دير دياري ~ يوميات

[مزن هتان]

اليوم: البارح، الاربعا
المزاج: كووووول

الموضوع



الأمور طيييييبه

[مجموعة إنسان]

أمس الأربع ,

مستوي ما ارقد ابد ,,
رقدت 3 الفجر وقمت 8:10 اشوف التلفون وهو يشوفني
اانا اقوله ليش ما قعدتني وهو يقول ليش ما ترقد
بسرعه بسرعه غسلت ويهي ولبست كندورتي وحطيت الكااب الأزرق (اسمه كاب الأزمات ) . شغلت سيارتي وعلى طووول حرك حرك
ابوي طلع جدامي ,, يمشي شوي شوي
وانا متأخر
يااخي اسرع ,,
ما يسرع

وصلت لين الهاي وي ,, وما شافني بعدها

واتذكرت ان عندي واجب وما كتبته ,, عند كل إشارة اكتب شوي
وصلت الكلية بالوقت 8:55

داومت وخلصت ورجعت البيت ,, يوم وصلت ابوي دخل البيت ,, انا اقوله ليش ما تسرع وهو يقولي ليش تسرع
وناقشنا موضوع العصر العباسي والأموي وليش العباسيين كانوا يعتمدون على الفرس في حكمهم ومن هالسوالف
صليت العصر وحطيت راسي عسب ارقد

كان بخاطري ارقد بس الرقاد ماله خاطر ,,

لييييييين الساعه 5 وشوي
ما ياني رقاد ,, قمت وانا مسطل
امي تقول ليش ما رقدت ,, اقولها احب شو اسوي
قالت قم لا ادوسك الحين (بيت ما يقدرون الحب هههههههه)

سويت لهم حشره وشفت ابله نوره
(مسلسل ما يعرفون يمثلون
فيه ,, !!) ومافي هدف وكلهم يكرهون بعض

حطيت قناة الرأي
شفت محمد العوضي وشوي شوي يحطون الفطور وانا مسطططططططططططل
ابي ارقد وابي اكل

أذن

فطرت
صليت
شربت قهوة ,,

سرت الغرفه ,, سكرت اليتات وبطلت اللاب ,, كنت اشوف شي
وما حسيت اللا بالساعه 3 الفجر ,,

وقته عاااد
استغفر الله ما صليت العشا
صليت

دخلت المطبخ وتعشيت
ابوي دخل قال سو سحوور

والحين مصحصح

[شوق القلوب]

صباح الخميــــــس...

الساعه 7:07 الصبح..

رقادي معتفـــــس من حوالي سبع شهور.. و يمكن أكثر..!

أحس اني من زمـــــــــــــــــاااااا ااااااااااااااان ما رقدت مثل الناس.. سهر طول الليل.. ورقاد في النهار..

والله خاطري مره ارقد 11.. ولا 12..

..

اول امس كنت ناشه من وقت.. يعني مب راقده غير 3 ساعات.. المهم من استوت 9 في الليل كنت منتهيه وابا ارقد.. قلت فرصه اعدل رقادي.. غفلت من 10 لين 1:30.. و نشيت شبعانه..!! وكان الرقاد متقطع.. مثل الواحد اللي راقد في وقت غلط ..! و طبعا تميت لين عقب صلاه الفجر.. ورقدت..

امس..
من يت الساعه 3 حسيت انه فيني امل ارقد شوي.. رقدت و نشيت 4:15.. يا دوب الواحد يشرب ماي.. و عقب الصلاه قلت برقد.. وللاسف.. هالغفوه خربت كل شي.. و للحين مب طايع اييني رقاد..

..


