دير دياري ~ يوميات

[بنت الدلع]

اليوم: الجمعه
المود: مستااااانسه
الموضوع:

كنت معزومه في بيت ربيعتي عالفطور
سرنا وكنا جيه مال 4 بنات
تفطرنا وعقب تمينا نشوف الفريج + شعبية الكرتون
بعدين ظهرنا سرنا جدا الممزر
احلى شي انه فاااااااااااااضي
تمينا بس الا نتمشى بالسياره
وعقب كملنا لين جميرا وطبعا انا الي كنت اسوق
كان انجاز بالنسبه لي لاني ماجد سقت لين جميرا
دايما اكون passenger
تمينا نتمشى على شارع جميرا وكشخه ماافي زحمه بعد
بعدين نزلنا ميركاتو واغلبية المحلات كانت مسكره
خذنا اسكريم وردينا
وطبعا مادل طريج الرده
اتصلت في اخويا وهو كان عالدراجه
شو سوااااا بي
كان متفييييييييييييج عالآآآآآخر
مليوووون مره خلاني اعيد كلمة ميركاتو
اونه اي حد يتصل بي وينقع على طول التيلفون يسكر في ويهه ! سخيف
وعقب قالي حطي عالسبيكر
وتم يقرض ويقرض ويقرض
وانا كل شوي اقوله خلصت يقولي لا .. هههه وايد متفيج
المهم وصلنا جدا البيت بسلام
وسرت وصلت البنات لسكناتهم "في الجامعه"
ووصلت ربيعتي بيتهم
ورديت البيت

واحححححححححححححم

ناس كانوا يتريوني عند الباب
وحصلت محاضره شطولها شعرضها لاني كنت متأخره

والحين ممنوع اطلع ويا البنات لين ما ترضى الحكومه عني

[مزن هتان]

^^ و لا انا ماني مصدقه
ما شاء الله نص رمضان، قرقيعااان

اليوم: الثلاثا، اليوم
المزاج: الحمدلله

الموضوع: السرعه
الساعه 12 و شي(من شوي) انا و أخوي ودينا سيارة البيت الكراج
انا بسيارتي و هو بسيارة البيت، الحبيب يمشي على راحته و أنا
ماعرف المهم وصلت قبله وصل حط السياره و ركب معاي اول شي
سواه كفخني على راسي قلت له ليش يقول ليش تسرعين اقوله:
فهد انا ما اسرع هاي سواقتي، تبي تشوف شلون السرعه؟!! المهم
قعد ينصحني، عاد قلت لازم ادهن سيره خذتله من باسكن و قلت
له تكفى لا تعلم الوالد انا أختك الصغيره
ادري راح يعلمه

السرعه مو زينه، خذت عني خالتي
تذكروا انه عدكم ناس تخاف عليكم
دمتم سالمين بإذن الله

[أنامل قلب]

:
.

اليوم : الأربع ..
المود : .... .. !
الموضوع : صلاة التراويح =)

هممم ،، صدق اللي ما يسير التراويح ،، ما يحس ابـ أجواء رمضــــان ..
ولا يضحك عالـ مواقف اللي يشوفها ، ولا يزعل عـ شغلات يلحظها !

/

اممم ،، بالعاده ما شاء الله تشوفون كلمن يسلم عـ الثاني ،، يتعارفون يعني وجي ..
وانا من الصوب الثاني احاتي // اونه ان شاء الله محد يتعرف علي =$ // خاصه إني أسير بروحي !

همم ،، أحب أوقف أول سطر ،، بس اضطر أوقف ثاني سطر عشان الموضوع نفسه ،،
وكل مره ألاقي وحده تزقرني تقولي تعالي تجدمي وقفي حذاي
عشان أسد الصف وما ينقون غير حضرة جنابي لول ..

اليوم بعد نفس الحاله ،، وقفت ورا وانا أقول ابـ خاطري ان شاء الله لحد يزقرني ،،
ومن خلصت تحية المسجد شفت بنتين بالسيد الاول يبتسمون ويتساسرون //
مع ان ماكان السيد فاضي ،، بس خلت الحرمه تدن الصوب الثاني ،، ووقفتني حذالها !

