دير دياري ~ يوميات

[مــهــابه]

الـيوم :

كـآن الآحـد


المـزآج :

مسـتآنسه وللـه الحـمد


الـمـوضـوع :

مسـتآنسـه وااااااااايد ، الآبـتسـآمه مـآفـآرقـت شفـآتي طـول اليوم الحـمد الله :)

مرتـآحه نفسيـاً من بـعد ضغـط الامتحـآنـآت

ومسـتآنسـه آكثـر لـآني 3 آربـاع وقـتي كـآن مع عيـآل ختـيه وعيـآل اخـواني :)

.
.

عـيني اليـّمنى صـار لهـا يوميـن تــرف =p

[طير الحب]

تحوفه...أزمة وعدت ولله الحمد...وابا احلى الف مبروووك على نتايجي الحلوة بدلع نفسي بسفرة لو مب هالانفلونزا

[مايهزك ريح]

البارحه ظربتني ظيجه ويالس احاول اغير مودي ..
بس مب رايم .. موقف سخيف من واحد اسخف اتعرظت له ولين الحين في بالي ..
مع اني ما غطلت ولا قلت شي وكنت في حالي بس في ناس اعوذ بالله !
صدق انه "حد احشمه وحد احشم عمرك عنه" >_<

[تحفه]

^انته تعرف انا اشتغلت وورك بليسمنت شهرين وحسيت ان بيستويلي القلب وبموت من الي شفته من الموظفين في الشركه الي اشتغلت فيها!!

كانت العداوات اب بيزه!

حتا يوم يسلمون يعقون نغزات ... اجواء مصلحه و انانيه و كل حد يحفر في الثاني و كله نميمه وكره .....

الحمدلله ما قبلوني يوم قلت لهم بشتغل عندكم ولا جان بتشوفوني منجلطه بعيد الشر عني في غضون شهور ،،،، P=

احمد ربك انك ماتصادف هالمواقف يوميا او كل ساعه ونت فلشغل! لول! هالنصيحه الي اقدر اقولك اياها

[مايهزك ريح]

^انته تعرف انا اشتغلت وورك بليسمنت شهرين وحسيت ان بيستويلي القلب وبموت من الي شفته من الموظفين في الشركه الي اشتغلت فيها!!
كانت العداوات اب بيزه!
حتا يوم يسلمون يعقون نغزات ... اجواء مصلحه و انانيه و كل حد يحفر في الثاني و كله نميمه وكره .....
الحمدلله ما قبلوني يوم قلت لهم بشتغل عندكم ولا جان بتشوفوني منجلطه بعيد الشر عني في غضون شهور ،،،، P=
احمد ربك انك ماتصادف هالمواقف يوميا او كل ساعه ونت فلشغل! لول! هالنصيحه الي اقدر اقولك اياها

الحمدلله .. بيئة الشغل ما فيها هالخرابيط .. مفتك من الصدعه .... !

[أنامل قلب]

اليوم : آخر كذا يوم !
المود : ... ... ...... ~
الموضوع :

كذا شغلة منرفزتني ومخليتني بمود عصبي ، والحمدلله إن عصبيتي هادية نوعا ما ، بمعنى إني غير عدائية ،
وحاليا بالي جد تعبان ونفسيتي متوتره والقلب ضايج !

لكن صدق لمن نشوف أغلاط كبيييــــــــــــــره والناس كلهم ولا كنه ! / لأول مره أستخدم كلمة بوصف وحده ربي يهداها ،
مادري شلون جي ، والاعلام كلهم ولا همهم ويعتبرونه اظن حرية شخصية ولا شلون !!!

,

كنا طالعين لأحد المراكز ، وصادف بهاليوم شفت كذا مواطن "هيأتهم إماراتيين" كلن مرافق وحده غير عربية ،
اكثر شي نفرني لمن شفت واحد منهم حرمته الغير عربية "مبين روسية" لابسه لبس ؟!؟!؟!؟
مادري شلون هذول مافيهم غيره ، والله مناظر تعور القلب ، كيف رياييل جي ، عالأقل يخليها تحشم عمرها وتحشمه معاه ..

