دير دياري ~ يوميات

[بنت الدلع]

اليوم: الاثنين
المود:

اليوم كان عادي سرت الجامعه مال ساعتين ورجعت
ومن متى يالسه اشتغل
باجر عندي عرض ماده فلميه (برزنتيشن)
والكل بغاني اكون المنسقه العامه
صدق تعبت من الشغل
سويت ريسيرج عن الموضوع كامل
ورتبت البوربوينت وقسمت الشغل ووزعته
والحين يالسه اشوف الفلم عسب اختار أكثر لقطه معبره عن الموضوع واعرضه باجر

وغير جيه عندنا تسليم تقرير حق هذا الموضوع
واااايد شغل والله تعبت

وباجر عندي امتحان آي تي
ذاكرت بس بعدني ماراجعت
لازم اراجع من الورقه الي يعطينا السير لانها وايد مهمه

ان شاء الله باجر يمر على خير وبجي بيكون عندي تسليم بس شيئين (بروجكت الانفايرومنت و ريسيرج بيبر) + برزنتيشنين ومن بعدها على طول الفاينلز .. تعب والله


حاليا اعاني من حاله غريبه صايبتني
شي وايد شخصي بس ماعرف احس جيه اني يالسه عالكرسي والشريط يمشي جدام عيوني
مب مستوعبه شو الي يالس يصير
شرات الكابوس
مثل سلسة احلام جيه مرتبطه ويا بعض وانا اتريا النهايه
باسم الله الرحمن الرحيم
يارب ابعد عني وساوس الشياطين وطمّن لي قلبي

[بنت الدلع]

اليوم: الثلاثاء
المود: اففف راااحه

الموضوع:

الحمدالله سويت البرزنتيشن اليوم وكان اوكي وافتكيت

بعد ماظهرت من الجامعه مريت اخذ لي جواتي عالسريع
عفان الله am running out of shoeses









واااايد مريحييييييييين

وصلت البيت وخلاص كنت ميته من التعب رقدت لييييييين بعد المغرب
نشيت وشفتهم يااايبييين لي كناااافه
يمميييي

وعلى نهاية اليوم وصلني هالشي



لونه وااااايد حلووو وناعم

[تحفه]

حلوه يومياتج .. دوم عندج قصص لول! يوميات صايره ممله

[بنت الدلع]

لول ثانكس
وايد اكشنات تستوي لي

[تحفه]

^انا الاكشنات الوحيده الي عايشتنها في حياتي هي ضغوطات الديدلاينز و الامتحانات لووول

[مــهــابه]

الــيوم :


~ الآربعــا


المـزآج :


مسـتآنســه واااااااااااايد


الموضوع :


~ آمس مـتأخر آتذكرت عـيد ميلآد بنت ختيـه وتذكرت آني سـويت لـ عـبودي كيكـه وهي مآسويت لهآ

غمضـتني ~ *

آتصلت فـ خآليه وقـلت لـه ودنـي ، مآطآع آونه زحمـه وآنـآ مشغول ومـآدري شو

المهم عقب حَـنه ورَنـه روحت البآسكن وخذت لـهآ كيـكة مال سـرعه سرعه بس تفي بالغـرض





طبعـآ كالعـآدة آحط الشموع ولآزم آحـترق

وسوينـآ بـآرتي مآل خبـآل ، ماتمـت بـآلونه مانقعـوهـآ فــ ويهـي

~ آهم شي آسـتآنست وآآيد

شـوي ، آشـوف بـوكس ميـوب حقـي ،،




تـشوفون شقـآ فـآج حلجه هـذآ ، شرآتـه آنـا ، صدق آستانسـت ، هذي آول هديه منهم

فـرحت بس آستحيت شويه ، لآنهآ جدآم خواتي الكبآر وآمايه ( آونهـا البنت تسـتحي عـآد )


فـجيتهـآ :




~ تـدري وش آغـلى من " الهديه ؟ !