حالتي صعبه

[مجموعة إنسان]

نفس الحاااله شوووق

تقولين مكحل عيني بكحل فرعون
ههههههه

او حد عاطني بكس على عيني

[أنامل قلب]

^ كله ولا حالتي ،،
مستويه أواصل وما أنام إلا لمن أرد من الدوام =$

وماله داعي أوصف لكم جمال عيوني ،،

/

خواتي ايه احبك + تحفه + شمعة أمل + حلم الطفوله ،،
بل بل بل كل هالكلام حقي ^^" //
بالعكس والله ما أبديت غير وجهة نظر وملاحظه =)


/

اليوم : بدون تحديد ..
المود : كالعاده .... !
الموزوع : خواطر يوميه -_- !

ـ إذا مافجيت عقده هالموقع عني بيستويبي شي ><" !
ـ استانست بطلعتي معاها وااااايــــــد ،، حتى كل ما أشوف اللعبه اللي مب طايعه تتعدل ،، أذكر الطلعه وأرد أبتسم !
صح إن ماحصلنا شي ناخذه ،، وكان ودي الصراحه ،، بس الحمدلله // حسيت خاطري انتعش لول ^^
ـ مادري ليش قيام الليل هالمره كان صدق صدق صدق غيــــــر ،، وكان ناقصنه وحده راحت عليها نومه ^^"
بس سبحان الله عليه صوت واسلوب بالترتيل ما شاء الله لا إله إلا الله ،، جي تحسون ابـ مناجاته لـ رب العالمين !
ـ مستخيره كمن مره ،، وللحين حاسه ان مالي رغبه أكمل + ميل كبيـــــــر لترك الجامعه // بس دعواتكم ..
مو عارفه كيف أفتح الموضوع مع الاهل ،، كل اللي أعرفه إني أتعامل مع الجامعه عساس إنها مجرد زيارات مؤقته !
ـ هممم ،، ماحب شي اسمه صريخ ! // صدق أتنرفز بـ شكل ما تتخيلونه ><"
ـ ان شاء الله ان شاء الله ان شاء الله ألحق أختم المصحف من الجزئية اللي ناويه أبدأ فيها !

/

.... { !

[شوق القلوب]

عيل الله يعينك... وراك دوام ..!

[بنت الدلع]

اليوم في النهار كان عادي
والظهر يا الهي كسسسسسسل غييير طبيعيييييي
من الملل بس جيه طايحه في الحجره ماعرف شو اسوي
المغرب ارتبش البيت وكلهم يو

فليل ظهرنا وشفت تحفه بس هيه ماشافتني لول
وتعشينا
وحسيت اني برجع من السلموووون من كثر ماكان ني
طلبت salmon slice sachimi
استغفر الله وااايد كااان نييييي وااايد وااااايد

ووو شو صار بعد
ماشي
والحين ماشالله ماشالله كلهم وااعين
حلوو جيه
اخوي + نسيبي يايين من الملعب كان عندهم طايره
والحين جيه يالسين في الصاله قوم ماما
والي يتسحر والي حاط ادعيه ... الخ
غريبه يعني واعين لين الحين


هيهيهي اليوم استوى شي حلو
كنت اطالع عمري في المنظره عقب قلت حق بابا
بسألك سؤال
وكنت جاده
قالي تفظلي
قلت: انا على منو طالعه حلوه ؟

هههههههه والله اني متفيجه
ورده علي كااان واااايد حلووو
جيه استغربت يعني
فديته والله ، الله يحفظه ويخليه على راسنا

===

+ ابااا اييب مخاااويري
بس ماداني اسير وسط المدينه من كثر الزحمه ما استحمل
افر كل شي على خواتي
الحمدلله اني انا اصغر وحده في البيت
اكبببببر نعععمه والله

شكرا يا إلهي

[تحفه]

اليوم في النهار كان عادي
والظهر يا الهي كسسسسسسل غييير طبيعيييييي
من الملل بس جيه طايحه في الحجره ماعرف شو اسوي
المغرب ارتبش البيت وكلهم يو

فليل ظهرنا وشفت تحفه بس هيه ماشافتني لول
وتعشينا
وحسيت اني برجع من السلموووون من كثر ماكان ني
طلبت salmon slice sachimi
استغفر الله وااايد كااان نييييي وااايد وااااايد