حبوبات ،، بس استغربت مادري كيف حسيتهم ،، وللحين ماعرف جنسيتها ،، لهجتها مختلطه !
وبعد سنة العشا لقيتها تسألني : انتي إيرانيــه لووووووووول خخخ

هالسؤال يدل على إنها أكيــــــد مش عيميه ،، إما وافده أو إيرانيه "يعني فارسيه" ..
قتلها : إي عيميـــة // عقب تقولي صغيرة ما شاء الله صح // أقولها يعني 20 سنه >>
>> ماحبيت أقول 19 بما إن ماتم وايد عالعشرين !

واستانست لمن قالتلي ،، أويه باين عليج أصغر هي هي هي P=

وعقب ما صلو اربع ركعات من التراويح ،، روحو ونحن طبعا كملنا //
بس من سلمت وتمينا ركعة الوتر ،، شفت الحرمه اللي حذاي من الجهة الثانيه "عوده شوي"
قابضتني تقولي انتي من بنته .. عرب وين انتو لول ><" !! //
وانا استويت جي (( ها ! )) قلتلها لا نحن عيـــــــــــــــــــــم بابتسامه عريضه !

بادلتني الابتسامه وإهي تقولي متزوجه ما شاء الله ،، خخخ // اقولها لا لول ..
تقولي مخطوبه عيل =$ // هم أقولها لا ..
تقولي انزين انتو بيتكم هالمنطقه صح ،، أقولها إي قريبها ..

جان اتي وحده ثانيه يمكن اختها "صليت حذاها أمس" تقولي هيه هذي كانت حذاي أمس وسلمت عليها وجي ..
وانا بـ خاطري أقـــول صـــــــــــــــدق الحريم ســــــــــــوااااااااالف فففف ..

مالحقت أفتح المصحف إلا ويتني وحده لوت علي من ورا ،، وحده لها وحشـــــــه تعرفت عليها بالمسيد من سنتين ..
عاد هذي بالذات أحسها غير ،، جي عادي يعني ،، ولو إني انحرجت منها لكوني مقصره ،، ربي يحفظها !

+ اليوم صارت عدنا هوشه بسبب ان بعض الحريم إيببون عيالهم الصغار !
+ خلصنا الصلاة من وقت مقارنة ابـ كل يوم !

ووو بس !!!

/

ربي يتقبل منا جميعا ^^ ..

.. .

[مزن هتان]

أنتِ زيي تروحين لحالج !!

[وحي القلم]

(1)

أنامل قلب

شي من اليهال يسوون حشره و يخربون عليج الصلاه

أحس مب أي ياهل يتودا المسيد

و على طاري أول و آخر صف

لاحظت أول صف يكون أنظف عن اللى ورا.. هاك تهب عليج فيه ريحة طبيخ>> وايد يهمني هالموضوع ترا

مادري إذا انتو جيه بعد ولا لا بس هالشي هو اللى يخليني أجدم في السيره عشان أحصل مكان في أول سيد

.
.

(2)

مستويه سالفه وايد رافعتلي ضغطي

أحينه الموظف اللى يداوم في مكان مطلوب منه فيه أنه يتعامل ويا الناس

مب لازم يعلمونه أدب الحوار ...!!!!

و جانه وقح يقصون لسانه مره وحده بعد

شي وحده لو يحطوني مديرتها ما بفنشها بس... بفرها من فوق المبنى عشان تتأدب

[وحي القلم]

قصدي سكون.. مادري ليش مب مستوعبه أنج غيرتي الاسم ؛)

[أنامل قلب]

اختي مزن :
اختي وحي : مادري والله ،، لأني دوم أكون بالسيد الأول شئت أم أبيت لول ^^"
أصلا حلاته السيد الاول ،، لولا شغله إن دوووووم اللي يتعارفون ابـ هالسيد !!!!!
والـ كمن مره اللي وقفت فيهم بالسيد الثاني ماحسيت إلا بالمشاكل المعتاده ابـ كل سيد ..
يعني مثلا إن وحده وايد تتحرك ،، ولا من النوع اللي يحب يتعرف والخ !
وعـ طاري اليهال ،، تخيلي اليوم وحده طول الصلاة شاله ولدها ،، حتى وهي راكعه ><" !