آنهـا [ منـك ]

وآني لـمآ آمسك ( الدميـه )

فـيهآ ريـحه تـشبهك

وكـ آني آشمك


كلماتي


آكثر شي حبيـته الدبدووب الصغير ، ريحته حلوه

[عنــود المهـا]

^^
مهآبتي والله تستاهلين
آنا حسيت بـ شعورج
لأني
آنـــا آول من شهد اللحظه التاريخيه
وأصلن محد فاهم شي ~ والكل مستغرب
.
.
حبيت نظرتج الاندهاشيه
صدق وناسه
.
.
لو تشوفون شكل مهابه
عسسسسسسسسسسسسسسل

[تحفه]

ماهااااااابه ،،، تستاااااهلييييين كلللل خييييررر


عيشتيني الجو وياجج لوووول

[مــهــابه]

عـنود المهـآ :


آنـتي آخر وحده تـرمسين يـالدبه
آحبـج آنــا


تـحفه :

مــن طيب آصلـج والله

شكراً :)

[رمــش الغـــلا]

مهآآآبتي

تستآآهلين حبيبتي ^__^

واهم شي تكونين مستآآآآنسة :)

.
.

[بنت الدلع]

مهابه
تستااااهلين كل خييير
حسيت باحساااسج ^_^

===

اليوم: الأربعاء "يعني امس"
المود: عادي بس وايد كنت مشغوله

كان يوم حلو وفيه وااااايد اكشناااات لول بس بذكر لكم بعض الي صار
العصر سرت الجمعيه وتشريت اغراض وييت البيت وسويت كب كيييييب عشاااااااان بعض الناااااس بيووون بييييتناااا
هالبعض الناس من الواحاااات بعدين بخبركم منووو

وسويت كب كيك وبعدين وديت بيت صديقة الطفوله لانها من زمااااان ودها تذووقه
تميت عندها مال 10 دقايق
وبعدين رديت البيت وعقب ظهرت ويا هلي
اني ويييز شفنا حرمه من اهلنا ماما سلمت عليها جان تقولي تعالي اميه سلمي على خالوه
واناااا

آآه يالقفطه كنت توني ماكله هالحلاوه الحمرا الكبيييره الي فيها لبان داخلها
وخدي منتفخ

حاولت اكسرها بسرعه بس مووول ماشي وقت لوول وايد فظييحه

اني ويييز ردينا البيت
وبعدين فليل يلست اتابع فلم ويا اخويا
بلاك هوك داون (حرب)
سالفه صدقيه كانت مستويه في الصومال واايد احب افلام الحرب
المهم خلص الفلم وقبل لا ارقد شغلت الدفايه لانه ثلللللللج
قبل لا ادخل الغرفه جان اسمع صوت انفجااار

بوووووووم

وشفت دخان اسود

امييييييييه شو استوى !!!!!

ريحة حررررق

الدفايه صاحيه مافيها شي ما احترقت
جيكت عالمحول ولا اشوف ليتاته مب شغاله !!
قلت بجيك عالسوكت

ايش الي صااار !!

[تحفه]

اووويه زين ما تشوطو

يبالكم تتصلون في حد مختص .. كلشي ولا الكهربا

[بنت الدلع]

الساعه 2 ونص فليل بتصل في منو >.<
الحمدالله مافي شي قريب من السوكت ولاكنت بكون في خبر كان
الحمدالله على سلامتي XD

صدقج والله كل شي ولا الكهربا
بس لان كان عليه لوود واايد عسب جيه نقع
دفايه+ ثلاجه+ جارج اللابتوب+ البرنتر+ اضاءة المكتب >.< كل شي مكودتنهم مكان واحد

[محد يستاهل]

تستاهلين السلامة بنت الدلع ..

[ذنـيـنـي]

اليوم: الجمعة 2-1-2009
المزايج: رااااااااااااااااااايق
الساعه 11 الا عشر


يالس اسولف ويا حمودي ولد اخويه "بلغته العجيبة"
لا تسألوني شو تقوله و شو يقولك، لأني ما اعرف
بس قلتله شي و مط بوزه و عقب قلتله شي ثاني و رقعت السالفة و ضحك و لا تسألوني شو هالشي الي زعله و شو هو الشي الي ضحكه لول

اوا اوا ابو ابوغا اسّي تو ابوغا اوا لول