وغيرهم بمواقف صارتلي ولا صارت لغيري ، لمن نضطر ندخل بمعاملات أيا كانت مع الرياييل بخصوص مسائل
ما يصير ناخذها إلا من النساء ، لكن نشوفهم بكل بساطة يقعدون اونه بيقنعونا إن عادي مافيها شي اذا الريال سد حاجتنا !!!

يومها مادري كيف مسكت عمري ، غصب يخلون الواحد يتكلم ،
اما انهم صدق مافيهم غيره ، او انهم يرضونها لبنات الناس من غير أهلهم !!!

,

في رياييل أعوذ بالله ، يعني نحن الحين مش من النوع اللي يقط كلمات ولا نحب نحتك ولو بالكلام مع الناس والرياييل بالأخص ،
بس والله مرات أحس إني بوصل لمرحلة عادي أقط كلمة على هالفئات ، عيني عينك ..

,

أمس رفيجتي وصديييييييقتي يت عندي البيت ، وللأسف ما طولت !
لمن رحت ازهب للغدا خذيتها معاي تساعدني ، وتمت اونه عاد تتحرطم / ياربي اشكثر احب صديقاتي ..

قبل لا يمرها اخوها تمينا نسولف عن العباه الوسيعه ، لاني اول مره فصلت وحده وبيومها زهبت ـ
فتمت تقول برايها انها احسن من عباة الراس من زود ماتشوف بعض البنات يتلعوزون لمن تطيح وجي ،
ووووووباذن الله بنسير عقب بنفصل غيرها مع بعض ، بس ان شاء الله ترد تيينا وتقعد زياده !

اممم تكلمنا بعد عن أشيا والله تحزن ، لو اقدر اتكلم عنها بس !

الله يعين ..

,

اليوم رحنا بيبي شوب ، وكنا أخس عن اليهال ، كل وحده قابضتلها كذا لعبة > تعطش للألعاب ،
وكنت باخذلي كذا لعبه زياده من هالالعاب اللي شرا الشطرنج وجي ، بس استعيلنا ،
+ ما خلتني آخذ السلة لـ "كرة السله" مع انها كانت بخاطري ، اونه ما عيبتها ، بس شكلي برد آخذها !

وووو شو بعد اممم ، إي صح ماحب لمن ادخل مكان اييني أي أحد من الموظفين ،
كأن السالفه غصب لول ، حتى لمن رحت الكوفي شوب بسم الله هجمو علي يمكن جي قريب الخمس وانا O_o ،

ياني الاول بالمنيو واهو قابض الكرسي " اونه يعني قعدي =/" ، قلت لا اسمحلي باخذ تيك اواي ،
فيتني الثانيه تشوف شو بطلب وتمت تعددلي الموجود وتقولي اهي شو تفضل احليلها ^^" ، واهي تتكلم ياني ثالث
اونه ها اخترتي !!! ، وعقب ياني الرابع بعد ما اخترت يقولي شلون تبينه حار ولا والخ ، وعقب وانا انطر والين استلمت طلبيتي
تمو يسولفون ، البنية تسألني كم عمرج وتدرسين ، وليش ماخذه تيك اواي ، وغيرها ياي اونه يس يس نايس =$

بغيت ازاعج اقولهم بعدو / وخرو عني لول ، حتى كنت بنسى ادفع !

,

اممم في امور شاغلتني وايد وايد وايد ،
مسألة الدراسة المختلطه ، مسألة تأجيل الدراسة ،
مسألة الدورات اللي ممكن تعنيني وتسد ميولي ،
مسألة الشغل اللي احتمال كبير خلاص اداوم فيه ..!

باذن الله خير ، باذن الله خير ،
ودعواااااااااتكم ~ ..

[المزوحي]

ترى شو اللي يخرب غير هالرمسه الزايده ... وهذا منتشر بين البنات والشباب ماشي فرق الحين - للأسف ...