ووو شو صار بعد
ماشي
والحين ماشالله ماشالله كلهم وااعين
حلوو جيه
اخوي + نسيبي يايين من الملعب كان عندهم طايره
والحين جيه يالسين في الصاله قوم ماما
والي يتسحر والي حاط ادعيه ... الخ
غريبه يعني واعين لين الحين


هيهيهي اليوم استوى شي حلو
كنت اطالع عمري في المنظره عقب قلت حق بابا
بسألك سؤال
وكنت جاده
قالي تفظلي
قلت: انا على منو طالعه حلوه ؟

هههههههه والله اني متفيجه
ورده علي كااان واااايد حلووو
جيه استغربت يعني
فديته والله ، الله يحفظه ويخليه على راسنا

===

+ ابااا اييب مخاااويري
بس ماداني اسير وسط المدينه من كثر الزحمه ما استحمل
افر كل شي على خواتي
الحمدلله اني انا اصغر وحده في البيت
اكبببببر نعععمه والله

شكرا يا إلهي

فرصه سعيده لول



اليوم:
نشيت حق الفطور على اذان المغرب مغيضه ومتضايجه لان رقادي مــــــــــــــخـــترب

اكككككره شي يوم اليوم كله يطوف عليكم وانتوا رقود اففف مب قادره اعدله

[أنامل قلب]

/

اليوم : كنا بالجمعه ودخلنا السبت !
المود : .... وااااااايد !
الموضوع :

أكره عمري لمن أضيع وقتي ابـ هذا الشكل ،،
مادري هو عناد ولا احباط ولا كسل ولا ضيجه ولا .... ولا شو !

بخاطري أرسم ~ !

.. .

[مجموعة إنسان]

السبت ,

طبعا قعدوني للسحور غصب ,,
قمت وتسحرت
بعد الصلاة رقدت قمت 8
شووو بسوي شو بسوي ,,, مافي شي
شليت كيمرتي وسرت داخل بوظبي ,,
اول شي سرت اخذتلي تلفوون ( هدية من أختي)
عقب سرت اخذتلي فلاش للكيمرا
ورجعت البيت 11:30 ورقدت
ماعرف متى قمت 4:30 او 4:45

اتريا الفطوووور وانا يوعااااااان
فطرنا وخلصنا
وسرت القهوة ,, لييين صلاة العشا
صليت ورجعت البيت مافي شي لين ما بدا باب الحارة تعشيت وانا اشوف باب الحارة
والحين بنخمد لان وراي امتحان تحديد مستوى باجر
هو بس جذي بمتحن ,, وبشوف الإمتيازات عقب

[مزن هتان]

اليوم : من بداية ارمضان
المزاج: مستانسه، ضايجه، حايره، خايفه وااايد غيرهم
الموضوع

أقول عن نفسي قويه و ما الا ذلك و بالاخير و على أقل شي <<< حرررريم
مغيضه من ناس و افج الضيجه في أخوي.
فديت الفهدي مايهون عليه بس مو بيدي
واااايد أشيا أبي أظهرها بس خلوا اللي بالقلب بالقلب
وع ع ع ع ع، ما أحب أشوف نفسي ضعيفه نفس اليوم
أبيّ أسوي شي بس ماني قادره

" لا إله إلا الله وحده لا شريك له،
له الملك و له الحمد و هو على كل شيء قدير "

[بنت الدلع]

اليوم: السبت "امس"

رقدت رقااااااااااااد
لين الساااعه 3 ونص الظهر !!!
مووول ماحسيت بعمري
اخر شي ماما دخلت علي وقالت لي مب بس من الرقااد ؟!!
نشي خلص الرقااد لول
عقب يلست ويا هلي شفنا ابله نوره
وبعد الفطور سرت ويا مرت اخويا عسب تخبق اذن بنتها
و i was going to pierce my nose
فجأه دشششش في خاااااطري
ويوم سرت الاخصائيه قالت انا ما اسوي
قالت اذا التهب ابداان ماله علاج لا مضاد حيوي ولا بطيخ
والخشم لازم ينشل !!
موتتني من الزياااغ
وتميت مبوزه لول
اخر شي قالت حطي من هذيل الـ glue احسن واظمن =(
ماحبها


