــد ]

أهــم شي انــه ظهــرت من هـ المعمعــه بـ الســلامــه

:

ريحـنــا واتسبحــنا وعــقب اتزهبنــا حق العشـــا
وبعــد ما خلصنــا العشــا وردينــا الفيــلا اتمشينــا عن خاطرنــا اشــوي






هـــــــدووووء




وسهــرت مع خواتيــه انجــوف فلــم Orphan

:

اليــوم الثانــي ظهرنـا من المنتجــع الصبــح ورحنــا سـوق ما أعــرف شو اسمــه
وعقــب قبضنــا الخــط ع درب دبي وبتنــا فـ فيــلا روتانــا

وكنــا فـ هاليــوم [ الخميــس ] صيـّــام فـ تمينــا فـ الفنــدق لين ما أذن المغــرب وفطـرنا
>> صح عن خاطرنــا قلنـا بنـروح مزايـا لنـه جريب منــا [ بس الصـراحه ما فيــه شي ممــل ]

المهـم بعــد مافطرنــا رحنــا امرتــس مــول زحمــــــــــــــه
أنا تمـــيت مع قوم أمايــه وأبــويه ويلسنــا فـ كوفــي لين ما خلصــن خواتيــه

وع الســاعه ١١ وشي ردينــا الفنــدق
وعقــب عن خاطريــه تميــت أصــور حركــة السيــر [ ع شارع الشيـخ زايـــد ]




وماطولنــا فـ السهــر رقدنــا من وقـــت
واليــوم الصبـــح قمنــا امصحصحيــن واتريقنـــا وعقـــب شلينــا قشنــا واحنــا ظاهريــن مرينــا مارينـا مول دبي
وسوينــا شوبينــج اشــوي
وعقــب قبضنــا خــط بوظبـــي

وتوتـــة توتــة خلصــت الحتــوتــه >> أدري واايـــد رمســـت

[ الصــراحه كــان ويــك إينــد حلـــو وبعيــد عن ضغـــط الشغــل >> هـ الرمســه بالنسبــه لـ خواتيــه ]

[عهد الوداع]

طير مداام كنت في داري اكيد بتستااانسين لووول


والله ونااسه عشت وياج الدور ... (:

[وحي القلم]

طير.. أويــه ما أتخيل 0.o

الحمدلله على سلامتكم و مره ثانيه لا تركبون في شي شاكين فيه ؛)

[أنامل قلب]

اليوم : الاثنين ..
المود : .. .... ~
الموزوع :

اليوم قبل أذان الفير بشوي حنيت ظفوري ، بعد ما خازت الحنه كلها تقريبا ، وبما إني كنت متحنيه من غير الاظافر ،
بس تمت اختي تحط علي ، اونه صج عيــــووووز ، بس حلو ، جي عايبني كل فتره والثانيه نغير ، مره جي ومره جذاك ^^،

اممم اليوم يو عدنا الصغارية ، والتهينا فيهم ، غير إني المفروض احضر محاضرات الليسن ، بس طبعا ماحضرت وبنطر إلين الاثنين القادم !
وووشو بعد إي اليوم مريت بموقف لا أحسد عليه الصراحه ، كنت توني واصله مركز التعليم ، فسيده دخلت غرفة الانتظار الخاصه بالنساء ،
وبنفس الوقت يت وحده "اظني من المغرب العربي" دخلت معاي ، قعدنا حذا بعض ، وعنها إهي ما لحقت تقعد إلا ولقيتها تنبش بالجيسه اللي معاها ،
وشكلها احليلها يايه تتغدا بالمره "فطاير" ، بس الله لا يبليكم والله ، انا انسانه مــــوووول ما أحب أسمع أحد يظهر صوت وأهو ياكل ،
تعرفون هالأصوات شلون تظهر ، جي أتنرفز وأجز وتلوع جبدي ، وهذي كانت والله العظيم أبد أبد أبد مب طبيعيه ، يعني وكأن واحد
ياي بالعماله يتقصد يظهر صوت بشكل يلوع جبدك فيها بزياده ، مااادري كيف استحملت ، تميت جي مجابله فوني احاول أركز عليه
وعالاذاعه ، وبنفس الوقت فاتحه عالرسايل اكتب ، ويالله مادري ماصدقت لمن شفتها ردت قبضت جيستها إن يعني خلصت ،
شفتها عقب فتحت الببسي ، آااااااه معاناة ثانيه ، إلا شوي كنت صدق بتخبل ، وبنفس الوقت مفتشله أقوم من عندها ،
أحس جي مب حلوه ! / لا وأخيرا بعد ما خلصت وقفت فجأة وسوت حركه انا وقتها استويت جي : !