[مزن هتان]

اليوم : اممم
المزاج : الحمدلله تمام

الموضوع

ما عرف شـ قول اممم، وايد اشيا في بالي "البال مشغول"
قبل بارحه حلمانه في أخوي مجموعة انسان !! أمي تقول لي مسكين ما بيترقع =)

تحجت أنامل قلب عن العباه الوسيعه فـ ذكرت موقف صار لي، أنا عندي كمان عباه وسيعه
"يصير" تنحط فوق الراس، ذاك اليوم طالعين من عند حد اهالينا فـ رفعت العباه فوق راسي
عشان ما تخيس العباه و انا ماريد ارفعها من تحت و جيه ما اسمع صريخ وراي تام كل اللي
بالليوان صدوا صوبي =S "حريم و رياييل" و الصريخ مستمر بسبب طريقة لبسي للعباه !!

ما عرف شو صاير بالدنيا ؟ مادري شلون يرضونها الاهل عـ بنتهم ترتبط بواحد أهله مش
راضين على بنتهم و تشوف المعرس ينزف لحاله، و الادهى من ذلك لمن تسمع انه نصف
العرس قايمه فيه العروس و يمكن كله !!

اممم الكل يتكلم عنها و الله اني رحمتها، كل حد يدور الزين
بس اهي بزياده يعني تبي جنتها "بيضه، جميله و شعرها حلو" ما قالت الاخلاق
ما تدرين يا خالتي يمكن أخلاقها تغطي على شكلها
شـ حلوهم السمر P=

ياني انطقيت طق البارحه و انقرصت و اتعضضت من "مرت أخوي و أختها"
ما يبون اطلع مع رفيجاتي، كله يبوني معاهم، استانست وايد البارحه من زمان عن
خالاتي. داروا عليه خالاتي الا اخذ البلاك بيري يقولون وايد راح ينفعج و قبله بيوم
أخوي يقول لي باخذ بلاك بيري خذيه معاي o.O عاد هو خال يدلع نفسه =)

خايفه من شي

[مجموعة إنسان]

صدقها امج
اسميني مو مترقع هاليوميييييين

[أنامل قلب]

اختي مزن ، تدرين من بعد ما لبست هالعباه ،
قمت استحي البس العباه العادية ، لأن هذي وسيييعه وساتره اكثر ،
اما العبي اللي بالقصات العادية تكون غير ! ^^"

,

اليوم : قبل أمس بالأخص ، واليوم !
المزاج : .... ~
الموضوع :

تفشّـلــــــــــــــت !"

,
,

وبعدني بتفشل !!"

,
,

من بينهم كلهم ،
ياهي حاله ..!

وووو ماتم إلا كذا يوم ،
فعسااااااااااه خييييييــــــــــــر ..

,
,

لمة الأهل حلوه ، وسبحان الله ،
شلون أحيانا ناس ما بينكم وبينهم صلة قرابة ،
لكنهم قرااااااب جدا جدا جدا ..

ربي ييسرلهم أمورهم كلها ، ويشرح خاطر خالو ف وعيالها كلهم ،
ويطمن خاطرها ويعينهم بكل شي ، وما يرزقهم نعمة
إلا ويجعلها لهم عونا لما يحب سبحانه ..

ما شاء الله عليهم ،
وايد أحبهم وأعزهم وأقدرهم والله ~ ..

=)

[مزن هتان]

مجموعة انسان
خل عنك

أنامل قلب
أنا ما ألبسها دوم
و غير اني ما تعودت عليها لسه كل شوي اتخرطف =)
اوصلتج رسالتي ؟!

[قصايد غلا]

^ يااااا ربييييه يا مزن لا تطرين سالفة التخرطيف لووول

أسميييييني أتخرطف بالعبي و خاااصة إذا العباة مسكرة صدق أغمض .. كل شوية أقبض أميه و أتم أضحك على عمري

[أنامل قلب]

^ انتي مثلي ، اقعد اضحك على عمري ^^"

مزن لا ماوصلتني لأني مسكره الخاصيه ،
ردي دزيها لمن تشوفين ردي هذا ، وعساه خير ~ ..