وفلييييييل ياااابو مخاااااويييري ^___^

[مــهــابه]

اليــوم :

~ الأحــد



المزاج :

مش ولا بـد


الموضوع :

تَـعب

والله شغل البيت تـَعب ، وخاصه فـ رمضان وجريب العـيد ، 2 من البشاكير روحن ، الطباخه واختها وصفينا عـ 1

مووول مب وقتهم والله

طبعـاً انا اعـرف شو اللي بيخلونه عليَه ( الطباخ ) ، موعيني من رقادي ، عسب اسوي صالونه الثـريد

تغيضت منهم خربوا عليه رقادي ، جان اكمل رقـاد يلييين 3 ونص

كل شي يبونه فـ وقت واحد ، روحي اطبخي ، روحي السوق خلصـي أغراض خواتج

طبعـاً انا للحين مب مخلصه أغراضي كـ العـاده


عـباتي فـ العين ، وكـنَـا مخططين انسير اليوم عقب الفطور نيبها ، بس مرض ولد ختيه واتكنسلت السيره
والحين اتـرياه يطرشهـا عن طريق الأمبوست

ومخـورتي بـعد ماشفتها للحين ، ودوها يفصلونها


امس رحت خذت لي تنورتين بلا قمصان ، وخذت لي جوتي ..

والحين أتـريـا الأفندم يفضـى لي عسب آروح اكمل باجي الأغراض

المشكله السـوق زحمممممممه ، وانا ماحب جيه ، ما اخذ راحتي

وخويه ييلس يحتشر عليَه ، عاد انا مول ماعـرف اعـاند

يعني عـادي عــندي ايلس فالبيت مب مخلصه شي ، ولا انه حد ييلس يعصـب عليَه


وبس


~ من بـوح الخـاطر :


لا معـك ينفع " عـتاب " / ولا [ ملام ] . .
وين آســافر عـن عذابك ؟ / وين آروح ؟

[أنامل قلب]

:

اليوم : أظن السبت ،، ولا الأحد !
المود : .... ~
الموضوع :

من بعد صلاة الفير تميت قاعده إلين الساعه 8 عـ موقع يوتيوب أقلب بالملفات الكريمه ..
وايد انصدمت ابـ شغلات شفتها ،، اللي كانت متحجبه وشلت عنها الحجاب واللي يجحد ابـ كتاب الله ..

وايد وايد وايد انصدمت ،، خاصه إن التعليقات تزيد الطين بله بدل لا تداويهم من علل ..
حسيت إني ماعرف شي ولا أبي أعرف شي + رجعتلي حالة التعب وانا اللي روحي مب ناقصه أرق ..

بس عقبها لقيت ملفات اسعدتني جدا ،، لأخوانا المشايخ محمد العريفي / مشاري العفاسي وغيرهم !
ريحوني أراح ربي قلوبهم ونفوسهم مما يهمهم ،، كما جعلهم ممن كتب لهم طيب المنزل بغير حساب ..

/

هدانا الرحمن جميعا ،، ووفقنا لما يحبه ويرضاه ..
كما بارك لنا بكل أمرنا يــــــــارب ~

... .

[شمعة أمل]

اليوم الاثنين

الموضوع:

مرات الواحد يمر بظروف

ويكرهه كل شي

ويظارب كلحد

بس فجأه

بدون انذار

يستويله شي واحد حلو

وفي حياتي أنا

هالشي

عباره عن كيـس عند الباب


وشو محتوى هالكيـس؟؟



































الحين منو مايروم يوّد عمره من انه يبتسم ويحضن الكرتون وينقز؟؟







بس تبـون الـ bad news ؟
اليوم آخر حلقة!!
بس شي 29 حلقة في الكرتون :( للأسف