مادري شو السالفه والله ، مرات صدق نلقى أشيا نستغرب منها ، مادري هل اهمه يعني مايلاحظون ولا يحسون بعمارهم ،
ولا انهم صدق ما يدرون إن مثلا هالشي ما يليق ولا عيب ولا ولا أيا كان ، بس في أشيا صدق الواحد ما يحتاي أحد يوجهه فيها ،
ولا إنه يقوله ترى لازم كذا ومو لازم كذا ، مادري بس الصراحه ، عانيت باختصار ، وبنفس الوقت كان بخاطري أقولها :
لو سمحتي اضيج من هالأصوات ، بس ماتخيل الصراحه اتيني هالجرأة ..

..! / أحسها مادري جرأة فيها مسحة وقاحة =$

,

وشووو بعد ، إي لعوزت الحرمه احليلها "مدربتي" ، مع انها جي أول ما تشوفها تحسها من النوع السيرياس اللي ماتبتسم ولا تضحك ،
وتحسسك إنك هم على قلبها وتبي الفكه ، بس من نقعد بسيارة التعليم وتشوفون حرصها عالشرح والتوضيح ولو كانت جديه بزياده ،
على طول ترتاحون ، وسبحان الله أكيد بتنفعني أكثر من اللي بتوزع ابتسامات وبطوف علي شغلات P=

بس لعوزتها صدق ، تقولي لو سمحتي انا الابله وانتي الطالبه مب العكس "اهي هندية فالتواصل معاها يالله يالله بالانجليزي" ،
المهم ، وشو بعد تقولي ، اي صح الحمدلله مدحتني هذا أهم شي بالليسن لول ، بس تمت تحط علي اونه الخبير اهني ما يروم
يسوق فوق الـ 40 لان المكان اصلا ما يسمح وأغلبه لفات ، وانتي ما شاء الله عاللقه قربتي عالـ 50 ، لا وهذا ثاني يوم لج ..

حسيتها هزبة محترمه ، تميت اتذرع طبعا اقولها ماعرف اشكثر اضغط عالبريك وجي ، ولا اقولها ماعرف اشكثر بلف السكان ،
واهي تقولي ماعليه انتي الحمدلله تعرفين كذا وكذا ، اممم ان شاء الله بس يظهر كلامها واقع مش انه ترفعلي معنوياتي ،
وكله ولا يوم تقولي هدي الشيله وهدي الشيله ، لأن عادي وانا اسوق اهد السكان ع كيفي وارد ارتب شيلتي لول / وووو شووو بعد ،
إي صح كله ولا انها طول الوقت تقولي واتش ذا ميرور ، لفت شولدر ، رايت شولدر ، آل ذا ميرور نات اونلي ذيس !

أحس إني لو بقعد اتلفت جي ما بروم أركز ..
+ أسوأ شي إني ماروم ألف السكان بالشكل اللي احسه يريحني اكثر ، كله تقولي لا تلفين بيد وحده بالكامل !

,

اممم هذي قصة حياتي اليوم ، وحتى هذي الدقيقة وهذي اللحظه ،
وووحاليا احتمال اقلب ويهي ، مع ان بخاطري احط اضافات بموضوعي "كلمات" ..!

وهيك يعني ~ ..