+ حرام عليج ،، لول
تفرينها من المبنى مره وحده ^^"

+ بالعكس ،، أحب إنكم تنادوني بـ أنامل قلب =)

/

اليـــوم : اونه الخميس ..
المـــود : .... .. !
الموضوع :

صاير عندي ادمان عـ لعبة بالنت // مع ان اللعبه بشكل عام ماحسبها وايد يعني !
يمكن كـ رد فعل لـ حال النفسيه الكريمه // أو يمكن أشغل نفسي من الأشغال ،، وأتعذر !

لازلت وايد وايد وايد متردده ،، ومادري ليش خايفه أستخير ..
للحين ماعرف أكمل ،، ولا أوقف وأبدأ باللي أحسبه أنسب لي !

مب حلو لمن تنحطون ابـ وسط هالقرارت المصيريه لول ..
لا صدق ،، احساس جدا كريه ،، خاصه لمن يكون رايك وطريقة تفكيرك
مختلفه تماما عن طريقة تفكير الأغلب ،، إن لم يكن الـ كـــل !

خاطري أستشير أحد يفكر بطريقتي ولو مره ابـ هالخصوص !

.. .

[وحي القلم]

سكون

صدق مول ما يعيبني اسلوبها

العام استوا بيننا خلاف و السنه كنا على وشك

وايد اسلوبها استفزازي ماحب الناس اللى يحاولون يستغلونج عشان مصالحهم هم ... و البنات اللى ويايه أذكيا بعد

قلت لهم هاي محد يرمسها بس ماشي فايده.. ساروا و قصت عليهم و خلتهم يظرون غيرهم و هم مستانسين

مادري شقايل ما يحسون بتأنيب الضمير لانهم سايروها

.
.

الله يعينج

أظني عرفت السالفه XP

المشكله رايي ما يعيبج في هالسالفه بالذات ههههه

[أنامل قلب]

^ كيف جي O.o !
هممم ،، ربي يكون بـ عونج !!!!

/

وإي صح ،، رايج أعرفه ومب عايبني XP ..

اااااخ بس ،، متى برتــــــــاح من هالهم ="(

.. .

[بنت الدلع]

اليوم: الخميس
المود: احراااااااااااج
الموضوع
اليوم صاااارلي مووووقف جداااااااااااااا محررررررج
صدق حسيت انيييي مغفيييييييييييييييييييييي يه
والشرطي يبا يضحك بس اشكره ميوّد ضحكته لول

[تحفه]

اليوم:

6:00 المغرب نشيت من رقادي :S اكره حياتي يوم رقادي يعتفس ..................

وتفطرت وكل شي عادي و ماشي بس يلست في البيت اطالع تي في وفي الواحات و اطالع غريز انتومي
آآآآآآآه راحه الويكند .. اكره شعور يوم احس يوم عندي دوام الله يطولج يا الاجازه

[بنت الدلع]

اليوم: السبت
المود: ممم جيه كسل
الموضوع:
اليوم مادري شو ياني
رقدت رقاااااااااااااااااااااد بعدين الساعه 2 ونص الظهر ماما دخلت علي الحجره وشافتني يالسه عالفراش واتعبث في تيلفوني
تمت جيه مبهته !! اميه **** شو بلاج ؟
بسج رقاد شو ياينج اليوم
قومي صلي !!

وماشي طول اليوم كان عادي وكسل

صدقج تحفه
اخس شي يوم تعرفين ان باجر دوااام يع

[تحفه]

بنت الدلع: اتوقع شعور كل بنات جامعة زايد لول ;)

---

اليوم نشيت على اذان المغرب .. اففففففففففففف ماحب جي مادري كيف ماسمعت المنبه

[بنت الدلع]

XD Definitely

[أنامل قلب]

^^ ترفعون المعنويات الصراحه P=

/

اليوم : السبت =(
المود : .... !
الموضوع :

مادري شو هالنفسيه الغريبه اللي مخليتني وايد اتغشمر !

على فكره عندي برزنتيشن باجر وانا للحين ما سويت شي ولا قريت الموضوع ولا بسو شي ..
مستخيره كمن مره ،، وللحين مضايجه من الجامعه وحابه فكرة إني أقدم استقالتي ..

والله ييسرلي إن شــــــــاااء الله ،، ادعولي !

.. .