,

اليوم : الاثنين ..
المود : .. .... ~
الموضوع :

لأني التهيت ابـ شغلات بالفتره الأخيره ، قمت أهمل بالرياضه !
ع كثر ما يكون احساس الالتزام بالرياضه حلو ، ع كثر مايكون بايخ لمن تردون تهملون ماركم "شوي" ..

+ من بعد ماهجرت دفتري كذا يوم ، رديت التهيت فيه امس وما تم فيه صفحه فاضيه ، خلص اكتمل !
مع اني وااااااايد احب هالدفتر ، نعوم وعلافه معبر ، بس لازم اقعد اشقق اوراقه ..

,

مرات تستوقفنا أسئلة واستفهامات أعوذ بالله منها ومن الشيطان ،
ماصدق إن ممكن تخطف علي مثل هالأفكار ، عسانا مانتحاسب عليها ...

,

أشوف أحيانا شغلات استغرب منها وايد ، يعني مواقف الناس من أمور ، نظرتهم التشاؤمية أحيانا ،
عدم اكتفاءهم ، انهم ما يحاولون يستشعرون كثر النعمة اللي يملكونها ..

وغيره لمن نصادف ناس ما يفكرون مثل ما نفكر ، بمسائل أخرى ..!

,

فرق شاسع ، فـ من منا على خطأ ..؟!

[مزن هتان]

اليوم : الاثنين
المزاج : عادي

الموضوع

ما شاء الله عليها مرت أخوي وايد اجتماعيه، البارحه كنا نتعشى
بالميلس "امها و أختها و أمي و خواتي" نشت قالت بتروح غرفتي أنا و أختي
يوم ردت تقول لنا دخلت على أبوي الصاله سلمت عليه و كملت
" أنا جايه فوق مخصوص عشان احاجيك، جيه ما تخلي فلانه تبيّت عدنا "
و خذت منه الموافقه *أبوي كلش ما يحب انه نرقد عند أحد، بس عشانها وافق
و غير جيه كل شباب و بنات أهل أمي مستحيل يسولفون مع أبوي "يشوفونه
سيريس وايد"، بس مرت أخوي و أختها و أخوها ضحك و سوالف معاه عادي

أخوي و مرته ان قعدوا مكان واحد بينجلب المكان لـ ساحة تقطيع "فاهمين الرومانسيه غلط !"

نشيت الفير أشوفها دازتلي مسج يبون يروحون مكان
من فتره و هي تحن عليه في المكان، ما تهون عليه اليوم ان شاء الله
اذا ربي راد راح نروح

البارحه تفجرت عندي مشاعر خبيتها فوق الـ 6 شهور
ادعو لها ربي يهون عليها و يعوضها خير "بزوج صالح، خايف ربه، صاين نفسه قبل بيته و يقدرها و يسعدها" اللهم آمين

[مزن هتان]

اليوم : من يوم الثالاثا
المزاج : الحمدلله

الموضوع
الثالاثا رحنا سكي دبي أنا و أختي + بنات خالتي، و نحن داخلين أقولهم
واخزياه الناس داخلين مع عيالهم و نحن !! طول الوقت و أنا قابضه الكاميرا
شكوا فيني P: ساعه و طلعنا تعشينا هناك 11 طلعنا من امرتس مول
عاد و نحن طالعين قطوني بموقف والله أهما عادي عدهم و أنا بس خلاص
ويهي تكسر أونه على قولتهم حرية شخصيه ما دروا انهن تعدوا حريتهم !!

و البارحه اممم "لا حول و لا قوة إلا بالله" كل حاجه كانت ماشيه تمام من أول
الصبح لين آخر الليل، خلاص برقد تعكر مزاجي بقوه امسح دموعي لكن من يقول
لين آخر شي رقدت و أنا أصيح. بس الحمدلله اليوم نشيت و أنا بخير طلعت اللي بخاطري =)

اليوم أتمنى يكون مسانا خفيف و حلو